1 King 15 - Nobonob Baibel

Abaiya nug Juda dilag king ba dayom

¹ Amu Nebat bekka Jeroboam nug Israel dilag king dayaya, nuhig king dayaknu maɗ 18ppa Abaiya, nug Juda dilag king ba dayom.

² Abaiya nug king ba, nug maɗ ewam Jerusalem appa king dayom. Abaiya anig am Apsalom aɗeg Makah.

³ Abaiya nug hipunin oh, nug mameg heum amu, nug ele heum. Nug alag Dawit nug meu ohppa Yawe dim lamittom bia, Yawe, nuhig Kayak, nug Nug anambia ii dim lamittom.

⁴ Amge Yawe, Dawitnu Kayak, Nug Dawitnu dabmak anuqak awawa, nug buɗubppanu danab laippu laa nug Nug noobppa haen oh Jerusalem appa king daakkunu Nug he, Abaiya nug bekka ⌊king daakkunu⌋ menue daye, Yawe Nug ele he, Jerusalem ɠagattag dayom.

⁵ Yawe Nug Dawit daug ii atiom. Aɗinu? Dawit nug Yawenu neekkakppa kobol genab tutukku ele dim lamittom. Nug nuhig wanppan oiyaknu maɗ oh nug Yawenu haknunab anak oh dim lamittom. Haen laippu aakkuib nug Kayaknu nai tappe ne, eheɗ heum. Haen amuppa nug Uraia, nug Hit buɗubppan danab amu, nuhigppa nug eheɗ heum.

⁶ Haen Abaiya nug Jeroboam ele aa king daapiɗ, haen amuam wan aɗit amu aa ban hedapiɗ. Ahilahppa maɗoɗ haen laa ii dayom.

⁷ Amu keeke kuɗum laa ele King Abaiya heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte. Amu Abaiya, Jeroboam ele aa ban heyaya daapiɗ.

⁸ Amu Abaiya nug mauhe, ag Dawitnu Aab, appa boumppig. Nug mauhe amu, nug bekka Asa nug mameg abenabppa king ba dayom.

Asa nug Juda dilag king ba dayom

⁹ Amu Jeroboam nug Israel dilag king dayaya, nuhig king dayaknu maɗ 20ppa, Asa nug Juda dilag king ba dayom.

¹⁰ Asa nug ba, nug maɗ 41 Jerusalem appa king dayom. Asa mameg amu, nug anig, Asa alag, nug am Apsalom aɗeg Makah.

¹¹ Amu Asa nug king dayaya, nug Yawenu neekkakppa kobol genab tutukku ele dim lamittom; nug alag Dawit heum bia amu, nug heum.

¹² Asa nug danab ag kayak hambuppuak dilag mettid lag nakok, ag amuppa danab danab ele gappai aɗaglagnu daan heppig ele, nug danab amu geɗatta lamatte, wan amu uun goppig. Laa ele nug kayak hambuppuak dottolkad nug mamekkud aɗi heppig amu, nug dottolkad amu loppaɗatta akke ukkom.

¹³ Asa alag ah Makah, nug kuin anignu ehah aɗa dayom ele amu, Asa nug ii baɗa, nug ehah amu ele otaɗom. Aɗinu? Makah nug kayak hambuppuak Aserah dabmekkulagnu biidod laa heum. Biidod amunu amu, Yawe Nug ooppa uuaknab dootte. Amu Asa nug keeke amu okkula, mawa ukka, le Kidronnu oolnu noakppa manom.

¹⁴ Genab, Asa nug aabaabppanu mettid lag nakok oh ii loppaɗom, amge nug bau dayaya, haen amu oh nug meu ohppa Yawe dim lamidkkunu dayom.

¹⁵ Asa nug mameg nug keeke laala oh Yawenu tituana mettom amu awa, am keeke laala oh nug nukka Yawenu tituana mettom, amu oh nug akka, Yawenu mettid lag ooppa maattom. Keeke amuam silwa, gol, am tappiɗ, keeke iɗu iɗu oh ele.

¹⁶ Aria, Jeroboam nug mauhe, Basa nug Israel dilag king ba dayom, haen amuppa Asa nug ele king dayom. Amu ahilah haenppa aa maɗoɗ haen ena laa ii anidya daapiɗ. Iitta. Wan aɗit aa haen oh ban hedapiɗ.

¹⁷ Deɗ laa Israel dilag king Basa nug nuhikkud ban danab diie gona, Juda ele ban hena, ag aab Rama aona, danab ah ag Juda wanppa, Asa gumom ele, ag appa gomananu, appanu domananu, Basa nug aɗ, keeke aab amuppa heum.

¹⁸ Anam daaegeg, Asa nug Yawenu mettid lagnu en maknu oo anen anenppa, kingnu lag enanagnab, appanu en maknu oo anen anen eleppa silwa, gol, o men doɗo daatte amu, nug amu oh awa, nuhikkud ehanittak anuqak danab matte, ag aon, Aram dilag king Benhadat, Damaskus dayom, ag nug mettaglagnu Damaskus goppig. Benhadat mameg amu Taprimon, nug alag am Hesion.

¹⁹ Asa nug anam ha, nug pas ele Benhadatnu babaitta me ukkom. Pas amuppa yaak inam dayom. “I manenti anukka hepiɗ bia, i ele nug layam daagnihnu, i nug tituanɗa, nai qakkalopnu da ool daye, da silwa, gol ele imu nahip daakkunu hamu na mettaglagnu ehanittak anuqak danab dahilad laa mattai, ag aon gona medatteb. Da am na Israel dilag king Basa ele aa nug tituanya nai qagapiɗ amu, na nai amu otaɗppe, nug nuhig ban danab amu oh diieb, wan dahil uun gokkulagnu ool daatte.” Nai amu nug ehanittak anuqak danab nuhikkud eppelagppa meum.

²⁰ King Benhadat nug King Asa nai aum amu doya, nug amunu ena doyom. Nug ena doyom amunu, nug nuhikkud ban daup ikki amelagppa a, ag ban danab diieg gona, Israel dilag aab anen anen amuppa ban heppig. Ag gona ban henana, Israel dilag aab Iyon, Dan amu Abel Betmaka ele, aria wan maha onig Kineret oh, amu Naptali wan oh ele eɗadna aoppig.

²¹ Amu haen King Basa nug Aram ag uɗin, Israel aab anen anenppa ban hetteb, nug amu doya, nug Rama aab eɗua babaittom amu, nug uɗat amu uua, aha eɗua ukka, aab Tirsa dayom.

²² Aria, dimppa King Asa nug Juda danab ohnab dilagnu, ag oh Rama gokkulagnu, ag men, ad ele King Basa nug aab Rama eɗua bappaidkkunu qagmeum amu, ag mawadna gokkulagnu aum. Keeke amuppa King Asa nug aab Mispa, aab Geba ele, aab aɗit amu aa oh am Benyaminnu wanppa daattep amu, nug men, ad ele amuppa aab aɗit amu eɗua bappalatom.

²³ Amu keeke kuɗum laa oh ele King Asa heum, nuhig uɗat ɠagattag ele, aab okkai laala ele kalom amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte. Amge haen Asa nug kaino me amu, oɗe nau laa baegppa beum.

²⁴ Dimppa Asa nug mauhe amu, ag nug Dawitnu Aab, appa nug mamekuɗ aɗi boumadppigppa boumppig. Nug mauhe, nug bekka Jehosapat nug mameg abenabppa king ba dayom.

Nadap nug Israel dilag king ba dayom

²⁵ Asa nug Juda dilag king dayeye, amu maɗ aɗitppa Jeroboam bekka Nadap nug Israel dilag king ba, nug maɗ aɗitib king dayom.

²⁶ Nug Yawenu neekkakppa eheɗ heum. Nug mamegnu hak dim lamitta, hipunin mameg heum ele heum. Hipunin nug heum ele amu, hipunin amuam nug mameg Jeroboam hipunin amu ha he, Israel danab ah ag hipunin amu ele heppig.

²⁷ Amu Israel dilag huu okkai Isakarnu laa, am Ahaiya bekka Basa, nug aha, Nadap qeeb mauhkkunu ib mattiom. Amu Nadap nug nuhikkud ban danab ele ag gona, Pilistia dilag aab Gibeton amu oo mettan, aqaglagnu daaegeg, Basa nug Nadap gumitta ukka, qe mauhom.

²⁸ Basa nug Nadap qe mauhe amu, Basa nug Nadap abenabppa king ba dayom. Keeke imu beum, haen amu Asa nug nuhig maɗ ewamppa Juda dilag king dayom.

²⁹ Basa nug king ba amu, nug paha Jeroboam baegppan, amu oh aqe mauhppig. Nug laippu laa ii uue dayom. Iitta. Keeke amu beum, amuam Yawe Nug nuhig maɗi nid, propet Ahaiya, Silonu, nug oɗeppa nai mehuqom, nai amu meu oum.

³⁰ Am Jeroboam nug baegppan ele, ahilagppa uug amu beum, amunu diig am Jeroboam nug Yawe noobppa hipunin hatta he, Israel ag ele hipunin amu hadappig. Laa ele amu, Jeroboam nug hipunin heum, amuppa nug he, Yawe, Israel dilag Kayak, Nug oppoɗi beum.

³¹ Amu keeke kuɗum laa ele King Nadap heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

Basa nug Israel dilag king dayom

³² Aria, Asa nug Juda dilag king dayeye, Basa nug Israel dilag king dayom. Amu ahilah haenppa aa maɗoɗ haen ena laa ii anidya daapiɗ. Iitta. Wan aɗit aa haen oh ban hedapiɗ.

³³ Amu Asa nug Juda dilag king dayaya, nuhig king dayaknu maɗ ewamppa amu, Ahaiya bekka Basa, nug Israel dilag king digma dayom. Nug Tirsa aabppa maɗ 24 king dayom.

³⁴ Nug Yawenu neekkakppa eheɗ heum. Nug Jeroboam, nug nuhig oiyak dim lamitta, nug Jeroboam hipunin ha he, Israel danab ah ag hipunin amu ele heppig amu, nug nuhig hipunin amu ele dim lamitta oiyom.