1 King 4 - Nobonob Baibel

King Solomonnu ehanittak anuqak danab oh amu gawana oh ele

¹ King Solomon nug Israel oh gumom.

² Imuam Solomonnu ehanittak anuqak danab onilag iikku: Sadok bekka Asaria, nug am mana mettak danab.

³ Sisa bekoɗ aɗit Elihorep, Ahaiya ele, aa nai yaak danab daapiɗ. Ahilut bekka Jehosapat nug yaak danab dayom.

⁴ Jehoiada bekka Benaia nug am ban daup ikki anuqak. Sadok, Abiatar ele aa amu mana mettak danab.

⁵ Natan bekka Asaria nug am wan obatak gumak danab, amu dilag gumak ikki anuqak. Natan bekka Sabut, nug am mana mettak danab, amu nug ele kingnu ulum mettak danab.

⁶ Ahisar nug am kingnu lag enanagnab, appanu keeke oh, appan maɗi nid oh ele dilag gumak danab. Abda bekka Adoniram, nug am danab ag ɗo waappa kingnu uɗat haknuib daappig amu, nug am, amu dilag gumak ikki anuqak.

⁷ Solomon nug gawana 12 Israel dilag wan obatak anen anen gumaglagnu otialattom. Danab amu ag ee, wan obatak ahilag, amuppanu ag aon meppeg, Jerusalem ukkeb, King Solomon nug baekkudppa ele ag lakkulagnu hanhan hedappig. Wan obatak laanu okkai nug kalam laappa nuhikkud danab ah dilagppa ee awa, nug ee amu Jerusalem me ukkom. Laa nug kalam laappa me ukkom. Ag oh anam heeg ukke, kalam 12 male, ag baula digmeppig.

⁸ Gawana amu ag onilag am: Benhur, nug am Epraim wanppa, qauko qauko daatteb, nug wan amu gumom.

⁹ Bendeker, nug am aab Makas, Salbim, Betsemes, Elon Bethanan ele, amu wan aab waɗele amu taliliattak daatteb, amu oh gumom.

¹⁰ Benheset, nug am aab Arubot, Soko amu Heper ele, amu wan aab ewam amu taliliattak daatteb, amu oh gumom.

¹¹ Ben Abinadap, nug Solomon aɗeg laa onig Tapat, nug awom, nug am aab Napot Dor, amu wan aab amu taliliom ele, amu gumom.

¹² Ahilut bekka Bana, nug am aab Tanak, Megido amu Betsan ele, amu wan aab ewam amu taliliattak daatteb, amu gumom, amge nug Betsannu wan taliliak amu nug laihigib gumom. Laih nug gumom am wan Saretan guguittak, Jesrilnu yau uɗitteppanu, laih amu, aria Betsannu ukka Abel Mehola, ukka Jokmeam batak.

¹³ Bengeber, nug am aab Ramot, Gileat wanppanu, amu wan aab amu taliliom ele gumaama, nug Jair ⌊buɗubppan⌋ aab ele gumattom. Jair nug am Manase bekka. Am aab amu oh ele Gileat wanppa daatteb. Amu laih Argob, Basan wanppa daatte, amu ele gumom. Am laih appa amu, aab okkai 60 daatteb; amu oh am aɗ itak ele, od oɗeppa od, aria od manak qaknu keeke brasppa hak ele daatteb.

¹⁴ Ido bekka Ahinadap, nug am aab Mahanaim, wan aab amu taliliom ele, amu gumom.

¹⁵ Ahimas, nug Naptali buɗub dilag wan gumom. Nug am Solomon aɗeg laa, Basemat awom.

¹⁶ Husai bekka Bana, nug am Aser buɗub dilag wan gumaama, nug Alot ele gumom.

¹⁷ Parua bekka Jehosapat, nug am Isakar buɗub, amu dilag wan gumom.

¹⁸ Ela bekka Simei, nug am Benyamin buɗub dilag wan gumom.

¹⁹ Uri bekka Geber, nug am wan obatak Gileat gumom. Wan obatak amuam anukka Amo danab, ag ahilag King Sihon ele, ag daadppig. Amu Basan danab, amu ahilag King Og ele ag ele wan amuppa daadppig. Amge gemu Geba nukka wan obatak amu gumom. Danab amu ag wan obatak anen anen dilag anam daappig, amu laippu laa nug amu oh dilag anuqak danab dayom.

Solomonnu ɗo maɗoɗ

²⁰ Juda, Israel ele ag am appatna, danab ah huanak, kuɗumnab daappig. Ebqak ahilag am kuɗumnab, am abuɗ yu ihippa daatte, amubia. Ag ee, le ele, elele lanana, gamag ahak ele ena daappig.

²¹ Solomon nug ɗo maɗoɗ laala dilag king ele dayom; ɗo maɗoɗ amu gumomnu tom heqo laih aam bedeppanu am, le Yupretis, appa. Aam nodeppa Pilistia dilag wanppa noum. Tom laa yau uɗitteppanu am Isip dilag tom. Wan amu oh en takis bia Solomon mettanna, nug waappa daaegeg ukke, nug mauhe batak.

²² Deɗ ohppa Solomon nug ee inam aottom. Plaua enanag, uug nuhig am 6,000 kilogram, amu plaua ena aottom, uug nuhig am 3,000 kilogram.

²³ Amu awawa, nug makau eblaih tanig ele aɗppa bekkadttappig ele, amu makau 20 dad okkaippa daan, gikkiɗah lappig ele awom. Laa amu, nug sipsip, meeme ele, ebqak ahilag 100, nug amu ele awa, nug doɗ iɗu iɗu laa, amuam dia, gasel, dia diig laa, amu ai okkai ittalkad ele, nug amu ele awom.

²⁴ Solomon ⌊nug wan oh Israel guguittak daappig amu gume ukka, le Yupretis laih aam bedeppa batak, uɗat amu haknu, am nug ehanittak danab kuɗumnab,⌋ amunu nug keeke amu oh aottom. Nuhig wan gumak tom amu aab Tipsa, le Yupretis appa digma ukka, aab Gasa, laih aam nodeppa batom. King laih appanu oh ag Solomon waappa daappig. Israel wan ohppa, am maɗoɗib dayom.

²⁵ Haen Solomon nug king dayeye amu, Juda danab ah, am Israel danab ah ele, aab onig Dan, appanu ukka ukka, Berseba aabppa batak, ag oh baɗak iittappa daappig. Amunu danab oh anen anen ag ahilag ad fig, amu muɗi grep ele waappa daanna, ag gumappig. Haen amuppa keeke eheɗ laa ahilagppa ii beum. Iitta.

²⁶ Solomon nug hos bannu karis eeɗadtteb ele, nug hos amu maadppeg daaglagnu lag kuɗum ele, amu ag lag amu ooppa hos maatteg daappig. Lag oo amu oh am 4,000, amu anen anen am hos ele. Hos 12,000 ag daappig.

²⁷ Wan obatak laib laib ohppa danab anuqak daappig, ag haen oh kalam anen anen ahilag haen mattak, amuppa ag ee aon gona, King Solomon medattappig. Ee amuam king, amu nuhikkud danab oh nug ele daatteb amu, ee amuam ag oh lakkulagnu. Danab anuqak amu ag ahilag uɗat ena heppig amunu, king nug haen laa keeke laanu tutu laa ii dayom.

²⁸ Laa ele ag hos, bannu karis eeɗaknu, amu uɗatnu hos ele dilag ee, keeke gane gane awa ukkaknu anak dayom bia, aben adeppa maknu anak ele dayom, ag amuppa, aon goppig; amuam ag bali aeg, am wit keeke gumu qaɗaiettak.

Solomonnu doyak dabmak ena ele

²⁹ Kayak Nug doyak dabmak ena ele huanak Solomon metta, Nug dabmak meu unuqagnu okkainab, amu diignu doyak tutukku ele mettom. Nuhig doyak amu oh am yu ihippa abuɗ niitte, amubia amunu, danab laa ebqekkunu elele iitta.

³⁰ Solomon nug doyak, dabmak ena ele amu okkainab, aam bedeppanu doyak dabmak ena ele danab, amu dilag doyak oh eɗitta, Isip dilag doyak dabmak ena ele danab, amu dilag doyak oh ele eɗittom.

³¹ Solomonnu doyak dabmak ena ele am wanppan danab oh dilag doyak dabmak ena ele eɗattom. Nug Esra buɗub Etan, nuhig doyak dabmak ena ele eɗitta, am nuhig doyak dabmak ena ele am Heman, Kalkol, Darda ele, ag Mahol bekkod, nuhig doyak dabmak ena ele ahilag eɗittom. Am King Solomon onig okkai ahe, wan oh Israel, Juda ele taliliattak daappig amu, appan danab ag dooppig.

³² Haen amuppa Solomon nug oiyak ehanittaknu nai tutu 3,000 anam yowa, ahi 1,005 ele yom.

³³ Nug keeke iɗu iɗu kuɗum wanppa beppig daaegeg anadttem ele, nug amunu ippunittak nai mattiom. Nuhig ippunittak nai nug mattiom ele, amu oh am ad sida okkai okkai Lebanonnu, ukka ukka ad nakok laa onig hisop, men aɗ giɗoppanu bette ele, nug amunu oh ippunittak nai mattiom. Laa amu nug doɗ wanppa oitteb, ai, peɗi, am yuppa kakai dilagppa ele ippunittak nai mattiom.

³⁴ Wanppan wan ohppan king ag Solomon, nug nuhig doyak dabmak ena elenu dooppig amu, ag ahilkad danab laala Solomonnu doyak dabmak ena ele dooglagnu maatteg uɗippig.