1 King 17 - Nobonob Baibel

Elaiya dayeye, Kayak he, gu ii neum

¹ Elaiya nug am propet laa. Nug appag diig am aab onig Tisbe. Aab amuam Gileat wanppa dayom. Haen laappa Elaiya nug King Ahap gumitta ukka, amegppa inam aum. “Yawe, ig Israel, ihinig Kayak, da nuhig maɗi nid daattem, amu Nug genab bau daatte, genab amubia amu, geha gu, baito ele maɗ laala wanppa baula ii nema. Anam dayebeb ukkeb, geha da appi, amu nekku,” awa aum.

² Amu dimppa Yawe Nug nuhig nai imu Elaiya mettom.

³ “Na laih imu uun gona, Jodan le heqo laih aam bedeppanu, le nakok Kerit oolnu noakppa, na appa le guguittak lokkumna daye!

⁴ Daanna, na le amu labeppe, da ai alɗal amelagppa haknunab ami amunu, ag ee lakkutnu aon uɗin mettaglag,” awa aum.

⁵ Yawe Nug anam aum amunu, Elaiya nug Yawe aum, amubia heum. Nug ukka, le nakok onig Keritnu oolnu noak, aguppa dayom. Le nakok amuam Jodan le heqo laih, kaɗag uɗitteppanu, amuppa daatte.

⁶ Am haen oh buttua tueb ele alɗal ag bret, doɗ teppu ele aon uɗin mettaegeg, nug lanana, le amu lattom.

⁷ Am Israel wanppa gu ii neene, haen laala ukkom amunu, le amu ele qaɗaiettom.

Ah qab Sarepat dayeye, Elaiya appa ele ukkom

⁸ Le qaɗaiette amu, Yawe Nug nuhig nai imu Elaiya mettom.

⁹ “Na ahan, laih Saidon appa gona, Sarepat aabppa daye! Aab amuppa ah qab laa, da ah amu nug na eeppa ehanidkkunu tituanmi daatte,” awa aum.

¹⁰ Awa a, aakku Elaiya nug aha, Sarepat ukkom. Nug ukka, aabnu aɗ odppa ta, nug ah laa aab hiɗig awawa dayeye anttom. Ah amu nug ah qab. Elaiya nug ah amu antta, ewa amegppa inam aum. “Da le baal diitte amunu, na botol nakokppa le aon dona, meɗappe lakkulnu elelete?” ewa aum.

¹¹ Ah qab nug Elaiya aum amu doya, nug le aokkunu ugekke, amu Elaiya baula onigppa ewa aum. “Na bret maha laa ele aon dookkutnu ool daatte,” awa aum.

¹² Ewa a amu, ah qab nug aum. “Yawe, nahip Kayak, Nug genab bau daatte, genab amubia, da bret iitta. Da plaua nakokib waa laappa dayeye, am olip goɗen big nakok hinaippa daatte. Geha iikku da aab hiɗig imu awe ukke, plaua amu maikkul. Geha da maippi, da bekkal ele i lawoɗa, dimppa amu ee laa iitta amunu, geha i mauhkkunih,” awa aum.

¹³ Amge Elaiya nug ah qab amegppa aum. “Na aib baɗame! Na ame bia gona, anam he! Amge tatam na plaua amunu nakok laa goɗen ele aon, bret batappatak dahil main, aon uɗiona, dimppa na bret nahipnu, nid nahipnu plau, goɗen amuppanu ele mane!

¹⁴ Aɗinu? Yawe, Israel dilag Kayak, Nug atte. ‘Waa ooppa plaua daatte, amu ii iitta mema, goɗen hinaippa daatte amu, amu ele ii iitta mema. Anam dayebeb ukkeb, deɗ da Yawe, da heppi, gu eɗua wanppa neeb, ⌊ee baula dayebeb⌋ batakku,’ awa atte.” Elaiya nug anam aum.

¹⁵ Amu ah nug lakka ukka, Elaiya amegppa aum bia heum. Nug anam he, dimppa amu Elaiya, ah amu, amu nug baegppan ele ag deɗ deɗppa ee elele lappig. Enug ii aqom.

¹⁶ Plaua waa ooppa dayom am ii iitta meum, amu goɗen dayom, amu ele ii qaɗaiettom. Yawe Nug Elaiya oɗeppa aum bia, anam dayom.

¹⁷ Amge dimppa amu, ah amu bekka nug oɗe qeum. Nid nug oɗe naɗi awa, nug mauhom.

¹⁸ Aakku ah nug Elaiya amegppa aum. “Kayaknu danab, na aɗinu dahilppa kobol imu heme? Na uɗin heppe, Kayak Nug dahil hipunin eɗua daugppa dob heeb, nid dahil imu oɗe awa, mauhkkunu uɗimete?” awa oɗ mettom.

¹⁹ Ah nug anam nug amegppa a, Elaiya nug doya, nug ah amegppa aum. “Nid nahip amu aon dona, da meɗe!” awa aum. Aakku Elaiya nug nid mauhom amu anig eppegppanu aɗitta awa, mawa, lag oo attan amuppa ta, nuhig niiak oo, nug niitte, amuppa noa, nuhig niiak balalppa meum.

²⁰ Mewowa, nug inam Yawe unuqittom. “O Yawe, na Kayak dahil. Ah imu nug da ena atognoiɗom, amge nug bekka imu mauhom. Na hee, uug naunab imu beumte?” awa unuqittom.

²¹ Elaiya nug anam unuqitta mala, nug ukka, nug beɗu nid beɗu qaɗeppa ma tona niie, ewam bate, nug Yawe unuqitta aum. “O Yawe, na Kayak dahil, na heppe, nid imu nug eɗua, bau mekkunu oɗ medattem,” awa unuqittom.

²² Yawe Nug Elaiya unuqittom amu doya he, nid eɗua bau dayom.

²³ Nid nug eɗua, bau daye, Elaiya nug nid amu eɗua awa noa, anig medatta, nug nid anig amegppa aum. “Antte, nid nahip eɗua bau daatte!” awa aum.

²⁴ Nug anam a amu, ah nug Elaiya amegppa aum. “Genabnab genab, gemu da doottem. Na Kayaknu danab. Genabnab, na nai mehuqttem amu, Yawe Nug nukka nai amu na medette, na nai amu mehuqttem. Am nai genabib,” awa aum.