1 King 20 - Nobonob Baibel

Benhadat nug Samaria banelag ukkom

¹ Aria, haen amuppa amu Benhadat, nug am Aram dilag king, nug daup nuhikkud oh qagmaatta, nug a, king 32 laa, ag nug waappa daanna, nug ehanidppig ele, king amu oh ahilkad daup ele, ahilkad hos, bannu karis ele, ag oh ahaeg, Benhadat aɗi ele ag oh gona, Israel dilag aab okkai Samaria oo mattan, aqaglagnu daan, Israel dilag daup ele ban heppig.

² Ag anam henana, Benhadat nug nai laa nai awa ukkak danab amelagppa a, ag aon aab okkai Samaria ooppa gona, Israel dilag king Ahap amegppa appig. Ag inam appig. “Benhadat nug atte.

³ ‘Nahip silwa, amu nahip gol ele am dahil. Na waatad oolagppanu amu, aun aɗi ag ah enanag ele, ag ele am dahil. Aria, nahipad nid aun aɗi am enanag amu, ag ele am dahilib,’ awa atte.” Nai awa ukkak danab ag Ahap amegppa anam appig.

⁴ Ag anam aeg, Israel dilag king Ahap nug nai amu doya, nug nai Benhadat dookkunu me ukkom. Nug inam aum. “O naɗi, dahil king, na attem am anamib baɗ! Da am nahip, amu dahil keeke oh ele am nahip, aakkuib,” awa aum.

⁵ Ahap nug nai amu me ukke, Benhadat doya, nug nai laa me, Ahap toppa ukkom. Danab ag nai amu aon goppig ele amu, ag Ahap amegppa inam appig. “Benhadat nug atte. ‘Da na amenppa, “Silwa nahip, gol nahip, ah nahipad, amu nahipad nid ele da meɗe!” awe ami,

⁶ amge laa ele, da butti haen imubiappa amu, da danab dahilad maadppi, ag nahip lag enanagnab, ag appa, amu nahipad ehanittak anuqak danab laulkadppa ele oinna, ag keeke oh neegna, ag aɗi keeke ena ena anidna, ag amu oh aon gokkulag,’ awa atte,” aon appig.

⁷ Benhadat nug nai amu me ukke, King Ahap nug doya, nug Israel dilag ikki danab onilagppa e uɗieg, nug ag amelagppa aum. “Antteg, danab okkai amu nug ban imu tuɗitta hekkunu, nug ig iqakkunu ib maditte. Aɗinu? Nug da amelppa dahilad ah, dahilad nid naunau, amu dahil silwa, gol ele aokkunu aum amu da, ‘Aib,’ ii ami. Iitta! Da, ‘Yo,’ ami, amge nug gemu amunu ena ii dootte, nug tuɗitta laa ele aokkunu atte,” awa aum.

⁸ Ahap nug anam a amu, Israel dilag ikki danab, amu Israel danab laa oh ele ag appig. “Benhadat nug atte amu, na aib dabmeme. Na amu aib dim lamidme!” aon appig.

⁹ Ikki danab ag nai amu appig amunu, Ahap nug nai awa ukkak danab, Benhadat maatte uɗippig ele amu, nug ag amelagppa, ag Benhadat amegppa appeg dookkunu inam a dooppig. “Ag dahil naɗi, King Benhadat, ag nug amegppa inam appeg doyaɗ! ‘Keeke oh na da, nahip maɗi nid, na da hekkulnunab tatam ame amu, da hekkul, amge keeke laa ele da tuɗitten medakkulnu attem amu, da amu hekkulnu elele iitta.’ ” Ahap nug ag amelagppa anam aum. Nug anam a amu, ag ahan, eɗun gona, Benhadat amegppa nai amu madippig.

¹⁰ Ag gona, Benhadat amegppa anam aeg, Benhadat nug doya, nug nai laa Ahap dookkunu me ukkom. Nai amuam inam. “Da heppi, dahilad daup ag danab nug wan paduduɗe, kalu nette, ag Samaria aabnu anam bia heppeg, Samaria nauheb, aab amu oh kalu daalo amu, kalu amu oh dahilad daup ag eppelkadppa aɗaglagnu elele. Ag eppelkad am-ii-bema. Da amu heppi, meu ii beeb amu, kayak laala ag bu okkainab meɗaglagnu ool daatte,” awa aum.

¹¹ Nai awa ukkak danab amu ag Benhadatnu nai amu Ahap amegppa aeg, King Ahap nug eɗua ag amelagppa aum. “Ag eɗun gona, Benhadat amegppa inam appeg doyaɗ! ‘Danab nug ban ha, kekeɗ eɗitta mala, nug bannu bala uɗaɗa, nug aɗi keeke okkai heumnu akkunu elele, amge danab nug bannu bala geha iikku mette amu, nug amubia aib heum!’ ” awa aum.

¹² Ahap nug anam a doona, nai awa ukkak danab ag gona, Benhadat toppa teeg, Benhadat nug king laa ele ag ahilkad sel lag, appa daanna, le ɠagattag laegeg, nai awa ukkak danab ag nai Ahap aum ele Benhadat amegppa aeg doya, nug daup nuhikkud amelagppa aum. “Ag Israel dilag daup ele ban hekkulagnu keeke babaitteg!” awa aum. Nug anam a amu, ag ahan, ag Israel dilag daup aab okkai Samaria appa daappig ele amu, ag ag ele ban hekkulagnu keeke bappaidppig.

Ahap nug Benhadat eɗittom

¹³ Aria, Yawenu propet laa nug Israel dilag king Ahap gukkuitta ukka, nug amegppa aum. “Yawe Nug inam atte. ‘Na daup huanak ɠagattag ele anidttem amu, da gemu heppi, na ag eɗadkkut. Amuppa amu na dookkut; da am Yawe.’ Nug anam awa atte.” Propet nug Ahap amegppa anam aum.

¹⁴ Propet nug anam a amu, Ahap eɗua oɗ mettom. “Amge aun aɗi ag daup huanak amu ele ban hekkulagnu digmekkulag?” awa aum. Nug anam a amu, propet nug aum. “Yawe Nug atte. ‘Prowins anen anen dilag ban daup ikki, ahilkad ban danab nid bau daatteb, nid bau amu ag hekkulag,’ ” awa aum. Nug anam a amu, Ahap nug oɗ mettom. “Aun nug ag ban digmekkulagnu akku?” awa oɗ mettom. Oɗ mette amu propet nug aum. “Na hekkut,” awa aum.

¹⁵ Propet nug anam aum amunu, Ahap nug a, prowins anen anen dilag ban daup ikki, ahilkad ban danab, nid bau daatteb, ag uɗin qagmeeg, ahilag ebqak am 232 dayom. Ag uɗin daaegeg, Ahap a, amu Israel dilag daup laa ele uɗin qagmeeg, ahilag ebqak am 7,000.

^16-17 Ahap nug a, daup amu oh ag qagmeeg, aam anig, haen amuppa, Benhadat, amu king 32 laa ag Benhadat ehanidppig, ag ahilkad peh lag appa daanna, ag le ɠagattag lanana, ag spak mekkulagnu heegeg, Israel dilag daup amu ag ahan, Samaria uuna, Aram dilag daup ele ban hekkulagnu aab dimittim gonana, ban danab nid bau ag anuqna goppig. Amu Benhadat nug matu ib meitta, keeke laa antta, amunu nai eɗua uɗia mattiaknu danab laa ag gona, Israel dilag daup ag uɗippeg, ag uɗin appeg dookkunu maatte goppig amunu, Israel ag ahan uɗiegeg, danab amu ag amu anidna, ag eɗun, Benhadat amegppa, “Danab ag Samaria aabppanu uɗitteb,” aon appig.

¹⁸ Ag anam aeg doya, Benhadat nug aum. “Ag ig ele maɗoɗ nai mattignignu uɗitteb dayeb amu, ag aɗualattakib aɗualatteg! Aib aqappig. O iitta, ag ban hekkulagnu uɗitteb dayeb amu, ag amunu ele ag aɗualattakib aɗualatteg! Aib aqappig!” awa aum.

¹⁹ Aria, Israel dilag ban danab, nid bau, ag ahan anuqnana, ag Israel dilag daup laa oh noolag aon aab okkai dimittim ukkaeg,

²⁰ Aram dilag daup ele ban henana, Israel dilag daup ag anen anen Aram dilag daup anen anen ele ban heppig, amu Israel danab ag Aram danab anen anen aqaeg mauhadppig. Ag mauhatteg, ag lailkad amu anidna, ag oolppig. Ag oolegeg, Israel dilag daup ag ag lamadppig, amge Benhadat, Aram dilag king, amu nuhikkud daup laala ag hos attan oinna, ban heppig ele, ag hos attan oolegeg, Israel ag ii aqappig.

²¹ Ag oolegeg, King Ahap ahe, nug, amu nuhikkud daup ele ag ukkaeg, Aram danab ag hos, bannu karis eleppa ban heppig ele, ag ag ele ban heppig. Ban heegeg, Israel dilag daup ag eɗadna, Aram dilag daup amu huanaknab aqaeg mauhadppig.

²² Israel ag ban amu eɗitteg, propet tatam Ahap amegppa nai mattiom amu, nug eɗua Ahap guguitta uɗia, nug amegppa aum. “Doye! Maɗ imu uueb, maɗ laappa aam haen digmekkunu heebeb amu, Aram dilag king nug na ele ban baula hekkulagnu uɗikku amunu, na nug haen amuppa eɗiɗkkunu, na ɠagattag daakkutnu, na aɗi gemu hekkutnu daatte amu, na amu he!” awa aum.

²³ Ban tatam heppig amu, dimppa Aram dilag king Benhadat nug nuhikkud ehanittak anuqak danab ag inam amegppa appig. “Israel dilag Kayak Nug atu qaukonu Kayak amunu, haen ig ag ele qaukoppa ban hemut, Kayak amu Nug Israel ehanatte, ag ig eɗigppig. Amge aben uɗemppa ban helom amu, ig ag eɗadlom.

²⁴ Laa ele, na appe, king ag ban daup banppa ii gumadmana. Ban daup ikki ag ban danab gumadkkulag.

²⁵ Laa am, na ban daup bau kuɗum diiadppe, geha nahip ban daup amu ameg naɗi anukka daappig bia daaglag. Bannu hos, bannu karis ele kuɗum aokkut; tatam nauhadppig na amu ou diiadkkut amu, geha ig gopput, Israel ele aben uɗemppa ban heta, ig ag eɗadkkunig,” aon appig. King Benhadat nug ag nai appig doya, nug ag appig bia heum.

²⁶ Dimppa maɗ laappa, gakkaɗak haen digmeumppa, Benhadat nug nuhikkud ban danab diie, Apek aabppa Israel ele ban hekkulagnu goppig,

²⁷ Israel ag ele bannu keeke bapaidna daappig amunu, Israel dilag king nug nuhikkud ban danab onilagppa e uɗin qagmeeg, ag bannu keeke amu bapaidna ahan, Aram daappig, aben amu gukkuidna goppig. Ag gona, haen tutu dayaknu aab kalappig, amge ag ahilag huu amu okkai iitta, nakoknab, meeme huu aɗit bia daappig. Amge Aram ban danab ag am kuɗum huanaknab, aben oh ag aoeg ambe daappig.

²⁸ Amu Kayaknu propet laa nug nai awa ukka, King Ahap toppa ukka, nug Ahap amegppa aum. “Yawe Nug inam atte. ‘Aram danab ag da Yawe, dahilnu, “Nug am atu qaukonu Kayak, Nug am atu uɗemnu Kayak iitta,” aon atteb amunu, da geha heppi, ag Israel ag ahan, Aram ban danab ameg naɗi amu eɗattona, geha ag Israel ag dooglag, da am Yawe,’ awa atte,” awa aum.

²⁹ Amu Aram, Israel ele ag deɗ eblaih laippu ele ag haen tutu dayaknu aab kalappigppa hamu aben aoppigppa daappig, deɗ eblaih aɗit eleppa amu, ag digmena ban heppig. Ban hena, Israel ag deɗ amuppaib Aram ban danab 100,000 aqaeg mauhppig.

³⁰ Ag aqaeg, Aram ban danab laala ag oolna gona, aab okkai Apek ooppa noeg, aabnu aɗ amu pana ukka, 27,000 laa aqe mauhppig. King Benhadat nug ele oola, aab amuppa ukkom, amge nug lag laa ooppa noa, oo ooppanab ukka, appa lokkuma dayom.

³¹ Dayeye, nuhikkud ehanittak anuqak danab ag gona anidna, amegppa inam appig. “Ig nai inam laa deɗ laala doomut. ‘Israel dilag king amu, ag ahilag kobolppa, ag danab laa dilagnu oo mauhaknab doon ehanadtteb.’ Ag anam aeg doomut. Anam amunu, ig inam hetu! Ig lamen heɗiag ele ig imuanigppa takkat, muɗi taliliak ikkinigppa mewota, ig Israel dilag king gumidta gokkunig. Ig anam hekkunignu dayeb amu, nug geha nahipnu oo doyeb, na nitteb ii mauhmana anam oɗ medapput, nug na bau daakkutnu akkutai,” aon appig

³² King Benhadat nug amunu ena doye, ag lamen heɗiag ele takkan, muɗi ikkilagppa itoɗieg daye, ag Israel dilag king Ahap gumidna gona, ag nug amegppa inam appig. “Nahip uɗat nid Benhadat, nug atte. ‘Na oot doyeb, da iuppe ii mauhpanu oɗ medattem,’ awa atte,” aon appig. Ag anam aeg, King Ahap nug ag amelagppa aum. “Nug ana daattete? I am eamag,” awa aum.

³³ Benhadatnu ehanittak anuqak danab ag King Ahap nug nai aɗi akku, ag amunu daulag humaegeg, nug, “I am eamag,” aum, ag dooppig bia, ag keeke hetteb amuam ii ettamna, anam bekkunu ag paha appig. “Ge, na Benhadat ele, aa am eamag,” aon appig. Aria, King Ahap nug ag amelagppa, ag Benhadat omalppeg, nug gumitta uɗikkunu a, ag gona, Benhadat amegppa aeg, nug aha, Ahap gumitta ukkom. Ukke, Ahap nug Benhadat amegppa nuhig bannu karisppa bekkunu aum.

³⁴ Aria, Benhadat nug Ahapnu bannu karis attan ta, nug Ahap amegppa inam aum. “Da mamel nug anukka ban haaha, nug na mamennu aab okkai awom amu, geha da aab amu oh eɗue, na medakkul. Laa ele, na keeke meeb, daden maknu aben digdig ele Damaskus, aab okkai amuppa heppe bekkulag. Da mamel anukka nug Samaria aab okkaippa he dayom, amubia na hekkut,” awa aum. Nug anam a, aria Ahap nug Benhadat amegppa aum. “Na anam hekkutnu genab da amelppa attem dayeb amu, da na ele i nug tituanɗa, nai qakkoɗa, amuppa da heppi, na eɗun aon nahip-ppa gokkut,” awa aum. Anam amu, aa nug tituanya nai qagapiɗ. Aa nug tituanya, nai qakkoya, Ahap paɗe, nug ukkom.

Propet laa nug Ahap nug eheɗ heum amegppa aum

³⁵ Amu Benhadat noa ukke, Yawe Nug propet danab oolagppanu propet danab laa amegppa a, propet amu nug aha, propet danab laa amegppa aum. “Na ahan, da oiɗe,” awa aum. Nug anam aum, amge propet amu nug uuom.

³⁶ Nug uuom amunu, propet tatamnu nug propet danab amu amegppa aum. “Na Yawenu nai okkulme amunu, haen na ahan, da uuiɗna gobeppe, geha laion laa na niitteb mauhkkut,” awa aum. Aakku haen propet amu nug aha ugekke, laion laa ibppa qe mauhom.

³⁷ Aria, amu dimppa propet nug danab laa gumitta ukka, nug amegppa inam aum. “Na da oiɗe!” awa aum. A amu, danab amu nug aha, propet amu makkuɗa, guittak mettom.

³⁸ Aakku propet nug lamen qatti laappa, danab ag nug anidna, nug am propet ii doomnanu, nug lamen amuppa iɗu hautom. Nug iɗu hauta ukka, King Ahap uɗikku, ib amuppa ib aɗa, ib daugppa hibaitta dayom.

³⁹ Propet nug anam hibaitta dayeye, haen King Ahap nug uɗia gumitta be amu, nug inam eum. “O king, na nai dahil dookkutnu ool daatte. Da, nahip maɗi nid, da banppa daaiyi, ihinig ban danab laa nug kekeɗ laa aɗa, omala da gumiɗa uɗia, nug da amelppa inam aum. ‘Danab imu oolmanu uɗat atognoaknab he! Nug oolkku dayeb amu, da na nidappi mauhkkut. O iitta, da na ii nidakkulnu amu, na nob silwa 34 kilogram anam daden meɗakkut.’ Ban danab amu nug da amelppa anam anana, nug ukkom.

⁴⁰ Amge, O king, da, maɗi nid nahip, da uɗat kuɗum laala heinne, kekeɗ amu da ii gumai, nug oola ukkom,” awa aum. Awa a, aria Israel dilag king nug amegppa aum. “Na nakka na dimun meme, amuppa na keeke aɗi nahip-ppa bekkunu amu, na doottem,” awa aum.

⁴¹ King nug anam a amu, pahanab propet nug iɗu lamen qatti hautom amu uhuqa awe, Israel dilag king anttom, nug am propet.

⁴² Aria, propet nug king amegppa aum. “Yawe Nug inam atte. ‘Da am Yawe, da attem. Danab laa, da nuhignu nug dahilnuib, dahil pelemppa daakkunu dabmak aoi ɠagattag eppom daatte amu, na he, nug ukkom amunu, nug ouppa na mauhkkut, nahipad danab ah ag am nuhikkud danab ah oulkadppa, ag ele maukkulag,’ ” awa aum.

⁴³ King Ahap nug nai amu a doya, nug amya daya, nug eɗua, nuhig lag enanagnab, Samaria dayom amu, nug appa ukkom.