1 King 22 - Nobonob Baibel

Geha Ahap nug mauhkkunu propet Mikaia aum

¹ Israel dilag daup, Aram dilag daup ele ag maɗ ewam bia ag ban ii heppig, hamu ena daappig.

² Aria, maɗ ewam, maɗ amu ooppa amu, Juda dilag king Jehosapat nug ukka, Israel dilag king Ahap anttom.

³ ⌊Amu haen amuppa⌋ Ahap, nug Israel dilag king amu, nug nuhikkud ehanittak anuqak danab amelagppa inam aum. “Ag dootteb, aab Ramot, Gileat wanppanu, aab amuam ihinig, amge Aram ag aoppig. Aab amu Aram dilag king eppegppa daatte, amu aɗinu ig eɗut aognignu, ig keeke laa ii hemut?” awa oɗ mattom.

⁴ Awa oɗ matte amu, aakku Ahap nug Jehosapat oɗ mettom. “Na nahipad ele, am da dahilad ele ig oh aab Ramot, Gileat wanppanu, ig appa banelag gota, ig aab amu eɗut aognigte?” awa oɗ mettom. Oɗ mette, Jehosapat nug Ahap, Israel dilag king, nug oɗeppa awa aum. “Da na ele i laippu daattep. Ihintad danab ele ag anamib aakku, amu ihintad hos ele, ⌊amunu ig ag ele oh gota, ban hekkunig,⌋” awa aum.

⁵ Jehosapat nug Israel dilag king amegppa anam aum, amge nug ele aum. “Amge tatam na Yawe, Nug amunu aɗi attenu oɗ mette!” awa aum.

⁶ Jehosapat nug anam a, aria Ahap, Israel dilag king, nug he, propet danab, ahilag ebqak am 400 anam, ag uɗieg, nug ag oɗ mattom. “Da Ramot, Gileat wanppanu, banelag ukken, aab amu eɗue aokkulte, o iitta da iitai gopa?” awa oɗ mattom. Nug ag anam oɗ matte, ag appig. “Na ahan ukke! Naɗi Nug aab amu na eppenppa mekku,” aon appig.

⁷ Ahapnu propet ag anam appig, amge Jehosapat nug Ahap oɗ metta aum. “Ig nug oɗ mettagnignu amu, Yawenu propet laa gemu ippa ina daattetai, o iittatai?,” awa oɗ mettom.

⁸ Jehosapat nug Ahap anam oɗ mette, Israel dilag king Ahap nug aum. “Laippu laa ig hepput, nug Yawe oɗ metteb, aɗi ab doya, nug ab doognignu elele. Nug am Imla bekka Mikaia, amge da danab amunu nau ninig ele doottem. Aɗinu? Haen oh nug dimppa aɗi bekkunu nai dahilnu da amelppa maditte amu, keeke ena laa bekkunu ii maditte. Iitta. Nug nauib bekkunu atte,” awa aum. Ahap nug anam a, Jehosapat nug aum. “O king, na anam madikkutnu am ena iitta,” awa aum.

⁹ Aa anam awoya, Israel dilag king Ahap nug nuhig ehanittak anuqak danab laa onigppa e uɗie, amegppa aum. “Na paha gona, Imla bekka, propet Mikaia, nug omalna uɗie!” awa aum.

¹⁰ Haen amuppa Israel dilag king, amu Juda dilag king Jehosapat ele, king aɗit amu aa kingnu lamen elab enanag takkadya, sia king ahilahppa, Samaria aɗnu od guguittak ee aeg mumuɗaknu aben dayom amu, aa aguppa daaeheh, propet laa ag aa noolahppa daan, propet nai ahilag madippig.

¹¹ Propet amu ag ahilag nai mattiegeg, ag oolagppan laa, Kenana bekka Sedekaia, nug doɗ qeqeɗi dottog aenppa hak awa, nug aum. “Yawe Nug inam atte. ‘Na imuppa Aram dilag daup yaaladna, yaaladna, oh yaaladna maladkkut,’ awa atte,” awa aum.

¹² Sedekaia nug anam a, propet laa oh ele ag anamib madippig. Ag propet nai inam King Ahap amegppa appig. “Na aab Ramot, Gileat wanppanu baneb gona, ban hena, genabnab genab aab amu na geha aokkut. Yawe Nug geha na ehanitteb, Aram eɗadkkut,” aon appig.

¹³ Amu ehanittak anuqak danab Ahap he, Mikaia aokkun ukkom, amu nug Mikaia omala uɗiom, me haen aa king gumidya ii tepiɗppa danab amu nug Mikaia amegppa aum. “Antte! Propet oh ag king nug geha ban eɗidkkunu maditteb. Laa nug keeke laal ii maditte amunu, na ele kobol ag hetteb, na amubia hena, na nai ena king mette!” awa aum.

¹⁴ Nug anam aum, amge Mikaia nug ehanittak anuqak danab amegppa aum. “Yawe genab bau daatte, genab amubia da Yawe aɗi da amelppa atte amu, da amu aakkuib da madikkulnu elele,” awa aum. “Da keeke laanu madikkulnu elele iitta,” awa aum.

¹⁵ Mikaia nug anam a, aa king daapiɗppa teeh, King Ahap nug Mikaia oɗ mettom. “Mikaia, ig aab Ramot, Gileat wanppanu banelag gota, aab amu ele ban hekkunigte, o iitta, ig iitai gomata?” awa oɗ mettom. Nug anam oɗ mette, Mikaia nug ⌊baag danab daugppa dootte, nug danab amu nug doyaya, nai genab ii maditte, Mikaia baag amuppa⌋ nob ma aum. “Ag aab Ramot, Gileat wanppanu banelag gona, ban hena, genabnab genab aab amu na geha aokkut. Yawe Nug geha na ehanitteb, Aram eɗadkkut,” awa aum.

¹⁶ Mikaia nug anam aum, amge King Ahap nug Mikaia amegppa aum. “Da hei, na Yawenu nai da amelppa akkutnu akkut amu, na Nug genab aɗi aum aakkuib akkutnu nahip nai ɠagattag qena ame. Amu da heppi, na nai amu baubau haen gane awona, na Yawenu nai genabib da amelppa madikkut?” awa aum.

¹⁷ Ahap nug anam a, aria Mikaia nug amegppa aum. “Da matu Israel dilag ban danab ag aben qaukoppa sipsip gumak danab iitta bia hamu matatun gona daaegeg anadmi. Am Yawe Nug inam a doomi. ‘Danab imu ag gumak laa iitta amunu, ag oh anen anen ag laulkadppa, maɗoɗ ele eɗun ukkeg!’ ” awa aum.

¹⁸ Mikaia nai amu mattia male, Israel dilag king Ahap nug nai amu doya, nug King Jehosapat amegppa inam aum. “Da propet amu haen oh nug dimppa aɗi bekkunu nai dahilnu da amelppa maditte amu, nug keeke ena laa bekkunu ii maditte; nug nauib bekkunu atte iite ami?” awa oɗ mettom.

¹⁹ Ahap nug Jehosapat amegppa anam a amu, Mikaia nug nai amu tuɗitta, nug aum. “Na daut human daappe, geha da Yawenu nai appi doye! Yawe Nug sia king nuhigppa dayeye, nuhikkud engel hab aabppa daatteb oh ag Nug talilidna, naɗiap-ppa nanehppa ele hippaidna daaegeg anadmi.

²⁰ Ag anam daaegeg amu, Yawe Nug engel oɗ matta inam aum. ‘Aun nug geha Ahap oo eeɗeb, geha nug aab Ramot, Gileat wanppanu, banelag ukka, banppa mauhkku?’ awa oɗ matta aum. Nug anam a amu, engel laala anen anen ahilag dabmak Yawe amegppa madippig. Laa nug ana male, laa nug laa aum.

²¹ Ag anam heeg ukke, ouɗi laa ukka, Yawe noobppa hibaitta, nug aum. ‘Da geha ukke, Ahap oo eeɗkkul,’ awa aum.

²² Nug anam a amu, Yawe nug oɗ mettom. ‘Na geha gona, Ahap oo attem eeɗkkut?’ awa oɗ mettom. Oɗ mette amu, ouɗi nug Yawe amegppa aum. ‘Da ukken, hambuppuak nai Ahapnu propet oh oɗelagppa mekkul,’ awa aum. Ouɗi amu nug anam a, Yawe Nug aum. ‘Nahip ib amuppa Ahap nug aab Ramot, Gileat wanppanu banelag aha gokku amunu, na ame bia gona he!’ awa aum.” Mikaia nug anam aum.

²³ Mikaia nug anam awowa, nug tutukku Ahap amegppa aum. “Yawe Nug ouɗi nau hambubutte ele amu he, nug uɗia he, nahipad propet imu oh ag na amenppa nai hambubuppig. Yawe Nug na eheɗ aokkutnu mattiom daatte,” awa aum.

²⁴ Mikaia nug anam a, amu Kenana bekka Sedekaia nug Mikaia nai amu Ahap amegppa mattieye doya, nug aha, Mikaia gumitta ukka, hippeg mataɗa, nug aum. “Ouɗi Yawenu uɗiom amu, nug da uuiɗa, ib attem nahip-ppa ukka, nai amu na amenppa aum?” awa oɗ mettom.

²⁵ Sedekaia nug anam a, Mikaia nug nob ma aum. “Qinob, uug naunab beeb, na lag ooppa uma lokkumak daakkutnu wana daanna, na oɗmak nahipnu nob aakku dookkut,” awa aum.

²⁶ Amu oh ba male, aria King Ahap nug laa amelagppa haknunab aum. “Ag Mikaia aɗan, aon aab okkai gumak danab anuqak Amon, am da bekkal Joas ele gumatna gona,

²⁷ aa amelahppa inam appeg doyeɗ! ‘King nug inam atte. Aa danab imu aoya, maniguittakppa mewoya, bret, le ele nakokib medapeɗ dayebeb ukkeb, ban maleb, da maɗoɗ ele eɗue uɗikkul batak,’ ” awa aum.

²⁸ King nug anam a amu, Mikaia nug eɗua Ahap amegppa aum. “Na maɗoɗ ele eɗun uɗikkut dayeb amu, Yawe Nug da oɗelppa nai ii aum,” awa aum. Nug anam ana, amu nug tuɗitta aum. “Ag danab ah oh, ag dahil nai doyeg!” awa aum.

Kekeɗ laa aab Ramot, Gileat wanppanu, nug appa Ahap qe mauhom

²⁹ Aria, dimppa Israel dilag king Ahap, Juda dilag king Jehosapat ele, aa ahilti daup ele ag oh ahan, aab Ramot, Gileat wanppanu goppig.

³⁰ Amu ban ii digmeumppa, Israel dilag king Ahap nug Jehosapat amegppa inam aum. “Haen ig gota, ban hekkunignu hetata amu, da geha kingnu lamen elab imu baolie, lamen laa mekkul. Meppi, geha kekeɗ ag da ii dooiɗmana, amge na amu, na kingnu lamen elab mekkut,” awa aum. Aakku King Ahap nug lamen laa me, aa banppa gopiɗ.

³¹ Amu ban ii digmeeme, Aram dilag king nug nuhikkud ban daup ikki ban haknu karis gumappig ele, ahilag ebqak am 32 amu, nug ag inam hekkulagnunab ag amelagppa aum. “Ig ban hekkunig, amge ag auntai laa, nug daup okkai, o nug daup hamu, ag ag laa amubia ele ban hekkulagnu dabmak anuqak aib dooppig. Iitta. Ag Israel dilag king Ahap, ag nugnab ele ban hekkulagnu anuqak doyeg!” awa aum.

³² Aram dilag king nug anam a, ban daup ikki ban haknu karis gumappig ele ag gona, ban henana, haen ag Jehosapat anidna, ag, “Genab, umu am Israel dilag king Ahap,” dabmena, ag eɗun, nug qekkulagnu ban heegeg, Jehosapat nug huan baag okkaippa e doon, ag dooppig,

³³ nug am Israel dilag king Ahap iitta, amu ag nug tuɗidna, dim ii lamidppig.

³⁴ Amge ban danab ag ban henana, Aram ban danab laa nug lat pimala, lat doɗo hamu e, Israel dilagppa ukka, lat doɗo amu Israel dilag king Ahap beɗu laih, bannu klos me, hauta ii auta awom, giɗo nakoknab dayom amu, lat doɗo giɗo amu awom. Aakku Ahap nug nuhig karis ulum aɗak danab amegppa aum. “Da guittak aomide amunu, paha karis aon eɗuppe, ban aben imu uuɗ goɗu!” awa aum.

³⁵ Amu Aram ban danab, Israel ban danab ele ag deɗ amu ohppa ban huan eheɗ heppig. Amu King Ahap nug deɗ amu ohppa karisppa anam ehanittakppa dayaya nug neekke Aram dilagppa ukke dayeye, nug tiig am nuhig karisppa noum. Tiig neene, anam dayeye ukka, tueb me, Ahap mauhom.

³⁶ Aria, aam nokkunu heehe amu, ban danab ag baalag okkaippa inam aon eppig. “Ig oh eɗut, aab ihinigppa, ihinig wanppa gota, appan appan gotu!” aon eppig.

³⁷ Amu King Ahap nug mauhe amu, ag nug gaɗa aon gona, Samaria appa boumppig.

³⁸ Nuhig karisnu amu, Samaria le ameg nakok amuppa ihaeg, qai ag tiig amu lappig. Le ameg nakok amuam gappai ah ag le laatteb, le ameg amu. Yawe nai mattiom, amu aakku elele mettom.

³⁹ Amu keeke kuɗum laa ele King Ahap heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte. Nug lag enanagnab buua, lag amuppa kobol kobol hoiyak dayomppa elepan aeg babaittak qataqa, aab okkai laalanu aɗ keeke, heum amu, keeke amu ohnu kaya amuppa daatte.

⁴⁰ Ahap mauhe, nug bekka Ahasia nug abenabppa king ba dayom.

Jehosapat nug Juda dilag king dayom

⁴¹ Amu Ahap nug Israel dilag king dayaya, nuhig king dayaknu maɗ waɗeleppa amu, Asa bekka Jehosapat nug Juda dilag king ba dayom.

⁴² Jehosapat nug maɗ 35 dayaya, nug king ba dayom. Nug king ba, nug maɗ 25 Jerusalem appa king dayom. Nug anig am Silhi aɗeg Asubah.

⁴³ Jehosapat nug mameg Asanu kobol, nug amu oh dim lamittom, laa ii apiɗittom; nug Yawenu neekkakppa kobol genab tutukku ele dim lamittom. Amge keeke laippu nug ii heum, nug aabaabppanu mettid lag nakok ii loppaɗattom. Ag anam daaegeg, danab ah ag aben amuppa tuɗidna gona, mana mettak henana, ag appa ele kalu danab ile muttuɗig enanag bette ele manappig.

⁴⁴ Jehosapat nug king dayeye, Israel dilag king, Jehosapat ele aa maɗoɗ daaeheh, Israel wan, Juda wan ele ban laa ii hepiɗ.

⁴⁵ Amu keeke kuɗum laa ele King Jehosapat heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte. Kaya amuppa amu, uɗat ɠagattag oh nug heum, nug wan laalappa ban heum, amu oh amuppa daatte.

⁴⁶ Anukka Jehosapat mameg Asa nug danab ag kayak hambuppuak mettid lag nakokppa danab danab ele gappai kobol heppig amu, nug ag lamattom. Amge laala ag daaegeg, Jehosapat nug amu oh he, ag tuɗidna appa ii daappig.

⁴⁷ Haen amuppa Edom dilag wanppa king laa ii dayom, amunu Juda dilag king nug Edom wan gumakkunu danab otie, danab amu nug gumattom.

⁴⁸ Haen amu King Jehosapat nug a, danab ag uub okkai okkai, ag gona Opir wanppa gol aoglagnu itadppig. Ag itadppig, amge ag ii goppig. Aɗinu? Uub amu oh amu aab okkai Esiongeber guguittak appa nauhppig.

⁴⁹ Am haen amuppa Israel dilag king Ahasia, Ahap bekka, nug Jehosapatnu uub amu nauhppig doya, nug Jehosapat amegppa aum. “Na uub amu eɗun itadppe daappeg, gokkulagnu appe amu, da heppi, dahilad danab ag nahip ele oh gokkulag,” awa aum. Nug anam aum, amge Jehosapat nug amu uuom.

⁵⁰ Dimppa Jehosapat nug mauhe, ag nug Dawitnu Aab, appa nug mamekkud aɗi boumadppigppa boumppig. Jehosapat alag anukkanu am Dawit. Jehosapat nug mauhe amu, nug bekka Jehoram, nug mameg abenabppa king ba dayom.

Ahasia nug Israel dilag king beum

⁵¹ Jehosapat nug Juda dilag king dayaya, nuhig king dayaknu maɗ 17ppa, Ahap bekka Ahasia nug Israel dilag king beum. Nug maɗ aɗit Samaria appa king dayom.

⁵² Nug king dayaya, nug Yawenu neekkakppa eheɗ heum. Nug mameg, anig ele dilah oiyak dim lamitta, nug Nebat bekka Jeroboam hipunin ha he, Israel danab ah ag hipunin amu ele heppig, nug nuhig oiyak ele dim lamittom.

⁵³ Ahasia nug Yawe noobppa hipunin ha, kayak hambuppuak Bal waappa dayaya nug oɗe dim lamitta, nug noobppa dup noa binag meum. Nug kobol amu heehe, Yawe, Israel dilag Kayak, Nug amunu oppoɗi beum. Nug mameg Ahap eheɗ heehe, Yawe Nug oo huana nauhom, amubia nug bekka ele anamib eheɗ heehe, Yawe Nug oo huana nauhom.