1 King 2 - Nobonob Baibel

Dawit nug Solomon aɗi aɗi haknu nai mettom

¹ Amu Dawitnu mauhak haen miag do, nug bekka Solomon aɗi aɗi hekkunu nai imu nug mettom.

² Dawit nug aum. “Da danab oh mauhtteb bia, da mauhkkulnu haen aakku miag daatte amunu, na gumak danab ena, ɠagattag ele daanna, uɗat nahip he!

³ Amu na Yawe, nahip Kayak, na nuhig nai ig hekkunignu mekkom, nuhig kobol oh ele dim lamitte! Na gona, adeppa adeppa daanna, appa na keeke aɗi hettem, amu keeke amu ena bekkulagnu, na nuhig ɗo iɗu iɗu oh, amu nuhig haknunab anak oh ele, Nug Moses oɗeppa ig mekkom amu, na amu oh dim lamitte!

⁴ Amu na Yawe oɗe dim lamidkkutnu diig laa am, na Nug waappa daappe, Nug anukka dahilnu keeke laa hekkunu da amelppa nai ana qakkom, am heeb bekku. Nai qakkak amuam inam. ‘Nahip nid ag ahilag oiyak atognokkulag dayeb, ag oo metta ii uuak kobol dim lamidna, da noolppa tutukku oiglag dayeb amu, geha haen oh da heppi, na buɗunppanu laa ag anen anen ahilag haenppa Israel dilag king bena, sia kingppa daaglag.’ Yawe Nug anam aum amunu, Solomon, na nuhig nai amu, na oh ena tutukku dim lamidppe, Yawe Nug nuhig nai ana qakkom amu, Nug ii loppaɗma. Iitta.

⁵ Am laa ele, Solomon, na doottem, Seruia bekka Joap nug kobol nau heehe, amuppa da uug okkai, kobol nug heum amuppa da anidmi. Nug Israel dilag ban daup ikki aɗit aqatom. Aa am Ner bekka Apner, am Jeter bekka Amasa ele. Ban haenppa danab laa nug laa qe mauhtte bia ii aqate mauhpiɗ. Iitta. Nug ban haenppa helo bia ban iitta haenppa, am maɗoɗ haenppa, nug aqate mauhpiɗ. Nug danab aɗit amu aqattom, hak nau amunu aab am nug beɗuppa daatte.

⁶ Anam daatte amunu, na nakka nahip doyak dabmak ena ele, na amu dim lamidna, na nuhig eheɗ hak amu eɗun, nob mette! Na uuidppe, nug dayaya, kaino ma, maɗoɗ ele aib mauhom.

⁷ Na Joapnu anam hekkut, amge na Gileat danab Barsilai, na nug bekkod dilagppa na oo mauhaknab kobol doon dim lamidna, na appe, ag nahip balalppa ele daanna, ee lakkulag. Aɗinu? Haen na awan Apsalom he, da oole ukkai, ag dahilppa kobol ena hena, ɠagattag iuppig.

⁸ Am laa imu ele dabmekkut. Gera bekka Simei, Bahurim ted, Benyaminnu huu dilag wanppanu, nug ele daatte. Anukka haen Apsalom he, da oole gomi, haen amuppa da Mahanaim gokkulnu ukkaiyi, nug da eheɗ laa awaknu anak waappa daakkulnu nai mattiom. Amge haen da eɗue uɗiyi, nug na, da Jodan leppa aniɗe, da Yawe onigppa nug qep elabppa qeppi ii mauhmanu nai ɠagattag qettami.

⁹ Amge na nug nau dahilppa heum amu, na amunu dabmak aona, na, ‘Nug eheɗ laa ii heum,’ aib dabmeme. Na am danab doyak dabmak ena ele amunu, na nuhigppa aɗi hekkutnu daatte amu, na dookkut. Na heppe, nug mauhaɗ!” awa aum.

Dawit mauhom

¹⁰ Dawit nug nai amu oh mattia mala dayaya, dimppa nug mauhe, ag nug gaɗa Dawitnu Aab, appa boumppig.

¹¹ Nug ii mauhak haenppa amu, Dawit nug Israel wanppa Israel dilag king ba, nug maɗ 40 Israel gumattom; nug Hebron appa maɗ eblaih aɗit ele king daya, Jerusalem appa nug maɗ 33 king dayom.

¹² Anam amu, Dawit bekka Solomon nug abenabppa king ba dayom. Am Solomon nug king ɠagattag be, nug king daakkunu ehah am nug eppegppa ɠagattag dayom.

Ag Adonaiya qeeg mauhom

¹³ Haen amu Hagit bekka Adonaiya nug Solomon anig Batseba anidkkunu ukke, Batseba nug inam oɗ mettom. “Na maɗoɗ ele uɗimete?” awa aum. A amu, Adonaiya nug inam amegppa aum. “Ao, da ool maɗoɗ ele uɗimi,” aum.

¹⁴ Anam anana, nug tuɗitta inam aum. “Da nai nakok laa appi dookkutnu ool daatte,” awa aum. A amu, Batseba nug nob ma, amegppa aum. “Na da amelppa appe doye!” awa aum.

¹⁵ Batseba nug anam a, amu Adonaiya nug aum. “Na doottem, Israel danab oh ag tatam geha da king ahilag daakkulnu dabmeppig. Ag anam dabmeppig amunu, da am king belom, amge Yawe Nug he, da amal, nug king beum daatte.

¹⁶ Anam beum daatte amunu, da keeke laippunu na oɗ medakkul, am na dahil oɗmak amunu amu na, ‘Ena,’ aon akkutnu ool daatte,” awa aum. Aakku Batseba nug aum. “Aakkude, na appe doye!” awa aum.

¹⁷ Nug anam a, aria Adonaiya nug Batseba amegppa aum. “Na gona, King Solomon nug Sunem ah, Abisak, nug dahil ah daakkunu meɗakkunu ool daatte. Aɗinu da na amu hekkutnu oɗ medattem? Da doottem, geha king nug nahip nai amu ii tappeb nema,” awa aum.

¹⁸ Nug anam a, aakku Batseba nug Adonaiya amegppa aum. “Amun nai iitta, geha da na oɗen awen ukken, king oɗ medakkul,” awa aum.

¹⁹ Aria, Batseba nug anam awowa, nug ukka, King Solomon antta, oɗ metteb, nug Abisak awa, Adonaiya medakkunu ukkom. Ukke, King Solomon nug Batseba uɗieye antta, nug aha, ukka uɗa ta, nug noobppa dup noa, gomelom. Nug anam hewowa, nug eɗua sia kingppa dayaya, nug maɗi nid he gona, sia king laa aon dona, Solomonnu sia king gukkuittak, nug eppeg naɗiap-ppa meeg, amu Batseba nug sia amuppa dayom.

²⁰ Am Batseba nug siappa dayaya amu, nug inam aum. “Da keeke nakok laanu na od medappi, na dahil oɗmak amu nob ena amunu meɗakkutnu ool daatte. Na iitta aib ame,” awa aum. Nug anam a, King Solomon nug oɗmak am nob ma inam aum. “Anai, na oɗ mekkutnu am oɗ mekkut. Aɗinu? Da nahip oɗmak nob mein, ‘Iitta,’ ii apa,” awa aum.

²¹ Aakku Batseba nug aum. “Na appe, na awan Adonaiya nug Sunem ah Abisak aokkunu da ool daatte,” awa aum.

²² Am King Solomon nug oɗmak amu doya, nug inam aum. “Aɗinu da Sunem ah Abisak Adonaiya mettaknu, am na da oɗ meɗattem? Am anam dayeb amu, aria na tutukku da oɗ meɗappe, nug da oulppa nug king baɗ! Aɗinu? Nug am tatamnu, da awal. Amu mana mettak danab Abiatar, amu Seruia bekka Joap ele aa nuhig ehanittak daattep,” awa aum.

²³ King Solomon nug nai amu nug anig amegppa ana, nug nai tuɗitta, Yawe onigppa nuhig nai ɠagattag qetta, nug inam mattiom. “Adonaiya nug nai imu mattiom amu, nug eheɗ heum amunu, da nug qeppi mauhkku. Amu da nug ii qeppi mauhkku amu, Kayak Nug bu okkainab meɗakkunu ool daatte!

²⁴ Genab, Yawe, Nug da ehaniɗa, ɠagattag meɗe, da mamel Dawit abenabppa king daattem, amu Nug anukka dahilnu, da buɗulad dilagnu ele nai qakka, da, amu da buɗulad ele, ig sia king imuppa daagnignu aum bia amu, Nug aakku heum. Yawe Nug anam heum, Nug genab bau daatte, genab amubia Adonaiya nug gemu mauhkku,” awa aum.

²⁵ Aria, King Solomon nug anam ana, nug he, Jehoiada bekka Benaia ukka, Adonaiya qe mauhom.

King Solomon nug Abiatar mana mettak uɗatppanu lamittom

²⁶ Am Solomon nug mana mettak danab Abiatar amegppa inam aum. “Na eɗun, Anatot appa gona, na nahip wanppa daye! Na nahip eheɗ hak amunu amu, na mauhkkutnu elele, amge gemu da na ii nidappi mauhmana. Aɗinu? Na anukka na da mamel Dawit ele daayya, na nuhignu Naɗi Yawenu Tituanak Nainu Kunup maome. Laa ele amu, haen Dawit nug uug laala maottom amu, na nug ele daayya, na ele eheɗ hak amunu uug mawadttame,” awa aum.

²⁷ Solomon anam aum amunu, nai amuppa amu Solomon nug Abiatar Yawenu mana mettak uɗatppanu lamittom. Solomon nug Abiatar lamittom, amuam Yawe Nug anukka Silo aabppa mana mettak danab Eli, nug baekkudppa ele, amu oh dilagppa uug bekkunu aum amu, nai amu aakku elele mettom.

Joapnu qe mauhak

²⁸ Amu Joap nug anukka Apsalom ele, aa oh laippu ii oidpiɗ, amge nug Adonaiya ehanittom amunu, haen nug Adonaiya, Abiatar ele dilahppa kobol amu be antta amu, nug ele baɗa, oola ukka, Yawenu mettid haknu peh lag, nug amuppa ukka, qaɗabnu makau qeqeɗi dottog amu aɗalata dayom.

²⁹ Dayeye amu, danab laala ag anidna gona, King Solomon amegppa inam appig. “Joap nug oola ukka, Yawenu mettid haknu peh lag ooppa noa, nug qaɗab daugppa daatte,” aon appig. Aeg, Solomon doya, nug Jehoiada bekka Benaia amegppa haknunab aum. “Na gona, Joap qeppe mauhaɗ!” awa aum.

³⁰ Solomon nug anam a, Benaia nug Yawenu mettid haknu peh lag appa ukka, Joap amegppa inam aum. “King nug atte. ‘Na aben imu uun, dimittim ukke!’ awa atte,” amge Joap nug aum. “Da dimittim ii gopa. Iitta. Da inam daappi, na iuppe mauhkkul,” awa aum. Anam a amu, Benaia nug eɗua ukka, Joap aum amu, nug king amegppa aum.

³¹ A amu, king nug Benaia amegppa aum. “Anam amu, nug oo daatte bia appa nug daatteppa, na nug qeppe mauheb, gaɗa aon gona boume! Joap nug danab ag eheɗ ii heppig, nug hamu aqe mauhppig amu, kobol nau amunu da mamel nug uug amu mawom, gemu da ele maottem. Amunu na nug qeppe mauheb, eheɗ hak amunu uug am baula da, da mamel buɗub ele, ihinigppa ii daama.

³² Joap nug danab aɗit hamu aqate, Yawe Nug nob iikku medakku. Da mamel, Dawit, nug ii doyeye, Joap nug qep elabppa ban ha, Ner bekka Apner, nug am Israel ban daup ikki anuqak, amu Jeter bekka Amasa, nug am Juda ban daup ikki anuqak, Joap nug aa hamu aqate mauhpiɗ, amge aa am danab aɗit, ahilah oiyak, ahilah kobol ele am ena. Aa, amu ahilah hak ele, am Joapnu kobol, oiyak ele eɗittom.

³³ Danab aɗit amu hamu qe mauhaknu aab am, hanhan Joap, amu nug buɗub dimppa bekkulag ele, ahilagppa daakkunu ool daatte. Amge Dawit, nuhigppa, amu nug buɗubppa, amu nug abenabppa ele Yawenu maɗoɗ am hanhan daakkunu ool daatte,” awa aum.

³⁴ Solomon anam a amu, Jehoiada bekka Benaia nug nai amu doya, nug eɗua, Yawenu peh lakka ukka, nug Joap qe mauhom. Qe mauhe, ag Joap gaɗa aon, atu taɗakppa, Joap daatteppa gona, appa boumppig.

³⁵ Amu King Solomon nug Benaia awa, Joap abenppa ban daup ikki anuqak meum. Benaia nug Jehoiada bekka. Am King Solomon nug mana mettak danab Abiatar abenppa, mana mettak danab Sadok otiom.

Simeinu qe mauhak

³⁶ Joap qe mauhe amu, king nug Simei onigppa e uɗie, nug inam amegppa aum. “Na lag laa Jerusalem buun, na lag amuppa daakkut. Na aab okkai imu uun, laih laa ii gomana.

³⁷ Amu na oolnu noak onig Kidron mataɗna, ⌊amuam Jerusalem aab okkainu tom amu,⌋ na amu eɗidppe, da na paha nidappi mauhkkut. Na mauhkkut dayeb amu, amuam na nakka nahip eheɗ haknu nob,” awa aum.

³⁸ Solomon nug anam a, Simei nug king aum, nug amu nob ma, king amegppa aum. “Na nai ame am, nai ena. Da, nahip maɗi nid, da geha na, dahil okkai, dahil king, na ame bia daakkul,” awa aum. Amu Simei nug haen elab Jerusalem aab okkaippa dayom.

³⁹ Amge maɗ ewam ukke, Simenu begbeg maɗi nid aɗit laa aa oolya, Gat aabppa ukkaeh, Maka bekka Akis, nug am Gat dilag king, nug ele daappig. Daaegeg amu, danab laala ag gona, Simei amegppa appig. “Nahip begbeg maɗi nid aɗit oolya gopiɗ ele amu, aa Gat daattep,” aon appig.

⁴⁰ Ag anam aeg, Simei nug amu doya, nug dayaknu keeke nuhig donki gomeppa qakka, attan ta, King Akis gumitta Gat ukkom. Nuhig begbeg maɗi nid aɗit amu mattialata ukkom. Ukka anata amu, nug Gatnu omalata, eɗua Jerusalem ukkom.

⁴¹ Ukka dayeye amu, laa ag Solomon amegppa appig. “Simei nug Jerusalemnu aha, Gat aabppa ukkowa, eɗua uɗiom,” aon appig.

⁴² Amu King Solomon nug Simei onigppa e uɗie, amegppa inam aum. “Da na amenppa na Jerusalem uun, laih laih ii gomananu ain hei, na Yawe onigppa nai amu iite anan ɠagattag qettame. Da amunu ɠagattag na amenppa inam ami. ‘Na aab okkai uun, laih goppe, da na paha nidappi mauhkkut.’ Ai amu na da amelppa ame. ‘Am ena, da na ame amu, da dim lamidkkul,’ aon ame.

⁴³ Amu aɗinu na Yawe amegppa nai ɠagattag qena ame, na amu otaɗna, na dahil haknunab nai ii dim lamidme?

⁴⁴ Imu ele na doottem, na kobol eheɗ kuɗum, da mamel Dawitppa heme amunu, gemu geha Yawe Nug nahip eheɗ hak amunu nob medakku.

⁴⁵ Amge Yawe Nug da itiɗa, Nug geha heeb, Dawitnu huuppan danab ag am hanhan king bena, sia kingppa daaglag,” awa aum.

⁴⁶ Aria, Solomon nug anam ana, nug Jehoiada bekka Benaia, Simei qeeb mauhkkunu amegppa aum. A amu, Benaia nug ukka, Simei qe mauhom. Amu Solomon nug gemu king daakkunu ehah am, nug eppegppa ɠagattag dayom.