1 King 6 - Nobonob Baibel

Solomon nug Yawenu mettid lag buuom

¹ Solomon nug king ba, Israel gume ukke, maɗ waɗeleppa, kalam ebqak aɗit, ag kalam amu onig Siv atteb, kalam amuppa amu, Solomon nug digma, Yawenu mettid lag buuom. Israel ag Isip uun uɗieg, maɗ 480 uue, Solomon nug Yawenu mettid lag digma buuom.

² Yawenu mettid lag King Solomon buuom ele amu, nuhig elab amu 27 mita, emaitak nuhig am 9 mita amu nuhig attan tak amu 13 mita maha ele.

³ Lag amu odppa amu, ag oo laippu laa, veranda bia heppig. Lag oo amu, nuhig okkai am Yawenu mettid lag, nuhig emaitak am 9 mita, am amubia. Oo amunu elab am 4 mita maha ele.

⁴ Ag lag amu gililppa ulah ippu hadappig. Gililppa ulah ippu lag ooppa amu okkai okkai hadappig. Dimittim amu gililppa ulah ippu naunau hadappig.

⁵ Amu Solomon nug Yawenu mettid lag, heqo laih laih, amu bitobppa ele, nug amuppa lag laa bia tuɗitta heum. Lag amu ooppa, oo anen anen laa ag wanppa daappig. Amu oo anen anen laa, ag wanppanu oo daappig, amu qaɗelagppa daappig. Aria, oo anen anen laa ag gamagppanu oo qaɗelagppa daappig. Wanppanu digma ukka gamagppan oo daattebppan taknu am 2 mita maha ele. Aria, gamagppan oo daatteb, appanu digma, oo attan daattebppa, appa taknu am ele 2 mita maha ele.

⁶ Lag amu wanppa dayom am emaitak 2 mita, 20 sentimita ele. Oo amu qaɗeppa daappig amu, emaitak ahilag am 2 mita, 70 sentimita. Amu qaɗeppan oo, ag ahilag emaitak am 3 mita, 10 sentimita ele.

⁷ Ag mettid lag amu haknu men otaɗppig amu, men aoppig, aben amuppa ag men amu otaɗadna bappaidppig. Bappaitteg amu, ag akkan uɗiegeg, ag Yawenu mettid lag heppig. Ag lag amu heppig, haen amuppa amu hama oqotti, hebeb oqotti, am tul laala aenppa hak oh oqottilag laa ii oum.

⁸ Amu lag oo aɗit attan daattep, oo amuppa taknu adqaɗ am lag heqo laih yau uɗitteppanu, appa meppig. Appa ele am wanppan oo ukkaknu od dayom.

⁹ Solomon nug mettid lag amu ⌊koɗokko uɗem ukkak⌋ tona duqakkunu amu, nug ad gikkiak okkai diia, abenppa maatta, amu nug ad sida laa awa, gikkie ne ukke, lag koɗokko plang teppu ele amuppa duqe ukke, lag amu ha malom.

¹⁰ Tatam anak amu, Solomon nug Yawenu mettid lag amu haaha, nug lag amuppa heqo laih ewamppa, oo duqowa, attan tak ahilag anen anen amu oh melemel laippu; amuam 2 mita, 20 sentimita ele. Aria, oo amu oh amunu duug am, ag ad sidappa gikkiak okkai ele. Oo amu oh am Yawenu mettid lag gililppa qataqak daappig.

¹¹ Solomon he, ag Yawenu mettid lag amu heegeg, Yawe Nug nuhig nai imu Solomon mettom.

¹² “Gemu na mettid lag dahil hettem amu, lag amunu da attem. Na dahil ɗo iɗu iɗu dim lamidna, dahil haknunab anak oh ele dabmettan dim lamidppe amu, am da anukka na mamen Dawit nug amegppa nai ain qakkami amu, da anam hekkul.

¹³ Ele amu, da Israel danab ah oolagppa daakkul. Da ag ii uuadpa!” awa aum.

¹⁴ Aakku Solomon nug Yawenu mettid lag akku ha malom.

Ag Yawenu mettid lag oo bala medappig

¹⁵ Yawenu mettid lag ooppa amu, Solomon nug ad sida awa, men gilil amu tonom. Honap oo duqakppanu nug digma, me ukke, gilil amu tone ukke, attan hol waappa, amu oh tonom. Amu nug ad painnu plang awa, men wan qaɗeppa meum, aguppa oiglagnu amu, nug men amu plang amuppa tonom.

^16-17 Nug Yawenu mettid lag ooppa oo okkai amu makkula, gilil heum. Oo laa ooppanab amu, ag oo amunu, “Oo Gunnab Ele,” atteb. Nuhig elab am 9 mita. Aria, oo laa, amuam Yawenu mettid lag oo ooppanab iitta, amu onig am oo Gun Ele, oo amunu elab am 18 mita. Nug gilil oo aɗit gamagppa makkula heum, amuam ad sidanu plangppa heum. Nug gilil am he ta, hol diigppa batom.

¹⁸ Nug ad sidanu plangppa lag amu ooppanu men gilil oh tonom amunu, danab ag men amu ii anidppig. Ag ad sida plang amu qaɗeppa bala mappatak dottolkad, amu gub dottolkad laala otaɗadppig.

¹⁹ Solomon nug Yawenu mettid lag oo ooppanab, am Oo Gunnab Ele, nug amuppa Yawenu Tituanak Nainu Kunup kontrak inak ele mekkulagnu babaittom.

²⁰ Amu Oo Gunnab Ele, amunu melemel oh am iɗu laippu, elab nuhig amu 9 mita maha ele, emaitak nuhig ele 9 mita maha ele, amu elab attan tak nuhig am ele 9 mita maha ele. Nug gol ena dubuttid iitta eleppa oo amunu gililnu plang qaɗeppa ma tonom. Oo amunu od daatte, amu guguittak amu qaɗab laa ad sidanu plangppa heum. Qaɗab amu ele, nuhig plang am golppa tonom.

²¹ Nug amu tonowa, nug lag amunu Oo Gun Ele, aben amunu gililnu plang qaɗeppa gol ena dubuttid iitta eleppa tonom. Nug sen gol ele ha, Oo Gunnab Ele, amu odppa mayatte neppig. Amunu gilil ele amu, nug gol awa tonom.

²² Nug Yawenu mettid lag ooppan oo ohnu gililnu plang, qaɗabnu plang ele qaɗeppa gol maatta tonom.

^23-26 Solomon nug ad olip awa, amuppa engel okkai-kerubim dottog aɗit, Oo Gunnab Ele amuppa mateb daaglahnu haatom. Elab ahilahnu melemel am laippu, 4 mita maha ele. Anttak ahilah ele amu iɗu laippu. Aa haulah elab am melemel laippu, amu 2 mita, 25 sentimita ele amunu, haug laih noob ukka, haug laih noob yom am 4 mita maha ele. Aa oh, anttak ahilah, okkai ahilah oh laippunab. Amunu kerubim anen anen elab ahilah attan amu 4 mita maha ele.

²⁷ Nug engel okkai-kerubim aɗit dottolah amu otaɗa malowa, nug Yawenu mettid lag Oo Gunnab Ele amuppa qappalate daapiɗ. Engel dottog laa amu daye, haug laih amu ukka, gilil laih naɗiap-ppa amu ye dayom. Aria, engel dottog laa amu laih nanehppanu qappe daye, haug laih ukke, gilil nanehppanu ye dayom. Aa haulah laih amu mateh, gilil laih laih aɗalateh, lag gamagppanab haug aɗit aa uɗieh, haug noob laa am haug noob laa ele nug yaapiɗ.

²⁸ Kerubim aɗit dottolah amu ele nug golppa tonom.

²⁹ Nug Yawenu mettid lag oo aɗit, am Oo Gunnab Ele, am oo laa ooppanab iitta amu, nug oo amu bala mettom. Amuam nug lag oo aɗit amunu gililppa engel okkai-kerubim dottog, ad det dottog, am bala mappatak dottog ele otaɗattom.

³⁰ Lag oo aɗit amu oh tappa oiyaknu gumun, amu oh nug golppa tonattom.

³¹ Amu Oo Gunnab Ele, amunu od am nug ad olipnu plangppa od aɗit laih laih doya manataknu, matulataknu ele haata, od oɗeppa aihatom. Od aɗit amunu ukku anen anen am guhig tanig ele.

³² Oo amunu odppa amu, nug engel okkai-kerubim dottog, ad det dottog, am bala mappatak dottog ele otaɗatta, nug golppa od, kerubim dottolag, ad det dottolag, ⌊bala mappatak dottolag⌋ ele tonattom.

³³ Lag Oo Gun Elenu od oɗenu amu, nug heum bia appa nug od ukku amu ad olipnu plangppa heum. Od ukku amuam guhig waɗele.

³⁴ Nug ad painnu plangppa od aɗit, heqo laih laih daaglahnu haatom, amge od anen anen am laih aɗit, gamagppa hinsis ele amunu, od matulak dayaya, laih am eɗua, layag qaɗeppa daakkunu elele. Od aɗit anen anen ohppa amu od manaknu, matulaknu ele.

³⁵ Od amuppa nug engel okkai-kerubim dottog, ad det dottog, am bala mappatak dottog otaɗattowa, nug gol laa awa, hamappa qeeqe, gol am bala amu tonatta auta awom.

³⁶ Amu nug lag amunu talilittaknu aɗ ooppan haɗap daakkunu haaha, nug men otaɗa babaittak ele amu, nug amu akka, huu ewam, laa am laa qaɗeppa mak amu, maatte ukke, nug men aɗ amu attan ad sidanu plang gikkiak okkai ele me ukkom.

³⁷ Ag Yawenu mettid lag amu, Solomon nug king dayom, nuhig maɗ waɗeleppa, maɗ amuppa kalam aɗitppa ag digmena hena, lag ukku meppig. Kalam ebqak aɗit amu onig am “Siv”.

³⁸ Danab uɗat amu heppig amu, ag maɗ eblaih aɗit uɗat heeg ukke, lag amu heppig. Amu Solomon king dayeye, maɗ 11ppa, kalam ebqak eblaih ewam ele, kalam amuppa, ag lag amu hena malappig. Kalam ebqak eblaih ewam ele, kalam amunu onig am “Bul”. Kalam amuppa ag lagnu uɗat oh hena malappig. Ag lagnu keeke oh Solomon aum bia, ag hena bappaidna, autna aon, malappig.