1 King 1 - Nobonob Baibel

King Dawit nug kainonab me, bekka Adonaiya sia kingppa daakkunu heum

¹ Haen King Dawit nug kainonab ma dayom, haen amuppa amu, nug beɗu ulah qe, oug doyeye, nuhig maɗi nid ag haen oh palanget laidttappig, amge nug beɗu ii gakkaɗttom, iitta.

² Nug anam dayom amunu, nuhig maɗi nid ag nug amegppa inam appig. “King, ig inam dabmettem. Na appe, ig ah makkun laa anidta, apput uɗieb, na ele daayya, nug na, ihinig naɗi, nug na atognoittebeb, amu nug na ele oh niipeɗ, na beɗun amu gakkaɗkku,” aon appig.

³ Ag Dawit amegppa anam awona, ag ahan, Israel wan atu ohppa gona, ag nid ahin laa nug iɗu tuqak ele anidna, aon uɗiglagnu mattin oippig. Ag oin oin Sunem aabppa Abisak, Sunem ah, ag nug anidppig. Anidna, ag nug omalna king toppa uɗippig.

⁴ Abisak nug am nid ahin enanag, ag nug aon uɗieg, nug king ehanitta atognottom, amge king nug ah amu beɗu laa ii aɗom.

^5-6 Dawit, Abisak ele aa anam daaeheh, amu Adonaiya, nug King Dawit, Hagit ele bekkalah, nug king abenab awa, king daakkunu dabmeum. Dawit wau, onig Maka, nug Apsalom menue, amu dimugppa Dawit wau Hagit nug Adonaiya menuom. Adonaiya Nug danab anttak nuhig am iɗu tuqak ele, enanagnab. Nug mameg nug Adonaiya deɗ laa ii tolitta, daug laa ele ii batom amunu, nug gemu king daakkunu nug nuhig dabmak amu ɠagattag dayom amunu, nug aum. “Gemu da king bein daakkul,” anana, nug nukka nuhikkud daaglagnu, nug bannu karis laala, hos ele diiattowa, amu danab 50 ele diiom. Nug aha gokkunu oo dayeb amu, nug aha, karis laa awa ukkebeb, danab 50 amu ag anuqna, noob aon gobeppeg gokkunu diiom.

⁷ Amu Adonaiya nug Seruia bekka Joap, amu mana mettak danab Abiatar ele, ag nai madippig. Ag nai mattin, danab aɗit aa nug ele, ag oolag laippu daye, aa nug ehanidkkulahnu apiɗ.

⁸ Aa ehanidkkulahnu apiɗ, amge danab laib laib laa, ag Adonaiya ele oolag laippu ii dayom. Amuam mana mettak danab Sadok, Jehoiada bekka Benaia, propet Natan, amu Simei, Rei, amu King Dawitnu gumak daup, ag ele.

⁹ Amu deɗ laa Adonaiya nug aha, mana mettak hekkunu ha, nug ukka, aben onig, “Matnu Men,” atteb, le qeppuɗia bette onig Enrogel guguittak, appa nug mana mettak heum. Nug sipsip, makau ele aqa, makau nag ittalkad ele aqa, nug mana mettak amu heum. Nug mana mettak amu hekkunu dabmaama, nug awakkud, amakkud, ag am King Dawit bekkod, amu Juda danab ag kingnu ehanittak anuqak danab ele, nug ag oh ag mana mettak amuppa uɗiglagnu nug amelagppa aum.

¹⁰ Amge Adonaiya nug propet Natan, Benaia, am nug mamegnu gumak daup, amu nug amag Solomon ele, ag am mana mettak nug hekkunu dabmeum ele, nug ag amuppa gokkulagnu nug amelagppa ii aum.

Solomon king beum

¹¹ Anam he, propet Natan nug nai amu doya, nug Solomon anig Batseba gumitta ukka, oɗ mettom. “Na Hagit bekka Adonaiya heum amu, na doomete? Nug nukka king ba, gemu nug ihinig king daatte, am King Dawit nug ii dootte. Na amu doomete, o iitta?” Nug anam od mettom.

¹² Nug anam anana amu, nug nai tuɗitta aum. “Nug anam hette amunu, ag na, amu na bekkat Solomon ele, ag aa aqatmananu, na dahil ulum nai dim lamitte!

¹³ Na King Dawit gumidna paha gona, inam amegppa akkut. ‘O King, dahil naɗi, na anukka nai ɠagattag qakkan, nahip maɗi ah da, da amelppa inam dahil nid Solomonnu iite ame? “Geha Solomon, nug am na bekkat, nug geha da abenal awa, king ba, nug dahil sia kingppa daakku.” Anam amu, attem daye, Adonaiya nug gemu king ihinig beum daatte?’ ” Natan nug anam Batseba amegppa aum.

¹⁴ Natan nug Batseba amegppa anam ana, nug tuɗitta aum. “Na King Dawit amegppa Adonaiya nug anam heum, na amunu appe doyebeb, da ele na madippeppe, lag ooppa noin, King Dawit amegppa nahip nai amu ɠagattag qetten, appi dookku,” awa aum.

¹⁵ Natan nug anam a, aakku Batseba nug king lag oo, king nug oo amuppa daatte, nug appa gumitta noum. Tatam anak amu, king nug kainonab meum amunu, Sunem ah aon uɗippig, Abisak, nug king ehanittatta, atognottom.

¹⁶ Amu Batseba nug king gumitta noa, gomela auta awa, gateg qaun o, amu king nug Batseba oɗ mettom. “Na aɗi keekenu oot daatte?” awa aum.

¹⁷ Dawit anam a amu, Batseba nug King Dawit amegppa aum. “O dahil naɗi, na anukka Yawe, Kayak nahip, na Nug onigppa na nahip maɗi ah da, da amelppa nai ɠagattag qettan, na da amelppa inam ame. ‘Nahip nid Solomon nug da abenal awa, king ba, nug dahil sia kingppa daakku,’ aon ame.

¹⁸ Amge Adonaiya nug gemu king beum daatte, amu na nai amu ii doome.

¹⁹ Adonaiya nug makau, makau nag ittalkad ele, amu sipsip ele aqa, manatta, Kayak mettom. Amu nug mana mettak hekkunu dabmaama, nug na king, na begapad laa oh mana mettak amuppa gokkulagnu amelagppa a ukkaeg, nug mana mettak danab Abiatar, amu nahip ban daup ikki anuqak Joap, nug ele aa amelahppa a, aa ukkaeh, mana mettak amu heum. Amge nug Solomon, nahip maɗi nid, nug nug gokkunu nug oɗ ii mettom.

²⁰ O King, dahil naɗi, na doye! Israel danab ah oh ag na aun nug nahip abenppa sia kingppa king daakkunu amelagppa appe dooglagnu, ag na amen metteb.

²¹ Na ag amelagppa ii awona, geha na mauhppe amu, Adonaiya aɗi ag Solomon da ele, ag ihinihnu danab ah nau bia dooitnana, nitappeg mauhkkunih,” awa aum.

²² Am Batseba nug king ele nai mattieheh amu, propet Natan aakku king laugppa beum.

²³ Be, kingnu maɗi nid ag king amegppa appig. “Propet Natan nug uɗiom,” appig. Ag aeg, ⌊Batseba aha ukke,⌋ Dawit nug Natan dokkunu a, Natan nug king gumitta wana, gateg qaun o, gomela, iɗu wanppa meum.

²⁴ Aria, Natan nug Dawit amegppa aum. “Dahil king, Adonaiya nug king ba, na abenamppa nahip sia kingppa daakkunu amu, na amete?

²⁵ Aɗinu? Gemu nug mana mettak ha, makau kuɗum, amu makau nag ittalkad ele kuɗum, amu sipsip kuɗum ele aqom. Amu nug na begapad laa, nahip daup dilag ikkilag, amu mana mettak danab Abiatar ele, nug ag oh gokkulagnu a, aakku ag goppig. Am gemu ag nug ele ee, le lanana, ag enana inam atteb. ‘Adonaiya nug king haen elab dayaɗ!’ aon atteb.

²⁶ Nug anam hette, amge nahip maɗi nid da, mana mettak danab Sadok, Jehoiada bekka Benaia, amu Solomon, nahip maɗi nid, nug ig amenigppa appa gokkunignu ii aum.

²⁷ O king, dahil naɗi, na ig, nahipad maɗi nid amu, na ig amenigppa aun nug na abenamppa king daakkun tituanme amu, na ae, ig ii dooutut, Adonaiya aɗi ag anam hettebte?” awa oɗ mettom.

Dawit nug Solomon awa, king meum

²⁸ Natan anam awowa, ⌊nug aha ukke⌋, King Dawit nug ⌊nuhig ehanittak⌋ laa amelagppa, “Ag appeg, Batseba nug eɗua, dahilppa uɗiaɗ!” awa a, ag heeg, nug eɗua king gumitta noum.

²⁹ No amu, king nug inam Batseba amegppa nug nuhig nai ɠagattag qetta aum. “Yawe Nug haen oh da uug digdigppa daattem amu, Nug da ehaniɗaɗa, eɗua awiɗtte, Nug genab bau daatte, genab amubia da na amenppa iikku attem.

³⁰ Anukka da na amenppa Yawe onigppa keeke laa hekkulnu nai ɠagattag qetten mattimi amu, da nai amu gemu heppi, nai amu meu bekku. Nai qakkak amuam da Yawe, Israel dilag Kayak, da Nug onigppa nai qakkami. Am da nai qakkami, amuam inam. ‘Nid nahip Solomon, nug da abenalppa king dayaya, nug dahil sia kingppa daakku!’ Nai amu da ɠagattag qettami amunu, da nuhignu nai qakkami amu, da gemu heppi meu bekku!” awa aum.

³¹ Nug anam a, Batseba nug nai amu doya, nug gateg qaun o, gomela auta awa, iɗu wanppa ma, nug king amegppa aum. “Da na, dahil okkai King Dawit, da na hanhan daakkutnu ool daatte,” awa aum.

³² Aakku King Dawit nug ⌊nuhikkud ehanittak amelagppa⌋ aum. “Ag gona, mana mettak danab Sadok, propet Natan, am Jehoiada bekka Benaia ele amelagppa appeg, ag uɗin, da aniɗkkulag,” awa aum. Nug anam a heeg, danab ewam ag king gumidna uɗippig.

³³ Uɗieg, aria king nug ag amelagppa inam aum. “Ag da, ahilag okkai, ag dahilad maɗi nid diiadppeg, ag gona, dahil nid Solomon amegppa anan heppeg, nug dahil miul attan teeb, ag nug aon omalppeg, le qeppuɗia bette onig Gihon, appa nokkulag.

³⁴ Nona, appa mana mettak danab Sadok, am propet Natan ele aa Solomon nug Israel dilag king daakkunu goɗen gokkaɗakppa tituaneɗ! Aa amu hepeɗ amu, ag trampet iwalnana, ag baalag okkaippa ekkulag. ‘Solomon nug king haen elab dayaɗ!’ Ag anam aon eig!

³⁵ Am ag anam heppeg, ag nug ele oh eɗun, ippa uɗin, nug dahil sia kingppa daakku. Da nug Israel, Juda ele gumadkkunu iikku tituanmi,” awa aum.

³⁶ King nug anam a amu, Jehoiada bekka Benaia nug kingnu nai nob ma, king amegppa aum. “Genab, anam dayaɗ! Am nahip Kayak, Yawe, Nug geha keeke oh na ame, amubia heeb bekkunu ool naɗi daatte.

³⁷ Amu Yawe Nug am haen oh na ehanittette, na ihinig king daame amu, amubia Yawe Nug Solomon ele nug ehanittatta heeb, nug king ena, ɠagattag ele ba, onig ele okkai beeb, na onin okkai ele daame, amu eɗidkkunu ool daatte,” awa aum.

³⁸ Dawit nug anam a, aakku mana mettak danab Sadok, propet Natan, am Jehoiada bekka Benaia, aria, danab Dawit gumappig, amuam Keret danab, Pelet danab ele amu, ag oh noppig. Ag nona Solomon aon, King Dawitnu miul attan mewon, ag nug ele oh le nakok Gihon, amuppa noppig.

³⁹ Amge ii noak haenppa mana mettak danab Sadok nug peh lag Yawenu tituanak daatte ele, nug appa ukka, olip goɗen makau qeqeɗi okkulakppa inak ele awom. Awe nona, nug Solomon king daakkunu nug goɗen gokkaɗakppa tituanom. Anam gokkaɗa tituane amu, ag trampet iwaleg, danab ah oh ag ahan inam aon eppig. “Solomon nug king haen elab dayaɗ!” aon eppig.

⁴⁰ Am danab ah oh ag anam enana, Solomon dim lamitteg, Jerusalem aab okkaippa wappig. Wanana, ag gamalag ahehe, baalag okkaippa enana, attug ele iwalppig. Eppig, baalag oqotti amu okkainab ahehe, wan uɗalom.

Adonaiya nug King Solomon baɗittom

⁴¹ Haen amuppa Adonaiya nug nuhikkud huu ele ee naɗi amu lana malona, ag muttub qak okkai, am trampet baag ele ahe dooppig. Doon amu, Joap nug trampet iwalak amu doya, nug inam od meum. “Attem daye, oqotti okkai Jerusalem aab okkaippa ahatte?” awa aum.

⁴² Am Joap nug anam aawo, mana mettak danab Abiatar, nug bekka Jonatan, nug ukka gumatta teum. Te amu, Adonaiya aum. “Inam do! Aɗinu? Na am danab ena amunu, da doottem, na ihinig nai ena laa aakku aon uɗime,” awa aum.

⁴³ Amge Jonatan nug Adonaiya aum amu oɗeppa awa, inam amegppa aum. “Iitta! Gadon da nai ena ii awe uɗimi. Amu danab okkai ihinig, King Dawit, nug Solomon awa, king meum.

⁴⁴ King Dawit nug mana mettak danab Sadok, propet Natan, Jehoiada bekka Benaia, aria danab Dawit gumappig, amuam Keret danab, Pelet danab ele amu, king nug he, ag Solomon ele le nakok Gihon appa goppig. Ag Solomon aon, King Dawit nuhig miul attan meeg dayeye goppig.

⁴⁵ Ag gona, mana mettak danab Sadok, propet Natan ele aa le qeppuɗia bette Gihon appa Solomon king daakkunu goɗen gokkaɗakppa tituanpiɗ. Anam goɗen gokkaɗakppa tituaneh, amu ag Solomon king daattenu gamalag ahehe, baalag okkaippa enana, muttub ele appanu uɗin, aab okkai Jerusalem noegeg, oqotti amu ag dootteb.

⁴⁶ Solomon nug gemu king ba, sia kingppa daatte.

⁴⁷ Amu kingnu ehanittak anuqak danab ⌊Adonaiya ele ii goppig,⌋ ag gamalag ahom amunu, ag King Dawit nug ena heum, ag amu nug amegppa akkulagnu gumidna uɗippig. Ag uɗin, Dawit amegppa inam appig. ‘Nahip Kayak Nug Solomon, nug king ena, ɠagattag okkai metta, nug onig okkai ele metteb, na onin eɗidkkunu oonig daatte,’ appig.” Jonatan nug ag anam appig, nug amunu anana, nug nai tuɗitta aum. “King Dawit nug nuhig niiak abenppa dayaya, nug Yawe noobppa dup noa binag meum.

⁴⁸ Nug Yawe noobppa dup noa binag ma, nug inam aum. ‘Ig Yawe, Israel dilag Kayak, ig Nug binag metu! Gemu Nug he, nid dahil imu nug da abenalppa king be, nug dahil sia kingppa dayeye, da anidmi!’ ” awa aum.

⁴⁹ Am danab Adonaiya ele daanna ee lappig ele amu, ag Jonatan nai amu a doon, ag baɗan, ag paha ahan, Adonaiya uuidna, matatun goppig.

⁵⁰ Amu Adonaiya nug ele Solomon baɗitta, oola ukka, mettid haknu peh lakka ukka, nug makau qeqeɗi dottolag, qaɗab daugppa daatteb, nug amu aɗalata, appa dayom. ⌊Aɗinu? Nug auntai laa aben amuppa nug ii qema doyom.⌋

⁵¹ Dayeye amu danab laa ag gona, Solomon amegppa inam appig. “Adonaiya nug na baɗitta ukka, Yawenu peh lakka appa qaɗab daugppa qeqeɗi dottolag daatteb, amu aɗalata dayaya, amuppa nug ena, bau daakkunu appa daatte. Appa dayaya nug inam aum. ‘King Solomon amegppa inam appeg doyaɗ! “Da qaɗabppa daattem. Da imuppanu ahe, laih ii gopa! King Solomon nug Yawe onigppa nug da, nuhig maɗi nid, nug da qep elabppa ii iumanu nuhig nai ɠagattag qeeb, da gokkul,” ’ ” awa aum.

⁵² Aria, Solomon nug nai amu doya, nug nob ma, inam amelagppa aum. “Adonaiya nug kobol ena, kobol tutukku dim lamidtte dayeb amu, da aɗinu nuhigppa eheɗ hekkul. Amge nug kobol eheɗ hekku amu, nug mauhkku,” awa aum.

⁵³ Aakku King Solomon nug danab laala peh lakka qaɗabppa Adonaiya aoglagnu he goppig. Ag gona, Adonaiya aon, King Solomon toppa uɗieg, amu Adonaiya nug King Solomon noobppa gomele, king nug amegppa aum. “Enade, na lautppa ukke!” awa aum.