1 Korint 14 - Nobonob Baibel

Kayak Ouɗinu ɗo hamu mettak nai laa

¹ Oo mauhaknu kobol anam daatte amunu, ag hanhan danab ah laa dilag oolag mauhkkunu wagai menana, aria ag Kayak Ouɗinu ɗo hamu megatte amu ag aoglagnu oolag dayaɗ! Amge ɗo hamu mettak anuqak amu ag propet nai mehuqaknu, ag amu aoglagnu wagai meig!

² Aɗinu? Ig doottem, danab nug nai laappa nai maditte, nug danab ah ele nai ii madatte. Iitta. Danab ag nai amu ii dootteb amunu, nug Kayakib amegppa atte. Kayak Ouɗi he, nug Kayaknu dabmak lokkumak daatte, nug amu maditte.

³ Amge danab nug Kayak nai mehuqtte, danab amu nug nai mattieye, danab dilag ooppa genab doyak ɠagattag qedatte, kobol ena dim lamidkkulagnu ɠagattag madatte, amu ag oolagppa maɗoɗ daakkunu ɠagattag ele madatte.

⁴ Danab nug nai laappa nai maditte, nug nukka oo ɠagattag medatte. Amge danab nug Kayak nai mehuqtte, nug Kristen tamaniak, ahilag ooppa genab doyak amu ɠagattag qedatte.

⁵ Ag oh nai laalappa nai mattiglagnu ool daatte, amge ag propet nai mehuqkkulagnu da ool huana daatte. Danab nug propet nai mehuqtte ele, ⌊uɗat nuhig am⌋ danab nai laalappa nai maditte ele, ⌊nuhig uɗat⌋ eɗidtte. Keeke laippu aakkuib, danab nug nai laalappa nai maditte ele, nug nai amu Kristen tamaniak ag oolag ɠagattag qedakkunu eɗueb, nug propet nai mehuqak danab bia daakku.

⁶ O lailad, nai imu ag tutukku dabmettan aɗeg! Da ag gumatte ukke, nai laalappa nai madakkul amu, da ag attem ehanadkkul? Iitta, amge da ukken, nai ag dootteb ele, da nai amuppa Kayak Nug da nai aɗi ag amelagppa akkulnu ippuniɗom appi dooglag dayeb, o iitta doyak ena laa appi dooglag dayeb, o iitta propet nai laa appi dooglag dayeb, o iitta da ippunittak nai laa appi dooglag dayeb amu, amuppa da ag ehanadppi, ag Kayak tutukku dooglag.

⁷ Keeke bau iitta, amge oqotti otte amu, amuam dumuttum o iitta laia keeke, nug oqotti ena digdig ii heeb, danab ag ahi baag attem doolom?

⁸ Amu trampet baag ena ii gayeb am, aun nug aha ban hekkunu bappaidkku?

⁹ Amubia ag ele nai laalappa nai mattiglag dayeb amu, laa ag attemun geha ahilag nai amu dooglag? Iittanab! Nai ag mattiglag amu aun dookku? Laa iitta. Geha qettoɗkku.

¹⁰ Genab, danab nainig piɗe piɗe kuɗumnab wan imuppa daatteb, amu nai amu oh anen anenppa nai meu ele mattieb bekkun elele.

¹¹ Anam daatte amunu, aria danab laa nug nai laa da ii doottem eleppa da amelppa nai mattieb, ⌊da ootot daappi,⌋ nug dahilnu, “Danab umu am wan laihnu danab,” awa akku. Da ele geha nuhignu, “Nug am wan laihnu danab,” akkul.

¹² Amu ag ele anamib. Ag ele Kayak Ouɗinu ɗo hamu mettak aoglagnu oolag huana daatte amunu, Kayak Ouɗi Nug ag Kristen tamaniak ɠagattag madakkunu ɗo hamu mettak amu ag anen anen madatte amu, ag ɗo hamu mettak amu elelenab hekkulagnu wagai meig!

¹³ Diig amuppa amu, danab laa nug nai laappa Kayak nai mehuqtte amu, nug Kayak ɠagattag metteb, nug nai amu eɗukkunu elele daakkunu unuqittaɗ!

¹⁴ Aɗinu? Da nai laappa nai unuqidttem dayeb, da ouɗil aakkuib nug unuqidtte. Am dabmak dahil amu hamu daatte.

¹⁵ Amunu da attem hekkul? Da unuqidkkul amu da ouɗil, dahil dabmak ele ohppa unuqidkkul. Da ahi edakkul amu da ouɗil, dabmak ele ohppa ahi edakkul.

¹⁶ Na anam ii hena, ouɗinppaib nai laappa Kayak unuqidna, “Ena heme,” abeppe amu, danab laa nug attemun unuqittak nahipnu, “Genab, anam dayaɗ!” akku?

¹⁷ Na hettem am genab, na Kayaknu ena heme aon amegppa ana, binag mettem, amge danab laa oo ɠagattag qettak ii aotte.

¹⁸ Da haen kuɗum nai laalappa ⌊Kayak binag mette⌋ madittem. Da kobol amu okkainab hein, ag eɗadttem. Da anam hettem amunu da Kayak amegppa, “Ena heme,” awe attem.

¹⁹ Da anam hettem, amge Kristen tamaniak qagmakppa amu da nai onig tanig eleppa nai madippi, danab ag oolag maitteb, meu aoglag am enanag. Amge da nai onig 10,000 nai laappa nai madippi, danab ag nai amunu meu ii aoglag am ena iitta.

²⁰ O lailad ag dabmaknu amu, ag nid naunau, dabmak tutuib aon oitteb, amubia ag aib oippig, amge ag hipuninnu amu, ag nid yuɗ, hipunin doonna ii hetteb, amubia ag hipunin aib heppig. Ag danab okkai dilag dabmak aon oiyeg!

²¹ Kayaknu ɗo naippa nai imu daatte. “Da wan laihnu danab, ag nailag laa, Israel ag ii dootteb ele amu, da danab amu maadppi, ag Israel gumadna uɗina, ag ag oɗelagppa nai madakkul, amge amuppa ele Israel ag dahil nai ii doomna.” Naɗi Nug anam awa aum.

²² Amuppa ig doottem, nai laappa mattiak, amuam ooppa genab doyak danab ehanadkkunu ii daatte. Iitta. Kobol amuam danab ag oolagppa genab ii dootteb ele, ag amuppa ⌊Kayak hettenu⌋ at anidna oolag maitteb, ag oolag eɗukkunu daatte. Amge propet nai mehuqak, amuam danab ag oolagppa genab ii dootteb ehanadkkunu ii daatte. Iitta. Kobol amuam danab ag oolagppa genab dootteb ele, ag amuppa ⌊Kayak hettenu⌋ at anidna oolag maitteb, ag ɠagattag aqakkunu daatte.

²³ Anam daatte amunu, Kristen tamaniak danab ah oh ag qagmena, ag nai piɗe piɗeppa nai mattiglag dayeb, danab laala ag oolag ii maidtte o iitta ag oolagppa genab ii dootteb ele amu, ag ahilag qagmak ooppa nona anadna, ag, “Ag kaaka aqom,” aon akkulag.

²⁴ Aria, ag oh propet nai mehuqppeg, danab laa nug ooppa genab ii dootte, o iitta nug oo ii maidtte ele amu, nug qagmak ooppa nob, ag oh ahilag nai amu danab amu ooppa noa dayaya heeb, geha danab amu nug am hipunin danab daatte doyeb, ag nai madippig ele amu, nug epeɗikku.

²⁵ Nai oh amu nug ooppa noa, aɗi lokkumom daatte ele amu oh heeb, miag atieb amu geha nug laippun gateg qaun o, gomela, iɗu wanppa ma, Kayak binag ma, nug oɗeppa, “Genabnab, Kayak Nug ag oolagppa daatte,” awa akku.

Kristen ag attem ahi ettaglag

²⁶ Anam daatte amunu O lailad, ag ahi ettaglagnu qagmena, ag attemtai hekkulag? Ag inam hekkulag. Haen ag oh qagmetteb, laa nug ahiettak laa edakku, laa nug ɠagattag aqaknu nai ippuanadkku, laa nug Kayak nai ippunittom amu mehuqkku, laa nug nai laappa nai madikku, am laa nug nai amu eɗukku. Ag keeke amu oh anam hekkulag, amge ag keeke oh Kristen tamaniak ɠagattag qekkunu heig!

²⁷ Am laala ag nai laappa nai mattiglagnu hetteb, aria aɗit o ewam aakkuib ag anam hekkulagnu am elele, amge ag oh haen laippu aib madippig. Iitta. Laa tatam mattieb, laa mattiaɗ! Am laa nug nai amu eɗukkuoitte.

²⁸ Kristen tamaniak qagmakppa laa nug nai laappa nai mattieb, laa nug nai amu eɗukkunu ii dayeb, danab nug nai maditte ele amu, nug oɗe qamutaɗ! Nug ooppaib nai amu Kayak amegppa mattiaɗ!

²⁹ Propet aɗit o ewam ag anen anen nai mehuqppeppeg amu, laa ag bia amu, ag nai amu epeɗieg!

³⁰ Am propet laa nug heɗep na dayebeb, Kayak Nug nai ippunidkku dayeb amu, ⌊nug hibaitteb⌋ laa nug nai maditte ele nug oɗe qamutteb, laa amu nug nai madikku.

³¹ Geha ag kobol amu hebeppeg, ag anen anen oh ahan, propet nai mehuqaknu elele daappeg, geha danab oh ag doyak amu aon, ag oh ɠagattag aoglag.

³² Propet ag nai mehuqkkulagnu ⌊nug mehqak ii hemananu⌋, ag Kayak Ouɗinu ehanittakppa ag akka akka anen anen atognoadkkulagnu ɠagattag aotteb.

³³ Aɗinu? Kayak Nug mauhnoak dayak ii he bette. Iitta. Nug he, oo laippu, maɗoɗ ele dayak bette. Kristen tamaniak qagmak ohppa

³⁴ ah ag oɗelag qamutna daaglagoitte. Ag nai mattiglagnu ii daatte. Iitta. Ag ɗo atte bia ag ⌊gamulkad⌋ waappa daaglag.

³⁵ Ah ag nai laa diig dooglag oolag dayeb amu, aria ag laulagppa ahilkad danab oɗ matteg! Ah nug Kristen tamaniakppa nai mehuqkku amu, nug kobol elele ii hette.

³⁶ Amu attemtai? Kayaknu nai diig am ag Korint agte? Agibte aakku Kayak nai aoppig, danab ah laala ag amu iittate?

³⁷ Danab laa nug, “Da am propet,” dabmette dayeb, o nug, “Kayak Ouɗi Nug dabmak ippuniɗtte,” dabmette dayeb amu, aria nug nai da ahilagppa yaattem imu, nug amunu, “Naɗinu ɗo anam daatte,” ele anaɗ!

³⁸ Amge danab amu nug nai imu dab-ii-mette dayeb amu, aria ag nuhig nai aib dabmeppig.

³⁹ Amunu O lailad, ag propet nai mehuqkkulagnu, ag uɗat amu aoglagnu ɠagattag heig! Laa ele amu, ag nai laalappa nai mattiglagnu aib ɗo meppig,

⁴⁰ amge ag Kristen tamaniak ooppa, qagmak ahilag, amuam elelenabib daakkunu, ag tutukku heig!