1 King 12 - Nobonob Baibel

Israel dilag huu okkai eblaih tanig ele ag Juda uuppig

¹ Danab ah Israel oh ag gona Sekem appa ag Rehoboam aon, ahilag king mekkulagnu goppig amunu, Rehoboam nug ele appa ukkom.

² Amu anukka Nebat bekka Jeroboam nug King Solomon, ⌊nug nuhigppa eheɗ ha,⌋ nug Solomon baɗitta, oola Isip ukka dayaya, nug Israel wanppa aɗi beum, nug nai amu doya, nug Isipnu aha, eɗua uɗiom.

³ Nug Isipnu uɗiom amunu, Israel danab ag Jeroboam onigppa eeg do, nug Israel danab qagmeppig ele oh ag Rehoboam gumidna gona, amegppa inam appig.

⁴ “Na mamen Solomon nug, nug ig uɗatnu uug okkai, ɠagattagnab mekkom. Anam amunu, gemu na ihinignu bodoettak hena, ihinig uug heppe, nakok iitta mekkunu oɗ medattem. Na anam heppe amu, ig geha na waatppa daat, nahip maɗi nid daagnig,” aon appig.

⁵ Ag anam aeg amu, King Rehoboam nug ag amelagppa aum. “Ag gona, deɗ ewam dayona, ag eɗun, da gumiɗna uɗippeg, da oɗmak amunu nob ag amelagppa appi dooglag,” awa aum. Nug anam a amu, ag eɗun goppig.

⁶ Ag ukkaeg amu, King Rehoboam nug ikki danab laala, danab amu ag anukka nug mameg Solomon dabmak ena medattappig ele, nug ag onilagppa e doeg, nug nai amunu oɗ matta, inam aum. “Israel danab ag da mamel heum bia ii hepanu atteb, amu ag attem dabmetteb? Da nai amu attem amelagppa nob mein, aɗi akkul?” awa aum.

⁷ Aria, nug anam oɗ matte amu, ag nug amegppa inam appig. “Amu na danab ah amu dilag maɗi nid bia daanna, ag dabmattanna ehanadkkut, na nai ena ag amelagppa akkut amu, ag geha nahipad maɗi nid daanna, na waatppa hanhan daaglag,” aon appig.

⁸ Danab kaino ag anam appig, amge Rehoboam nug ahilag ulum nai dookkunu uua, nug nid bau, ag nug ele oh laippu ena meppig, gemu ag nug waappa daan, nuhig maɗi nid daappig ele amu, nug ag onilagppa e doeg, nug ag ulum mettaglagnu anana,

⁹ nug inam ag oɗ matta aum. “Ag ahilag ulum nai am attem? Ig danab imu ag da amelppa, ‘Na mamen bia uug okkai ii mekkamnanu oɗ medattem,’ appig ele amu, ig nai amunu nob ag amelagppa attem akkunig?” awa oɗ mattom.

¹⁰ Nug anam a amu, nid bau, ag nug ele oh laippu ena meppig ele, ag nug amegppa appig. “Na danab ah amu, ag na amenppa, ‘Na mamen nug ig uɗatnu uug okkai, ɠagattagnab mekke hemut amu, na uug amu heppe, nakok iitta mekkunu oonig daatte,’ appig, na amu dilag oɗmak amu nob mena, na ag amelagppa inam appe doyeg! ‘Da eppel doɗo nakoknab imu, nug am da mamelnu ɠagattag oh eɗidtte.

¹¹ Genab, da mamel nug ag uɗatnu uug okkai, ɠagattagnab mattom, amge da amu, geha da ag amu eɗittak, okkainab madakkul. Da mamel nug ag bu qaun eleppa mataɗattom, amge da geha bu laa noobppa aeg ele awe, ag huan mataɗadkkul.’ Na anam appe doyeg!” aon appig.

¹² Aria, ag anam aeg, King Rehoboam nug Jeroboam aɗi amelagppa matu aum bia deɗ ewam ukke, Jeroboam, amu Israel danab ah ele ag eɗun, Rehoboam gumidna goppig.

¹³ Ag ukkaeg, King Rehoboam nug baag ɠagattagppa ag amelagppa nai mattiom. Nug danab kaino dilag ulum nai dab-ii-maama,

¹⁴ nug nid bau dilag ulum nai dim lamitta, nug ag amelagppa inam aum. “Am genab, da mamel nug ag uɗatnu uug okkai, ɠagattagnab mattom, amge da amu, geha da ag amu eɗittak, okkainab madakkul. Da mamel nug ag bu qaun eleppa mataɗattom, amge da bu qaun ele noob aeg eleppa ag mataɗadkkul,” awa aum.

¹⁵ King Rehoboam nug anam aum amunu, nug danab ah, ahilag oo hak, ag amunu nug amegppa appig amu, nug ahilag nai amu ii dabmeum; dim ii lamittom. Amu beumnu diig am, Yawe Nug nukka he, King Rehoboam nug danab ah appig amu oɗelag dim ii lamittom. Aɗinu? Yawe Nug Nebat bekka Jeroboam amegppa nai aum, nai amu heeb, meu bekkunu heum. Anukka Yawe Nug Silonu propet Ahaiya amegppa Jeroboamnu a, Ahaiya ukka Jeroboam amegppa aum.

¹⁶ Aria, Rehoboam nug anam a, Israel danab ah oh, ⌊amuam Israel dilag huu okkai laa oh, Juda, Benyamin aakkuib iitta⌋, ag aakku dooppig, king bau amu nug nai ahilag dookkunu uuom. Ag anam dooppig amunu, ag king amegppa inam appig. “Ig Israel laa oh, ig Dawit ele laippu iitta. Ao, ig Jesi bekka Dawit, ig nug buɗub iitta. Anam amunu, ig Israel danab, ig oh eɗut, aabppa gotu. Ao, Dawit bekkod ag akka nug gumanna dayeg!” Israel ag anam anana, ag oh qatin, appalagppa ukkadppig.

¹⁷ Israel laa oh ag laulkadppa goppig, amge Israel buɗub Juda wanppa daappig amu, Rehoboam ag gumattom.

¹⁸ Aria, amu nakok dimppa King Rehoboam nug ⌊Sekem appa tuɗitta dayaya, nug⌋ he, Adoniram, nug danab ag ɗo waappa kingnu uɗat haknuib daappig ele gumattom, nug Israel huu ⌊ag eɗun laulkadppa goppig amu,⌋ nug ag gumatta ukkom. Ukkom, amge haen Adoniram nug ukka, ag gumatta te, Israel ag oh ahan, men ena, menppa makkuɗeg mauhom. Ag anam heeg, King Rehoboam nug Israel Adoniram menppa makkuɗeg mauhom doya, nug baɗa, pahanab aha, ban haknu karis attan ta, oola, Jerusalem ukkom.

¹⁹ Amu haen amuppa digma uɗie, gemu, ⌊nai imu yaak haenppa⌋ batak, Israel danab laih, Juda wanppanu yawalti uɗitteppanu, appa ana daatteb, ag Dawit buɗubppanu laa waappa daaglagnu uun, king amunu nai tappaeg nette.

²⁰ Amu haen Israel danab ah oh ag Jeroboam nug Isipnu aha, eɗua uɗiom, nai amu doon, ag nug qagmak ahilag laappa uɗikkunu oɗmak nai meeg ukkom. Nug qagmak amuppa uɗie, ag nug aon, ag Israel oh, ahilag king meppig. Amge Israel dilag huu okkai Juda, ag laa king daaglagnu Dawit buɗub, ag ahilagib dabmena oo metta ii uuak kobol dim lamidppig. Israel dilag huu okkai laa oh am anam iitta, Juda aakkuib.

Propet Semaianu nai

²¹ Solomon bekka Rehoboam nug oola ukka, Jerusalem tewowa, nug Juda dilag ban danab oh, am Israel dilag huu okkai Benyaminnu ban danab ele oh onilagppa e, ag uɗin qagmeppig. Ban danab nug diiom amu, ahilag ebqak am 180,000. Nug ukka Israel, ahilagppa ban ha heeb, ag eɗun nug waappa daaglagnu heum.

²² Rehoboam nug anam heum, amge Kayak Nug propet Semaia, nug Kayaknu danab amu, Nug nug nai mettom. Nai nug mettom am inam.

²³ “Na gona Solomon bekka, Juda dilag king Rehoboam, nug amegppa, Juda danab ah oh, Benyamin danab ah oh, amu danab laa appa daatteb ele, ag oh amelagppa na nai inam appe doyeg!

²⁴ ‘Yawe, Nug inam atte. “Ag gona, Israel ele ban aib heppig. Ag oh tiig laippu amunu, ag anam ii hemana. Iitta. Ag oh eɗun, appalagppa ukkeg! Aɗinu? Da dakka ai, Israel ag oppatna, ag uuadna, laa daatteb,” ’ ” awa aum. Semaia nug Yawenu nai amu doya, Rehoboam, danab nug ele daappig oh ele amelagppa anam aum amunu, ag Yawenu haknunab nai amu dim lamidna, ag oh eɗun, appalagppa goppig.

Jeroboam nug Kayak dim lamidkkunu uuom

²⁵ Am King Jeroboam nug Sekem, aab amuam Epraim wanppa, qauko qauko daattebppa dayom amu, nug aab amuppa aɗ, keeke heum. Nug deɗ laala aab amuppa dayom. Dimppa nug appanu aha, nug ukka, Peniel ele dayom. Dayaya, aab amunu aɗ, keeke ele heum.

²⁶ Nug anam ha amu, Jeroboam nug dabmak imu awom. “Danab ah dahilad ag eɗun, Dawitnu huu waalagppa daaglagnu goppeg am eheɗ.

²⁷ Gemu haen oh ag Jerusalem appa, Yawenu mettid lag, amuppa mana mettak hekkulagnu aakku gotteb amunu, ag anam gona gona, geha ag ahilag dabmak eɗueb, ag ahan, Juda dilag king Rehoboam waappa daaglag. Ag da iuppeg mauhppi, ag nug waappa gona daaglag.” Nug anam dabmeum.

²⁸ King Jeroboam nug anam dabmewowa, nug nuhig dabmak amunu nug nuhikkud doyak danab oɗ maatte, ag ahilag ulum nai aeg doyowa, nug golppa makau gaiɗ aɗit dottolah haatowa, nug nuhikkud danab ah amelagppa inam aum. “Ag haen oh Yawe noobppa dup nona binag mekkulagnu Jerusalem gotteb amu, ag uɗat okkai hetteb. Amge gemu ag baula appa ii gomana. Antteg! Imu am, ag Israel, ag ahilag kayak. Aa ag Isipnu diiya, omaladya uɗipiɗ. ⌊Amunu kayak aɗit imu ag noolahppa dup nona binalah meig!⌋” awa aum.

²⁹ Aakku King Jeroboam nug makau golppa hak aɗit amu laa aab Betel, appa mewowa, laa amu aab Dan, appa meum.

³⁰ Danab ah laala ag Betel gona, laala ag nakok uma Dan gona, ag kayak aɗit amu noolahppa dup nona binalah menana, amu kobol amuppa ag hipunin heppig.

³¹ Jeroboam nug kayak hambuppuak dilag mettid lag nakok buuattowa, nug danab ah oh dilagppanu mana mettak danab daaglagnu danab diia, otiattom, amge danab amu ag am Lewi buɗub iitta.

³² Jeroboam nug ele qagmak gamag ahak elenu deɗ laa tituanom. Nug kalam ebqak eblaih ewam ele, kalam amunu deɗ 15ppa, nug qagmak gamag ahak ele amunu deɗ tituanom. Amuam Juda dilag qagmak gamag ahak elenu deɗ, amubia. Deɗ amu haenppa king nug Betel appa qaɗabppa mana mettak heum. Mana mettak amuam nug Betel appa heum, amge nug makau gaiɗ aɗit golppa hak oh dilahnu doɗ manatta matattom. Nug Betel appa mana mettak amu ha, nug mana mettak danab ag kayak hambuppuak dilag mettid lag nakok, nug babaittom ele, ag amu gumadkkulagnu appa ele baɗ mattom.

³³ Anam dayom. Jeroboam nug nukka nuhig dabmak dim lamitta, nug kalam eblaih ewamppa Israel dilag qagmak gamag ahak ele daakkunu tituanom amu, kalam amuppa, deɗ 15ppa, Jeroboam nug Betel qaɗab qeum amuppa ukka, nug mana mettak heum. Nug qagmak gamag ahak ele amu he be, nug qaɗabppa mana mettak amu hekkunu qaɗabppa ukkom.