1 Jon 4 - Nobonob Baibel

Kayak Ouɗi amu ouɗi nau ele epeɗiaknu nai

¹ O gamalad, propet hambuppuak kuɗum ag ihinigppanu qatin gona wan imuppa oitteb amunu, ag danab ag, “Da Kayak Ouɗi oɗe awen madittem,” atteb ele, ag amu oh dilag nai oolagppa genab aib dooppig. Iitta. Ag nai dootteb ele ag ouɗi aun laa nai maditteb ele ehanatte, ag nai maditteb, ag amu pehettan epeɗin, aun nug Kayak Ouɗippa nai maditte anidna, ahilag naiib ag oolagppa genab doyeg!

² Amunu aun nug Kayak Ouɗi awom daatte ag amunu tutukku dooglagnu ib am iikku. Danab nug Jesus Kristusnu, “Nug uɗia danab beɗu awom,” nai amu maditte ele amu, ag nuhignu, nug am Kayaknu danab dooglag.

³ Amge danab oh ag Jesusnu anam ii atteb amu, danab amu ag ouɗi laa ele, amu Kayak Ouɗi iitta. Ouɗi amuam Kristusnu kekeɗnu ouɗi! Anukka ag nug uɗikkunu dooppig ele amu, aakku wanppa uɗiom daatte.

⁴ O nid naunau dahilad, ag am Kayaknu amunu, ag propet hambuppuak eɗadppig. Aɗinu? Laa ag oolagppa daatte amu, Nug onig, ɠagattag ele am wan imuppan okkai eɗittak.

⁵ Amu propet hambuppuak ag am wanppanu amunu, ag wanppanu naiib maditteb. Mattiegeg, wanppanu danab ag dootteb.

⁶ Ge ig am Kayaknu amunu, aun nug Kayak dootte amu nug ihinig nai dootte. Amge aun nug Kayaknu danab iitta amu, nug ihinig nai ii dootte. Amuppa ele ig aun nug Kayak Ouɗi oɗe awa, nai doyak diig genabibppanu maditte, amu aun nug wan imuppan okkai oɗe awa, nai genab iitta maditte ele doottem.

Kayak Nug oo mauhaknu diig

⁷ O gamalad, ig lainkad ele ig oh nug oo mauhak dootu! Aɗinu? Oo mauhak kobol diig am Kayak. Laa nug oo mauhak kobol dim lamidtte amu, nug Kayak Bekka daya, nug ele Kayak dootte.

⁸ Am aun laa nug laikkud dilag oo mauhak ii dootte amu, nug Kayak ele ii dootte. Aɗinu? Kayak Nug oo mauhak kobolnu diig daatte.

⁹ Kayak Nug Bekka laippunab, ig nuhigppa bauklel aognignu wanppa me uɗiom amunu, amuppa amu Kayak Nug ihinignu oo mauhak dootte ig ippunikkom.

¹⁰ Ig Kayaknu oonig mauhom, diig amunu Kayak Nug Bekka me wan imuppa uɗiom am genabte! Iittanab! Nug ihinignu oo mauhom amunu, Nug Bekka laippunab me, Nug ihinig eheɗ haknu nob nau Nug tiigppa iitta mekkunu heeb elele medakkunu wan imuppa uɗiom. Amuam oo mauhak kobol tutukku aakku.

¹¹ O gamalad, Kayak Nug ihinignu anam oo mauhom amunu, ig ele nug oo mauhak kobol genab hekkunig daatte.

¹² Genab danab laippu laa nug Kayak ii anttom, amge ig nug oo mauhak kobol hettem dayeb, Kayak Nug ig oonigppa dayeye, nuhig oo mauhak kobol ihinigppa elelenab mette.

¹³ Nug nukka nuhig Ouɗi ig mekkom amunu amuppa ig doottem, ig nuhigppa daattem, amu Nug ihinigppa ele daatte.

¹⁴ Mame Nug Bekka, wan imuppan danab oh eɗua diiadkkunu me uɗiom, amu ig Nug Bekka anidta, ig amunu iikku madittem.

¹⁵ Laa nug Jesus am Kayak Bekka anana maditte ele, Kayak Nug danab amu nuhigppa daatte, amu danab amu nug ele Kayak nuhigppa daatte.

¹⁶ Ig Kayak Nug ihinignu oo mauhtte doottem, amu ig oo mauhak amunu oonigppa genab doottem. Kayak Nug oo mauhak kobolnu diig daatte. Laa nug oo mauhakppa daatte, nug aakku Kayak, nuhigppa daatte, amu Kayak ele nuhigppa daatte.

¹⁷ Ib amuppa amu, ig epeɗiak haenppa Kayak noobppa baɗak iitta ele daagnignu, oo mauhak kobol ig oonigppa elelenab mette. Ig epeɗiak haenppa Kayak noobppa baɗak iitta daagnignu diig am, ig wan imuppa daatta, Kristus Nug daatte amubia, ig ele daattem.

¹⁸ Baɗak nakok laa ⌊Kayaknu⌋ oo mauhakppa ii daatte. Aɗinu? ⌊Kayaknu⌋ oo mauhak elelenab daatte, amu oo mauhak amuam baɗak lamidtte. Nob nau aokkunu doyak am he, danab nug baɗatte, amunu danab nug anam baɗatte amu, ⌊Kayaknu⌋ oo mauhak ⌊elelenab, amunu diignu doyak tutukku⌋ am danab amu ooppa elelenab ii meum.

¹⁹ Kayak Nug tatam ihinignu oo mauhom amunu, ig oo mauhak kobolppa oittem.

²⁰ Am laa nug, “Da Kayaknu ool mauhtte” atte, amge nug layagnu nau ninig ele dootte amu, nug am hambuppuak danab. Aɗinu? Danab nug layag laa antta malom ele, nug nuhignu oo mauhak ii dootte dayeb, nug attem ha, Kayak, nug Nug ii anttom amu, nug nuhignu oo mauhak dookku?.

²¹ Amu Kayak Nug ɗo iikku ig mekkom. Laa nug Kayaknu oo mauhak dootte amu, nug layagnu ele oo mauhak doyaɗ!