1 King 14 - Nobonob Baibel

Jeroboam bekka nug mauhom

¹ Haen amuppa King Jeroboam bekka Abaiya, nug oɗe meum.

² Oɗe me, aakku Jeroboam nug wau amegppa inam aum. “Danab ah ag na am da waal ii dooidmananu amu, na lamen diig laa aon, bala mena, Silo ukke! Na gona, na propet Ahaiya antte! Danab amu nug da geha Israel dilag king bekkulnu aum.

³ Na bret eblaih laih ele aon, am bret batappatak laala ele aon, uppuh leppu botol laippu ele aon gona mettona, na ihinih nid, nuhig oɗe imunu oɗ mette! Oɗ medappe, geha nug nid imunu attem bekku amu, nug na amenppa akku,” awa aum.

⁴ Jeroboam nug anam a, nug wau Jeroboam aum bia oɗe dim lamitta ha, nug ukka Silo ta, nug Ahaiya laugppa ukkom. Ahaiya nug gemu am kainonab amunu, nug ameg gaɗuak dayom.

⁵ Aria, ah amu nug ukkom, amge haen nug Ahaiya toppa ii te, Yawe nug Ahaiya amegppa aum. “Jeroboam bekka nug oɗe meum amunu, Jeroboam wau nug geha nid amu nug ena daakkute, o iittate, nug na oɗ medakkunu uɗitte. Haen nug uɗikku amu, nug na nuhignu, ‘Ah imuam Jeroboam wau,’ dabmemananu ippu hak laa hekku. Aria, nug uɗia beeb, na inam inam appe dookku,” awa aum.

⁶ Yawe anam Ahaiya amegppa aum amunu, haen Jeroboam wau nug ukka, lag od guguittette, Ahaiya baeg oqotti doyeye, nug wana odppanab waawo, Ahaiya nug aum. “Jeroboam wau, lag ooppa ne! Aɗinu na ippu hak anam hettem? Yawe Nug da nai laa appi dookkutnu meɗom, amge amuam nai ena iitta.

⁷ Na eɗun, Jeroboam gumidna gona, Yawe, Israel dilag Kayak, Nug nai aum imu amegppa appe doyaɗ! ‘Jeroboam, da na dahilad danab ah Israel oolagppanu, da na awitten, da na ahilag king daakkutnu meidmi.

⁸ Da Dawit bekkod dilagppanu Israel oh dilag king dayaknu ehah amu eɗue awe, laih imunu uɗat amu, da na mettami. Da na mettami, amge na kobol ena ii dim lamidme, maɗi nid dahil Dawit dim lamittom bia. Nug haknunab nai dahil oh dim lamitta, nug da meu ohppa dim lamiɗom. Nug kobol ena, kobol tutukku oh ele da ami amu, nug heum.

⁹ Amge na amu, na eheɗ hak huan heme; eheɗ hak nahip am king anukka daappig, amu oolagppa aun laa eheɗ nau heum amu, nahip eheɗ hak am nuhig eɗidtte. Na da dimeɗan autna aon, kayak hambuppuak golppa haatame. Na kobol amu heme, amuppa na he, da oppoɗi bak doottem. Na da na dimunppa meiɗme.

¹⁰ Anam amunu, da genab geha Jeroboamnu huuppan nid danab bau ukka danab kaino ele Israel oolagppa beppig daatteb amu uug naunab madakkul. Am geha da heppi, Jeroboamnu huuppan nid danab bau ukka danab kaino ele ohnab, laa nug begbeg maɗi nidte, o begbeg maɗi nid iittate, ag Israel danab ah oh oolagppanu iitta mekkulag. Da aab kinipan ewewe huppu nakok laa ii daatte, da nuhig, amu nuhigppan nid danab ele heppi, anam bia bekku.

¹¹ Am Jeroboam baegppan danab laala ag aab okkai ooppa mauhkkulag amu, qai ag gaɗalag lakkulag. Am laa ag aab okkai dimittim, aben laalappa mauhkkulag amu, ai ag gaɗalag lakkulag.’ Yawe Nug anam awa aum. Amu anam bekkunu diig am, Yawe Nug anam ana malom,” awa aum.

¹² Am Ahaiya nug Yawe nai aum amu Jeroboam wau amegppa awowa, nug tuɗitta inam ele aum. “Gemu na eɗun appanppa ukke! Na gona, na nahip aab okkaippa nobeppe amu, geha nahip nid amu mauhkku.

¹³ Mauheb, Israel oh ag Jeroboam bekka amu mauhomnu mahidna, gaɗa boumkkulag. Jeroboam baegppan oh oolagppanu nug nukka laippu aakkuib nug kobol ena laa he, Yawe, ig Israel ihinig Kayak, nug anttom. Amunu ag nug gaɗa aakkuib boumkkulag. Jeroboam baekkudppa laa oh amu, ag am iitta.

¹⁴ Am Yawe Nug geha danab laa Israel dilag king bekkunu tituankku. King amu nug ba, geha Jeroboam baegppan oh heeb iitta mekkulag. Geha, keeke amuam paha bekku; pahanab bekku.

¹⁵ Israel ag kayak hambuppuak Aserah dabmekkulagnu biidod hadappig. Ag kobol amu heppig, amuppa ag heeg, Yawe Nug ahilagnu oppoɗi beum daatte amunu, Yawe Nug geha ag eheɗ nau matta heeb, ag geha eheɗ ottaina, baɗan, hahaɗkkulag; le ui ugakka he, qao le daugppanu hahaɗtteb, ag amubia hekkulag. Yawe Nug ag Israel, ag mamelkad aɗi wan ena imu anukka ag mattom, amge Nug wan amuppanu geha akka heeb, ag le Yupretis heqo laih, appa tamtam gokkulag.

¹⁶ Jeroboam nug hipunin hatta he, Israel danab ah ag ele hipunin amu hadappig amunu, Yawe Nug uuatteb, ahilag kekeɗ ag eɗadkkulag,” awa aum.

¹⁷ Am Jeroboam wau nug nai amu doyowa, nug aha, eɗua aab Tirsa ukkom. Nug ukka, lag odppa noowo amu, nid akku mauhom.

¹⁸ Ag nug gaɗa boumona, Israel oh ag nid amunu mahidppig. Yawe Nug propet Ahaiya, nuhig maɗi nid, Nug nug amegppa aum, am amubia elele mettom.

Jeroboam nug mauhom

¹⁹ Amu keeke kuɗum laa ele King Jeroboam heum, kaya amuam ag buk laappa, buk amu onig am, Israel Dilag Kingnu Kaya, buk amuppa yaappig daatte. Yaak amuppa Jeroboam nug kekeɗ ele ban heppig, amu wan gumaknu kobol laala nug heum, kaya amu ele buk amuppa daatte.

²⁰ Jeroboam nug maɗ 22 king dayom. Dayaya, nug mauhe, nug bekka Nadap nug mameg abenabppa king ba dayom.

Rehoboam nug Judanu king dayom

²¹ Aria, Solomon bekka Rehoboam nug Juda dilag king dayom. Nug maɗ 41 dayaya, nug king ba dayom. Nug king ba, nug maɗ 17 Jerusalem appa king dayom. Yawe Nug Israel wanppanu, aab laa oh oolagppanu, Nug aab okkai Jerusalem appa Nug onig meeb daakkunu, aab amu tituanom. Rehoboam anig am Amon wanppanu ah onig Namah.

²² Juda danab ah ag Yawenu neekkakppa eheɗ heppig. Ag hipunin hattana, amuppa ag heeg, Yawe Nug ahilagnu oo nauhak laa, oo nauhak amuam dahil dooi laa aomanuppa bette, oo nauhak amu be doyom. Ag mamelkad aɗi anukka hipunin kuɗum heegeg, Yawe anam doyom, amge Rehoboam nug Juda gumom, haen amuppa Juda danab ah ag heeg, Yawe Nug ahilagnu oo nauhak amu huana doyom.

²³ Juda ag gemu kayak hambuppuak dilag mettid lag nakok, kayak hambuppuak Aserah dabmekkulagnu biidod, amu men gappi ele qauko nakok okkai oh ikkilkadppa, amu ad okkai eppelkad bahia ukkak ele oh waalkadppa bappaladna maadppig.

²⁴ Juda ag anam henana, ag kobol nau digdig ele heeg beum. Kobol nau amu laa naunab ele am, danab laa ag kayak hambuppuak dilag mettid lag nakok, ag amuppa danab danab ele gappai aɗaglagnu daan heppig. Juda ag wan anen anennu danab ah, Yawe he, Israel ag lamadppig ele, ag amu dilag kobol, Yawe Nug kobol amunu ooppa uuaknab dootte amu, ag kobol amu dim lamidppig.

²⁵ Rehoboam nug king abenab awe, maɗ waɗele ukke, nuhig king dayaknu maɗ tanig eleppa Isip dilag king Sisak, nug nuhikkud ban danab ele ag Jerusalem banelag uɗippig.

²⁶ Ag ban amu eɗidna, Jerusalem ooppa nona, Isip dilag king, Sisak, nug Yawenu mettid lagnu en oh awa, am kingnu lag enanagnab, appanu en oh ele awa, keeke ena amu oh akka, Solomon bannu guppiɗ hatta golppa tonattom, amu oh ele akka, keeke amu oh nug akka, Isip ukkom.

²⁷ Sisak nug guppiɗ amu awa ukkom amunu, King Rehoboam nug guppiɗ amubia, amge brasppa hak heum. Nug anam ha, Rehoboam nug daup ag king laug enanagnab odppa daan, gumak uɗat heppig dilag ikki ag guppiɗ amu dabmettaglagnu ɗo meum.

²⁸ Haen laala king nug Yawenu mettid lakka ugekke amu, aria gumak danab amu ag guppiɗ amu maoegeg, oh goppig. Aria, king nug eɗua laugppa ugekke, ag guppiɗ amu eɗun akkan gona, gumak danab laulag ooppa maadppig.

²⁹ Amu keeke kuɗum laa ele King Rehoboam heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

³⁰ Amu Rehoboam nug king dayeye, Juda, Israel ele ag hanhan ban hedappig.

³¹ Dimppa Rehoboam nug mauhe amu, ag Dawitnu Aab, appa nug mamekkud aɗi boumadppigppa boumppig. Rehoboam mauhe, nug bekka Abaiya nug mameg abenabppa king ba dayom. Rehoboam anig am Amon wanppanu ah onig Namah.