1 King 10 - Nobonob Baibel

Seba dilag kuin nug Solomon anidkkunu uɗiom

¹ Amu Seba wanppanu kuin nug Solomonnu, “Yawe nug Solomonnu ena he, Solomon nug onig okkai beum,” nai amu nug doyom. Nug doyom amunu, kuin nug Solomon anidkkunu, nug oɗmak ɠagattag laala, Solomon nuhig doyak dabmak ena ele, nug amunu ma anttak oɗ medakkunu uɗiom.

² Kuin nug nuhikkud ehanittak danab aɗi ameg naɗi, kamel huanak, kuɗum ele, ag Jerusalem uɗippig. Kamel ag gol kuɗum, huanak, spais digdig, amu men daden nob okkainab ele, ag keeke amu mawadppig. Kuin nug uɗia, Solomon gumitta ba, amu nug keeke oh dabmeum, nug amunu Solomon oɗ mette, aa madipiɗ.

³ Am Solomon nug oɗmak amu oh tutukkuib nob meum. Nug kuin Sebanu oɗmak amu oh mehuqa medakkunu ootot laa ii qeum. Iitta.

⁴ Amu Seba wanppanu kuin nug Solomonnu doyak dabmak ena ele oh aakku antta doya, nug nuhig lag enanagnab heum, amu ele antta,

⁵ nug King Solomon ee ena kuɗum deɗ ohppa aotte, amu nuhikkud ehanittak anuqak danab, amu ele kuɗum, ag nug ele daanna ee lappig amu, nug amu ele anttom. Laa amu nug kingnu maɗi nid, ag ahilkad lamen elab enanag ele, nug ag ele anattom. Aria, nug kingnu wain paniak danab anatta, laa amu nug doɗ Solomon nug diia, Yawenu mettid lakka ukka, manaknu ofa hettom amu, nug amu ele anttom. Kuin nug keeke ena amu oh anam anatta, nug ooppa ottaiak beebe, dabmak kuɗum awom.

⁶ Aakku dimppa amu, nug King Solomon amegppa inam aum. “Da wan dahilppa dayeye, da nahipnu, keeke oh na hettem, amu na nahip doyak dabmak ena ele amu, da amunu oh nai doomi. Aria, gemu da doottem, nai amu oh am nai genabib.

⁷ Tatam, haen da ii anidmi, da naiib doomi ele, da nai amunu oolppa genab ii doomi. Amge gemu da uɗie, amelppanab antte amu, da iikku doottem. Nai amuam genab. Ge, nai amuam genab, amge nahip doyak dabmak ena ele, amu nahip en am huanak, okkai ele, nai da amunu doomi ele amu, keeke aɗit amu aa nai amu huanak eɗidttep. Na nai da dahil wanppa dayeye doomi amu, na nai amu eɗidna malame,” awa aum.

⁸ Kuin nug nai anam anana amu, nug baula aum. “Nahipad danab ag gamag ahak okkainab dootteb bia doottem. Nahip ehanittak anuqak danab ag hanhan na noomppa daan, nahip doyak dabmak ena ele dootteb amu, ag ele gamag ahak okkai dootteb bia doottem.

⁹ Ig Yawe, nahip Kayak, ig Nug binag metu! Nug nahipnu enanagnab doya he, na Israel dilag king daattem. Am Yawe, Nug ag Israel, ahilagnu oo huan mauhtte, nuhig oo mauhak ahilagppa am ii tuqa aoma. Anam daatte amunu, Nug he, na nai doya mala hettoɗia epeɗia elele mettak kobol dim lamidnana, na genab tutukku hak kobol ele dim lamidnana, na Israel gumadkkutnu, na king beme.” Sebanu kuin nug anam awa aum.

¹⁰ Amu Sebanu kuin nug gol huanak, uug nuhig 4,000 kilogram Solomon mettowa, nug spais huanak, amu men daden nob okkainab ele Solomon mettom. Spais nug mettom, amuam huanaknab. King Solomon mette, haen amu dimppa amu, spais huanaknab amubia laa nug Israel wan ooppa awa ii noum.

¹¹ King Hiramnu uub ag Opir wanppa gona, gol huanak inan uɗin, amu ad laa onig almug, amunu plang, am men daden nob okkainab ele, ag amu oh inan, Israel wanppa uɗippig.

¹² Ag keeke amu oh aon uɗippig amu, aria Solomon nug plang amuppa Yawenu mettid lagnu uug mawaknu keeke laala hatta, am kingnu lag enanagnabnu ele hattom. Amu nug harp, laia ele, musik hak danab ag amu qekkulagnu ele heum. Haen amu ukke, dimppa amu, ag ad ena amu kuɗumnab baula amubia laa aon, Israel wanppa ii uɗippig. Laa nug ad amu huanak amubia Israel wanppa baula ii anttom.

¹³ Amu King Solomon nug Seba wanppanu kuin nug keeke oh nug oo heum, keeke oh nug amunu Solomon oɗ mettom ele amu, Solomon nug mettom. Amu nug ele danab okkai uɗiegeg mattom bia amu, nug Seba dilag kuin amu ele mettom. Mette, dimppa kuin nug nuhikkud huu ele ag eɗun, kuinnu wanppa goppig.

Solomonnu enub am huanak

¹⁴ Amu Solomon nug maɗ anen anen gol 23,000 kilogram awom.

¹⁵ Laa ele, Solomon nug keeke laihnu awa dadennu mak danab, nug amu dilagppa takis men doɗo awewe, amu Arebia dilag king anen anen, am gawana Israel wan oppatakppa daatteb ele, ag ele Solomon men doɗo medattappig.

¹⁶ King Solomon nug bannu guppiɗ okkai 200 hatta, gol hamappa qaaqa, qaɗelagppa meum. Gol amu, guppiɗ anen anennu uug am, 7 kilogram.

¹⁷ Amu Solomon nug guppiɗ naunau ele 300 hatta, gol hamappa qaaqa, qaɗelagppa meum. Gol amu, guppiɗ anen anennu uug am 1.7 kilogram. Nug guppiɗ hatta mala, Solomon nug guppiɗ amu oh akka ukka, lag enanagnab laa onig Lebanon Duppunu Lag Enanagnab, nug lag amuppa maattom.

¹⁸ Laa amu, King Solomon nug sia king naɗi laa heum. Nug sia amu hewowa, nug sia amuppa kobol kobol hoiyak dayomppa elepan aeg babaittak qataqa, nug gol enanag awa, elepan aeg ii dayomppa sia qaɗeppa ma tonom.

¹⁹ King nug sia king amu attan taknu, adqaɗ tappa tak eblaih laippu ele hak daappig. King nug amuppa tekkunu amu, nug amu tappa, attan teum. Sia amu laih gome maknu amu, laih amunu ikki am tutukku ukkak iitta. Am nakok doɗo bia. Amu eppeg maknu aben aɗit ele daapiɗ. Eppeg maknu aben guguittak amu, laion dottog aɗit, laa laih hibaitta dayeye, laa laih hibaitta dayom.

²⁰ Amu laion dottog 12 ag adqaɗ tappa tak eblaih laippu ele, amu anen anenppa, naɗiap-ppa, nanehppa ele hippaidna daappig. Amu wan laalappan king ag ahilag sia king anam am laa iitta.

²¹ King Solomonnu kap oh am golppaib hak, am nug lag enanagnab laa onig Lebanon Duppunu Lag Enanagnab, lag amuppan tappiɗ keeke, ag gol ena dubuttid iitta ele, amuppaib hak. Keeke laa ag silwappa laa ii heppig. Aɗinu? Solomonnu haenppa danab ah ag silwanu am keeke hamu bia dooppig.

²² Aɗinu? King Solomon nug ele am uub laala, ag Hiramnu uub amu ele aben laalappa gona oinna, keeke daden maknu amu mawadppig. Uub ag haen oh gonana, aben laalappa maɗ ewam anam oinna, eɗun uɗidppig. Ag gol, silwa, elepan aeg, monki, amu ai onig pikak ele, ag amu oh mawadna eɗun uɗidppig.

²³ Amu King Solomon nug nuhig doyak dabmak ena ele, amuppa, amu nug enub kuɗum eleppa nug wanppanu king laa oh eɗattak dayom.

²⁴ Anam amunu, danab aben ohppanu ag Solomon gumidna uɗin, doyak dabmak ena ele Kayak, Solomon mettom, ag amu dooglagnu oolag daye, qagmekkulagnu haen mettaglagnu nug oɗ medappig.

²⁵ Danab ag Solomon anidkkulagnu oolag daye, maɗ maɗ uɗittappig ele amu, ag oh keeke ena Solomonnu daakkunu hamu mettaglagnu ele aon uɗippig. Ag keeke silwappa hak, golppa hak, ag lamen elab, ag bannu keeke, ag spais digdig, ag hos, amu ag doɗ onig miul ele diin uɗin, Solomon medappig.

²⁶ Amu Solomon nug hos, bannu karis ele diiom. Nug bannu karis 1,400 diia, nug hos 12,000 ele diiom. Nug hos, karis ele diia amu, nug aab okkai laala hos, karis ele daaglagnu aben babaittak daappig ele, nug laa appa maatta, laala nug Jerusalem maattom.

²⁷ Solomon nug king dayom, haen amuppa amu nug silwa, ad sida ele huanak awa, Jerusalem uɗiom. Amunu haen amuppa silwa am men bia, ambak Jerusalem appa dayeye, amu ad sida gikkiak ele huanak, ambak, Israel wan qauko nakok qauko okkai diigppa daatteb, appa ad sikamo fig huanak daatteb, amubia Jerusalem appa ad sida gikkiak ele huanak dayom.

²⁸ Hos Solomon diiom ele amu, nug Isipnu, Kuenu ele diiom. Kue appanu King Solomonnu keeke laihnu awa dadennu mak danab ag hos men doɗo ganeppa awaknu ɗo dayom bia, ag hos daden amuppa aodppig.

²⁹ Solomonnu keeke laihnu awa dadennu mak danab ag bannu karis Isipnu aoppig amu, ag karis mameg 7 kilogram silwa mettana, ag karis laippu aoppig. Hosnu am ag 1.7 kilogram silwa hos mameg mettan, hos aoppig. Ag hos, bannu karis ele amu aona, ag Hit dilag king, Aram dilag king ele ippuanateg, ag Israel dilagppa aoppig.