1 Jon 5 - Nobonob Baibel

Danab ooppa genab doyak ele, nug wannu kobol ii dim lamidtte

¹ Am aun laa nug, Jesus am Kristus, ooppa genab dootte amu nug Kayak Bekka beum daatte. Amu aun laa nug Mamenu oo mauhak dootte amu, nug Bekkanu ele oo mauhak dootte.

² Ig Kayaknu oonig mauhtte, nuhig haknunab anak ele dim lamidttem dayeb amu, ig amuppa ig Nug bekkod dilag ele oonig mauhtte doottem.

³ Ig Kayaknu oonig mauhtte dayeb, ig nuhig haknunab anak dim lamidkkunig. Amuam oo mauhaknu diig aakku. Amu nuhig haknunab anak am uug iitta.

⁴ Aɗinu? Danab aun aɗi ag Kayak bekkod daatteb ele, ag wan imuppan kobol nau amu eɗidna, ɠagattag daatteb. Ig Jesusnu oonigppa genab doottem amu, amuppa ig wan imuppan kobol nau eɗidttem.

⁵ Aun nug wanppanu kobol nau eɗidtte? Danab nug Jesus Nug am Kayak Bekka, nug amunu ooppa genab dootte ele, nug aakkuib wanppanu kobol nau eɗidtte.

⁶ Jesus Kristus Nug uɗia, leppa layattak awa ukka, ad emaitakppa mauha Nug tiigppa ig uhuqikkom. Amu le, tiig amu ele, keeke aɗit amu Nug Kayak Bekka ippunigtte. Le nug nukka ii ippunigtte. Iitta. Le tiig ele oh amu ippunigtte. Kayak Ouɗi Nug am doyak diig genabib diig amunu, Nug amunu mehuqtte.

⁷ Am ewam amu ag Jesus, Nug am Kristus, ippunigtte.

⁸ Ewam amuam Kayak Ouɗi, le amu Jesus tiig ele. Ag oh laippuib ippunigtte.

⁹ Ig hettoɗiakppa danab dilag nai am genab doottem, amge Kayaknu nai am danab dilag eɗittaknab. Aɗinu? Kayak Nug amu mattiom. Aria, Nug Jesusnu ippunikkom amunu, ig oonigppa genab doognignu elelenab.

¹⁰ Danab nug Kayak Bekkanu ooppa genab dootte, nug aakku Kayaknu ippunittak amu awa, nug ooppa daatte. Am laa nug amu ooppa genab ii dootte, nug aakku, “Kayak Nug am hambuppuak danab,” awa atte. Aɗinu? Kayak Nug Bekkanu ippunittom, danab amu nug ooppa genab ii doyom amunu, nug anam atte.

¹¹ Amu Kayak Nug aɗi ippunikkom? Nug bauklel hanhannu ig mekkom, amu bauklel amu ig Nug Bekkanu aottem.

¹² Aun nug Kayak Bekka ele laippu daattep amu nug bauklel ele, am aun nug Kayak Bekka ele laippu ii daattep, nug bauklel iitta.

Bauklel hanhannu nai

¹³ Da ag Kayak Bekka, ag nuhignu oolagppa genab dootteb amu, da ag bauklel hanhannu aoppig daatteb genab dooglagnu, da ahilagnu nai imu yaattem.

¹⁴ Amu ig aɗi keekenu oonig daatte, keeke amu nug Kayak oo niitte bia daatte dayeb, ig amunu unuqidttem amu, ig Nug ihinig unuqittak amu dootte doottem.

¹⁵ Amu ig keeke ohnu anam bia oɗmak hettem amu, Nug ig dooigtte doottem dayeb, ig oɗmak oh hettem amu, ig nob amu aakku nuhigppa aognignu ele genab doottem.

¹⁶ Laa nug layag hipunin hette anidtte, amge hipunin am he, danab mauhtte, amu iitta ele antta amu, nug layagnu Kayak unuqitteb, Kayak Nug heeb, nug layag bau daakku. Nai amuam hipunin nug he, danab ii mauhtte amunuib, amge hipunin laa nug he, danab mauhtte ele amu, da ag amunu unuqidkkulagnu ain ii attem.

¹⁷ Kobol tutukku iitta amu oh am hipuninib, amge hipunin oh am heeg danab ii mauhtte.

¹⁸ Ig doottem, danab aun nug Kayak bekka daatte amu, nug hipuninppa ii oitte. Kayak Bekka Jesus, Nug nug atognotte. Satan nug danab amu nakok laa ii aɗatte.

¹⁹ Ig doottem, ig Kayak bekkod daattem, amge wanppanu danab ag Satan waappa daatteb.

²⁰ Ao ig ele doottem, Kayak Bekka Nug uɗia, ig Mame genab, Nug doognignu diignu doyak tutukku mekkom. Amu laa, Kayak Nug am genab diig, amu ig nuhigppa daattem, amu ig Nug Bekka Jesus Kristus, nuhigppa ele daattem. Kayak Nug am Kayak genab, Nug bauklel hanhannu diig ele.

²¹ O nid naunau, ag kayak hambuppuak dottolkad dim lamadmanade, dabmeig!