1 King 21 - Nobonob Baibel

Nabotnu grep dadnu kaya

¹ Nabot nug am Jesril aabppanu danab laa, amu nuhig grep dad am Israel dilag King Ahapnu lag enanagnab, amu guguittak dayom. Dayeye, haen ban naɗi Aram ele heppig dimppa

² amu, Ahap nug Nabot amegppa inam aum. “Nahip grep dad am dahil lag enanagnab guguittak daatte amunu, na dad amu da meɗakkutnu ool daatte. Meɗappe amu, da amuppa keh ebakkul. Na dad amu meɗakkut dayeb, na meɗappe, am da geha dad laa grep dad nahip amu eɗittak laa na medakkul. O iitta, men doɗo na medakkulnu oot dayeb appe amu, da dad amu daden nob men doɗo amu elele na medakkul,” awa aum.

³ Nug anam aum, amge Nabot nug Ahap amegppa aum. “Wan amu anukkanu da mamelad aɗi dilag daatte, wan amu da gemu aɗe daattem; am da aul. Yawe Nugnab nuhig ɗoppa da danab laa ii medapanu aum ⌊amunu, da na ii medapa⌋,” awa aum.

⁴ Jesril danab Nabot nug anam, “Da mamelad aɗi aulag wan ii medapa,” aum amunu, Ahap doya, nug amya, nug eɗua laugppa Samaria ukka, nuhig niiak abenppa niiaya, oo eɗue, gilil daatteppa ukke niiom; ee lanak uuom.

⁵ Anam niieye dimppa, nug wau Jesebel nug noa antta, oɗ mettom. “Na attem daye, amyan, ee lanak uun niittem?” awa oɗ mettom.

⁶ Nug anam a amu, Ahap nug Jesebel amegppa aum. “Aɗinu? Jesril danab Nabot nug da nai ami amu, nug dahil nai amu ii doyom. Da nuhig grep dad daden mekkulnu ool daye amegppa ami. Nug men doɗo aokkunu oo ii dayeb am, da nug grep dad laa medakkulnu ami, amge Nabot nug dad amu da meɗaknu uuom,” awa aum.

⁷ Ahap nug Jesebel amegppa anam a amu, nug Ahap amegppa aum. “Aun nug Israel wannu king daatte? Nate o iitta danab laatai? Ahan, ee lanan, gaman ahaɗ! Da geha Jesril ted Nabotnu grep dad amu awe, na medakkul,” awa aum.

⁸ Aria, Jesebel nug anam awowa, nug uɗug yaalatte neeg, uɗug yaalattom qaɗeppa amu, nug Ahap onig ya, Ahap doyaknu at stemp-ppa daatte uɗug qaɗeppa ele qataqeum. Nug amu hewowa, nug uɗug amu panie, Jesril ikki danab, anuqak danab ele dilagppa ukkom.

⁹ Uɗugppa nai yaak am inam. “Ag ee ohnu kud ma dayaknu deɗ laa tituanona, ag appeg, deɗ amuppa Jesril danab ah oh qagmeppeg, qagmak amuppa ag Nabot nug appeg, nug qagmak amunu balal anuqak amuppa dayaɗ!

¹⁰ Dayebeb, aria ag danab nau aɗit laa, Nabot daakku, amu guguittak maatppeg daayya, aa Nabot nug Kayak, king ele aa eheɗ laa awaknu anak waappa daaglahnu aum, amu Nabot beɗuppa yaapeɗ, ag doon, dimppa Nabot aon, aab okkai dimittim gona, menppa makkuɗppeg mauhaɗ!” Nug uɗugppa anam yom.

¹¹ Jesebel nug uɗug anam ya panie, Jesrilnu ikki danab, anuqak danab ele ag uɗug amu aon, ebqena anidna, ag Jesebel nai aum, amu oh ag dim lamidna heppig.

¹² Ag ee ohnu kud ma dayak deɗ tituanona, ag danab ah oh onilagppa eeg uɗin qagmeppig. Qagmeeg, ag Nabot aon, dayak aben anuqakppa meeg dayom.

¹³ Meeg dayeye amu, ⌊ag⌋ danab nau aɗit ⌊aeg dooya,⌋ Nabot dayom gukkuidya goya, heɗep neya daayya, aa danab ah oh daaegeg noolagppa daayya, aa Nabot nug Kayak, amu king ele aa eheɗ laa awaknu anak waappa daaglahnu aum apiɗ. Ayaya, Nabot beɗuppa yaapiɗ. Amu danab ah nai amu doon, ag ahan, Nabot aɗan, aon aab okkai dimittim gona, menppa makkuɗeg mauhom.

¹⁴ Dimppa Jesrilnu ikki danab, anuqak danab ele ag keeke heppig amu, ag Jesebel dookkunu nai meeg ukke appig. “Ig Nabot menppa makkuɗut mauhom,” aon appig.

¹⁵ Jesebel nug ag Nabot menppa makkuɗeg mauhomnu nai amu doya, nug paha ukka, Ahap amegppa aum. “Nabot nug ii daatte, nug mauhom. Mauhomde amunu, na gona, grep dad amu awe! Anukka na daden mekkutnu he, nug na medakkunu oo ii dayom,” awa aum.

¹⁶ Aria, haen Ahap nug Nabot mauhom doya nug aha, Nabotnu grep dad amu, nug aokkunu ukkom.

¹⁷ Aria, haen amu Yawe Nug nuhig nai imu propet Elaiya, Tisbe ted, Nug nug mettom.

¹⁸ “Israel dilag king, Ahap, nug Samaria appa king daatte amu, gemu nug aha, Nabotnu grep dad, nug appa ukka appan daatte. Nug dad amu nug aokkunu ukkom.

¹⁹ Amunu na gona, Ahap amegppa inam appe doyaɗ! ‘Da Yawe, da attem. Na Nabot iite qe mauhom? Na nuhig wan amu na yab iite aome?’ Amge da na tutukku amenppa attem. ‘Aben qai ag Nabot tiig lappigppa, aben amuppaib am geha qai ag na tiin ele lakkulag,’ awe attem,” awa aum.

²⁰ Elaiya nug Yawe nai aum amu awa, nug Ahap gumitta ukkom. Ukka te amu, haen Ahap nug Elaiya antta, nug inam amegppa aum. “Kekeɗ dahil na, na eɗun dahilppa bemete?” awa aum. Awa a amu, Elaiya nug aum. “Ao, da na maditte uɗimi. Aɗinu? Na kobol eheɗib nahip ɠagattag ohppa hekkutnu dabmenan oittem. Yawe Nug nuhig neekkakppa kobol amunu am nauib dootte.

²¹ Amu Yawe Nug atte. ‘Antte! Da geha heppi, na, nahip huuppan nid danab bau ukka danab kaino ele Israel oolagppa beppig daatteb amu, laa nug begbeg maɗi nidte, o begbeg maɗi nid iittate amu, ag oh iitta mekkulag.

²² Na hipunin hee, da oppoɗil be, ele amu, nahip hak amuppa Israel danab ah hipunin heegeg uɗie, gemu ele hetteb amunu, da heppi, na baenadppa ag iitta mekkulag. Ag Nebat bekka Jeroboam baekkudppa, amu Ahaiya bekka Basa baekkudppa iitta meppig, ag amubia iitta mekkulag.’

²³ Amu Jesebelnu amu, da Yawe, da inam attem. ‘Haen Jesebel nug Jesril aab okkaippa mauheb, geha qai ag nug beɗu aabnu aɗ daugppa lakkulag,’ awe attem.

²⁴ Aria, Ahap baekkudppa dilagppanu danab laala ag aab okkai ooppa mauhkkulag amu, geha qai ag gaɗalag lakkulag. Laala ag aab okkai dimittim mauhkkulag amu, geha ai ag gaɗalag lakkulag.” Elaiya nug Ahap amegppa anam aum.

²⁵ Haen Ahap nug king dayom amu, Nug Kayaknu neekkakppa genabnab genab nug kobol eheɗib nuhig ɠagattag ohppa hekkunu dabmaama oiya, amu haknu danab laa oh eɗattom. Yawe Nug nuhig neekkakppa kobol amunu am nauib dootte. Aria, nug wau Jesebel amu, nug anam hekkunu duttunak ele heum.

²⁶ Ahap nug Amo danab heppig bia, nug kobol uɗig wak naunab ele haaha, kayak hambuppuak binalag maama dim lamattom. Amo danab ah amu ag wan amuppa, ag tatam daappig, amge Yawe Nug he, Israel ag danab amu lamadppig.

²⁷ Haen Ahap nug Elaiya nai mattiom amu doya, nug eheɗ heum amu doya, nug nuhig lamen patiɗa, nug lamen heɗiag ele awa takka, nug ee ohnu ele kud dayom. Tuqan ele nug lamen heɗiag eleppa niiom. Nug dada danab kobol uua autanab awa, nukka onig qe ne oiyom.

²⁸ Ahap anam he, aria Yawe Nug nuhig nai imu propet Elaiya, Tisbe ted, Nug nug mettom.

²⁹ “Na Ahap hette am anidmete? Nug nukka da noolppa onig qe nette. Nug anam hette amunu, da uug naunab nuhig haenppa heppi ii bema. Iitta. Da nug bekka king dayebeb, da haen amuppa Ahap baegppa, da amu dilagppa amu heppi, ahilagppa bekku,” awa aum.