1 King 3 - Nobonob Baibel

Solomon nug Kayak doyak dabmak ena ele nug medakkunu unuqittom

¹ Am Solomon nug Isip dilag king Paro ele aa nug tituanpiɗ. Wan aɗit amu, Israel wan am Isip wan ele, aa ban ii hemaya, ena, hamu daaglahnu, aa amunu anam hepiɗ. Aa tituanak amu heya, Solomon nug Paro aɗeg nuhig ah daakkunu awom. Am Solomon nug ah amu awa, nug omala, Dawitnu Aab, appa uɗie dayom. Nug ah amu awa uɗie, nug appa dayeye ukke, Solomon nug nuhig lag enanagnab ha malowa, nug Yawenu mettid lag ha malowa, amu nug Jerusalem aɗub, Jerusalem talilitta daakkunu ele ita male ⌊ukke, ah amunu laug ele ha male, ah amu nug lag amuppa ta,⌋ haen amuppa nug dayomppa dayak am batom.

² Amu ii malak haenppa amu, ag Yawenu mettid lag, Yawe onig amuppa daakkunu ii buuppig amunu, danab ag Yawenu mana mettak hekkulagnu, ag gona, aabaabppanu mettid lag nakokppa mana mettak henana, Yawe medappig.

³ Am Solomon nug Yawenu oo mauhehe, kobol ena oh dim lamittatta, mameg Dawit aum bia heum. Amge Solomon nug ele aabaabppanu mettid lag nakokppa doɗ manatta, Yawe medatta, nug ele kalu danab ile muttuɗig enanag bette ele appa mana, Yawe mettom.

⁴ Gibeon, aab amuppa amu, aabppanu mettid lag nakok anuqak aguppa dayom amunu, deɗ laa Solomon nug mana mettak hekkunu Gibeon ukkom. Ukka, nug doɗ 1,000 aqa, qaɗabppa manaknu ofa haaha manatta, Yawe mettom.

⁵ Solomon nug anam ha, nug tuqan Gibeon appa niieye, Yawe Nug tul niiakppa gumitta na, amu Kayak Nug aum. “Na aɗi keeke da medakkulnu oot hette amu, na appe doyei!” awa aum.

⁶ Kayak Nug anam a amu, Solomon nug aum. “Da mamel Dawit, nahip maɗi nid amu, nug nahipnu oo metta ii uuak kobol dim lamittatta, nug genab tutukku hak kobol ele heum amunu, na oo mauhaknab kobol okkainab nuhignu doon dim lamidme. Am gemu ele anamib na nuhignu oo mauhaknab doonna, na hee, da, nug bekka, da nug abenabppa king daattem.

⁷ O Yawe, dahil Kayak, na da, nahip maɗi nid, na da awiɗna hee, da mamel abenabppa king daattem, amge da am nid nakok hamu laa bia daattem amunu, da attem hekkul? Da kobol aɗippa danab ah gumadkkulnu amu, da ii doottem; elele iitta.

⁸ Da, nahip maɗi nid, da gemu danab ah ameg imu oolagppa iikku daattem. Ag am nahipad, na ag nahipad tituanadme daatteb. Ag am huanaknab, ebaqaknu elele iitta.

⁹ Anam amunu, da, nahip maɗi nid, da danab ah imu gumadkkulnu, da aɗi keeke am ena, aɗi keeke am nau ele dookkulnu, na da oo maittak awaknu ehah meɗakkutnu ool daye, oɗ medattem. Aɗinu? Auntai nug nukka, nuhig doyakppa danab ah huanak imu ena, elele gumadkkunu elele?” awa aum.

¹⁰ Am Naɗi Nug Solomon nug amunu oɗ meum doya, Nug Solomonnu oo ena doyom.

¹¹ Aakku Kayak Nug Solomon amegppa aum. “Na da heppi, na wanppa bauklel haen elab daakkutnu oɗ ii meɗame. Na da enub kuɗum medakkulnu ele oɗ ii meɗame. Amu na da nahipad kekeɗ amu, da eheɗ hadappi mauhkkulagnu ele oɗ ii meɗame. Iitta! Na nahip gumak uɗat henana, na nai doya mala hettoɗia epeɗia elele mettak kobol elele hekkutnu, oo maittak awaknu ehah medakkulnu oɗ meɗame

¹² amunu, na da oɗ meɗame bia, da na doyak dabmak ena ele, amu oo maittak awaknu ehah ele medakkul. Anam amu, am inam daakku. Anukka danab laa nug doyak dabmak ena ele, oo maittak awaknu ehah ele anam amu, laa ii awom. Iitta! Aria, dimppa ele danab laa nug aokku, nug amubia ii aoma. Iitta.

¹³ Laa ele, da geha keeke laala na amunu da ii oɗ meɗame ele, da amu ele na medakkul. Medappi, na geha en okkai aon, amu binan okkai ele aon daakkut. Aria, na anam daakkut amu, na bau daattem, haen amuppa amu, king laa nug na daakkut, laa anam bia ii daama. Iitta.

¹⁴ Am na da ib ena oh da tituanadmi, ɗo nai dahil oh, amu dahil haknunab nai ele, na amu dim lamidkkut dayeb, na mamen Dawit heum amubia, amu da heppi, na wanppa haen elab daakkut,” awa aum.

¹⁵ Solomon nug niia aha, nug doyom, nug tul niiakppa Kayak Nug nug amegppa nai mattie doyom. Doya, Solomon nug aha, eɗua Jerusalem ukka, Yawenu Tituanak Nainu Kunup kontrak inak ele noobppa hibaitta dayom. Amu nug manaknu ofa hatta, nug laippu dayaknu ofa ele hattom. Mana mettak hewowa, dimppa amu nug ee okkai nuhikkud ehanittak anuqak danab dilag ele heum.

Kayak Nug Solomon doyak dabmak ena ele mette, nug hettoɗiakppa hettoɗiak haaha, tutukku hettoɗiom

¹⁶ Aria, deɗ laa ib baag ah aɗit laa king gumidya, ahilah uug elele mettaglagnu uɗipiɗ.

¹⁷ Uɗiya, ah laa nug aum. “O naɗi dahil, da ah imu ele i lag laippuppa daattep. Da nid menumi, haen amu nug da ele oh daaɗa, da nid menumi.

¹⁸ Amu deɗ ewam ukke amu, ah imu nug ele nid danab menuom. Laa lag amuppa laa ii daappig. Iitta! I iya aakkuib lag amuppa daamuɗ.

¹⁹ I anam daaɗɗa, tuqanppa i niiɗa amu, ah imu nug nid nuhig amu, nug niiaya tone mauhom.

²⁰ Am tuqan tugmag da, nahip maɗi ah, da niiiyi, nug dahil nid, dahil betppanu awa, nuhig betppa mewowa, nuhig nid amu, nug dahil betppa meum.

²¹ Aria, da buttua ahe, nid dahil huh medakkulnu hemi, amge da anidmi, nid amu mauhom. Aakku da baula nid amu pehetten itale anidmi; nid amu da ii menumi,” awa aum.

²² Ah tatamnu nug anam aum, amge ah laa nug aum. “Iitta! Nid bau daatte imu, am nid da menumi. Nid mauhom am nahip nid,” awa aum. Amge ah anuqom nug aum. “Iitta. Nid mauhak am nahip, bau daatte imuam nid dahil,” awa aum. Aakku ah aɗit aa ahaya, king noobppa anam aeh ona, aeh do hepiɗ.

²³ Aa anam heeheh amu, King Solomon nug amelahppa aum. “Aa oh inam attep. ‘Nid bau daatte am dahil.’ Aa anam ayaya amu, aa oh ele attep. ‘Nid mauhom am ah laa umunu nid,’ aoya attep,” awa aum.

²⁴ Aakku King Solomon nug maɗi nid amelagppa qep elab laa aon dokkulagnu aum. Nug anam a, ag gona, qep elab aon doeg,

²⁵ nug aum. “Nid bau daatte amu, ag aon, nid beɗu gamagppa oppatna, aɗit mettan, nidnu laih amu aon, ah laa mettona, laih amu ah laa metteg!” awa aum.

²⁶ Solomon nug anam aum, amge nid anignab nug nid nuhignu oo bodoetta le meum amunu, nug king amegppa aum. “O naɗi dahil, na nid amu aib qeme! Nid amu ah umu mette!” awa aum. Amge ah laa am nug aum. “Iitta. Da aib meɗame, nug ele aib mettame. I oh am nid amu ii aomɗa, na nid amu gamagppa oppate!” awa aum.

²⁷ Aa anam aeh amu, King Solomon nug aum. “Nid nakok amu aon, ah anuqom nug metteg! Aib qeppeg mauhom! Ah amu nug am nid nakok anignab aakku,” awa aum.

²⁸ Amu dimppa haen Israel danab ah oh ag King Solomon nug hettoɗiakppa ah aɗit hettoɗiatom amu doona, ag kingnu ebehilag oh bodoetta le mettom. Aɗinu? Ag dooppig, Kayak Nug doyak dabmak ena ele Solomon mette, nug nai doya mala hettoɗia epeɗia elele mettak kobol elele hekkunu elele dayom.