1 Korint 13 - Nobonob Baibel

Oo mauhak kobol

¹ Da danab amelagppa danab nailag digdig amu engel nailagppa ele madittem dayeb, amge da laa dilagnu oo mauhak ii doottem dayeb amu, da do hamu gaatte bia, o iitta simbal oqotti hamu otte bia daattem.

² Amu da propet nai madikkulnu, Kayaknu dabmak lokkumak oh amu doyak oh ele dookkulnu elele daattem dayeb, dahil ooppa genab doyak ɠagattag daakku dayeb, amuppa da qauko heppi, laih wakkunu ele hekkulnu elele daattem dayeb, amge da laa dilagnu oo mauhak ii doottem dayeb amu, da keeke hamu bia daattem.

³ Am da keeke dahilad oh daɗek danab madakkul dayeb, amu da Kayaknu uɗat huan heina, da dakka da binal mekkulnu da beɗul imu kakidttem dayeb, amge da laa dilagnu oo mauhak ii doottem dayeb amu, keeke amu oh da ehaniɗkkunu elele iitta.

⁴ Danab nug oo mauhak dootte ele, nug laa dilagnu paha eheɗ ii dootte, amu nug laa dilagnu oo bodoettak dootte. Nug laanu ameg qe oo elele ii dayak kobol ii hette. Nug nukka onig ii humatte, nug dada ii hette.

⁵ Danab nug oo mauhak dootte ele, nug laa noolagppa dagom oitte, nug nukka nuhignuib ii dabmette. Nug paha oo nauhak ii dootte, nug laa ag nuhigppa eheɗ laa heppig, nug amunu tuɗid ii dabmette.

⁶ Danab nug oo mauhak dootte ele, nug kobol eheɗnu enanagnab ii dootte. Iitta. Nug kobol doyak diig genabibppanu, nug amunuib maɗoɗppan gamag ahak dootte.

⁷ Danab nug oo mauhak dootte ele nug uug oh maotte, nug hanhan ooppa genab doyak ele oitte. Nug hanhan Kayak nug ehanidkkunu dabmak aɗa daatte. Nug uug doyaya eɗittaknuib dabmak hanhan aotte.

⁸ Am oo mauhak kobol amuam geha iitta ii mema. Iitta. Nug hanhan daakku! Propet nai mehuqak uɗat amu geha iitta mekku; nailag digdig mattiaknu uɗat am ele geha iitta mekku. Amu ⌊wanppanu⌋ doyak danab ag aoppig, amu ele iitta mekku.

⁹ Gemu ig keeke laippu laippu doottem, ⌊am qa oppiaawak iitta,⌋ amu propet nai ele am laib laib aakkuib doot mehuqttem, ⌊amu ele qa oppiaawak iitta⌋,

¹⁰ amge dimppa haen qa oppiaawak kobol miag atieb, qa oppiaawak iitta kobol am iitta mekku.

¹¹ Amu haen da nid nakok dayeye, da nid naunau dilag nai mattimi. Nid naunau keeke dabmedatteb anam da dabmettami. Da nid naunau keeke diig dooglagnu dabmetteb bia, da keeke diig dooglagnu dabmemi. Amge dimppa, da danab okkai mewoya, da nid nakok dilag kobol amu oh da eɗitten, danab okkai dilag dabmak amu da awen daattem.

¹² Anamib gemu ig Kayak baegppa daatta, Nug attem daatte anidkkunignu amu ig nuhig kobol amu laih nakok nakokib, ig keeke lettod ena iittappa anidttem, amubia anidta doottem, oh ii doottem. Dimppa gogtak haenppa amu, ig Kayak attemnab daatte anidkkunig. Gemu da laihib doottem. Dimppa da Kayak Nug dooiɗtte, amubia da haen amuppa keeke oh antten dookkul.

¹³ Amunu ib ewam imu daatteb; ooppa genab doyak kobol, ena bekkunu dabmak aɗa oiyak kobol, aria laa dilagnu oo mauhak kobol ele aakku. Ib ewam amu oh daatteb, amge ib ewam amu oh oolagppa ib anuqaknab daatte, amuam laa dilagnu oo mauhak kobol.