1 King 5 - Nobonob Baibel

Solomon nug Yawenu mettid lag hekkunu keeke babaittom

¹ Amu aab okkai Tair dilag king Hiram nug anukka Dawitnu layam ena dayom, nug Solomon nug king daakkunu goɗen gokkaɗakppa tituanak awa, nug mameg Dawit abenabppa king ba daatte, nug amu doyowa, diig aɗit amunu nug nuhikkud ehanittak anuqak danab laala maatte, ag Solomon anidkkulagnu uɗippig.

² Ag uɗin, Solomon anitteg amu, Solomon nug nai inam Hiramnu me ukkom.

³ “Na da mamel Dawit, nug king dayaya heum amu, na doottem. Wan Israel taliliak daatteb, ag ahan ban heegeg, nug amu dilagppa ban haaha, amuppa nug mettid lag, Yawe, nuhig Kayak, Nug onig amuppa daakkunu ii heum. Amu nuhig dabmak am inam dayom. Nug Yawe ameg meeb, Yawe Nug kekeɗ tabatteb noppeg, amu dimppa nug Yawenu mettid lag buukku. Nug anam dabmeum. Nug anam dabme, Yawe ehanitte, nug kekeɗ nuhikkud oh tappalatte noppig, ⌊amge haen amuppa Yawe nug mettid lag nuhig buukkunu aib aum. Nug hekkunu aib aum, amge Nug nug bekka buukkunu aum. Aria da am nug bekka amu,⌋

⁴ gemu Yawe, Kayak dahil, Nug maɗoɗ haen ena da meɗa he, wan laa oh ag ig ele ena daattem, uug laa ele iitta

⁵ amunu, gemu da mettid lag laa, Yawe, dahil Kayak, Nug onig amuppa daakkunu buukkulnu hettem. Yawe Nug anukka da mamel, nug bekkanu nug amegppa nai aum am inam. ‘Da geha heppi, nahip nid laa na abenamppa king dayaya, amu nug geha mettid lag dahil, da onil amuppa daakkunu buukku.’ Yawe Nug nai anam aum amunu, gemu da Nug laug amu buukkulnu hettem.

⁶ Anam amunu, na da ehaniɗkkutnu na oɗ medattem. Nahipad uɗat nid, Saidonnu amu, ag na appe, ag Lebanonnu qaukoppa gona, ad sida oadppeg, da lag amu hekkulnu ool daatte. Dahilad danab ag nahipad ehanadkkulagnuib heppi gokkulag. Amu da nahipad uɗat nid uɗat nob men doɗo gane ag madakkulnu appe amu, da anam madakkul. Aɗinu? Na doottem bia, Saidon danab ag am ad wattaknu doyak okkai, laa eɗattak ele.” Solomon nug nai anam me ukkom.

⁷ Hiram nug Solomonnu oɗmak amu doya, nug nai amunu ooppa enanagnab doya, nug inam aum. “Gemu ig Yawe amegppa, ‘Ena heme,’ ata, Nug binag mekkunig. Aɗinu? Nug Dawitnu nid imu, nug doyak dabmak ena ele Dawit abenabppa daakkunu, nug danab ah huu okkainab, ɠagattag ele imu gumadkkunu Dawit abenabppa meum,” awa aum.

⁸ Aakku Hiram nug nai amu eɗua nob me, Solomon toppa ukke, aum. “Da nahip nai amu doye, ‘Ena,’ awe attem. Da geha na oot daatte bia ad sida, am ad pain ele awe meppi gokku,” awa aum.

⁹ Nug anam anana amu, nug nai tuɗitta aum. “Dahilad danab ag Lebanon qaukoppanu ad oadna, eeɗadna, yu ihippa nona, yuppa buɗiadppeg noppeg, ag yuppa akkan ehagna, eeɗadna gona, na ad mekkulagnu aben tituankkutppa meppeg, appa dahilad danab ag muɗi uhuqadppeg, nahipad danab ag ad amu aoglag. Da amu hekkulnu amu, na keeke laippu aakkuib hekkutnu ool daatte. Amuam na dahilad dilag ee meppe uɗikkunu ool daatte,” awa aum.

¹⁰ Aakku ib amuppa amu, Hiram nug Solomon oo dayom bia ad sida, ad pain ele awa mettom.

¹¹ Amu Solomon nug Hiram wit aeg, uug nuhig 2,000,000 kilogram, amu 400,000 lita olip goɗen ena ele maɗ ohppa medattom. Ee amuam Hiram, nug danab nug ele daatteb ele lakkulagnu madattom.

¹² Am Yawe Nug Solomon amegppa nai ana qakkom bia, Nug doyak dabmak ena ele Solomon mettom, amunu Solomon, Hiram ele aa gamalahppa maɗoɗ ena dayom. King aɗit aa gamalahppa kekeɗ kobol laa ii daamanu, aa nug tituanya nai qagapiɗ.

¹³ King Solomon nug Israel danab 30,000, danab amu ag ɗo waappa kingnu uɗat haknuib daappig amu, ag Saidon danab ehanadppeg, ag ad awaknu uɗat hekkulagnu diiom.

¹⁴ Solomon nug danab amu huu ameg ewam oppatom; huu ameg ewam amu anen anen oh ag danab 10,000 ele. Amunu kalam ohppa huu ameg laippu ag gona kalam laippu uɗat heppig. Aria, ag kalam laippu uɗat hewona, ag eɗun uɗippig. Amu huu ameg laa goppig ele ag daanna, uɗat heppig. Huu ameg aɗit amu, ag uɗatppa ii daaegeg, huu ameg laa ag uɗat amu heppig. Ag anam baolinna heppig. Maɗi nid amu ag kalam laippu Lebanon daanna, kalam aɗit Israel wanppa daappig. Danab amu ag ɗo waappa kingnu uɗat haknuib daappig, ahilag gumattak danab amu, nug danab onig Adoniram.

¹⁵ Laa amu, Solomon nug danab 80,000 laa diiom, ag am atu qaukoppa gona, men otaɗadkkulagnu diiom. Aria, nug danab 70,000 laa ag men amu mawadkkulagnu diiom.

¹⁶ Nug danab amu, uɗat amu ele gumadkkulagnu gumak danab 3,300 ele otiom.

¹⁷ King Solomon nug haknunab aum amunu, ag Yawenu mettid lagnu men ukku unuqag men otaɗa babaittakppa hewona, amu qaɗeppa lag hekkulagnu men otaɗa babaittak danab ag gona, men awaknu abenppa men maha okkai okkai anam bappaidppig.

¹⁸ Uɗat amu haknu doyak danab Solomonnu, Hiramnu, amu laa Gebalnu ele, ag lag haknu men amu otaɗadna bappaidna, aria lag haknu plang ele gikkiadna bappaidppig.