ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 14 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑲᐎᔾ ᑎᐸᔅᑯᓐ ᐊᐛᓐ Romans 14.1-12 (Proper-19 Year A)

¹ ᐊᑲᐎᔾ ᐊᑐᐛᔨᒪᐧᒄ ᐊᓐ ᐊᐛᓐ ᐊᑲ ᐊᔨᒋᑲᐳᐅᑦ ᑕᑈᑎᒧᐅᓂᒡ᙮ ᐊᑲᐎᔾ ᒋᑭ ᐅᒋ ᒋᐧᑲᓇᑯᐎᑐᓇᐛᐤ ᐊ ᐃᔭᔨᒧᑎᒪᒄ ᐊᓂᔭᔪᐛ ᒐᒂᔪᐛ ᐊᑲ ᐸᐃᑯᓄᒡ ᐃᑕᔨᑎᒥᐃᑯᔭᒄ᙮

² ᐸᐃᒄ ᐊᐛᓐ ᒥᒄ ᐊ ᐃᓯᓇᒂᒡ ᒐᒂᓐ ᓂᑭ ᒋ ᒥᒋᓐ ᐃᑕᔨᑎᒻ᙮ ᐊᑯ ᑯᑎᒃ ᐊᐛᓐ ᐊᑲ ᐊᔨᒋᑲᐳᐅᑦ ᑕᑈᑎᒧᐅᓂᒡ ᒥᒄ ᓂᑕᐅᒋᑕᑭᓐ ᒥᒋᒥᔪᐤ ᒥᒍᐤ᙮

³ ᐊᓐ ᐊᐛᓐ ᐊᑲ ᓇᔅᒡ ᓂᑎᒥᒄ ᐃᑕᔨᑎᒥᐃᑯᑦ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᐊ ᒥᒋᑦ ᐊᑲᐎᔾ ᒋᑭ ᐅᒋ ᐊᑐᐛᔨᒪᐤ ᐊᓂᔭᔪᐛ ᐊᑲ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᔨᒋ᙮ ᑭᔭ ᐊᓐ ᐊᐛᓐ ᐊᑲ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᑦ ᐊᑲᐎᔾ ᒋᑭ ᐅᒋ ᑎᐸᔅᑯᓇᐤ ᐊᓂᔭᔪᐛ ᐊᐛᔪᐛ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᔨᒋ᙮ ᐛᔅ ᒋᓴᒪᓂᑐᐛ ᓇᒪ ᐊᑐᐛᔨᒥᑯᔪᐛ᙮

⁴ ᐊᐛᓐ ᒋᔾ ᑲ ᐎ ᑎᐸᔅᑯᓂᒥᑎ ᑯᑎᒃ ᐊᐛᓐ ᐅᑦ ᐊᐱᒋᐊᑭᓇ᙮ ᐊᓐᒡ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᒡ ᐊᑐᔅᑯᐛᐅᒡ ᒋᓴᒪᓂᑐᐛ᙮ ᒥᒄ ᐅᒋᒪᒪ ᒋᑭ ᐎᔭᔨᑎᒥᔪᐛ ᑯᐃᔅᒄ ᐊ ᑎᒂ ᒪᒃ ᐊᑲ ᑯᐃᔅᒄ ᐊ ᑎᒂ᙮ ᑯᐃᔅᒄ ᒪᒃ ᒋᑭ ᐃᑐᐤ ᐛᔅ ᑭᔅᒋᐅᔪᐛ ᒋᓴᒪᓂᑐᐛ ᒐᒋ ᐊᔨᒋᑲᐳᐃᑯᑦ ᑕᑈᑎᒧᐅᓂᒡ᙮

⁵ ᐸᐃᒄ ᐊᐛᓐ ᑎᑯᓂᔪᐛ ᐊᓂᔭᔪᐛ ᐊ ᒋᓯᑲᔨᒡ ᒋᒋᐛ ᐊ ᐃᑕᔨᑎᒥᐃᑯᑦ᙮ ᑯᑎᒃ ᐊᐛᓐ ᐸᐃᑯᓄᒡ ᐃᓯ ᑭᓄᐛᐸᑎᒻ ᒥᓯᐛ ᐊ ᒋᓯᑲᔨᒡ᙮ ᒥᓯᐛ ᒪᒃ ᐊᐛᓐ ᒋᐸ ᐎᔭᔨᑎᒻ ᑕᓐ ᐊᓐ ᒐ ᐃᓯ ᑭᓄᐛᐸᑕᐧᒃ ᐎᔾ ᐅᔭ᙮

⁶ ᐊᓐ ᐊᐛᓐ ᑲ ᑎᑯᓂᔨᒡ ᐊ ᒋᓯᑲᔨᒡ ᐅᔅᑕ ᐊ ᐃᑕᔨᑎᒥᐃᑯᑦ ᐃᔅᐱᔅ ᑯᑎᑲ, ᐎᔾ ᒋᔅᑕᔨᒪᐤ ᐅᑎᐸᔨᒋᒐᐛ ᐅᔭ ᐊ ᐃᑎᑦ᙮ ᐊᑯ ᐊᓐ ᐊᐛᓐ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᑦ ᐎᔾ ᒋᔅᑕᔨᒪᐤ ᐅᑎᐸᔨᒋᒐᐛ ᐅᔭ ᐊ ᐃᑎᑦ ᐛᔅ ᓂᓇᔅᑯᒪᐤ ᒋᓴᒪᓂᑐᐛ ᐊᓂᔭ ᒥᒋᒥᔪᐤ᙮ ᑭᔭ ᐊᓐ ᐊᐛᓐ ᐊᑲ ᒥᒄ ᐊ ᐃᓯᓇᑯᓂᔨᒡ ᒐᒂᔪᐤ ᑲ ᒥᒋᑦ ᐎᔾ ᒋᔅᑕᔨᒪᐤ ᑭᔭ ᐎᔾ ᐅᑎᐸᔨᒋᒐᐛ ᐅᔭ ᐊ ᐃᑎᑦ᙮ ᑭᔭ ᐎᔾ ᒪᒃ ᓂᓇᔅᑯᒪᐤ ᒋᓴᒪᓂᑐᐛ᙮

⁷ ᓇᒪ ᐛᐛᒡ ᐸᐃᒄ ᐊ ᑎᓯᔭᐧᒄ ᒋ ᑎᐸᔨᒥᓱᓇᓄᐤ ᐊ ᐱᒪᑎᓯᔭᐧᒄ᙮ ᑭᔭ ᓇᒪ ᐛᐛᒡ ᐸᐃᒄ ᒋ ᑎᐸᔨᒥᓱᓇᓄᐤ ᓇᐱᔭᐧᑯ᙮

⁸ ᐛᔅ ᒪᒂᒡ ᐊ ᐱᒪᑎᓯᔭᐧᒄ ᐅᑎᐸᔨᒋᒐᐤ ᒋᐸ ᒋᔅᑕᔨᑕᑯᐊᓄᐤ᙮ ᑭᔭ ᐃᔅᐱ ᓂᐱᔭᒂ ᐎᔾ ᒋᑭ ᒋᔅᑕᔨᑕᑯᐊᓄᐤ᙮

⁹ ᐛᔅ ᙭ ᒋ ᓂᐳᐤ ᑭᔭ ᑲᐤ ᒋ ᐱᒪᑎᓯᐤ ᒐᒋ ᐅᑎᐸᔨᒋᒐᓯᒥᑐᑕᑯᑦ ᑕᐱᔅᑯᓐ ᐊᓂᔭ ᑲ ᐱᒪᑎᓯᔨᒋ ᑭᔭ ᐊᓂᔭᔪᐛ ᓴᔅ ᑲ ᓂᐱᔨᒋ᙮

¹⁰ ᒋᔾ ᒪᒃ ᐎ᙮ ᒐᒂᓐ ᐛᒋ ᐎ ᑎᐸᔅᑯᓂᑦ ᒋᐧᑲᓂᔅ᙮ ᒐᒂᔪᐤ ᐛᒋ ᐊᑐᐛᔨᒥᑦ᙮ ᐛᔅ ᒥᓯᐛ ᒋᑭ ᐅᑎᔅᑯᑲᐳᔅᑐᐛᓄᐤ ᒋᓴᒪᓂᑐᐤ ᒐᒋ ᑎᐸᔅᑯᓂᑕᐧᒄ᙮

¹¹ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊ ᐃᔅᐱᔅ ᒐᔅᑎᓇᑕᔨᑕᒂᒡ ᑕᑈ ᐊ ᐱᒪᑎᓯᔭᓐ” ᐃᔅᒋᔄᐤ ᐅᑎᐸᔨᒋᒐᐤ, “ᒥᓯᐛ ᐊᐛᓐ ᓂᑭ ᐅᒋᒋᐧᑯᓂᐃᔅᐱᔅᑕᒄ᙮ ᒥᓯᐛ ᐊᐛᓐ ᒋᑭ ᒋᔅᑕᒋᒪᐤ ᒋᓴᒪᓂᑐᐛ᙮”

¹² ᒥᓯᐛ ᐊ ᑎᓯᔭᐧᒄ ᒋᑭ ᐛᐎᑎᒧᐛᓄᐤ ᒋᓴᒪᓂᑐᐤ ᑕᓐ ᑲ ᐃᑐᐛᐧᒄ ᑭᔭ ᒐᒂᔪᐤ ᐊᓂᔭ ᐛᒋ ᐃᑐᐛᐧᒄ᙮

ᐊᑲᐎᔾ ᐃᑐᑐᐤ ᒋᐧᑲᓂᔅ ᒐᒋ ᐸᒋᓯᓂᑦ

¹³ ᐊᑯᓐ ᐊᑯ ᐃᔅᐱᔅ ᑎᐸᔅᑯᓂᑐᑕᐤ᙮ ᐃᔭᐱᒡ ᒋᐸ ᐃᓯ ᐎᔭᔨᑕᓇᓄᐤ ᒐ ᐊᑲ ᐅᒋ ᐃᑐᑎᒪᐧᒄ ᒐᒂᓐ ᒐᒋ ᐃᑐᑕᑯᑦ ᒋᐧᑲᓂᓯᓄᐤ ᒐᒋ ᒥᒋᑐᑕᐧᒃ᙮

¹⁴ ᐊ ᐎᒐᐛᐧᒄ ᐅᑎᐸᔨᒋᒐᐤ ᒋᓴᔅ ᐊᑯᑕ ᐛᒋ ᒋᔅᒐᔨᑎᒪᐧᒄ ᒥᓯᐛ ᐊ ᐃᓯᓇᒂᒡ ᒥᒋᒻ ᒐᒋ ᒥᒋᒄ᙮ ᒥᒄ ᒪᒃ ᒧᔭᒻ ᐊ ᑎᑯᓂᒂ ᐊᐛᓐ ᒐᒂᔪᐤ ᐊ ᐃᑕᔨᑕᐧᒃ ᐊᑲ ᒋᐸ ᐅᒋ ᓇᐊᔨᑎᒥᐃᑯᔪᐛ ᒋᓴᒪᓂᑐᐛ ᐊ ᒥᒋᑦ ᒪᒃ ᐊ ᒥᓐᑦ ᓇᒪᐎᔾ ᑭᑈ ᒋᐸ ᐅᒋ ᒥᒍᐤ ᑭᔭ ᓇᒪ ᒋᐸ ᐅᒋ ᒥᓄᐤ ᐊᓂᔭ ᒐᒂᔪᐤ᙮

¹⁵ ᐛᔅᑐᐛᔨᑎᒥᐊᐅᑕ ᒋᐧᑲᓂᔅ ᐃᔭᐱᒡ ᒥᒄ ᐊ ᐃᓯᓇᒂᒡ ᒐᒂᓐ ᐊ ᒥᒋᔨᓐ ᓇᒪ ᒋ ᓴᒋᐊᐤ ᐊᓂᔭ ᐊ ᐃᑐᐅᑦ᙮ ᐊᑲᐎᔾ ᒪᒃ ᒋᑭ ᐅᒋ ᐃᓯᓇᑯᓐ ᒋᐧᑲᓂᔅ ᒐᒋ ᓂᓱᐅᓇᑎᓯᑦ ᐊᓐ ᐊ ᐃᑎᔨᓐ ᒥᒄ ᐊ ᐃᓯᓇᒂᒡ ᒐᒂᓐ ᐊ ᒥᒋᔨᓐ, ᐛᔅ ᒋ ᓂᐱᔅᑎᒪᑯᐤ ᙭ᑕ᙮

¹⁶ ᐊᑲᐎᔾ ᑭᔭ ᒋᑭ ᐅᒋ ᐃᑐᑕᓐ ᒐᒂᓐ ᒐᒋ ᐅᒋ ᒥᒋ ᐊᔨᒧᒥᑕᑯᒡ ᐊᓐᒡ ᐊᑲ ᑕᑈᑕᒡ ᐊᑎ ᐊᑲ ᓂᑎᒥᒄ ᐃᑕᔨᑎᒥᐃᑯᔨᓐ ᐊ ᐃᑐᑎᒥᓐ ᐊᓐ ᑲ ᐃᑐᑎᒥᓐ᙮

¹⁷ ᐛᔅ ᐊᓐᑕ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ ᑕᐸ ᓇᒪᔭᔪᐤ ᑕᓐ ᐊ ᐃᓯ ᒥᒋᓱᑦ ᐊᐛᓐ ᒪᒃ ᒐᒂᔪᐤ ᐊ ᒥᓐᑦ ᓇᔅᒡ ᑲᓄᐛᐸᑕᑭᓄᐅᒡ᙮ ᐊ ᑯᐃᔅᑯᑕᑎᓯᔭᐧᒄ ᑭᔭ ᐊ ᒥᔪ ᐎᒐᐛᐧᑯᒡ ᐊᐛᓐᒋ ᑭᔭ ᐊ ᒥᔽᔨᑎᒪᐧᒄ ᒋᑕᐃᓇᒡ ᐊᐅᒄ ᒋᒋᐛ ᐊ ᐃᑕᔨᑕᒂᒡ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ᙮ ᑲ ᐸᔭᒋᓯᑦ ᐊᒐᐧᒄ ᒪᒃ ᒥᔨᐛᐤ ᐅᔭ ᒐᒋ ᐃᓯ ᐱᒪᑎᓯᓇᓄᐎᔨᒡ᙮

¹⁸ ᐊᓐ ᒪᒃ ᐊᐛᓐ ᑲ ᐊᑐᔅᑯᐛᑦ ᙭ᑕ ᐅᔭ ᐊ ᐃᓯ ᐱᒪᑎᓯᑦ ᒋᓴᒪᓂᑐᐛ ᓇᐊᔨᑎᒥᐊᐤ᙮ ᑭᔭ ᒋᑭ ᒋᔅᑕᔨᒥᑯᐤ ᑯᑎᑲ ᐊᐛᔪᐛ᙮

¹⁹ ᓱᒃ ᒪᒃ ᒧᔅ ᐎᓯ ᐱᒪᑎᓯᑕᐤ ᒐᒋ ᐎᒋᐃᐧᑯᒡ ᑯᑎᑭᒡ ᐊᐛᓐᒋ ᒐᒋ ᒥᔪ ᐎᒐᐅᑐᒡ᙮

²⁰ ᐊᑲᐎᔾ ᒋᑭ ᐅᒋ ᓂᓱᐅᓇᒋᑕᐛᓐ ᑕᓐ ᐊᓯᓇᑯᑕᐛᑦ ᒋᓴᒪᓂᑐᐤ ᒋᐧᑲᓂᓴ ᐅᐱᒪᑎᓯᐅᓂᔪᐤ᙮ ᒥᓯᐛ ᒥᒋᒻ ᐸᔭᐧᑭᓐ ᒥᒄ ᒪᒃ ᐊᑲᐎᔾ ᒥᒋᔾ ᒐᒂᓐ ᒐ ᐃᑐᑕᑯᒂ ᒋᐧᑲᓂᔅ ᒐᒋ ᒥᒋᑐᑕᐧᒃ᙮

²¹ ᐅᔅᑕ ᒋᑭ ᒥᔽᐤ ᒐ ᐊᑲ ᒋ ᒥᒋᔨᓐ ᐎᔭᔅ ᑭᔭ ᒐ ᐊᑲ ᒥᓂᔨᓐ ᒐᒂᓐ ᒐ ᐃᑐᑕᑯᒂ ᒋᐧᑲᓂᔅ ᒐᒋ ᐸᒋᓯᐧᒃ᙮ ᐊᑲᐎᔾ ᒋᑭ ᐅᒋ ᐃᑐᑕᓐ ᒐᒂᓐ ᒐ ᐃᑐᑕᑯᒂ ᒋᐧᑲᓂᔅ ᒐᒋ ᐸᒋᓯᓂᑦ᙮

²² ᐊᑯᔅ ᒥᒄ ᒋᓴᒪᓂᑐᐤ ᑭᔭ ᒋᔾ ᒋᑭ ᒋᔅᒐᔨᑕᓇᐛᐤ ᑕᓐ ᐊ ᐃᓯ ᑕᑈᑎᒥᓐ ᒐᒂᔪᐤ ᒋᐸ ᒥᒍᐤ ᐊᐛᓐ ᑭᔭ ᑕᓐ ᐊᓂᔭᔪᐛ ᐊᑲ ᒋᐸ ᐅᒋ ᒥᒍᐤ ᑭᔭ ᒐᒂᔪᐤ ᒋᐸ ᒋ ᒥᓄᐤ ᑭᔭ ᑕᓐ ᐊᓂᔭᔪᐛ ᐊᑲ ᒋᐸ ᐅᒋ ᒥᓄᐤ᙮ ᒥᔽᔨᑎᒻ ᐊᓐ ᐊᐛᓐ ᑲ ᒐᔅᑎᓇᑕᔨᑕᐧᒃ ᑯᐃᔅᒄ ᐊ ᐃᓯᓇᑯᓂᔨᒡ ᑕᓐ ᐊ ᐃᑎᑦ᙮

²³ ᐊᓐ ᐊᐛᓐ ᐃᔭᐱᒡ ᑲ ᒥᒋᑦ ᒥᒋᒥᔪᐤ ᐊ ᐃᑕᔨᑕᐧᒃ ᐊᑲ ᒋᐸ ᐅᒋ ᒥᒍᐤ ᑎᑯᓂᔪᐤ ᐊ ᐃᓯ ᐊᑕᒪᔨᑕᑯᓯᑦ ᐊᓂᔭ ᐊ ᐃᑎᑦ᙮ ᐛᔅ ᐃᑐᑎᒻ ᐊᓂᔭ ᒐᒂᔪᐤ ᐊ ᑕᑈᑕᐧᒃ ᐊᑲ ᒋᐸ ᐅᒋ ᐃᑐᑎᒻ᙮ ᒧᔭᒻ ᐊ ᐃᑐᑎᒧᐛᐅᒂ ᒐᒂᓐ ᐊ ᑕᑈᑎᒪᐧᒄ ᐊᑲ ᒋᐸ ᐅᒋ ᐃᑐᑕᓇᓄᐤ ᒋ ᒥᒋᑐᑕᓇᓄᐤ᙮