1 King 18 - Nobonob Baibel

Elaiya nug Balnu propet ele, ag Kamel qaukoppa nug mehqeppig

¹ Amu haen elab gu Israel wanppa ii neum. Anam daye, maɗ ewam ukke, maɗ ewam amu ooppa Yawe Nug nuhig nai imu Elaiya mettom. “Na Ahap gumidna goppe, Ahap na anitteb, da heppi, gu wanppa nekku,” awa aum.

² Nug anam aum amunu, Elaiya nug ukka, Ahap anidkkunu gumitta ukkom. Am haen amuppa Israel wanppa enug haen nau dayeye, Samaria appa ag ahilag ee am tutunab me,

³ King Ahap nug Obadaia gumitta uɗikkunu onigppa eum. Obadaia nug kingnu lag enanagnab gumak danab. Nug Yawenu ebehi oh bodoetta le meum.

⁴ Amu haen kuin Jesebel nug Yawenu propet danab aqeeqe, Obadaia nug propet danab amunu 100 diia, men oɗe aɗit, amuppa lokkumattom. Nug propet danab 50 laa amu men oɗe laappa lokkumattowa, 50 laa amu men oɗe laappa lokkumatte daaegeg, bret, le ele matte, lanan daappig.

⁵ Aria, Obadaia nug Ahap gumitta ukke, Ahap nug Obadaia amegppa inam aum. “I Israel wan ooppa aben ohppa goɗa, le qeppuɗia bette ohppa, amu lenu oolnu noak ohppa ele goɗa, amuppa i gikkiɗah laa hos, miul ele, ig ag ii aqamtanu, ag gikkiɗah amu lanan ii mauhmananu mattignih,” awa aum.

⁶ Nug anam aum amunu, aa wan oh anidkkulahnu aa wan oppatya, laih Ahap nug appa gikkiɗah madikkunu tituanya, laih Obadaianu tituanpiɗ. Aa anam heya, Ahap nug laih ukke, Obadaia nug laih laappa ukkom. Aa anen anen ahilah wan aopiɗ, amuppa gopiɗ.

⁷ Aria, Obadaia ugekke, ibppa nug Elaiya ele nug uɗa tepiɗ. Obadaia nug Elaiya doyom amunu, nug gateg qaun o, gomela, iɗu wanppa ma, nug inam awa oɗ mettom. “Na genabte dahil danab naɗi Elaiyate?” awa oɗ mettom.

⁸ Nug a amu, Elaiya nug oɗeppa awa aum. “Ao, da iikku. Da Elaiya. Na eɗun, nahip danab okkai, King Ahap, nug toppa tena, nug amegppa inam a! ‘Elaiya nug uɗiom.’ Na anam aon a!” awa aum.

⁹ Aakku Obadaia nug inam Elaiya amegppa aum. “Danab okkai, da aɗi eheɗ laa hemi amunu, na maɗi nid nahip da, na da awiɗna, King Ahap eppegppa meiɗppe, iweb mauhkkulnu attem?

¹⁰ Am Yawe, nahip Kayak, Nug genab bau daatte, genab amubia King Ahap nug na eɗua anidkkunu oo huan daye, nug na wan atu ohppa na anidkkunu mattiak uɗat naɗi heum. Nug anam haaha, nug he, danab ag wanppan wan ohppa gona, na mattidppig. Amu aɗi wan laa, amuppa ag nahipnu, ‘Nug ippa ii daatte,’ aeg amu, Ahap nug he, ag genab na mattidna anidkkulagnu elele iitta, ag ahilag nai amu ɠagattag qena appig.

¹¹ Amu geha na da ukke, king amegppa, ‘Elaiya eɗua uɗiom,’ awe akkulnu attem.

¹² Amge da na uuitte goppi, Yawenu Ouɗi Nug na awitta, aben laih da ii doottemppatai meitteb daappe, da ukken, Ahap amegppa appi, nug na maditta, ii anitta amu, geha da iweb mauhkkul. Amge da nid nakokppanu uɗie, gemu batak, haen amu oh da Yawenu ebehil oh bodoetta le meum.

¹³ Haen Jesebel nug Yawenu propet danab aqe mauheg amu, da Yawenu propet danab 100 men oɗe okkai laalappa diie, lokkumatti daappig. 50 laa da men oɗe laappa lokkumattoya, 50 laa am men oɗe laihppa lokkumatti daappig. Maatti daaegeg, da ag ee, le ele mattai lappig. Am na da amu hemi amu, na doottemtai?

¹⁴ Amu gemu na da king gumitten ukken, ‘Elaiya uɗiom,’ amegppa akkulnu attem. Amu da anam heppi amu, dimppa king nug na ii anitta, geha nug da iweb mauhkkul,” awa aum.

¹⁵ Obadaia anam a amu, Elaiya nug inam amegppa aum. “Yawe Nukka Ɠagattag Oh Ele, da nuhig maɗi nid daattem amu, Nug genab bau daatte, genab amubia da gemu Ahap gumitten goppi, Ahap nug da aniɗkku,” awa aum.

¹⁶ Aakku Obadaia nug King Ahap anidkkunu ukka antta, nug Ahap amegppa, “Elaiya uɗiom,” awa aum. Amu Ahap nug Elaiya uɗa tekkunu ukkom.

¹⁷ Haen Ahap nug ukka, Elaiya antta amu, nug aum. “Am genab na, na Israel uug madattem danab, am nate aakku?” awa oɗ mettom.

¹⁸ Nug anam oɗ mette, Elaiya nug Ahap aum, nug amu nob ma inam aum. “Da iitta, da Israel uug laa ii mattami, amge na, amu na mamen ele, aa, amu aa baelti ele, ag Israel uug mattaegeg uɗie, gemu ele hetteb. Aɗinu? Ag Yawenu haknunab nai tappaeg ne, ag kayak hambuppuak Bal iɗu iɗu noolagppa dup nona binalag meegeg uɗie, gemu ele hetteb.

¹⁹ Anam amu, na Israel danab ah oh dilagppa ag gona, qauko Karmel appa da ele qagmekkunignu nai meppe ukkaɗ! Aria na, amu Balnu propet 450, aria kayak hambuppuak Aserahnu propet 400 ele, kuin Jesebel nug ee matta atognoadtte amu, na amu oh ele diin omaladna gokkut,” awa aum.

²⁰ Nug anam aum amunu, Ahap nug Israel danab ah oh onilagppa e doeg, nug propet amu ele diie gona, Karmel qaukoppa qagmeppig.

²¹ Am Elaiya nug aha, Israel danab ah gumatta wana, nug amelagppa aum. “Ag danab ah, ag ahilag dabmak am ib piɗe piɗenu. Ag ib aɗitnu dabmak ele. Haen gane laa ele ukkeb, ag geha ahilag dabmak ib laippu ele daaglag? Amu Yawe, Nug Kayak genab daatte dayeb amu, ag nugib dim lamidkkulag. Amu Bal nug Kayak genab daatte dayeb amu, ag Bal nugib dim lamidkkulag,” awa aum. Amge danab ah ag nai amu nob laa ii meppig. Iitta.

²² Aria, Elaiya nug danab ah amelagppa aum. “Yawenu propet amu laal ii daatteb. Iitta. Da dakka iikku daattem. Amge Balnu propet danab am 450 daatteb.

²³ Aria, ag makau dawai aɗit aon uɗin, ig mekkaglagnu da ool daatte. Amu Balnu propet ag makau dawai laa, am ahilag, ag aoglagnu daakku. Ag laa tituanna, ag aon qena tuqan, ag mana mettak hekkulag. Ag aab akkan, Balnu qaɗabppa mewona, ag teppu amu akkan, aab qaɗeppa maadkkulag; amge ag aab amu ii amotmana. Geha amu, da ele makau laa mana mettak hekkulnu babaitten, aab qaɗeppa mekkul, amge da ele aab ii amotpa.

²⁴ Anam amu, ag Balnu propet, ag makau amu bappaidna malona, ag ahilag kayak unuqidppeg, am geha da Yawe unuqidkkul. Amu laa aun nug doya, Nug unuqittak nob ma heeb, aab aɗu na, mana mettak amu eokku amu, Nug am Kayak genab,” awa aum. Nug anam a amu, danab ah oh ag nai amu doon, ag appig. “Na attem am ena. Ig anam hekkunig,” aon appig.

²⁵ Ag anam aeg amu, Elaiya nug Balnu propet amelagppa aum. “Ag amu kuɗumde! Ag tatam makau dawai laa tituanna, amu aon qena babaittona, ag ahilag kayak unuqidkkulag, amge ag aab amu aib amotppig,” awa aum.

²⁶ Aria, Balnu propet ag makau dawai laa, danab ah aon uɗin madappig amu, ag amu aon bappaidppig. Ag bappaidna malon, ag kayak hambuppuak Bal unuqidppig. Ag buttuanu digmena, unuqitteg ukke, aam ameg tutukku awom. Ag Bal onigppa unuqidna inam eppig. “O Bal, na ihinig unuqittak imu dookkutnu ig oonig daatte,” aon eppig, amge ag unuqidppignu, auntai laa aɗitai laa ii heum, oɗelagppa laa ele ii awom. Iittanab iitta. Ag ahi goɗan oolna tena, oolna nenan, qaɗab qeppig amu talilidppig.

²⁷ Aam ameg tutukkuppa amu, Elaiya nug awa awa aqa aum. “Bal nug am kayak, amunu ag huan baalag okkaippa unuqitteg! Aɗinu? Bal nug genab kayak daatte dayeb amu, nug keeke laanu dabma dayayatai, ag ii doyadtte. O nug moɗppa ukkomtai. O amu ele iitta dayeb amu, nug aab laappa uma ukkomtai. O iitta, nug niia gad meumtai amunu, ag nug maɗ edappeg ahaɗ!” awa aum.

²⁸ Elaiya nug anam a amu, aria ag baalag okkaippa huan enana, ahilag mettid hak kobol dim lamidna, ag qep elab, qep tutu eleppa akka ag beɗulag oppateg, tiilag neene heppig.

²⁹ Aam anig uɗia ukkom, amge ag amunu ii dabmeppig. Ag propet nai duttunak huanak ele mattin henan daaegeg ukka, tueb mana mettak haknu haen doum. Ag anam heeg ukkom, amge ⌊kayak hambuppuak⌋ auntai laa oɗelagppa ii awom, auntai laa nug amunu dabmak laa ii awom.

³⁰ Aria, tueb me amu, Elaiya nug danab ah amelagppa aum. “Ag da gumiɗna, miag doig!” awa aum. Awa a, danab ah oh ag nug gumidna doeg, nug Yawenu qaɗab, danab heeg loppaɗak dayom amu, nug amu eɗua babaittom.

³¹ Nug amu hekkunu amu, nug men 12 qaɗab hekkunu diiom. Jakop buɗub Israel dilag huu okkai 12 daappig, ebqak amubia nug men awom. Anukka Yawe nug Jakop amegppa aum. “Na onin amu Israel daakku,” awa aum.

³² Amu Elaiya nug men amuppa Yawenu qaɗab amu ha malowa, qaɗab amu talilitta, nug le ippu heum. Le ippu heum, amuppa le 14 lita amuppa noa daakkunu elele babaittom.

³³ Elaiya nug aab akka, qaɗab amuppa mewowa, nug makau dawai tuqe ne, amu teppu aab qaɗep maattom.

³⁴ Aria, nug danab ah amelagppa aum. “Ag le itaknu hanak okkai waɗele aon, le itappeg ambeeb, aab, doɗ teppu, manaknu ofa daakkunu, amu ele qaɗep gokkaɗeg!” awa aum. Ag anam heeg, nug aum. “Ag eɗun baula heig!” awa aum. Nug ag amelagppa a, ag baula heeg, nug ag baula le itan hekkulagnu a, ag baula le itan gokkaɗppig.

³⁵ Ag le anam gokkaɗeg, le noa, le ippu qaɗab daug talilittak hak, amuppa ambeum.

³⁶ Amu tueb me, mana mettak haknu haenppa, propet Elaiya nug qaɗab guguitta wana, nug unuqitta, nug inam aum. “O Yawe, na am Abraham, Aisak, amu Israel ele dilag Kayak, na gemu deɗ imuppa na nakkaib Israel ippa Kayak daattem amu, na danab ah imu ippunadkkutnu, da na oɗ medattem. Laa amu, danab ah ag da am nahip maɗi nid, da nahip haknunab nai dim lamitte, keeke imu oh hemi amu, ag amu anidna dooglagnu ele ippunadkkutnu, da oɗ medattem.

³⁷ O Yawe, danab ah imu ag na Yawe, na Kayak daattem dooglagnu, na ag eɗun, na dim lamidkkulagnu hettem ele dooglagnu amu, na da oɗelppa aon heppe, ⌊aab aɗu qaɗabppa nekkunu oɗ medattem⌋,” awa unuqittom.

³⁸ Nug anam unuqitte, aakku Yawe nug he, aab aɗu neum. Aab amu na, mana mettak amu ewa, qaɗabppa aab ameg mak amu ewa, qaɗabnu men amu ewa, gappud amu ele ewa, am qaɗab daug aiɗak le ippu hakppa le gokkaɗeg, amba dayom amu, le amu oh ele he, iitta meum.

³⁹ Aria, haen danab ah oh ag amu anidna amu, ag oh laippun gatelag qaun o, gomelna, iɗulag wanppa mena, ag inam eppig. “Yawe Nugib am Kayak genab, Yawe Nugib am Kayak genab!” aon eppig.

⁴⁰ Anam aon eeg, Elaiya nug ag hekkulagnunab amelagppa aum. “Balnu propet amu oh aɗualatteg, laippu laa aib uuppeg oola ukkom!” awa aum. Nug anam a, ag Balnu propet amu oh aɗualatteg, Elaiya nug propet amu oh diia, Kison oolnu noakppa noa, appa aqe mauhppig.

Gu ii nak haen aakku iitta meum

⁴¹ Ag appa daanna, Elaiya nug Ahap amegppa inam aum. “Na paha gona, ee, le ele la! Aɗinu? Gu naɗi nekkunu oqotti wa uɗitte doottem,” awa aum.

⁴² Aria, Ahap nug ee, le ele lakkunu ugekke, Elaiya nug nuhig maɗi nid ele aa goya, Karmel qaukoppa teya, Elaiya nug gomela, duug qiie, iɗu gatekuɗ giɗoɗolahppa noum.

⁴³ Nug anam ha, nug nuhig maɗi nid amegppa aum. “Gona neegppe, yuppa ukkaɗ!” awa aum. Nug anam awa a, nug ukka, neekke yuppa ukke, nug eɗua doa, inam aum. “Da keeke laa ii anidmi,” awa aum. Anam amu, haen eblaih aɗit ele batak Elaiya nug maɗi nid, nug amu haknu aum.

⁴⁴ Aakku haen eblaih aɗit eleppa maɗi nid nug eɗua uɗia, nug aum. “Da lombig laa yuppanu nakoknab beum anidmi. Lombig amu, okkai nuhig am danab eppeg keeke, am anam bia anidmi,” awa aum. Aria Elaiya nug maɗi nid nuhig amegppa aum. “Na paha gona, Ahap amegppa appe, nug karis nuhig babaitta, paha noaɗ! Iitta amu, gu nug ataɗguidkku,” awa aum.

⁴⁵ Nug anam a amu, laippun pahanab lombig hinqak amu hab oh tonom. Aakku ulah digmeeme, gu apaɗpaɗ digma neum. Aria, Ahap nug karisppa ta ukka, Jesril aabppa nokkunu ukkom.

⁴⁶ Ugekke amu, aria Yawe Nug ɠagattag Elaiya mette, nug lamen nuhig daug letppa elele ina ma, qaietta ukka, Ahapnu karis, amu noobppa noob awa anuqom. Anuqeqe, huan anamib goya, Jesril aabppa nopiɗ.