1 Jon 2 - Nobonob Baibel

¹ O nid naunau dahilad, ag hipunin ii hemananu da nai imu ye madattem. Amge laa nug hipunin hekku amu, ihinig ehanittak, Nug am gamag danab, Nug Mame toppa daatte. Nug Jesus Kristus; Nug am genab tutukku hak danab.

² Nug ad emaitakppa mana mettak bia dayaya, ihinig eheɗ haknu nob nau Nug tiigppa iitta mekkunu he elele mettom. Amge Nug ihinignuib anam ii heum. Iitta. Nug danab ah wan atu ohppa daatteb ele amu, Nug amu dilagnu ele heum.

³ Amu ig Kayaknu haknunab anak dim lamidttem dayeb amu, ig amuppa ig Nug doota oittem aakku doottem.

⁴ Am danab aun nug, “Da Nug doottem” atte, amge nug nuhig haknunab anak ii dim lamidtte amu, nug am hambuppuak danab. Doyak diig genabib nuhigppa ii daatte.

⁵ Amge aun laa nug nuhig nai dim lamidtte amu, Kayaknu oo mauhak am genab ambak nuhigppa daatte. Amuppa ig doottem, ig nuhigppa daattem.

⁶ Am aun laa nug, “Da nuhigppa daattem,” atte amu, nug Jesus oiyom bia oiyaɗ!

⁷ O gamalad, da haknunab anak imu madattem amu, da haknunab anak bau ahilagnu ii yaattem. Iitta. Imuam haknunab anak ag anukka Kristen bena aoppig ele amuib; am nai ag anukka dooppig aakkuib.

⁸ Amge haknunab anak imu, da ahilagnu yaattem ele amu, nug am bau bia ele. Nuhig meu am Jesus nuhigppa amu ahilagppa ele miag atitte. Aɗinu? Gatatu oh iitta meeme, amahlak genab nug aakku amahaltte.

⁹ Aun laa nug, “Da amahlakppa daattem,” awa atte, amge nug layagnu nau ninig ele dootte amu, nug gatatuppa daatte.

¹⁰ Aun nug layagnu oo mauhtte, nug amahlakppa daya oitte, amu keeke eheɗ laa nuhigppa dayaya heeb, na qekkunu laa ii daatte.

¹¹ Am aun laa nug layagnu nau ninig ele dootte amu, nug gatatuppa daatte, gatatuppa ele oitte; nug adeppa gotte amu, nug ii dootte. Gatatu nug ameg qehakkom.

¹² O nid naunau dahilad, Jesus Kristus onigppa Kayak Nug hipunin ahilag uhuqa mattom amunu, da ahilagnu yaattem.

¹³ Ag nid mamelkad, ag aun Nug anukka digmakppa dayom amu, ag dootteb amunu, da ahilagnu yaattem. Ag nid bau, ag Satan eɗidppig daatteb amunu, da ahilagnu yaattem. O nid naunau dahilad, ag Mame dootteb amunu, da ahilagnu yaami.

¹⁴ Ag nid mamelkad, ag aun Nug anukka digmakppa dayom amu, ag dootteb amunu, da ahilagnu yaami. Nid bau, ag am ɠagattag, Kayak nai ahilagppa daatte, ag Satan eɗidppig daatteb amunu, da ahilagnu yaami.

Wan kobolnu oo mauhak am ena iitta

¹⁵ Ag wan imuppan kobol amu keeke laa wanppa niitte ele, ag amunu oolag aib mauhom. Laa nug wanppan keekenu oo mauhtte amu, nug Mamenu oo ii mauhtte.

¹⁶ Aɗinu? Ig doottem, wanppan keeke oh, amuam beɗu kobol haknu oo hak nau dim lamittak, ameg qak doya awaknu oo hak nau dim lamittak, amu nukka binag maknu oo hak nau dim lamittak ele, kobol amu oh am Mame toppanu iitta, keeke amu oh am wanppanuib.

¹⁷ Wan amu wanppanu keeke, danab ag aoglagnu amelag qette ele amu, keeke amu oh ag iitta mekkulag, amge aun laa nug Kayak oɗe dim lamidtte amu, nug hanhan bau daakku.

Kristusnu kekeɗ kuɗum bena malappig

¹⁸ O nid naunau dahilad, haen aakku gogppa tekkunu hette. Kristusnu kekeɗ uɗikkunu amu, anukka laa ag ag amelagppa aeg dooppig. Anam aakku amu gemu Kristusnu kekeɗ kuɗumnab beppig amunu ig doottem, haen aakku gogppa tekkunu hette.

¹⁹ Kristusnu kekeɗ ag ig oonigppa daappig, amge ahilag ooppa genab doyak am ihinig ele laippu iitta amunu, ag uuigna goppig. Ag ig ele ooppa genab doyak laippu daalom, ig gemu ag ele laippu daalom. Ag ig uuigna goppig amu, amuam ag ig ele laippu ii daamut ippunigtte.

²⁰ Anam, amge dahilad, ag Kayak Ouɗi aoppig amunu, ag oh aakku keeke doyak diig genabibppanu bette dootteb.

²¹ Ag doyak diig genabib ii dooppig amunute da imu yaattem? Iitta! Ag doyak diig genabib amu dootteb amunu, da ahilagnu yaattem. Amu ag ele dootteb, nai hambuppuak laa doyak diig genabibppa ii daatte.

²² Anam amunu aun nug hambuppuak danab daatte? Danab nug Jesus am Kristus iitta atte ele, nug am hambuppuak danab daatte. Nug am Kristusnu kekeɗ. Nug Kristus am Mame Kayak ele aa oh guhuɗat-te.

²³ Am aun laa nug Mame Bekka guhuɗidtte amu, nug Mame ele laippu ii daattep. Am laa nug Mame Bekka nuhignu, “Nug am Kristus,” atte amu, nug Nug, Mame ele oh laippu daatteb.

²⁴ Ag digmakppa nai dooppig amu, ag oolagppa ɠagattag aɗan dayeg! Amu ag digmakppa nai dooppig ag oolagppa daakku dayeb amu, ag haen oh Mame Bekka, amu Mame ele laippu daaglag.

²⁵ ⌊Ig anam daagnig amu,⌋ ig bauklel hanhannu aognig; Kristus Nug nai amu qakka aum.

²⁶ Da aun ag hambuppualadkkulagnu hetteb amu, ag ahilag hambuppuak amu miag atiak anidkkulagnu iikku yaattem.

²⁷ Amge ag Kristus eppegppanu Kayak Ouɗi aoppig, ag oolagppa ele daatte amunu, auntai laa nug ag keeke laa ippunadkkununab ii daatte. Aɗinu? Kayak Ouɗi, Nug keeke ohnu diig tutukku ippunadtte, Nug am genabib ippunadtte, Nug hambuppuak laa ii ippunadtte amunu, Nug ag ippunadtte amu, ag amu dim lamidna, Kristus ele laippu dayeg!

Kayak bekkod dilagnu nai

²⁸ Ao, nid naunau dahilad, haen Nug miag atieb, ig ɠagattag daagnignu, ig uɗa nak ele ii aomtanu amu, ag Nug ele laippu dayeg!

²⁹ Ag Kristus Nug genab tutukku hak danab daatte dootteb amunu, ag imu ele doyeg! Danab ag genab tutukku hak kobolppa oitteb amu, ag aakku Kayak bekka daatte.