1 Korint 11 - Nobonob Baibel

¹ Am da Kristus Nug kobol aɗi aɗi heum ele andette, da kobol amu dim lamidttem, amubia ag ele da aniɗnana, da hettem bia heig!

Kayak noobppa dup noa binag mak haenppa ikki hautak kobol

² Ag hanhan dahil dabmetteb, nai da ag amelagppa attem ele amu, ag tutukku aon aɗatteb amunu, da ag onilag humattem.

³ Amge ag nai imu dooglagnu da ool daatte. Danab oh ikkilag am Kristus, ah ikki am danab, Kristus ikki am Kayak.

⁴ Anam daatte amunu danab laa nug unuqidkkunu, o iitta propet nai mehuqkkunu haaha, ikki haut-tte amu, nug aakku laa nug ikki daatte, nug nuhigppa elele ii hette.

⁵ Am ah laa nug unuqidkkunu, o propet nai mehuqkkunu haaha, ikki ii haut-tte amu, nug ele aakku laa nug ikki daatte, nug nuhigppa elele ii hette. Nug ikki ii haut-tte dayeb, ah nug ikki uɗug oh hoitte bia hette. Am uɗa nak ele.

⁶ Ge, ah nug ikki hautaknu uutte amu, nug ikki uɗug hoiaɗ! Amge nug ikki uɗug hoiyaknu uɗa nak dootte dayeb, aria nug ikki hautaɗ!

⁷ Aria, danab nug ikki aib hautom. Aɗinu? Kayak Nug danab Nug bia heum daatte, amu lettod amahlak awa he, amimia gotte, amubia danab nug Kayak binag amahlak oppiaawak awa he, laa anidtteb. Aria, lettod amahlak awa he, amia gotte amu, ah nug gamu binag amahalak oppiaawak ele awa, anam hette amunu, ah ag ikkilag hauteg!

⁸ Kayak Nug ah beɗuppa danab ii heum. Iitta. Nug danab beɗuppa ah heum.

⁹ Am ele Kayak Nug ahnu dabma, danab ah ehanidkkunu ii heum. Iitta. Nug danabnu dabma, ah nug danab ehanidkkunu heum.

¹⁰ Kayak Nug ah danabnu heum, diig amunu, aria, ah ag engel noolagppa ena daaglagnu, diig amunu ele ag ikkilag hauteg!

¹¹ Amge ig Naɗi ele ouqak daattem ele amu, ihinigppa ah nug nukka piɗe ii daatte. Danab nug ele nukka piɗe ii daatte. Iitta. Ah nug danabnu ehanittak aotte, danab nug ahnu ehanittak ele aotte.

¹² Kayak Nug ah hekkunu amu, Nug danab beɗu laih awa heum; gemu amu danab ahppa dotteb, amge Kayak Nug keeke oh Mameg daatte.

¹³ Ag imu tutukku epeɗin antteg! Ah laa nug ikki ii hauta Kayak unuqidtte amu, nug kobol tutukku hettete?

¹⁴ Am Kayak Nug ig danab ah beɗunig piɗe piɗe aben aben ihinig mekkomppa daagnignu anidttem amu, amuam danab laa nug ikki uɗug elab ele daatte dayeb, amuam eheɗ iite ippunigtte? Nug amunu uɗa nak guittak ele iite dookku?

¹⁵ Amge ah laa nug ikki uɗug elab ele oikku am ena, am nuhig bala. Aɗinu? Kayak Nug ah ikki uɗug elab heum amunu, amuppa nug ikki haut-tte.

¹⁶ Amu laa nug nai imu tappeb neeb, awa awa qettak nai mattiaya hette dayeb amu, nug doyaɗ! Ig kobol amunu ɗo laa ii mettem, Kayaknu Kristen tamaniak ooppa ele anamib daatte.

Pasowanu ee lanaknu kobol tutukku

¹⁷ Aria, da keeke laanu madikkulnu hettem amu, da amunu binalag ii mettem. Am inam. Ag qagmena daatteb amu, ag kobol tutukku ii aɗatteb. Danab ag qagmak amuppa ehanittak aolob amge iitta, ag nakok eheɗ bia aotteb.

¹⁸ Amu laa ag haen ag Korint tamaniak ag Mettid hekkulagnu qagmetteb amu, ag obatak obatak daatteb, laippu oh ii daatteb, anam aeg doomi amu da nakok oolppa genab doottem.

¹⁹ Aɗinu? Ag enanag ii hetteb amunu, obatak amubia genab bekku, amge amuppa Kayak Nug heeb, ag oolagppa danab aun aɗi ag tutukku daatteb ele amu, ag miag atiglag.

²⁰ Ag anam daatteb amu haen ag oh qagmetteb amuppa ag, “Ig Naɗinu ee lattem,” aon atteb, amge ag anam ii hetteb.

²¹ Iitta! Ag oh akka akka ahilag ee akka latteb amunu, laa ee iitta ele daatte, nug enug dayeye, aria danab laa nug le ɠagattag huan lawowa kaaka qette.

²² Amu attemu? Ag ee le ele lakkulagnu laulkad iittate? Ag Kayaknu Kristen tamaniak amu keeke hamunab bia doottebte? Ag lailkad laala, ee iitta ele daatteb amu, ag ag anadna ahilagnu dabmak ii aona, uɗa nak nau madattebte? Ag hetteb amu da amunu aɗi akkul? Da ag binalag mekkulte? Iitta! Kobol amunu amu da ag binalag iinab mepa.

²³ Da nai imu Naɗi Jesus Nug oɗeppan nai awen, da ag amelagppa tatam ami amu da gemu eɗuen baula attem. Nai amuam inam. Judas Nug tuqan Naɗi Jesus awa kekeɗ eppelagppa meum, tuqan amuppa Naɗi Jesus Nug bret awa,

²⁴ Mameg amegppa, “Ena heme,” awowa, pane ne Nug aum. “Imuam da beɗul, amuppa da ag ehanadkkul. Ag dahilnu dabmekkulagnu lanaknu kobol imu heig!” awa aum.

²⁵ Amu ag ee lana malona, Nug matu heum, amubianab Nug kap awa, Nug aum. “Kap imuppa da nug tituana nai qakkak bau da tiilppa hettem. Ag lanana, ag dahilnu dabmekkulagnu lanaknu kobol imu heig!” Jesus Nug anam aum.

²⁶ Amu genab, ag hanhan Jesus eɗua ii nak haen imuppa, bret imu wain imu ele lanana, ag Naɗi Jesus mauhomnu nai amu mehuqtteb.

²⁷ Amunu danab laa nug oo babaittak iitta, nug Naɗinu bret o wain anam hamu awa latte amu, nug amuppa Naɗi Jesus beɗu, tiig ele am keeke hamu bia doya, kobol nug hette, amuppa nug hipunin hette.

²⁸ Danab nug nukka epeɗitta anttowa, aria haen amuppa nug ee, wain amu ele lakku.

²⁹ Aɗinu? Danab nug nuhig oiyak elele iittappa, Naɗi Jesus beɗu, tiig ele amu dab-ii-mata, nug hamu latte dayeb, nug nukka nuhig aab aakku latte.

³⁰ Diig amuppa ag oolagppa danab ah kuɗum ag ɠagattag iitta, laa kuɗum ele ag oɗe aona, laala mauhadppig.

³¹ Ig ikka ig epeɗidta, elele anidta lakkunig dayeb amu, ig beɗunigppa aab iitta daagnig; ig Kayaknu epeɗiak waappa ii daamta.

³² Amu haen Naɗi Nug ig aɗi hettem anikka, Nug ihinig hak amu epeɗitta, ig danab Kayak ii dim lamidtteb ele oh padal ii mematanu, ig ena bekkunignu Nug ig tolikka, bu iqaaqa bappaigtte.

³³ Anam aakku amunu o dahilad, haen ag ee lanaknu qagmetteb amu, ag akka akka aib ee paha lappig. Laala uɗiglagnu amelag meig!

³⁴ Ag mauhnoak ee latteb amubia tuɗidna labeppeg, Kayak epeɗiak baubau mattamanu amu, laa nug enug qeeb nug nukka nug laugppa ee lanaɗ! Keeke laalanu da ag dim lamittaknu nai ag amelagppa akkulnu daatteb amu, dimppa da eɗue ahilagppa ukke, appa da madippi dooglag.