1 King 13 - Nobonob Baibel

Jeroboam nug Betel qaɗabppa dayaya, propetnu nai doyom

¹ Aria, Jeroboam nug mana mettak hekkunu qaɗab Betel appa ha, aguppa mana mettak hekkunu ukka dayeye, Kayaknu propet danab laa Juda wanppanu aha ukke, Jeroboam nug qaɗab amu guguitta hibaitta dayeye, propet amu nug Jeroboam gumitta teum. Propet amuam Juda danab, Yawe Nug propet amu amegppa nug Judanu aha, nug Betel gokkunu a ukkom.

² Yawe Nug propet danab amu nug danab laa amegppa nai mattilo, amubia qaɗab amu nuhigppa nai imu madikkunu a mattiom. Nug inam aum. “Qaɗab, Yawe Nug nahipnu nai inam maditte. Dawitnu huuppan nid danab laa geha bekku, nug onig Josaia. Nug ba, king dayaya, nug mana mettak danab ag haen amuppa daanna, kayak hambuppuak dilag mettid lag nakokppa mana mettak henana, uɗin ippa doɗ main, kayak hambuppuak mettaglag amu, nug ag na qaɗenppa aqeb mauhppeg, nug danab ebehilkad awa, qaɗab na qaɗenppa maneb eoglag,” awa aum.

³ Kayaknu propet nug nai amu mehuqowa, nug nai imu, ippuanattaknu at daakkunu, nai imu ele mattia, nug nai tuɗitta inam aum. “Yawe Nug ippunittaknu at imu babaittom daatte. Qaɗab imu amu, Yawe Nug heeb, qaɗab imu nug oppateb, uhuɗ wanppa gokkaɗa nokku,” awa aum.

⁴ King Jeroboam nug Betel appa qaɗabppa hibaitta dayeye, Kayaknu propet nai amu a doyom. Doya, Jeroboam nug anam dayaya, nug eppeg huma, nug laa daappig amu, nug ag propet eppona, nug aum. “Danab amu aɗeg!” awa aum. Nug anam aum, amge Jeroboam nug anam aawo, nug eppeg ɠagattag eppe, nug eɗua aokkunu elele iitta. Nug eppeg taietta, tutukku anam aakku dayom, ii awa oiyom.

⁵ Laa amu, qaɗab ele aoɗe, uhuɗ oh gokkaɗa, wanppa noum. Yawe Nug nuhig propet oɗeppa ippunittaknu at daakkunu aum bia aakku heum.

⁶ Aakku King Jeroboam nug Kayaknu propet amegppa aum. “Na Yawe, nahip Kayak, na Nug unuqidppe, nug da ehaniɗa heeb, da eppel imu eɗua ena daakkunu ool daatte,” awa aum. Nug anam a amu, Kayaknu propet nug Yawe, nuhig Kayak, nug Nug unuqitte, king eppeg eɗua, ena dayom bia dayom.

⁷ King nug eppeg ena daye, nug Kayaknu propet amegppa aum. “Na da laulppa uɗippe, da ele ee lawoɗa, da keeke laa nahip daakkunu hamu na medakkul,” awa aum.

^8-9 King anam aum, amge Kayaknu propet nug king oɗeppa awa aum. “Yawe Nug da ippa ee, le ele ii lapanu, da ib laa, da ib amuppa uɗimi amu, da ib amu ele awen eɗuen, da appalppa gopanu ele haknunab nai aum amunu, da na ele na lautppa ii gomaɗa. Da ippa ee, le ele ii lapa. Amu na enun, am men doɗo nahip ele, na keeke amu oh na gamagppa oppatna, laih am da meɗakkutnu akkut amu, diig amunu ele da na lautppa ii gopa,” awa aum.

¹⁰ Aria, propet nug anam awowa, nug Betelnu aha, ib laa dim lamitta, eɗua digma ukkom. Nug ib uɗiom ele, nug ib amu ii dim lamitta ukkom.

Propet kaino laa nug Betel dayom

¹¹ Haen amuppa amu, propet kaino laa nug Betel appa dayom. Dayeye amu, nug bekkod ag uɗin, ag Judanu propet, nug Kayaknu danab amu, nug uɗia, nug deɗ amuppa Betel appa keeke heum amu, ag mamelag amegppa madippig. Nug bekkod ag propet amu keeke heum amegppa awona, ag propet nug King Jeroboam amegppa nai mattiom amu, ag nug amegppa amunu ele appig.

¹² Aakku mamelag kaino nug bekkod oɗ mattom. “Propet amu nug ib atten dim lamitta ukkom?” oɗ mattom. Nug anam oɗ matte, nug bekkod ag Judanu propet nug ib laa, nug ib amuppa ugekke anidppig, ag ib amunu ag mamelag amegppa appig.

¹³ Ag anam appig amu, propet amu nug bekkod amelagppa aum. “Ag donki qaɗeppa dayaknu keeke mena qakkan meɗeg!” awa aum. Nug anam ag amelagppa a, ag amu aon, donki attan mena qakkeg, nug donki attan ta ukkom.

¹⁴ Propet kaino amu nug Kayaknu propet ukkom amu dim lamitta ukkom. Dim lamitta ukka, nug nug ad ok waappa dayeye anttom. Antta amu, propet kaino amu nug inam oɗ mettom. “Na am Kayaknu propet laa, Judanu uɗimete?” oɗ mettom. Oɗ mette amu, Judanu propet nug aum. “Ao, am da,” awa aum.

¹⁵ Aria, propet kaino amu nug amegppa aum. “Na da laulppa uɗippe, da ele ee lakkunihnu ool daatte,” awa aum.

¹⁶ A amge Kayaknu propet nug, nug amegppa aum. “Da na ele eɗuɗ, na lautppa gokkunihnu elele iitta. Da ee, o le ippa lakkulnu elele iitta.

¹⁷ Aɗinu? Da Juda wanppa daaiyi, Yawe Nug da amelppa aum. ‘Na gona, na appa ee, le ele aib lame. Ele amu, na ib laa, na ib amuppa gokkut amu, na ib amu ele aon, eɗun ippa, na appanppa, aib uɗime. Na ib laa aon uɗie!’ ” awa aum.

¹⁸ Aria, Kayaknu propet amu nug anam a, propet kaino nug aum. “Am da ele am propet, na bia,” awa aum. Nug anam anana amu, nug inam ele aum. “Yawe Nug engel laa he, engel nug da amelppa aum. ‘Na gona, danab amu eɗun omalppe, na lautppa ukkeb, ee, le ele lakkunu medakkut,’ awa aum.” Nug anam aum, amge nug hambuppuom.

¹⁹ Aakku Kayaknu propet Judanu, nug nai amu doya, nug ahe, propet kaino ele eɗuya, nug laugppa goya, ee, le ele mette laum.

²⁰ Aa ee lanak balalppa daaeheh, Yawe Nug propet kaino, nug he, propet laa eɗua uɗiom amu, Nug nug nai nuhig mette doya,

²¹ propet kaino nug baag okkaippa qattiɗa, Kayaknu propet Judanu amegppa aum. “Yawe Nug nahipnu inam atte. ‘Na dahil nai tappai ne, da na amenppa hekkutnunab ami amu, na ii dim lamidme. Iitta.

²² Na ippa ee, le ele ii lamananu aum, amge na eɗun uɗin laame. Na anam heme amunu, geha na mauhppe, ag na gaɗan, na mamenad aɗi boumadppigppa ii boumidmana,’ ” awa aum.

²³ Judanu propet nug ee, le ele lana male, propet kaino nug donki gomeppa dayaknu keeke awa, nug propet Judanu eɗua uɗiom, nug nuhig donki qaɗeppa ma qakke, Juda dilag propet attan ta dayaya ukkom.

²⁴ Nug ugekke, ibppa laion laa ba antta, qe mauhom. Qe mauha, nug gaɗa aakku ibppa dayom. Gaɗa amu anam ibppa niieye, donki nug guguitta hibaitta dayeye, amu laion nug ele guguitta hibaitta dayom.

²⁵ Dimppa danab laala ag ib amuppa gonana, ag gaɗa amu niieye, laion guguitta hibaitta dayeye anidna, ag Betel, aab okkai propet kaino daatteppa gona, ag keeke anidppig amu danab ah amelagppa madippig.

²⁶ Am haen propet kaino nug he, Judanu propet eɗua uɗiom ele, nug keeke amu beumnu nai doya, nug aum. “Amuam Judanu propet, nugib. Nug Yawenu nai tappe neum amunu, Yawe he, laion nug uɗia, nug beɗu he nauhe, qe mauhom. Yawe Nug aum bia, am aakku beum,” awa aum.

²⁷ Nug anam awowa, nug nug bekkod amelagppa aum. “Ag donki qaɗeppa dayaknu keeke mena qakkan meɗeg!” awa aum. Nug a amu, nug aumbia ag heppig.

²⁸ Ag anam heeg, propet kaino nug donki attan ta, ib amuppa ukka, Judanu propet gaɗa ibppa niieye antta, nug donki, laion ele aa anam gaɗa amu gukkuidya hippaidya daaeheh anatom. Am laion nug mauhak gaɗa amu ii laum, nug donki ele attemtai laa ii heum.

²⁹ Aria, propet kaino nug mahittowa, gaɗa boumkkunu, nug mauhak gaɗa amu awa, donki nuhig attan ma, eɗua Betel ukkom.

³⁰ Am propet kaino nug mauhak gaɗa amu awa ukka, nuhig boumak abenppa boumom. Boume amu, nug baekkudppa ele ag propet mauhom, ag nuhignu mahidnana inam appig. “O gadonnab, ig lainig,” aon appig.

³¹ Nug gaɗa am boumowa, propet kaino nug bekkod amelagppa inam aum. “Haen da mauhppi, ag da gaɗal Kayaknu propet gaɗa mak iikku, nug heqoppa meiɗkkulag.

³² Aɗinu? Yawe Nug Betel ippa propet imu oɗeppa nai mattiom amu, nai amu oh am elele medakku. Yawe Nug Betelnu qaɗab heeb nauheb, am Israel wan ohppa mettid lag nakok, Samarianu aabaabppa mettid hambuppuak haknu abenppa daatteb, amu ele oh heeb nauhkkunu aum amu, nai amu oh am ba, elele medakku,” awa aum.

Jeroboam nug hipunin eheɗ heum

³³ Keeke amu beum, King Jeroboam nug anttom, amge nug nuhig kobol eheɗ ii uuom. Iitta. Nug baula nukka kayak hambuppuak dilag mettid lag nakokppa ag mana mettak uɗat hekkulagnu, nug danab ah oh dilagppanu mana mettak danab daaglagnu danab diia otiattom. Danab aun nug mana mettak danab daakkunu oo dayom amu, Jeroboam nug danab am uɗat amu hekkunu baɗ mettom.

³⁴ Hipunin amuam Jeroboam, amu nug baegppan dilag ele hipunin dayom, amu hipunin amuam he, Jeroboam, nug baegppa ele ag nena qena, wanppa ii daappig.