1 Korint 1 - Nobonob Baibel

Pol nug Kayak binag meum

¹ Da Pol, Kayak Nug da onilppa e, da Nug oo niitte bia Kristus Jesusnu totol danab daattem amu, da amu ig lainig Sostenes ele

² i nai imu uɗugppa yaattep. I Kayaknu Kristen tamaniak Korint daatteb, ahilagnu yaattep. Ag Kristus Jesusnu, oppiaawak danab ah daatteb. Nug ag oppiaawak daaglagnu ag onilagppa eum. Amge Nug agib onilagppa ii eum. Iitta! Nug danab ah oh ag wan atu ohppa daana, ag Naɗi Jesus Kristus onigppa unuqidtteb amu, ag oh onilagppa eum. Jesus amu, Nug am ag ig ele, ig oh ihinig Naɗi daatte.

³ Amu ig Mamenig Kayak, amu ihinig Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu oonih daatte.

Ena heme anak

⁴ Kayak Nug Kristus Jesusnu uɗatppa nuhig ehanittak okkai hamu megatte ag mattom amunu, da ahilagnu haen oh Nug amegppa, “Ena heme,” awe attem.

^5-6 ⌊Amu da Kayak amegppa imunu ele, “Ena heme,” awe attem.⌋ Kristusnu nai ag dooppig ele ahilagppa ɠagattag eppe, Kayak Nug Kristus Jesus, nuhigppa he, ag Kayaknu ɗo maɗoɗppa uɗat oh hekkulagnu elelenab daatteb; amuam ahilag nai mattiakppa, ahilag doyakppa ele.

⁷ Anam amunu, ag Naɗi Jesus Kristus, Nug geha miag atieb anidkkulagnu ameg menana, tappaɗidna daanna, ag Kayaknu uɗat hekkulagnu Kayak Ouɗinu ɗo hamu mettak laanu tutu ii metteb.

⁸ Naɗi Jesus Kristus Nug ag ehanatteb ukkeb, ag ɠagattag daappeg, haen malakppa batakku amunu, ihinig Naɗi Jesus Kristusnu deɗppa ag Kayak noobppa, ag danab oolagppa kaliak laa iitta ele daaglag.

⁹ Kayak, Nug nukka ag Nug bekka Jesus Kristus, ihinig Naɗi, Nug ele laippu daaglagnu tituanattom amu, Nug oo metta ii uuak kobol dim lamidtte.

Tamaniak ooppa obatak obatak dayom

¹⁰ O lailad, da Naɗi Jesus Kristus onigppa ag unuqadttem, ag obatak obatak daamnanu ag oolag laippu dayeg! Ag dabmak laippu, aɗi haknu laippu ele daaglagnu ag oolag laippunab dayeg!

¹¹ O lailad, Kloe baekkudppanu laa ag da amelppa, ag oolagppa nug mehqak laala beeg daatteb, ag amunu aeg doomi.

¹² Da nug mehqak kobolnu mattimi amu, da imunu ami. Ag oh ameg piɗe piɗe oppatna daanna, nai aeg ona aeg dotte. Ag anam henana amu, laa nug, “Da am Pol dim lamidttem,” awa aawo, laa nug, “Da Apolos dim lamidttem,” awa atte. Amu laa nug, “Da am Pita dim lamidttem,” awa aawo, laa nug, “Da am Kristus dim lamidttem,” awa atte.

¹³ Ag anam anam maditteb, amge Kristus Nug am oppatak kuɗum elete? Iitta! Am da ag ad emaitakppa atuliɗeg ehanatte mauhmite? Iitta! Am ag Pol onigppa layattak aoppigte? Iitta!

¹⁴ Amu da ag oolagppa Krispus, Gaius eleib layatmi; danab laa oh ag iitta amunu, da amunu Kayak amegppa, “Ena heme,” attem.

¹⁵ Aɗinu? Danab laippu laa nug laa amelagppa amunu inam akkunu elele iitta. “Ag am Pol onigppa layattak aoppig.”

¹⁶ (Laa ele, da Stepanas, nug baekkudppa, ag ele amu, da layadmi. Amu da laa ele laaidmitai, o iittatai amu, da daulppa ii daatte.)

¹⁷ Kristus Nug da danab layadkkulnu meiɗe ii uɗimi. Iitta. Da Nai Ena mehuqkkulnu he uɗimi. Amge da wan imuppan doyak danab nai maditteb bia, da nai ii mehuqmi. Am da nai anam, ag maditteb bia mehuqlom amu, Kristusnu ad emaitak am keeke hamu bia daalo amunu, da amubia ii hemi.

Kristus Nug amu Kayaknu ɠagattag

¹⁸ Amu danab ag oolagppa genab ii dootteb ele, ag ad emaitaknu nai dabmenan, nai amunu ag ahilag dabmakppa, “Amuam dabmak tutukku iitta,” aon atteb. Amge ig danab ah, Kayak Nug ig eɗua awikkom ele amu, ig ad emaitak nainu, “Amuam Kayaknu ɠagattag,” aot attem.

¹⁹ Nai amunu Kayak naippa, nai laa daatte. Nai amuam inam. “Da geha danab doyak dabmak ena ele dilag doyak dabmak ena ele heppi nauhkku. Ao, danab ag doyak okkai ele, ahilag doyak okkai amu da heppi, iitta mekku, baula ii daama.”

²⁰ Amunu danab doyak dabmak ena ele nug attemun? Danab doyak okkainab ele, nug ele am attemun? Attemun wannu haen imuppan danab nug oɗe alala eppa elelenab maditte? Kayak Nug wan danabnu doyak dabmak ena ele amu he, nai amu dabmak tutukku iitta iite daatte?

²¹ Wan danab ag akka ag ahilag doyak dabmak ena eleppa Kayak mattin anidkkulagnu elele iitta; ag ahilag doyak dabmak ena eleppa amu hekkulagnu am ib iitta. Anam amge Kayak Nug danab ah eɗua diikkunu ib iikku babaittom. Ag ad emaitaknu Nai Ena ig mehuqttem amu doona, ag Kristusnu oolagppa genab dooglag amu, Kayak Nug eɗua diikku. Danab laa ag Nai Enanu, “Am dabmak tutukku iitta,” aon atteb.

²² Am Juda danab ag laa heeb, Kayak dabmettaknu kobol danab haknu elele iitta anidkkulagnu dabmak aoegeg, Grik danab ag laa ippuanatteb, ag doyak dabmak ena ele aoglagnu oolag hette,

²³ amge ig ib aɗit amuppa ii gottem. Iitta! Ig Kristus ad emaitakppa atulitteg mauhom, ig amunu nai mehuqttem. Ig anam mehuqutut, Juda danab ag nai amunu ag eheɗ doon, ag kekeɗ mettaegeg, Grik danab ag nai amunu, “Dabmak tutukku iitta,” aon anana, ii aotteb.

²⁴ Juda, amu Grik danab ele ag anam hetteb, amge ig danab, Kayak Nug oninigppa ette doottem ele amu, ig Juda danabte, o Grik danabte, amuam keeke hamu, ig doottem; Kristus Nug am Kayaknu ɠagattag, amu Kayaknu doyak dabmak ena ele.

²⁵ Kayak Nug keeke oh dootte amunu, Nug aɗi keeke laa hette, danab ag amunu, “Dabmak tutukku iitta,” aon atteb amu, Kayaknu doyak dabmak ena ele amu, am danab dilag doyak dabmak ena ele oh eɗidtte. Aria, Kayak keeke oh hekkunu ɠagattag ele amunu, Nug aɗi keeke laa hette, danab ag amunu, “ɠagattag iitta,” aon atteb amu, Kayaknu ɠagattag amu nug danab dilag ɠagattag oh eɗidtte.

²⁶ Amu O lailad, imuam ag daulagppa doaɗ! Kayak Nug anukka ag Kristen daaglagnu onilagppa eum, haen amuppa ag oolagppanu danab kuɗum ag wanppanu doyak dabmak ena okkai iitta, ag kuɗum amu onilag iitta, amu anuqak danab ele kuɗum iitta.

²⁷ Amge ag amunu aib ottaippig. Kayak Nug kobol laala, wan danab ag amunu, “Dabmak tutukku iittappan kobol,” aon atteb ele amu, Nug wanppan doyak dabmak ena ele danab uɗalag nekkunu, kobol amu tituanattom. Amu keeke wan danab ag amunu, “Keeke ɠagattag iitta,” atteb ele amu, Kayak Nug wanppan danab ɠagattag ele amu, ag uɗalag nekkunu keeke amu tituanattom.

²⁸ Aria, Kayak Nug wan imuppan keeke onig iitta, keeke wan imuppan danab ag amunu ena iinab dootteb, keeke ag amunu hamunab dootteb, Kayak Nug amuppa heeb, keeke wanppan danab ag amunu keeke okkai dootteb ele, amu iitta mekkulagnu diia tituanattom.

²⁹ Anam amunu, danab laa nug Kayak amegppa nukka binag mena, “Da danab laa eɗittem,” akkunu elele iitta.

³⁰ Kayak Nug aakku he, ag Kristus Jesusnu daatteb. Kristus Nug am doyak dabmak ena, ig Kayaknu aottemnu diig. Gemu ig genab tutukku hak danab daattem, ig oppiaawak ele daattem, amu ig gemu qagaiettakppanu eɗua uhuqak aomut daattem, amu oh Kristus, nuhigppaib beppig daatteb.

³¹ Amunu ig Kayak naippa, nai laa daatte, amubia hetu! Nai amuam inam. “Laa nug onig humak hekkunu oo daatte amu, nug Naɗi onig aakkuib humaɗ!”