1 Jon 1 - Nobonob Baibel

Kristus, onig laa Nai, nuhignu nai

¹ Kristus, onig laa Nai, Nug am bauklel diig amu, Nug digmakppa dayom. Nug ⌊anam daye ukke, wanppa uɗia, Nug⌋ nai mattieye ig daunigppa dootta, ig amenigppa ele Nug anidmut. Ig Nug anidta, eppenigppa ele aɗamut. Nug amu, ig nuhignu iikku madittem.

² Kayak he, Kristus, Nug bauklel hanhannu diig amu, Nug miag atia be, ig Nug anidmut. Ig anidmut ele amu, ig ag amelagppa genabnab iikku madittem. Ig Kristusnu madittem. Nug anukka ig Mamenig Kayak ele daayya, Kayak he, Nug ihinigppa miag atia beum.

³ Ag uɗug imu ebqetteb ele amu, ag ig ele oh oonig laippu ele nug dootta daagnignu, ig aɗi anidta doomut ele amu, ig ag amelagppa iikku attem. Aria, oo laippu ele nug doya dayak ihinig amu, amuam Mame Kayak, amu Nug bekka Jesus Kristus ele, aa ig ele oh amuppa daattem.

⁴ Ig nai imu ig oh ihinig maɗoɗppan gamag ahak ambak daakkunu yaattem.

Amahlakppa oiyaknu nai

⁵ Nai ig daunigppa doot, ag amelagppa madittem ele am inam. Kayak Nug am amahlak, amu gatatu nakok laa nuhigppa ii daatte.

⁶ Am ig, “Ig Nug ele oonig laippu ele nug dootta daattem,” attem dayeb, amge ig gatatu ooppa oittem amu, ihinig nai amuam hambuppuak; am ig doyak diig genabib ii dim lamidta oittem.

⁷ Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

⁸ Ig, “Ig hipunin iitta,” attem dayeb amu, ig ikka hambuppuigttem, amu doyak diig genabib ig oonigppa ii niitte.

⁹ Ig ihinig hipunin Kayak amegppa miagib mattignig dayeb, Nug oo metta ii uuak kobol, aria nai doya mala hettoɗia epeɗia elele mettak kobol ele dim lamittatta, Nug ihinig eheɗ hak oh uhuqa mekka heeb, ig oppiak daagnig.

¹⁰ Ig hipunin ii hemut akkunig dayeb amu, nai amuppa ig Kayak, Nug am hambuppuak danab akkunig. Ig anam akkunig dayeb amu, nuhig nai ihinigppa nakok laa ii daatte.