1 Korint 12 - Nobonob Baibel

Kayak Ouɗi Nug nuhig ɗo hamu mettak digdig Kristen madatte

¹ Aria, keeke laa imu ele iikku yaakkulnu hettem. O lailad, Kayak Ouɗinu ɗo hamu mettak Nug megatte amu, da ag amunu oolag maidkkunu ool daatte.

² Ag dootteb, anukka ag Kayak ii doon daaegeg, haen amuppa Satan eeɗatte, ag kayak hambuppuak dottolkad, ag nai ii maditteb ele, ag binalag mekkulagnu oolag yaaegeg, ag amu dim lamadna gokkulagnuib heppig.

³ Amunu gemu keeke amubia baula bemanu, ag imu dooglagnu da ool daatte. Kayak Ouɗi Nug danab laa ooppa noa heeb, nai mehuqa, “Jesus Nug eheɗ laa awaknu anak waappa daakkunu ool daatte,” madikkunu elele iitta. Aria danab auntai laa, nug ooppa Kayak Ouɗi iitta ele amu nug Kayak binag ma, “Jesus Nug Naɗi daatte,” madikkunu ele elele iitta.

⁴ Kayak Ouɗi Nug nuhig ɗo hamu mettak megatte, amge Kayak Ouɗi am laippu, Nug aakkuib ɗo hamu mettak amu megatte.

⁵ Naɗinu uɗat digdig amu, ig hekkunig, amge Naɗi laippuib daatte, amu ig oh nuhig uɗat hettem.

⁶ Uɗat digdig, amu haknu ib piɗe piɗe ele daatte, amge Kayak laippu, Nugib uɗat amu haknu ɠagattag danab oh ag uɗat amu hekkulagnu madatte.

⁷ Danab ah ag tamaniak ooppa daatteb ele amu, ag nug ehanittak hekkulagnu, Kayak Ouɗi Nug nuhig ɗo hamu mettak digdig oolagppan laa danab anen anen madatte.

⁸ Kayak Ouɗi Nug danab laa dabmak ena laa ippunadkkunu ehah medatta, Kayak Ouɗi laippu amu, Nugib danab laa nug Kayaknu nai mehuqeb, danab ah tutukku dooglagnu ehah medatte.

⁹ Am Kayak Ouɗi laippu amu, Nugib Nug laa ooppa genab doyak okkai medatta, amu Kayak Ouɗi laippu amu, Nugib laa nug oɗe danab heeb, ena daaglagnu ehah medatte.

¹⁰ Am Nug laa ehah mette, nug kobol danab hekkunu elele iitta ele, nug hekkunu elele daatte. Laa nug propet nai mehuqkkunu ehah amu medatte. Am laa nug ouɗi digdig epeɗiadkkunu ehah amu medatte. Am laa nug nai laappa nai madikkunu ehah medatta, Nug laa nug nai amu eɗukkunu ehah amu medatte.

¹¹ Kayak Ouɗi laippu amu, Nugib nuhig ɗo hamu mettak amu oh he bette. Nug dabmette bia danab anen anen aɗi hekkulagnu ehah amu madatte.

Tamaniak am beɗu laippu, maha naunau kuɗum bia daatte

¹² Ig danab beɗunig amu laippu, amge laih kuɗum daatte. Am beɗu laih kuɗum amu ag oh qagmeeg, beɗu laippu daatte. Kristusnu tamaniak ele nug anam aakku daatte.

¹³ Kayak Ouɗi Nug he, ig oh beɗu laippu bia daattem. Laala am Juda danab, laala am iitta aɗi danab. Laala am begbeg maɗi nid, laala am begbeg maɗi nid iitta. Yo, ig oh Kayak Ouɗi Nugib aomut.

¹⁴ Aria, danab beɗu am laih laippuib iitta! Laih kuɗum ag daaegeg, beɗu nug daatte.

¹⁵ Baeg nug, “Da am eppeg iitta amunu, da beɗu imunu laih laa iitta,” alo amu, amunute nug am beɗu amunu laih laa iite daalo?

¹⁶ O iitta daug nug, “Da am ameg iitta amunu, da beɗu imunu laih laa iitta,” alo amu, amunute nug am beɗu amunu laih laa iite daalo?

¹⁷ Beɗu oh am amegib daalo amu, nug nai attem doolo? O iitta beɗu oh am daugib daalo amu, nug attem uɗig doolo.

¹⁸ Amge anam iitta. Kayak Nug oo niiom bianab beɗu laippuppa beɗuppan laih naunau digdig ele hattom daatteb.

¹⁹ Beɗuppan laih naunau ag iɗu iɗu ii daalob amu, beɗu laippu ii daalo

²⁰ amunu, beɗuppan laih naunau ag qagmeeg, beɗu laippu daatte.

²¹ Amunu ameg nug eppegnu, “Da dakka am elele. Na da ehaniɗkkutnu uɗat laa ii daatte,” ii akkunu elele iitta. Amu ikki ele nug baekuɗ dilah, “Da dakka am elele. Aa da ehaniɗkkulahnu uɗat laa ii daatte,” akkunu elele iitta. Iittanab!

²² Amu ig beɗunigppa laih laala am gai-iitta anadttem, amge laih amu ag ii daalob, ig uɗat laa ii helom.

²³ Ig beɗunig laih laala am binalag laa bia iitta anadttem, ahilagnu ig uɗad qak doottem amu, ig pehettak lamenppa tonadttem; amu amuppa ig laih laala danab laa anadmananu atognoadttem,

²⁴ amge laih laala am binalag ele anadttem amu, ig ahilagnu anam hekkunignu ii daatte. Anam aakku amu amuppa ig anidttem, Kayak Nug ig beɗunig babaitte, laih laih oh, laa am danab dilag neekkakppa anam iitta bia, amge laih laih oh ag daaglagnunab daatteb.

²⁵ Amunu beɗu laippu nug otiak laala ii daatteb. Iitta. Laih naunau oh ag nug ehanidnana daatteb.

²⁶ Beɗu laih laa nug guittak dootte dayeb amu, beɗu laih laa oh ag ele guittak aotteb. Beɗu laih laa nug binag ena ele daatte dayeb, beɗu laih laala oh ag ele maɗoɗppan gamag ahak dootteb.

²⁷ Ag oh amu Kristus beɗu daatteb, danab anen anen ag amu Nug beɗu laih naunau daatteb.

²⁸ Am Kayak Nug Kristen tamaniak ooppa nuhig uɗat hak danab ele anam aakku meum. Anuqak am totol danab daatteb. Amu dimulagppa am propet danab daaeg, ag dimulagppa am ippunittak danab daatteb. Aria, laa amu kobol danab hekkunu elele iitta hak danab daaeg, laa ag oɗe babaittak danab dilag ehah ele daaeg, amu laa ag ehanattak danab daaeg, laa ag uɗat digdig gumak danab dilag ehah ele daaeg, laa amu aabaab naippa nai mattiaknu danab daatteb.

²⁹ Ag oh totol danab daattebte? O iitta ag oh propet danabte? O iitta ag oh ippunittak danabte? O iitta ag oh am kobol danab hekkunu elele iitta hekkulagnu elelete?

³⁰ O iitta ag oh am oɗe danab bappaidkkulagnu ehah elete? O iitta ag oh am aabaab naippa nai madittebte? O iitta ag oh am nai amu eɗuttebte? Iitta!

³¹ Anam amunu, ag Kayak Ouɗinu ɗo hamu mettak okkai aoglagnu oolag hette, amge da geha iikku ib enanagnab ippunadppi dim lamidkkulagnu hettem.