1 King 11 - Nobonob Baibel

Solomon nug Kayak dimettom

¹ Amge King Solomon nug wan laalappan ah dilag oo mauhom amunu, nug diikkunu oo daye, nug Paro aɗeg amu awowa, nug Moap ah, laala ele diiowa, am Amon ah, Edom ah, ele diiowa, nug aab okkai Saidon ah, am Hit ah ele nug diiom.

² Anukka Yawe Nug Israel, ag ah amu diimnanu, Nug ɗo ma, ag amelagppa inam aum. “Iitta aɗi dilag ah amu, ag ahilag kayak hambuppuak diin uɗin heppeg, ag amu dim lamadkkulag amunu, ag wanppanu wan laalappan ah amu, ag diiglagnu, am aib,” awa aum. Yawe Nug anam aum, amge Solomon nug nai amu tappe ne, nug iitta aɗi dilag ah, nug amunu oo huana mauhe, nug wauud diiom.

³ Solomon nug ah wauud 700 diiowa, nug 300 laa, ag am nug wauud amge nug wauudnab iitta, nug ag ele diiom. Ah 700 amu, ag oh am ah okkai. Aria, ah amu ag ⌊ahilkad kayak hambuppuak ele akkan uɗin⌋ heeg, ⌊nug amu binalag meum. Binalag maama⌋, nug Yawe, nuhig Kayak, nug Nug oo ohppa ii dim lamittom.

⁴ Solomon nug kaino meeme, ah amu ag heeg, nuhig dabmak amu eɗue, nug kayak hambuppuak gumatta ukkom. Nug mameg Dawit, nug Yawe meu ohppa dim lamittom amu, nug kobol amubia ii heum. Iitta.

⁵ Solomon nug Saidon dilag kayak ah Astoret, nug dim lamitta, amu nug Molek, kayak amuam Amon dilag kayak, Kayak Nug nuhignu ooppa uuaknab dootte ele, nug ele dim lamittom.

⁶ Nug anam heum amunu, Solomon nug aakku Yawenu neekkakppa eheɗ heum. Nug Yawe pehettaknab nug mameg Dawit dim lamittom bia ii heum.

⁷ Jerusalem qauko heqo laih aam bedeppanu ukkakppan, appa qauko nakokppa Solomon nug aben aɗit babaittom; laa am Moap dilag kayak Kemos, Kayak Nug nuhignu ooppa uuaknab dootte amu, nug nuhig mettid lag nakok babaittowa, laa am Amon dilag kayak Molek, Kayak Nug nuhignu ele ooppa uuaknab dootte amu, nug nuhig mettid lag nakok ele babaittom.

⁸ Solomon nug iitta aɗi ah laa oh diiom amu, nug amu dilag ele anamib he, ag doɗ manan, ahilkad kayak mattan, ag kalu danab ile muttuɗig enanag bette ele, ag amu ele manan, ahilkad kayak hambuppuak madappig.

⁹ Solomon anam he, Yawe, Nug Solomonnu oo nauhom. Aɗinu? Solomon nug eɗua, meu ohppa Yawe, Nug am Israel dilag Kayak, Nug haen aɗit Solomon gumitta neum amu, nug Nug ii dim lamittom.

¹⁰ Yawe Nug Solomon nug kayak hambuppuak dim lamadkkunu, “Aib,” aum, amge Solomon nug Yawenu haknunab anak amu ii dim lamittom,

¹¹ amunu, Yawe Nug Solomon amegppa aum. “Doye! Na nakka nahip dabmak dim lamidna, na da ele nug tituanɗa nai qakkamuɗ amu, na amunu dab-ii-meeme, na tituanak amu tippalme, dahil ɗo ele, na dim lamidkkutnunab ami amu, na ii dim lamidme. Anam daye amu, da genabnab, da nahip king uɗat amu aɗitten, na geɗittoya, nahip king uɗat amu awe, nahip ehanittak laa medappi, nug king dayebeb, na geha baula wan imu ii gumamna.

¹² Amge geha na bau daattem, haen imuppa amu, da na uɗat amuppanu na ii aɗidpa. Am aɗinu? Da na mamen Dawitnu dabmak anuqak aottem. Na mauhppe, na bekkat nug king ba daakku, haen amuppa geha da nuhig king dayak uɗat amu loppaɗkkul.

¹³ Amge da nug king uɗat oh aɗiten nug ii lamidpa, iitta. Da dahil maɗi nid Dawit, da nuhignu dabmak anuqak awen, amu Jerusalem, aab amuam da dakka dahilnu tituanmi amu, da aab amunu ele dabmak anuqak aottem amunu, geha da heppi, na bekkat, nug am king dayaya, Israel dilag huu okkai laippu laa amu gumadkku,” awa aum.

Danab laala ag Solomonnu kekeɗ beppig

¹⁴ Aria, gemu Yawe Nug Solomonnu eheɗ hak, diig amunu, Nug he, Edom dilag king, nug baegppan danab laa Solomonnu kekeɗ beum. Danab amu onig Hadat.

¹⁵ Anukka King Dawit nug ban ha, Edom ban danab aqom. Aqe, Israel ban daup ikki anuqak Joap, nug Edom danab Dawit nug ban amuppa aqom amu, nug ag boumadkkunu ukka, nug appanu danab laa oh daappig amu, nug ag oh aqe mauhppig.

¹⁶ Nug amu nuhikkud ban danab ele ag Edom appa kalam eblaih laippu ele daanna, boumak uɗat aakkuib ii heppig. Iitta. Haen amuppa ag Edom ah uuadnana, Edom danab laa oh, ban danab, amu ban danab iitta ele, ag banppa ii mauhppig, ag ag aqan malappig. ⌊Hadat, amu nug laikkud laippu laippu aakkuib ag ii aqappig.⌋

¹⁷ ⌊Amu ag ii aqappignu diig am⌋ Hadat nug, amu nug mamegnu ehanittak anuqak laala ele, ag Edom ted amu, ag oolna, Isip goppig. Haen amuppa Hadat nug am nidib dayom.

¹⁸ Ag tatam Midian wanppa gonana, ag appanu ahan, Parannu atu taɗakppa goppig. Gona, Paran appa danab laa diieg, ag oh Isip wanppa goppig. Ag Isip tena, Isip dilag king Paro anidkkulagnu gumidna goppig. Antteg, Paro nug lag laa Hadat mettowa, wan laih nakok laa ele mette gumeeme, king nug ee ele mettom.

¹⁹ Paro nug Hadatnu oo enanag dayom amunu, nug ah laa mettom. Ah amu nug am Kuin Tapenes makkeg. Tapenes nug am Paro wau.

²⁰ Aria aa nid danab menuya, nug onig Genubat ataɗpiɗ. Amu kuin Tapenes nug Genubat awa, kingnu lag enanagnab, appa Paro bekkod, nid danab amu ele oh gumadttom.

²¹ Am Hadat nug Isip wanppa dayaya, nug Dawit, nug nuhig ban daup ikki anuqak Joap ele aa mauhpiɗ, nug nai amu doyom. Aakku Hadat nug Paro amegppa aum. “Na da uuiɗppe, da dahil wanppa eɗue gokkul,” awa aum.

²² Nug anam aum, amge Paro nug inam Hadat amegppa aum. “Na ippa daanna, na aɗi keekenu tutu meme amunu, na nahip wanppa eɗun gokkutnu attem?” awa oɗ mettom. Nug anam awa a, Hadat nug eɗua Paro amegppa aum. “Da keeke iitta, hamu dayeye gokkulnu ii attem. Iitta. Amge na da gokkulnu appe, da gokkulnu ool daatte,” awa aum.

²³ Amu Kayak Nug he, danab laa ele Solomon kekeɗ medakkunu ahom. Danab amu onig Reson, nug am Eliada bekka. Reson nug anukka Soba wannu King Hadatesernu maɗi nid dayaya, oola ukkom.

²⁴ Nug oola ukka, nug danab huu laa ag nai tappe nak danab, nug ag diia, ahilag ikki dayeye, Dawit nug Soba wannu ⌊King Hadatesernu⌋ ban danab oh aqa male, haen amuppa Reson nug danab nuhikkud diie, Damaskus aab okkaippa gona, appa daanna, Reson nug Damaskus dilag king ba dayom.

²⁵ Reson nug Aram dilag okkai dayaya, haen Solomon nug Israel dilag king dayeye, Reson nug haen amuppa Israel dilag kekeɗ dayom. Uug amuam Hadatnu uug tuɗittom.

Kayak nug Jeroboam tituanak nai mettom

²⁶ Amu ele, Nebat bekka Jeroboam, nug am Solomonnu ehanittak anuqak danab laa, nug ele King Solomon waappa daakkunu uua, nai tappe nak kobol haaha, kekeɗ mettom. Nug appag am Sereda, Israel dilag huu okkai Epraimnu. Nug anig onig am Serua, nug am ah qab.

²⁷ Jeroboam nug King Solomon waappa daakkunu uua, nuhig nai tappe noumnu kaya am iikku. Haen King Solomon nug aben laappa wan ita me, elele ii ba malak, nug Dawitnu Aab, amuam Solomon mamegnu aab amu, nug amunu aɗ ele ii ita malak, haen nug uɗat amu heehe ukke, Jeroboam nug uɗat amuppa dayom.

²⁸ Jeroboam nug uɗat amu haaha, nug uɗat ena hettom amunu, haen King Solomon nug Jeroboam nug nid bau uɗat ena hettom antta amu, Solomon nug Jeroboam awa, Epraim, Manase ele dilah danab ag uɗat amu heppig ele, nug ag gumadkkunu tituane, nug uɗat heegeg gumadttom.

²⁹ Aria, deɗ laa Jeroboam nug Jerusalemnu aha, nug ib laappa Jerusalem dimittim ugekke amu, Silonu propet Ahaiya nug nug ele ib amuppa nug uɗa tepiɗ. Aa ayaib. Danab laa ag aa guguatak ii daappig. Haen amuppa Ahaiya nug ulahnu lamen bau laa ma, nug ib amuppa uɗiom.

³⁰ Aakku Ahaiya nug nuhig ulahnu lamen bau ma uɗiom amu, nug amu uɗa awa, pattiɗe qatti 12 neeg,

³¹ am nug Jeroboam amegppa aum. “Lamen qatti eblaih tanig ele amu na nakka nahip diie! Aɗinu? Yawe, ig Israel ihinig Kayak, Nug na amenppa nai inam atte. ‘Da geha heppi, king dayaknu ehah Israel oh gumattaknu Solomon eppegppa ii daama. Geha da heppi, na king bena, Israel dilag huu okkai eblaih tanig ele gumadkkut.

³² Amge da Dawit, nug am dahil maɗi nid amu, da nuhignu dabmak anuqak awewe, da aab okkai Jerusalem, da aab amu Israel dilag huu okkai ohppanu dahil daakkunu tituanmi amu, da amu ele dabmak anuqak aottem amunu, geha da heppi, Solomon buɗub laa nug Israel dilag huu okkai laippu gumadkku.

³³ Da geha kobol imu Solomon, ⌊nuhikkudppan⌋ ele dilagppa hekkul. Aɗinu? Ag da uuiɗna dimeɗan, Saidon dilag kayak ah Astoret, Moap dilag kayak Kemos, amu Amon dilag kayak Molek ele noolagppa dup nona binalag meegeg uɗie, gemu ele hetteb. Am ib ena ag oiglagnu da tituanen mattami amu, ag uuna, am ɗo nai dahil oh ag ii dim lamidnana, ag kobol oh dahil neekkakppa ena daatte ele amu, ag ii heegeg uɗie, gemu ele ii hetteb. Ag Solomon mameg Dawit keeke amu oh dim lamittom bia ii heegeg uɗie, gemu ele ii hetteb.

³⁴ Amge da geha Solomon, nuhig king uɗat amu ii aɗidpa. Am laa amu, da dahil maɗi nid Dawit, da nug tituanmi, nug am dahil ɗo nai oh dim lamittom ele amu, da nuhignu dabmak anuqak aottem amunu, geha da heppi, Solomon nug king anam king dayeb ukkeb, nuhig mauhak batakku.

³⁵ Amge da nug bekka Rehoboam, nug king dayebeb amu, da geha Israel dilag huu okkai eblaih tanig ele amu aɗiten, na medakkul.

³⁶ Dahil maɗi nid Dawit, nug buɗubppanu danab laippu laa nug da noolppa haen oh Jerusalem ippa king daakkunu elele amu, da geha heppi, Solomon bekka Rehoboam nug Israel dilag huu okkai laippu, nug gumakku. Aab okkai Jerusalem imu amu, da onil iguppa daakkunu tituanmi.

³⁷ Amge Jeroboam na da geha heppi, na king daanna, na wan na gumakkut oot hette ele amu, na gumadkkut. Na Israel dilag king daakkut.

³⁸ Am na geha dahil haknunab nai oh dim lamidna, ib ena da tituanmi, amuppa na oinna, na ɗo nai oh, haknunab nai dahil ele dim lamidnana, amuppa na kobol oh dahil neekkakppa am ena ele heppe, dahil maɗi nid Dawit heum amubia, am da na ele daaɗa, da na ehanidkkul. Da heppi, na Israel dilag king daakkut. Am haen oh geha, da heppi, na buɗunad oolagppanu laala ag ahilag haen anen anenppa ag geha king daaglag. Da Dawitnu hemi amubia heinne, Israel medappi gumadkkut.

³⁹ Solomon nug hipunin heum amunu, geha da heppi, Dawit buɗub ag Israel wan oh ii gumamna. Amge haen ohnu am anam ii daamna. Iitta.’ ” Ahaiya nug Jeroboam amegppa anam aum.

⁴⁰ Solomon nug ⌊dimppa doyom, “Jeroboam nug aha, nug na tabitteb nokkutnu hette,” doya, nug⌋ Jeroboam qeeb mauhkkunu heum. Amge Jeroboam nug oola, Isip ukke, Isip dilag king Sisak ele daapiɗ, Jeroboam nug Isip dayeye, Solomon mauhom.

Solomon nug mauhom

⁴¹ Amu keeke kuɗum laa ele King Solomon heum, amu nuhig doyak dabmak ena ele oh ele amu, ag amu oh buk laappa, buk amuam onig Solomonnu Hak, Amunu Buk, buk amuppa yaappig daatte.

⁴² Solomon nug king maɗ 40 Jerusalem dayaya, Israel oh gumadttom.

⁴³ Dayaya, nug mauhe amu, ag nug Dawitnu Aab, ag appa boumppig. Dawit nug Solomon mameg. Solomon mauhe amu, nug bekka Rehoboam nug abenabppa king ba dayom.