1 Korint 10 - Nobonob Baibel

Laa oo eeɗakppa na qemanu nai

¹ O lailad, ig alankad ag keeke anidppig ele amu, da ag amunu dabmenana oiglagnu ool daatte. Ig alankad aɗi ag lombig waappa oinna, ag baelagppa Le Kokoɗ mataɗppig.

² Amuppa ag oh Mosesnu dim lamittak danab bena, ag nug waappa daanna oippig.

³ Ag oh amu Kayak Nug ag bret matte lappig.

⁴ Ag oh amu, Kayak Nug le matte lappig. Ao, hab aabnu Laa Nugib ag omalattom. Nug Kristus. Nug he lappig.

⁵ Amge Kayak Nug danab ah kuɗum ag ahilag eheɗ hak nau amu andatta, amuppa Nug ahilagnu oo ena ii dayom amunu Nug he, ag atu taɗakppa mauhppig.

⁶ Keeke amu oh beppig, ag antte oo maittak kobol daatteb. Amu Israel anukka heppig bia ig eheɗ hekkunignu oonig okkai daamanu, ig nau aomanu dabmettak kobol imu anidta doognignu daatte.

⁷ Israel oolagppan danab laala heppig bia, ag kayak hambuppuak aib dim lamidppig. Kayak naippa, nai amunu inam daatte. “Danab ah ag ee, le ele lawona, ag ahan gona, ahi uɗa nak ele goɗappig.”

⁸ Gappai kobol ele, Israel oolagppa laala heppig bia amu ig aib hemut. Ag kobol amu heppig amunu, deɗ laippuppa 23,000 ag mauhppig.

⁹ Ig Kayak ma anttak, Israel oolagppa laa heppig amubia, ig aib hemut. Ag oolagppa laala ag anam heeg, mat ag emalatteg mauhppig.

¹⁰ Amu ag Kayaknu naittuɗ, Israel oolagppa danab ah laala heppig bia aib heppig. Ag Kayaknu naittuɗ nai mattieg amu aqakkunu engel nug aqe mauhppig.

¹¹ Keeke imu oh amu ig anidpput oo maittak kobol daaglagnu beppig. Kayaknu yaak ooppa kaya amu yaaladppig daatteb amu, ig danab gogtak haen imuppan, ig anidtata, nau aomtanu dabmak aota oignignu ippunigtte

¹² amunu, danab laa nug ɠagattag hibaitta daatte dabmette ele amu, nug na qemanu dabma auta awaɗ!

¹³ Eheɗ haknu eeɗak laanab ag beɗulagppa ii bette. Iitta. Danab oh aotteb amuib. Amu Kayak Nug hanhan ehanigkkunu oo metta ii uuak kobol dim lamidtte amu, Nug eheɗ haknu eeɗak haenppa ele ehanigkku. Eheɗ haknu eeɗak amu na eɗidmanu Kayak Nug na ehanitta, eheɗ haknu eeɗak okkainab, na eɗidkkunu elele, amu bemanu amu Nug aib akku. Ge! Haen na eheɗ haknu eeɗak aottem ele amu, haen amunab Nug na eheɗ haknu eeɗak waappa daamnanu ɠagattag medakku, amu amuppa Nug eeɗak amu eɗidkkunu ib medakku.

Kayak genab, kayak hambuppuak ele oh dim lamataknu elele iitta

¹⁴ Anam daatte amunu O lailad, ag kayak hambuppuak dottolkad noolagppa dup noa binag mak kobol nakoknab aibnab heppig.

¹⁵ Ag doyak ele amunu, da ag amelagppa attem; dahil nai amu ahilag dabmakppa ag akka epeɗin antteg!

¹⁶ Ig Pasowanu ee lattem haenppa amu, ig wain itittak ena megatte ele, ig amunu, “Ena heme” atata lautut, amuppa ig Kristus ele iite ouqettem? Amu bret laippu panaut ne, panit lautut, amuppa ig Kristus ele iite ouqettem?

¹⁷ Bret kunum laippuib daatte, amu ig danab ah kuɗum amuppa beɗunig laippu daattem. Aɗinu? Ig oh am bret laippu amuib lattem.

¹⁸ Israel buɗub, danab amu ag hetteb, ag amu dabmekkulag. Israel ag doɗ main Kayak medatteb amu, ag amunu laih lanana, ag qaɗabppanu laih amu iite aotteb?

¹⁹ Nai imuppa amu da aɗitai attem? Da doɗ mana kayak hambuppuak dottog mettak am keeke genab attemte? O kayak hambuppuak dottog, nug am keeke genab attemte? Da anamte attem?

²⁰ Iitta. Amge iitta aɗi ag mana mettak ahilagppa amu ag doɗ main ouɗi nau madatteb. Ag main Kayak ii medatteb. Da ag ouɗi nau ele ouqak daaglagnu amu, da ool ii daatte.

²¹ Ag Naɗi, amu ouɗi nau ele ouqak daaglagnu elele iitta. Ge, ag Kristus, amu ouɗi nau ele laippu daaglagnu elele iitta.

²² Ig anam hepput, Naɗi Kristus Nug ihinignu, dahilppa anam daalon dabmak aɗa daakkunu dabmettemte? Ig nuhig ɠagattag eɗidkkunignu elelete?

Kristen nug haen oh Kayak binag mekku

²³ Da keeke oh hekkulnu ib daatte, amge keeke oh da ii ehaniɗtteb. Ge, da keeke oh hekkulnu ib daatte, amge keeke oh amu heppeg, da ɠagattag ii daapa.

²⁴ Danab laa nug nukka nuhignuib aib dabmeum. Iitta. Nug danab oh ag ena daaglagnu nug ag ehanattaɗ!

²⁵ Ag doɗ teppu oh daden lagppanu daden mekkulag amu, ag aon laig! Ag danab laa, ahilag ooppan oiyak ippunittaknu ulum dabmenan, diig doon lakkulagnu aib oɗ madappig.

²⁶ Aɗinu? Wan, amu keeke oh wanppa daatteb ele am Naɗinuib.

²⁷ Laa amu, danab laa, nug Jesusnu ooppa genab ii dootte ele amu, nug ag goppeg, nug laugppa oh ee lakkulagnu onilagppa eeb, ag gokkulagnu oolag dayeb amu gokkulagnu elele. Goppeg, keeke oh nug matteb amu lakkulag. Diig doon lakkulagnu aib oɗ medappig.

²⁸ Amge danab laa nug ag amelagppa, “Ag doɗ teppu imu main kayak hambuppuak medappig,” ab, aria danab nug amelagppa aum amu, ag nuhig ooppan oiyak ippunittaknu ulum dabmena, doɗ amu aib lappig.

²⁹ Amge ⌊da ami, amubia,⌋ da danab amunu ooppan oiyak ippunittaknu ulumnu attem; ahilagnu iitta. ⌊Amge ag oolagppanu laa nug inam akku.⌋ “Ehe, aɗinu da danab laanu ooppan oiyak ippunittaknu ulum nauhmanu dabmein, ee lakkulnu elele doottem ele amu, da ii lapa?

³⁰ Da doɗ teppu amunu Kayak amegppa, ‘Ena hen meɗame,’ awoya lappi amu, danab laa nug aɗinu dahilnu nai eheɗ akku?” ⌊awa akku.⌋

³¹ Amge ag ee le ele lakkulag, o keeke laa hekkulag amu ag keeke amu ohppa ag Kayak binag amahlak oppiaawak ele mekkulagnu aakkuib dabmenan heig!

³² Ag Juda danab laa, Grik danab laa, amu Kayaknu Kristen tamaniak dilag laa ele kobol ahilagppa heppeg, ag nena qemananu, ag tutukku daan oiyeg!

³³ Da hettem amubia ag heig! Da keeke oh hettem amu, danab oh ag da aɗi hettem amu oolag mettaglagnu hettem. Da uɗat hettem amu dakka ehaniɗkkulnu ii hettem. Iitta! Da uɗat hettem amu, danab ah kuɗum ehanadppi, Kayak eɗua diikkunu aakkuib hettem.