ᒋᔅᒐᔨᑕᑯᑕᒐᐅᓐ 9 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐱᑕᑕᒡ ᐳᑕᒋᑭᓐ 1 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᐊᐅᒄ ᐊᑯ ᐱᑕᑕᒡ ᐊᓐᒋᓐᒡ ᑲ ᐳᑕᑕᒡ ᐅᐳᑕᒋᑭᓄᐛᐛ᙮ ᐊᑯ ᒂ ᐛᐱᒥᒃ ᐅᒐᑭᑕᐧᒄ ᐊᔅᒋᒡ ᐊᒋ ᐃᓯ ᐸᒋᓯᓂᒂ ᒋᓯᑯᒡ ᐅᒡ᙮ ᒋ ᒥᔭᑭᓄᐤ ᐊᐸᐃᑭᓂᔪᐤ ᒐᒋ ᓴᓇᐧᒃ ᐊᓂᔭ ᑲ ᒥᔅᑎ ᐱᑯᓇᔭᔨᒡ ᐊᓐᑕ ᐃᔅ ᑕᒥᒡ ᐊᔅᒋᒡ᙮ 2 ᐃᔅᐱ ᒪᒃ ᑲ ᓴᓇᐧᒃ ᐊᓂᔭ ᑲ ᒥᔅᑎ ᐱᑯᓇᔭᔨᒡ ᒋ ᐅᒋ ᐎᐎᔭᐸᑕᐱᔪᐤ ᐊ ᒥᔅᑎ ᐊᒂᐸᑕᔨᒡ ᒧᔭᒻ ᐊᓐᑕ ᐊ ᒥᔅᑎ ᐃᔎᑕᒡ ᑲᒋ ᐃᔅᐱᔅ ᐊᒂᐸᑕᒡ᙮ ᒋ ᐎᐸᐸᑕᐤ ᒪᒃ ᐊᓐᑕ ᒋᓯᑯᒡ᙮ ᐱᓯᒻ ᑭᔭ ᒋ ᐊᑎ ᐅᑲᔅᑕᐱᔪᐤ ᐊ ᐃᔅᐱᔅ ᐊᒂᐸᑕᔨᒡ᙮ 3 ᐊᓐᑕ ᒪᒃ ᐊᓐ ᐊ ᐊᒂᐸᑕᒡ, ᐊᑯᑕ ᑲ ᐅᒋᐱᔨᒡ ᒥᓐᑐᓯᓯᒡ ᒧᔭᒻ ᒂᔅᑯᑎᓯᓯᒡ ᐊ ᐃᓯᓇᑯᓯᒡ ᐊᓐᑕ ᐊᔅᒋᒡ ᐊ ᐊᑎ ᐃᑕᒡ᙮ ᒧᔭᒻ ᒪᒃ ᐊ ᐃᑎᔨᒋ ᐊᓂᔭ ᒥᓐᑐᓯᓴ ᐊ ᐱᒋᔅᑲᐛᔨᒋ ᐊᐛᔪᐛ ᑲᒋ ᐅᒋ ᓂᓱᐅᓇᒋᐊᔨᒋ, ᐊᐅᑯᓐ ᑲ ᐃᓯ ᒥᔭᑭᓄᐎᒡ ᐅᒡ ᒐᒋ ᐃᑎᒡ᙮ 4 ᒋ ᐃᑕᑭᓄᐎᒡ ᒐ ᐊᑲ ᒋ ᓂᓱᐅᓇᒋᑕᒡ ᒥᔅᑯᓱᐛ ᐊᓐᑕ ᐊᔅᒋᒡ ᑭᔭ ᒥᔅᑎᒂ ᒐ ᐊᑲ ᒋ ᓂᓱᐅᓇᒋᐊᒡ ᑭᔭ ᑕᓐ ᐊ ᐃᓯ ᓂᑕᐅᒋᓂᔨᒋ ᓂᑕᐅᒋᑕᑭᓇ᙮ ᒥᒄ ᐊᓂᔭᔪᐛ ᐊᐛᔪᐛ ᐊᑲ ᐊᔭᔨᒋ ᒋᓴᒪᓂᑐᐛ ᐅᒋᔅᒋᓄᐛᒋᒋᑭᓂᔪᐤ ᐊᓐᑕ ᐅᔅᑲᑎᑯᐎᒡ, ᐊᐅᑯᓂ ᐊᓂᔭᔪᐛ ᑲ ᒥᔭᑭᓄᐎᒡ ᒐᒋ ᐎᔭᔅ ᐃᑐᑐᐛᒡ᙮ 5 ᓇᒪ ᐅᒋ ᐱᔅᑎᓇᑭᓄᐎᒡ ᒐᒋ ᓂᐸᐊᒡ ᐅᔭ ᐊᐛᔪᐛ, ᒥᒄ ᒐᒋ ᐛᐎᓯᒐᔨᑎᒥᐊᒡ ᐱᑕᑕᒡ ᑕᑐᐤ ᐱᓯᒺ ᐃᔅᐱ᙮ ᐊᓂᔭ ᒪᒃ ᐊ ᐃᓯ ᐛᐎᓯᒐᔨᑎᒥᐃᐛᒡ ᒧᔭᒻ ᐊ ᐃᓯ ᐛᐎᓯᒐᔨᑎᒥᐃᐛᔨᒋ ᒥᓐᑐᓯᓴ ᐊ ᐱᒋᔅᑯᐛᔨᒋ ᐊᐛᔪᐛ ᑲᒋ ᐅᒋ ᓂᓱᐅᓇᒋᐊᔨᒋ, ᐊᐅᑯᓐ ᑲ ᐃᑕᔨᑕᑯᓂᔨᒡ᙮ 6 ᐱᑕᑕᒡ ᑕᑐᐤ ᐱᓯᒺ ᒪᒃ ᐃᔅᐱᔅ ᒋᑭ ᓇᓂᑐᐤ ᒥᔅᑭᒧᒡ ᐊᓐᒡ ᐊᐛᓐᒋ ᑕᓐᑕ ᒐᒋ ᐅᒋ ᓂᐱᒡ, ᒥᒄ ᒪᒃ ᓇᒪ ᒋᑭ ᐅᒋ ᒥᔅᑭᒧᒡ᙮ ᒋᑭ ᓂᑐᐛᔨᑎᒧᒡ ᒐᒋ ᓂᐱᒡ ᓇᒪ ᒥᒄ ᒋᑭ ᐅᒋ ᓂᐳᐅᒡ᙮ 7 ᐊᓐᒡ ᒪᒃ ᒥᓐᑐᓯᓯᒡ ᒧᔭᒻ ᒂᔅᑯᑎᓯᓯᒡ ᑲ ᐃᓯᓇᑯᓯᒡ ᒧᔭᒻ ᐊᓐᑕ ᑲᐸᐃᑭᔎᐅᒡ ᐊᒋ ᐊᔭᔅᑯᐊᑭᓄᐎᒡ ᐊᓐᑕ ᐊ ᒪᓯᒐᓄᐎᒡ ᒐᒋ ᐃᔅᐸᔨᑐᒡ, ᐊᐅᑯᓐ ᑲ ᐃᓯᓇᑯᓯᒡ᙮ ᐊᓐᑕ ᐅᔅᑎᒂᓂᐛᒡ ᒋ ᒋᔅᑭᒧᒡ ᒐᒂᔪᐛ ᒧᔭᒻ ᒋᓴᐅᒋᒪᐅᑯᓂᔎᐅᓇ ᐊ ᐎᔄᐅᓱᓇᔭᐱᔅᑯᔨᒋ ᐊ ᐃᓯᓇᑯᓂᔨᒋ᙮ ᐅᑕᔅᑎᒥᐧᑯᐛᐛ ᒧᔭᒻ ᐃᔪᐤ ᒥᑕᔅᑎᒧᒂ ᒋ ᐃᓯᓇᑯᓂᔪᐛ᙮ 8 ᐅᐱᔎᐅᓄᐛᐛ ᒧᔭᒻ ᐃᔎᐤ ᐅᐱᔎᐅᓇ ᒋ ᐃᓯᓇᑯᓂᔪᐛ, ᐊᑯ ᐎᐱᑐᐛᐛ ᒧᔭᒻ ᒥᓯᐱᓱᐤ ᐎᐱᑕ ᐊᐅᑯᓐ ᑲ ᐃᓯᓇᑯᓂᔨᒋ᙮ 9 ᒋ ᐅᔅᑲᔅᒋᑭᓇᐱᔅᑯᐅᒡ ᒪᒃ᙮ ᐊᓂᔭᔪᐛ ᒪᒃ ᐅᔅᑲᔅᒋᑭᓇᐱᔅᑯᐛᐛ ᒧᔭᒻ ᐃᓴᒄ ᒥᔅᑲᔅᒋᑭᓇᐱᔎ ᐊᐅᑯᓐ ᑲ ᐃᓯᓇᑯᓂᔨᒋ᙮ ᐅᑎᑎᑭᓄᐛᐛ ᒪᒃ ᒧᔭᒻ ᐊ ᒥᒐᑎᒡ ᑎᑎᐱᑕᐸᓇᔅᑯᒡ ᐊ ᐱᒥᑕᐸᒡ ᑲᐸᐃᑭᔎᐅᒡ, ᐊᐅᑯᓐ ᑲ ᐃᑎᑕᑯᓂᔨᒋ᙮ 10 ᐅᓱᐛᐛ ᒧᔭᒻ ᐊᒧᐤ ᐅᐱᒋᔅᑲᐃᑭᓐ ᐊ ᐃᑕᔨᑕᑯᓂᔨᒡ, ᐊᐅᑯᓐ ᑲ ᐃᑕᔨᑕᑯᓂᔨᒋ᙮ ᑭᔭ ᒧᔭᒻ ᐊᓐᒡ ᒥᓐᑐᓯᒡ ᑲ ᐱᒋᔅᑯᐛᒡ ᐊᐛᔪᐛ ᐊ ᐃᓯᓇᑯᓂᔨᒋ ᐅᓱᐛᐛ, ᐊᐅᑯᓐ ᑲ ᐃᓯᓇᑯᓂᔨᒋ ᐅᓱᐛᐛ ᐅᒡ ᒂᔅᑯᑎᓯᓯᒡ᙮ ᐊᐅᑯᓂ ᒪᒃ ᐊᓂᔭᔪᐛ ᐅᓱᐛᐛ ᑲ ᐊᐱᒋᑕᒡ ᒐᒋ ᐛᐎᓯᒐᔨᑎᒥᐊᒡ ᐊᐛᔪᐛ ᐱᑕᑕᒡ ᑕᑐᐤ ᐱᓯᒺ ᐃᔅᐱᔅ᙮ 11 ᐊᓂᔭᔪᐛ ᐊᓐᒋᓇ ᑲ ᐅᒋᒪᐅᑐᑎᒥᔨᒋ ᐊᓂᔭ ᑲ ᒥᔅᑎ ᐱᑯᓇᔭᔨᒡ, ᐊᐅᑯᓂ ᐊᓂᔭᔪᐛ ᑲ ᐅᒋᒪᒥᒡ᙮ ᐃᑉᕈᐤ ᐊ ᐃᓯ ᐃᔨᒥᓇᓄᐎᒡ, ᐊᐸᑐᓐ ᒋ ᐃᓯᓂᐧᑲᓱᔪᐛ᙮ ᑯᕆᒃ ᒪᒃ ᐊ ᐃᓯ ᐃᔨᒥᓇᓄᐎᒡ, ᐊᐳᓕᔪᓐ ᒋ ᐃᓯᓂᐧᑲᓱᔪᐛ᙮ ᑲ ᓂᓱᐅᓇᒋᐃᐛᑦ ᐃᓯ ᐱᔭᑭᔅᒋᑕᑭᓄᐅᔪᐤ ᐊᓂᔭ ᐅᑦ ᐃᓯᓂᐧᑲᓱᐅᓐ᙮ 12 ᐊᓐ ᓂᔅᑎᒻ ᒐ ᐃᓯ ᓂᓇᐧᑲᑕᔨᒧᓇᓄᐅᒡ ᓴᔅ ᒋᔅᑕᐱᔪᐤ᙮ ᐊᔅᒄ ᒪᒃ ᓂᓱ ᒐᒂᔪᐛ ᐊ ᑯᔅᑕᑎᒂᒋ ᒋᑭ ᐸᐱᔪᐛ ᒐ ᐃᔅᐱᔨᒡ ᐊᐛᓐᒋ᙮ ᐊᓱᑕᒡ ᐳᑕᒋᑭᓐ 13 ᐊᑯ ᐊᓐ ᐊᓱᑕᒡ ᐊ ᑕᑦ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᓂᒋ ᐸᑐᐛᐤ ᒪᒃ ᐊᐛᓐ ᐊ ᐃᔨᒥᑦ ᐊᓐᑕ ᓇᐎᒡ ᐊ ᐃᓯ ᑭᒋᒐᔭᔨᒡ ᐊᓂᔭ ᑲ ᐎᔄᐅᓱᓇᔭᐱᔅᑯᓂᔨᒡ ᐱᔅᑎᓂᒐᐤ ᒥᒋᓱᐛᑭᓇᑎᑯᔪᐤ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᑲ ᑎᑯᓂᔨᒡ ᐊ ᐅᒋ ᐸᑕᑯᓯᑦ᙮ 14 ᒋ ᐃᑕᑭᓄᐤ ᐊᓐ ᐊᓱᑕᒡ ᐊ ᑕᑦ ᐊᓐᒋᓐ, “ᐊᐱᐧᑯᓂᒡ ᐊᓐᒡ ᓇᐤ ᐊᓐᒋᓐᒡ ᑲ ᒪᑯᐱᓱᒡ ᐊᓐᑕ ᔪᑉᕆᑎᔅ ᐊ ᐃᓯᓂᐧᑲᑕᔨᒡ ᒥᔅᑎ ᓯᐱᔪᐤ᙮” 15 ᐊᑯ ᒂ ᐊᐱᐧᑯᓇᑭᓄᐎᒡ ᐊᓐᒡ ᓇᐤ ᐊᓐᒋᓐᒡ᙮ ᐛᔅ ᐊᐅᒄ ᐅᔭ ᑎᐸᐃᑭᓂᔪᐤ, ᐊᐅᒄ ᐅᔭ ᐊ ᒋᓯᑲᔨᒡ, ᐊᐅᒄ ᐅᔭ ᐱᓯᒺ ᑭᔭ ᐊᐅᒄ ᐅᔭ ᐊ ᐱᐳᓂᔨᒡ ᑲ ᐃᓯ ᐊᔭᔅᑯᐊᑭᓄᐛᐛᒂ ᒐᒋ ᐊᐱᐧᑯᓇᑭᓄᐎᒡ ᑭᔭ ᒐᒋ ᓂᐸᐊᒡ ᐸᐃᒄ ᐊᓯᑯᒻ ᓂᔅᑐ ᒥᓯᐛ ᐊᐛᔪᐛ᙮ 16 ᓂᒋ ᐸᑎᒺᓐ ᒪᒃ ᑕᓐ ᑲ ᐃᑕᑎᓯᒡ ᐊᓐᒡ ᐊᓯᒪᑭᓂᓯᒡ᙮ ᓂᓱ ᒥᑕᓯᒥᑎᓄᐤ ᒋᓴ ᒥᑕᑐᒥᑎᓇᐛᐤ ᒐᓯᐱᔪᐤ᙮ 17 ᐊᓐ ᒪᒃ ᑲ ᐃᓯ ᐛᐸᑎᔨᑯᐅᔭᓐ, ᓂᒋ ᐛᐱᒪᐅᒡ ᑲᐸᐃᑭᔎᐅᒡ ᑭᔭ ᐊᓐᒡ ᑲ ᑕᑎᐱᒡ ᐊᓂᔭᔪᐛ ᑲᐸᐃᑭᔎᐛ᙮ ᒥᔅᑲᔅᒋᑭᓇᐱᔎ ᒋ ᒋᔅᑭᒧᒡ ᐊᓐᒡ ᑲ ᑕᑎᐱᒡ ᐊᓂᔭᔪᐛ ᑲᐸᐃᑭᔎᐛ, ᐊ ᒥᒂᔨᒋ ᑕᐱᔅᑯᓐ ᐃᔅᑯᑕᐤ ᑲ ᐃᔅᐱᔅ ᒥᒂᒡ ᑭᔭ ᐊ ᐱᒋᔅᑭᓇᔨᒋ ᑭᔭ ᐊ ᐎᔄᐛᔨᒋ᙮ ᐊᓐᒡ ᒪᒃ ᑲᐸᐃᑭᔎᐅᒡ ᐅᔅᑎᒂᓄᐛᐛ ᒧᔭᒻ ᒥᓯᐱᓱᐤ ᒥᔅᑎᒂᓇ ᒋ ᐃᓯᓇᑯᓂᔪᐛ᙮ ᐅᑐᓄᐛᒡ ᒋ ᐅᒋ ᓴᑲᐸᑕᐱᔪᐤ ᐊ ᐊᒂᐸᑕᔨᒡ ᑭᔭ ᐃᔅᑯᑕᔪᐤ ᒋ ᐅᒋ ᓄᑯᓂᔪᐤ ᑭᔭ ᐊ ᐎᔄᐛᐸᑕᔨᒡ ᒐᒂᔪᐤ᙮ 18 ᒐᑲᑦ ᐊᐱᑐᐤ ᐊ ᑎᓯᒡ ᐊᐛᓐᒋ ᐊᓐᑕ ᐊᔅᒋᒡ ᒋ ᓂᐸᐃᑯᐅᒡ ᐊᓂᔭ ᐊ ᐊᒂᐸᑕᔨᒡ, ᐊᓂᔭ ᐃᔅᑯᑕᔪᐤ ᑭᔭ ᐊᓂᔭ ᑲ ᐎᔄᐛᐸᑕᔨᒡ ᒐᒂᔪᐤ ᐅᑐᓂᔨᒡ ᐊᓂᔭᔪᐛ ᑲᐸᐃᑭᔎᐛ ᑲ ᐅᒋᐱᔨᒡ᙮ 19 ᐊᓐᒡ ᒪᒃ ᑲᐸᐃᑭᔎᐅᒡ ᐅᑐᓄᐛᒡ ᑭᔭ ᐅᓱᐛᒡ ᒋ ᑎᑯᓂᔪᐤ ᐅᒥᔅᑯᓯᐅᓄᐛᐤ᙮ ᐊᓂᔭᔪᐛ ᒪᒃ ᐅᓱᐛᐛ ᑕᐱᔅᑯᓐ ᒥᔅᑎᒋᓇᐱᒄ ᒋ ᐃᓯᓇᑯᓂᔪᐛ, ᐊᒋ ᐅᔅᑎᒂᓄᓂᔨᒋ᙮ ᐊᐅᑯᓐ ᒪᒃ ᐊᓂᔭᔪᐛ ᑲ ᐊᐱᒋᑕᒡ ᐊ ᐛᐎᓯᒐᔨᑎᒥᐊᒡ ᐊᐛᔪᐛ᙮ 20 ᐊᓐᒡ ᒪᒃ ᐊᐛᓐᒋ ᐊᑲ ᐅᒋ ᓂᓱᐅᓇᒋᐃᑯᒡ ᑲ ᓂᓱᐅᓇᒋᐃᐛᒥᑭᓂᔨᒋ ᒐᒂᔪᐛ, ᓇᒪ ᐃᔭᐱᒡ ᐅᒋ ᒥᑕᒋᔨᐛᔨᑎᒧᒡ ᑭᔭ ᓇᒪ ᐅᒋ ᐳᓂᐅᒡ ᑕᓐ ᑲ ᐃᓯ ᒥᒋᑐᑕᒡ᙮ ᓇᒪ ᐅᒋ ᒂᔅᑲᑎᓯᐅᒡ ᑭᔭ ᓇᒪ ᐅᒋ ᐳᓂᐅᒡ ᐊ ᐊᔭᒥᐊᔅᑐᐛᒡ ᒥᒋ ᐊᒐᒂ ᑭᔭ ᐊᓂᔭ ᒥᓂᑐᐧᑲᓇ ᑲ ᐎᔄᐅᓱᓇᔭᐱᔅᑯᔨᒋ, ᑲ ᐛᓴᔭᐱᒋᓯᔨᒋ, ᑭᔭ ᑲ ᐎᔄᐛᐱᔅᒋᓯᔨᒋ ᑲ ᐃᓯᓇᑯᓯᔨᒋ, ᑭᔭ ᐊᓂᔭ ᑲ ᐊᓯᓂᐅᔨᒋ, ᑭᔭ ᐊᓂᔭ ᑲ ᒥᔅᑎᑯᔨᒋ᙮ ᓇᒪ ᐅᒋ ᒥᑕᒋᔨᐛᔨᑎᒧᒡ ᑭᔭ ᓇᒪ ᐅᒋ ᐳᓂᐅᒡ ᐊ ᐊᔭᒥᐊᔅᑐᐛᒡ ᐊᓂᔭᔪᐛ ᒥᓂᑐᐧᑲᓇ ᐊᑲ ᐛᐸᑎᒥᔨᒋ ᑭᔭ ᐊᑲ ᐸᑎᒥᔨᒋ ᑭᔭ ᐊᑲ ᐱᒧᑕᔨᒋ᙮ 21 ᓇᒪ ᑭᔭ ᐅᒋ ᒥᑕᒋᔨᐛᔨᑎᒧᒡ ᑭᔭ ᓇᒪ ᐅᒋ ᐳᓂᐅᒡ ᐊ ᓂᐸᐃᐛᒡ, ᐊ ᒥᑕᐛᑎᓯᒡ, ᐊ ᐎᓂᓱᐤ ᐱᒪᑎᓯᒡ ᑭᔭ ᐊ ᑭᒐᒧᑎᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.