1 King 8 - Nobonob Baibel

Ag tituanaknu kunup Yawenu mettid lag ooppa meppig

¹ Amu King Solomon nug Yawenu Tituanak Nainu Kunup kontrak inak ele, nug kunup amu Sion, Sion am Dawitnu aab amu, nug appanu awa, Yawenu mettid lag, amuppa mekkunu dabmeum amunu, nug Israel dilag ikki danab, Israel dilag huu okkai anen anen dilag danab okkai oh, amu Israel baekkudppan dilag okkai ele ag nai doon, ahan, nug gumidna, Jerusalem uɗiglagnu onilagppa eum.

² Aria, ag nai amu doona, ag kalam ebqak eblaih aɗit, kalam amunu ag Etanim atteb amu, kalam amuppa Peh Dayaknu hobul haenppa ag oh King Solomon gumidna uɗin qagmeppig.

³ Amu Israel dilag ikki danab ag oh uɗin daaeg, mana mettak danab ag Tituanak Nainu Kunup humappig.

⁴ Ag human, ag Yawenu Tituanak Nainu Kunup, mettid haknu peh lag danab ah appa qagmetteb ele, amu lag amuppanu keeke, Yawenu tituanak daatteb ele, ag keeke amu ele akkan aon Kayak laug guguittak uɗippig. Lewi buɗubppan mana mettak danab, Lewi buɗubppan mana mettak danab iitta ele ag keeke amu aon uɗippig.

⁵ Mana mettak danab, amu Lewi buɗubppan mana mettak danab iitta ele ag gona teegeg, Solomon nug, amu Israel danab, ag uɗin, nug talilidna daappig ele, ag King Solomon ele oh anuqna ukkaegeg, laa ag Kayaknu Tituanak Nainu Kunup maoppig ele ag dim lamadna uɗippig. Ag anam uɗinna, Solomon, danab ele ag sipsip, makau ele huanaknab, laa ebaqa, bukppa yaakkunu elele iitta manadna, Yawe medappig.

⁶ Ag anam henan uɗin, mana mettak danab ag Yawenu Tituanak Nainu Kunup kontrak inak ele maon, Yawenu mettid lag ooppa Oo Gunnab Eleppa, nuhig aben aguppa daakkunu babaittak dayom ele, ag amuppa nona, meeg dayom. Engel okkai-kerubim dottog aɗit haulah tikkaɗe daaeheh, haulah waappa meppig.

⁷ Kerubim aɗit aa haulah am Tituanak Nainu Kunup daakkun aben attan daaya, kunup amu, amu nuhig mawaknu tuqai aɗit ele tonatpiɗ.

⁸ Tuqai amuam aa elabnab amunu, danab nug Oo Gun Ele, oo amuam Oo Gunnab Ele noobppa dayom amu, danab nug appa dayaya, nug neekkeb ukkeb, anatkkunu elele, amge danab nug lag amu dimittim daakku dayeb, nug neekkeb ukkeb, anidkkunu elele iitta. Gemu ⌊nai imu yaak haenppa⌋ ele Tituanak Nainu Kunupnu tuqai aɗit aa anam daattep.

⁹ Amu Tituanak Nainu Kunup ooppa am keeke kuɗum iitta; men maha aɗit, amuppa Kayaknu ɗo nai yaak ele, Moses Horep appa kunup amuppa meum ele amu, men aɗit amuib aguppa dayom. Horep appa amu, Israel danab ah ag Isip uun uɗin, Horep bena daaegeg, appa amu Yawe he, Israel Nug ele ag nug tituanna nai qagappig.

¹⁰ Amu mana mettak danab ag lag Oo Gun Ele amu uun, dimittim beeg, pahanab bud Yawenu mettid lag ooppa noa ambeum.

¹¹ Yawenu binag amahlak oppiaawak ele am bud amuppa naɗinab amahle, Yawenu mettid lag ooppa amu, amahlaknab dayom. Anam dayom amunu, mana mettak danab ag ahilag uɗat hekkulagnu elele iitta.

¹² Anam dayeye, Solomon nug danab ah amelagppa aum. “Yawe, Nug bud gatatu manak amuppa daakkunu aum,” awa aum.

¹³ Solomon nug danab ah amelagppa anam awowa amu, nug nai tuɗitta, Yawe amegppa inam unuqittom. “O Yawe, gemu amu, da genab mettid lag enanag nahip, na haen oh imuppa daakkutnu iikku hemi,” awa unuqittom.

Solomon nug danab ah amelagppa nai mattiom

¹⁴ King Solomon nug unuqittowa, nug eɗua Israel danab ah oh ag appa hippaidna daappig ele, nug ag neekkattatta, Kayak onigppa danab ah itittak ena mattom.

¹⁵ Nug itittak ena mattowa, nug inam aum. “Ig Yawe, Nug ig Israel, ihinig Kayak, ig Nug binag metu! Nug da mamel Dawit amegppa Nug oɗeppanab nai ana qakkom amu, nug nai amu tutukku dim lamitta he, meu oum.

¹⁶ Nug da mamel Dawit amegppa inam aum. ‘Haen da dahilad danab ah Israel, ag Isipnu diie uɗimi, haen amuppanu uɗie, gemu batak, da Israel dilag huu okkai oh oolagppa aab okkai laa, amuppa ag mettid lag laa, da onil amuppa daakkunu hekkulagnu amu laa ii tituanmi. Amge Dawit na amu, na dahilad danab ah gumadkkutnu da na tituanidmi,’ awa aum.

¹⁷ Aakku da mamel Dawit nug gumak uɗat amu haaha, nug mettid lag laa, Yawe, Israel dilag Kayak, Nug onig amuppa daakkunu helonu dabmeum.

¹⁸ Nug anam dabmeum, amge Yawe Nug da mamel Dawit amegppa aum. ‘Na mettid lag laa, da onil amuppa daakkunu buukkutnu dabmeme amu, dabmak nahip amuam ena,

¹⁹ amge na dahil mettid lag amu ii buumna. Iitta. Dimppa na nahip nidnab laa, nug mettid lag, da onil amuppa daakkunu buukku,’ awa aum.

²⁰ Yawe Nug nai ana qakkom amu, nuhig nai qakkak amu, nug aum bia gemu oh iikku be, da mamel Dawit amu, da nug abenabppa gemu da ag Israel, da ahilag king daattem; Yawe Nug nai qakka aum amubia. Amu da Yawe, ig Israel, ihinig Kayak, da mettid lag Nug onig amuppa daakkunu aakku buumi.

²¹ Amu Yawenu Tituanak Nainu Kunup lag amuppa daakkunu amu, da lag amu ooppa aben laa bappaidmi. Amu men aɗit Tituanak Nainu Kunup amu ooppa daattep. Men aɗit amuppa am tituanak nai, Yawe Nug ig mamenkad aɗi haen Nug ag Isipnu diia omalatte uɗiegeg, Nug he, Nug ag ele nug tituanppig, nai amu amuppa daatte.” Solomon nug anam aum.

Solomon nug unuqittom

²² Solomon nug nai amu mattia mala, nug eɗua, Yawenu qaɗab guguitta ukka, qaɗab am noobppa daye, Israel danab ah oh noolagppa anam dayaya, nug eppeg laih laih oh bahia, eppeg oo oh otale hume daye,

²³ nug unuqitta aum. “O Yawe, na am ig Israel, ihinig Kayak. Kayak laa na bia habppa, o honap wanppa ele, laa ii daatte. Amu na nahipad maɗi nid maɗi ah ele, ag meulag ohppa nahip ib dim lamittegeg, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem.

²⁴ Na anukka da mamel Dawit, nahip maɗi nid, na oɗenppa nug amegppa nai anan qakkame amu, na nai amu tutukku dim lamidna, amu na nai anan qakkame amu, na hee, nai amu oh meu o, gemu anam daatte.

²⁵ Am gemu Yawe, na ig Israel, ihinig Kayak, da na oɗ medattem. Na nai ana qakkak laa da mamel Dawit, nahip maɗi nid, na nug amegppa ame amu, na amunu ele heppe bekkunu oɗ medattem. Na nug amegppa inam ame. ‘Dawit, na begapad ag na hettem bia, ag haen oh da pehettak dim lamiɗna, da noolppa oiglag dayeb, geha haen oh da heppi, na buɗunppanu laa ag anen anen ahilag haenppa Israel dilag king bena, sia kingppa daaglag,’ aon ame.

²⁶ Anam amunu, O Kayak, na ig Israel, ihinig Kayak, na da mamel Dawit, nahip maɗi nid, na nug amegppa nai anan qakkame amu, na heppe, nai amu meu okkunu oɗ medattem,” awa unuqittom.

²⁷ Solomon nug anam unuqitta mala, nug tuɗitta inam ele unuqittom. “Amge, O Kayak, na am genab nena, wan imuppa daakkut-te? Hab, hab waappa, hab attan ukke ukke, adekku batatte, aben amu ohppa aben laa, na amuppaib daakkutnu elele laa iinab daatte amunu, nahip mettid lag da hemi imu am, nahipnu elelete? Am iittanab iitta.

²⁸ Anam, amge O Yawe, dahil Kayak, da nahip maɗi nid amu, da na dahil unuqittak dookkutnu oɗ medattem. Da na ihinignu oo gai-iitta doya oo metta ehanittak kobol hekkutnu unuqidttem. O Yawe, da nahip maɗi nid, da na gumitte uɗien daattem amu, na dahil oɗmak, dahil unuqittak imu dookkutnu oɗ medattem.

²⁹ Amu na mettid lag imu, na, ‘Da heppi, da onil am lag amuppa daakku,’ ame amu, na deɗ oh na amen am tuqan, amun ele uɗiebeb, lag imu anidkkutnu da ool daatte. Da ool anam daattenu diig am, haen da, nahip maɗi nid, da na unuqidkkulnu hein, da neegppi, lag imuppa uɗieb unuqidppi, geha na dahil unuqittak dookkut.

³⁰ O Kayak, nahip dayak aben am hab aab, amu na appa daanna, haen da, nahip maɗi nid, amu Israel ele, ig am nahipad danab ah, haen ig neegta, lag imu anidtata, na unuqidpput doona, na ihinig hipunin uhuqna megakkutnu oɗ medattem.

³¹ Amu danab laa nug layagnu, ‘Nug dahilppa nau imu heum,’ ab, laa eheɗ heumnu nai yaakppa daatte amu, ikki danab ag heppeg, nug uɗia, nahip mettid lag imuppa qaɗab guguittak dayaya, nug nai nuhig Kayak onigppa ɠagattag qa, ‘Da ii hemi,’ akku amu,

³² Yawe na hab aabppa daanna, na nai amu doon, na hettoɗiak tutukku henana, na danab amu nug hambuppua, nai hambuppuak ɠagattag qetta mattiom, nug eheɗ amu genab heum anidttem dayeb amu, na eheɗ hak nuhig amunu na eheɗ mettan, nob nau medakkutnu oɗ medattem. Amu danab amu nug genab eheɗ ii heum anidttem dayeb amu, da na nuhignu, ‘Nug eheɗ laa ii heum,’ appe, danab ag nug eheɗ ii heum dooglagnu unuqidttem.

³³ Amu ig Israel, ig am nahipad danab ah, ig nahip-ppa hipunin hekkunig dayeb, diig amunu na uuigppe, ihinig kekeɗ ag ban hak haenppa eɗigkkulag dayeb, amu dimppa ig Israel ig oonig eɗueb, ig na, na onin am Yawe, ig na tutukku dabmeta, ig nahip mettid lag imuppa uɗit, na noomppa ihinig hipunin uhuqna megakkutnu unuqidta oɗ mettagnig dayeb amu,

³⁴ Yawe, na hab aabppa daanna, danab ah nahipad ig, na ihinig unuqittak amu doon, hipunin amu uhuqna megakkutnu oɗ medattem. Amu kekeɗ ag ig awigna, wan laappa goppeg amu, na ig aigna, eɗun omaigna, wan imuppa uɗikkutnu ele oɗ medattem. Wan imu amu, na anukka ig mamenkad aɗi mattame.

³⁵ Amu ig Israel, ig nahipad danab ah, ig nahip-ppa hipunin hekkunig dayeb, diig amunu na heppe, ihinigppa gu ii nekku dayeb, na uug amu ihinig hipuninnu nob daakkunu megappe, diig amunu dimppa ig oonig eɗueb, na onin am Yawe tutukku dabmetata, hipunin dimettata, ig amenigppa lag imuppa neegpput uɗieb, na unuqidkkunig dayeb amu,

³⁶ Yawe na hab aabppa daana, danab ah nahipad, ig Israel, ig nahipad maɗi nid maɗi ah ele, na ihinig unuqittak amu doon, ihinig hipunin amu uhuqna mekkan, na ig kobol tutukku dim lamidkkunignu ihuhuigkkutnu oɗ medattem. Amu na heppe, gu nug wan imuppa nekkunu ool daatte. Wan imu anukka nahipad danab ah ig mekkame, wan imuam ihinig, ig aunig.

³⁷ Aria, ihinig wanppa enug haen naɗi laa bekku dayeb, o oɗe nau danab kuɗum aqe mauhtteb ele laa bekku dayeb, o dattanu ee heeb nauhkkunu oɗe nau diig laala bekku dayeb, o tap-lokus kuɗum huanak uɗin, ag ee oh lappeg, ee laa ii daakku dayeb, o kekeɗ ag uɗin, ihinkad aab atten oo mattan aqaknu maadna daaglag dayeb, o oɗe nau atten, o uug naunab mettak attem bena heppeg, ig nauhkkunig dayeb amu,

³⁸ ig Israel, ig nahipad danab ah, ig anen anen uug ig oonigppa doot, ig oonigppanu aun nug eppeg bahia, mettid lag imu epponana, na unuqidkku dayeb,

³⁹ amu Yawe na, na dayak aben nahip, amuam hab aab, na appa daanna, unuqittak amu dookkutnu ool daatte. Doon, hipunin attem daatte amu, na uhuqna mekkan, am ehanittak elele ele hekkutnu ool daatte. Na anam henana amu, na nakkaib danab ah oh dilag dabmak doottem amunu, na dabmak amu anidnana, na ag anen anen kobol heppig ele, na amuppa na ag melemel elele mattan, na ag kobol heppignu nob elele madakkutnu oɗ medattem.

⁴⁰ Aɗi diignu da na anam hekkutnu oɗ medattem am, nahipad danab ah ig, ig wan na ig mamenkad aɗi mattame ele, ig amuppa bau daatta, ig haen amu ohppa nahipnu ebehinig oh bodoetta le meebeb, ig nahip ɗo, nahip hak ele dim lamidta oignig.

^41-42 Aria, wan laihnu danab ah ag ele na onin okkainu nai dooglag. Am genab, ag na onin okkainu nai, nahip ɠagattag okkainu nai, nahip kobol danab hekkunu elele iitta okkai okkainu nai ele dooglag. Ag anam dooglag, diig amunu wan laihnu danab, Israel danab iitta, ag oolagppanu aun laa nug wan umanabnu uɗia, mettid lag imu neekkittatta, nug na unuqitteb,

⁴³ amu Yawe, geha wan laihnu danab ah ag ig nahipad danab ah Israel, ig na dooittutut, amu ig nahipnu ebehinig oh bodoetta le mette, amubia ag na dooidkkulagnu, ag nahipnu ebehilag oh bodoetta le mekkunu, geha wan laihnu danab ag lag imu, da hemi amu, lag amuam na laut, na onin aguppa daatte ele dooglagnu, na dayak aben nahip, amuam hab aab, na appa daanna, na wan laihnu danabnu unuqittak doon, nug na aɗi hekkutnu oɗ medatte amu, na amu hekkutnu oɗ medattem.

⁴⁴ Amu deɗ laa geha na heppe, ig nahipad danab ah ig na ig adeppa gota, ban hekkunignu ame amu, ig amubia gota, kekeɗ ele ban hetata, ig aab okkai na tituanme imu, amu ig nahip mettid lag, na onin aguppa daakkunu da buumi, imuppa daatte amu, ig amu oh neegpput uɗieb, ig na, Naɗi, ig na unuqidkkunig dayeb,

⁴⁵ amu Yawe na hab aabppa daanna, unuqittak ihinig amu, oɗmak ihinig ele doon ehanigkkutnu ool daatte.

⁴⁶ Danab ah oh ag hipunin hekkulagnu elele daatteb amunu, geha ig nahipad danab ah ele nahip-ppa hipunin hepput, na ihinignu oot nauheb, na heppe, kekeɗ ag uɗin ban hena, ig eɗigna aɗaigna, aigna, ahilag wanppa goppeg, wan amuam umatai, o miagtai,

⁴⁷ ig kekeɗ eɗigppig ele, ig amu dilag wanppa aɗaigppeg, ag eppelagppa anam daatta, dimppa ig ihinig hak nau amu anidta, ig amunu oonig doyeb, gaata, oonig eɗueb, am Yawe ig na oo doyak ele unuqidtata, ‘Ig eheɗ hetata, hipunin, kobol nau ele kuɗum hemut,’ akkunig dayeb amu,

⁴⁸ ig kekeɗ, ag ig eɗigna aɗaikkeg, ag eppelagppa daattem ele amu, ig amu dilag wanppa appa anam daatta, ig oonig ohppa, meunig ohppa ele oonig genab eɗueb, ig neegpput, wan imu, na ig mamenkad aɗi mattame, am aab okkai imu, na nahip daakkunu tituanme, amu mettid lag imu, na onin amuppa daakkunu da buumi amu, ig keeke amu oh neegpput uɗieb, na unuqidpput,

⁴⁹ Yawe, na dayak aben nahip, amuam hab aab, na appa daanna, na ihinig unuqittak, ihinig oɗmak amu ele doon ehanigna,

⁵⁰ amu na ig nahipad danab ah, na ig ihinig hipunin digdig oh, ig nahip-ppa hemut amu, na amu oh uhuqna mekkan, na heppe, kekeɗ ig eɗigppig ele, ag ihinignu oo gai-iitta doya oo metta ehanittak kobol dim lamidna ig amu mekkaglagnu ool daatte.

⁵¹ Aɗinu? Ig Israel, ig am danab ah nahipadnab. Isipnu amu, na ig aigna omaigna, ippa uɗime. Wan amuppa amu, ig eheɗ daamut, uɗat nau hemut.

⁵² O Yawe, da, nahip maɗi nid, amu Israel danab ah laa oh, ag am nahipad danab ah ele amu, haen ig na unuqidkkunig amu, na ihinig unuqittak dabmekkutnu oɗ medattem. Ao, haen adekku ig na oo doyak ele unuqidkkunig amu, na ig ihinig unuqittak dookkutnu oɗ medattem.

⁵³ Aɗinu? Na nakka ig Israel danab ah, danab ah buɗub ohnu oolagppanu awigna he, ig am nahipadnab danab ah daattem. O Naɗi Yawe, anukka, haen na ig mamenkad aɗi Isipnu diin, omaladna uɗime, haen amuppa na anam nahip maɗi nid Moses amegppa, na nai amu ae doya, amunu aum.” Solomon nug anam unuqittom.

Solomon nug unuqittak malom

⁵⁴ Aria, haen Solomon nug Yawe anam unuqittom amu, nug inam ha dayaya, Yawe unuqittom. Nug ukka, qaɗab noobppa gateg qaun o dayaya, nug eppeg laih laih oh bahia, eppeg oo oh otala huma daye, nug unuqittom. Nug unuqittak amu oh unuqittowa amu, nug eɗua aha hibaittom.

⁵⁵ Solomon nug hibaitta, nug Israel danab ah oh itittak ena madatta, nug aum.

⁵⁶ “Ig Yawe binag humatu! Nug ig Israel, nuhikkud danab ah, Nug nai ana qakkom, amubia Nug ig maɗoɗ mekkom. Nug nuhig nai qakkak ena oh Moses, nuhig maɗi nid, nug oɗeppa ihinignu mattiom amu, nug nai amu oh hamu laa ii mattiom. Iitta. Nug nai amu oh, nug aum bia heum.

⁵⁷ Da Yawe, ihinig Kayak, Nug ig mamenkad aɗi atognoattette oidppig, amubia ig ele oignignu, Nug ig ii uuigmanu ool daatte.

⁵⁸ Da Nug heeb, ihinig dabmak oh nuhigppa ukkeb, geha ig oonig Nug mettota, ib ena nuhig oh ig amuppa oignignu, amu haknunab anak nuhig oh, amu ɗo iɗu iɗu oh ele Nug ig mamenkad aɗi mattom amu, ig amu dim lamidkkunignu ele ool daatte.

⁵⁹ Da gemu unuqittak Nug noobppa hemi amu, da nai amu amunppa, tuqan ele Nug daugppa dayebeb, Nug heeb, da, nuhig maɗi nid, amu danab ah nuhikkud Israel ele, ig oh Kayaknu ehanittak deɗ deɗ attem attem godeppa aognignu, ool daatte.

⁶⁰ Amunu diig am, wan ohppan danab ah oh ag geha, Yawe Nug nukka Nug am Kayak genab, amu kayak laa Nug bia laa ii daatte dooglagnu daatte.

⁶¹ Aria, gemu amu da ag Israel, ag haen oh ag meulag ohppa Yawe, ihinig Kayak, ag Nug waappaib daaglagnu, ag haen oh ɠagattag daanna, nuhig ɗo nai, nuhig haknunab anaknu nai ele, gemu hetteb imu bia hekkulagnu ool daatte,” awa aum.

Ag mettid lag amu Yawenu tituanna medappig

⁶² Amu dimppa amu, king, Israel danab ah ele ag doɗ manadna, Yawe medappig.

⁶³ Solomon nug laippu dayaknu ofa haaha, nug makau 22,000 manatta mettowa, nug sipsip, meeme ele 120,000 ele manatta mettom. Am Solomon nug mana mettak heum amu, amuppa nug, Israel danab ah ele ag Yawenu mettid lag qeapina, Yawenu tituanna medappig.

⁶⁴ Laa ele, deɗ amuppa King Solomon nug wan huppu nakok laa Yawenu mettid lag odppa, haɗap amu gamagppa wan huppu amu Yawenu tituana mettom. Wan gamag amuppa nug manaknu ofa, amu ee aegnu ofa, amu laippu dayaknu ofanu ittag ele manatta, Yawe mettom. Aɗinu? Bras qaɗab Yawe noobppa dayom amu, qaɗab amu, nuhig okkai am elele iitta, Solomon nug manaknu ofa, amu ee aegnu ofa, amu laippu dayaknu ofanu ittag ele, nug mana mettak amu oh amuppa hekkunu elele iitta.

⁶⁵ Amunu Solomon nug Pehppa Dayaknu Hobul deɗ eblaih aɗit ele heum. Nug, Israel danab ah oh ele ag hobul amu heppig. Israel danab ah huanaknab, Lebo Hamat appanu ukka, Isipnu Oolnu Noak batakppanu uɗin daappig. Ag qagmak amu deɗ eblaih aɗit dayona, tuɗidna, bau laa deɗ eblaih aɗit ele daappig, aakku ag deɗ 14 Yawe, ihinig Kayak, Nug noobppa hobulppa daappig.

⁶⁶ Amu deɗ amu ukka male, deɗ amu dimugppa wagɗe, deɗ amuppa, Solomon nug he, danab ah amu ag oh eɗun, appan appan goppig. Ge, danab ah ag king itittak ena mettona, ag Yawe Nug nuhig maɗi nid Dawit, nuhignu, amu nuhikkud danab ah, ag Israel danab ah amu, Nug ag oh ahilagnu ele keeke ena ohnu dabmenan, gamag ahak okkai doon goppig.