ᒋᔅᒐᔨᑕᑯᑕᒐᐅᓐ 8 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒪᔭᑕᓂᔅ ᑲ ᒥᓇᐧᒃ ᐊᓂᔭ ᒪᔅᑕᔾ ᒋᔅᑕᐸᓱᐤ ᐱᓯᑯᐃᑭᓂᔪᐤ

¹ ᐊᑯ ᐊᓐ ᒪᔭᑕᓂᔅ ᒥᓐ ᒂ ᒥᓇᐧᒃ ᒋᔅᑕᐸᓱᐤ ᐱᓯᒂᐃᑭᓂᔪᐤ ᐊᓐᑕ ᒥᓯᓇᐃᑭᓂᒡ ᐅᒡ᙮ ᐊᐅᒄ ᐊᑯ ᐊᓂᔭ ᒪᔅᑕᔾ ᒋᔅᑕᐸᓱᐤ ᐱᓯᒂᐃᑭᓂᔪᐤ᙮ ᐃᔅᐱ ᒪᒃ ᑲ ᒥᓇᐧᒃ ᐳᔅᒄ ᑎᐸᐃᑭᓇ ᓇᒪ ᓇᔅᒡ ᒐᒂᓐ ᐅᒋ ᐸᑕᑯᓐ ᐊᓐᑕ ᒋᒋᒋᓯᑯᒡ᙮

² ᐊᑯ ᒂ ᐛᐱᒥᒂᐤ ᐊᓐᒡ ᓂᔄᐅᑕᒡ ᐊᓐᒋᓐᒡ ᒧᔅ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᐊ ᓂᐳᐅᒡ᙮ ᓂᔄᐅᑕᒡ ᐳᑕᒋᑭᓇ ᒋ ᒥᔭᑭᓄᐎᒡ᙮

³ ᒋ ᑕᐤ ᒥᓐ ᑯᑎᒃ ᐊᓐᒋᓐ ᐊ ᑕᐧᑯᓇᐧᒃ ᐊ ᐎᔄᐅᓱᓇᔭᐱᔅᑲᔨᒡ ᐎᔭᑭᓂᔪᐤ ᑲᐎᒋᒪᑯᓂᔨᒡ ᒐᒂᔪᐤ ᑲᒋ ᐃᔎᓯᑭᓄᐎᒡ ᐊ ᑎᑯᓂᔨᒡ ᐊᓐᑕ᙮ ᒋ ᐸᒋ ᓂᐳᐅᐤ ᐅᐱᒪ ᐊᓐᑕ ᐊᓂᔭ ᐱᔅᑎᓂᒐᐅᓇᐱᔅᑯᔪᐤ᙮ ᒥᔅᑎ ᒪᒃ ᒋ ᒥᔭᑭᓄᐤ ᐊᓂᔭ ᑲ ᐎᒋᒪᑯᓯᔨᒡ ᒐᒂᔪᐤ ᒐᒋ ᒋᑲᐅᓇᐧᒃ ᐅᑦ ᐊᔭᒥᐊᐅᓂᔨᒡ ᑲ ᑕᑈᑎᒥᔨᒋ ᑭᔭ ᒐᒋ ᐱᔅᑎᓂᒧᐛᑦ ᒋᓴᒪᓂᑐᐛ ᐊᓐᑕ ᑲ ᐎᔄᐅᓱᓇᔭᐱᔅᑯᔨᒡ ᐱᔅᑎᓂᒐᐅᓇᐱᔅᑯᒡ᙮

⁴ ᐊᓂᔭ ᑲᐎᒋᒪᑯᓯᔨᒡ ᑲ ᐃᔎᑕᔨᒡ ᑲ ᑕᐧᑯᓇᐧᒃ ᐊᓐ ᐊᓐᒋᓐ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᑲ ᓂᐳᐅᑦ, ᐊᓐᑕ ᒋᓴᒪᓂᑐᐛ ᐊ ᑕᔨᒋ ᒋ ᐃᑕᐸᑕᐱᔪᐤ, ᐊᔪᐤ ᐊᓂᔭᔪᐛ ᑲ ᑕᑈᑎᒥᔨᒋ ᐅᑦ ᐊᔭᒥᐊᐅᓂᔪᐛ ᐊ ᐊᔅᒋᐱᔨᒋ᙮

⁵ ᐊᑯ ᐊᓐ ᐊᓐᒋᓐ ᑲ ᓴᑭᔅᒋᓂᑕᑦ ᐊᓂᔭ ᑲ ᐎᔄᐅᓱᓇᔭᐱᔅᑲᔨᒡ ᐎᔭᑭᓂᔪᐤ ᐃᔅᑯᑕᔪᐤ ᐊ ᐊᔅᑕᑦ ᐊᓐᑕ ᐱᔅᑎᓂᒐᐅᓇᐱᔅᑯᒡ ᐊ ᐅᑎᓇᐧᒃ᙮ ᐊᑯ ᐊᓐᑕ ᐊᔅᒋᒡ ᑲ ᐃᓯ ᐛᐱᓇᐧᒃ ᐊᓂᔭ ᐃᔅᑯᑕᔪᐤ, ᑎᐛᒡ ᒪᒃ ᒋ ᐸᑕᑯᓱᐅᒡ ᓂᒥᔅᒍᐅᒡ ᑭᔭ ᒋ ᒥᔅᑎ ᐅᔄᔅᑕᐱᔪᐤ ᑭᔭ ᒋ ᑯᐃᐧᑯᓐ᙮

ᐊᓂᔭᔪᐛ ᓂᔅᑎᒻ ᓇᐤ ᐳᑕᒋᑭᓇ

⁶ ᐊᑯ ᐊᓐᒡ ᓂᔄᐅᑕᒡ ᐊᓐᒋᓐᒡ ᓂᔄᐅᑕᒡ ᐳᑕᒋᑭᓇ ᑲ ᑕᐧᑯᓇᒡ ᒂ ᐊᔭᔅᑯᐎᒡ ᒐᒋ ᐳᑕᑕᒡ ᐊᓂᔭᔪᐛ ᐳᑕᒋᑭᓇ᙮

⁷ ᐊᑯ ᐊᓐ ᓂᔅᑎᒻ ᐊ ᑕᑦ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᒋ ᒥᔅᑯᒥᔪᑕᓐ ᑭᔭ ᐃᔅᑯᑕᐤ ᒋ ᐸᒋᑎᓐ ᐊ ᒪᒧᐱᔨᒡ ᒥᐧᒄ ᐊᓐᑕ ᐊᔅᒋᒡ ᐊ ᐃᓯ ᐸᒋᑎᒡ᙮ ᒐᑲᑦ ᐊᐱᑐᐤ ᐊ ᐃᔅᐱᑎᔅᑭᒥᑲᒡ ᐊᔅᒋᔾ ᒋ ᐃᔎᑕᐤ᙮ ᒐᑲᑦ ᒪᒃ ᐊᐱᑐᐤ ᒋ ᐃᔅᐱᔅ ᐃᔎᓱᐅᒡ ᒥᔅᑎᑯᒡ᙮ ᒥᓯᐛ ᑭᔭ ᒥᔅᑯᓱᐛ ᒋ ᐃᔎᑕᐛ᙮

⁸ ᐊᑯ ᒥᓐ ᑯᑎᒃ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᒧᔭᒻ ᒥᔅᑎ ᐱᔅᑯᑎᓇᐤ ᐊ ᐃᔅᑯᑕᐅᒡ ᒋ ᐃᓯᓇᑯᓐ ᒐᒂᓐ ᐎᓂᐸᑯᒡ ᐊ ᐃᓯ ᐛᐱᓇᑭᓄᐅᒡ᙮ ᒐᑲᑦ ᒪᒃ ᐊᐱᑐᐤ ᐊᓐ ᐎᓂᐸᒄ ᒋ ᐊᑎ ᓱᐎᐧᑲᐤ᙮

⁹ ᒥᓯᐛ ᑕᓐ ᑲ ᐃᓯ ᐱᒪᑎᓯᒥᑲᒡ ᓂᐱᒡ ᒐᑲᑦ ᐊᐱᑐᐤ ᒋ ᓂᐱᒥᑭᓐ᙮ ᑭᔭ ᐸᐃᒄ ᐊᓯᑯᒻ ᓂᔅᑐ ᐊ ᒥᓴᒡ ᐅᐤᑕ ᐊᓐᑕ ᑲ ᑎᒂᒋ ᒋ ᓂᓱᐅᓇᑎᓇ᙮

¹⁰ ᐊᑯ ᐊᓐ ᓂᔅᑐ ᐊ ᑕᑦ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᐊ ᒥᓯᑎᑦ ᐅᒐᑭᑕᐧᒄ ᒋ ᐸᒋᓯᓄᐤ ᒋᓯᑯᒡ ᐅᒡ ᐊᓐᑕ ᐃᔅ ᐊᔅᒋᒡ᙮ ᒧᔭᒻ ᐊᓐᑕ ᐊ ᐅᓂᔎᑎᑯᐅᑦ ᒥᔅᑎᒄ ᐊ ᐱᓱᑦ, ᐊᐅᑯᓐ ᑲ ᐃᓯᓇᑯᓯᑦ ᐊᓐ ᐅᒐᑭᑕᐧᒄ᙮ ᒐᑲᑦ ᒪᒃ ᐊᐱᑐᐤ ᐊ ᑕᑎᔨᒋ ᓯᐱᔭ ᑭᔭ ᐊᓐᑕ ᐸᒪᒍᐅᒡ ᓂᐱᔾ, ᐊᑯᑕ ᑲ ᐃᓯ ᐸᒋᓯᐧᒃ ᐊᓐ ᐅᒐᑭᑕᐧᒄ᙮

¹¹ ᐊᓐ ᒪᒃ ᐅᒐᑭᑕᐧᒄ ᐎᓯᑭᓐ ᒋ ᐃᓯᓂᐧᑲᓱᐤ᙮ ᒐᑲᑦ ᒪᒃ ᐊᐱᑐᐤ ᐊᓐᑕ ᐊ ᐊᑎ ᑎᒂᒡ ᓂᐱᔾ ᒋ ᐎᓯᑲᐧᑭᒧᐤ᙮ ᒥᒐᑦ ᐊᐛᓐᒋ ᒋ ᓂᐸᐃᑯᐅᒡ ᐊᓂᔭ ᓂᐱᔪᐤ ᐊ ᒥᓂᒡ ᐊᑲ ᐅᒋ ᒥᔽᑭᒥᔨᒡ᙮

¹² ᐊᑯ ᐊᓐ ᓇᐤ ᐊ ᑕᑦ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᒐᑲᑦ ᐊᐱᑐᐤ ᐊᓐ ᐱᓯᒻ, ᑭᔭ ᒐᑲᑦ ᐊᐱᑐᐤ ᑎᐱᔅᑲᐤ ᐱᓯᒻ ᑭᔭ ᒐᑲᑦ ᐊᐱᑐᐤ ᐊ ᐃᑕᑎᓯᒡ ᐅᒐᑭᑕᐧᑯᒡ ᒋ ᑎᑯᓂᔪᐤ ᑲ ᐃᓯ ᓂᓱᐅᓇᒋᐊᑭᓄᐎᒡ, ᐊᑯ ᓇᒪ ᓇᔅᒡ ᐊᐱᑐᐤ ᐊ ᐃᔎᔨᒡ ᐊᔅᐱᔅ ᒋᐧᑲᔭᔅᑐᐛᒡ ᓇᒪ ᐅᒋ ᐃᔅᐱᔅ ᒋᐧᑲᔭᔅᑐᐛᐅᒡ᙮ ᒐᑲᑦ ᐊᐱᑐᐊᒋᓯᑲᔨᒡ ᐃᔅᐱᔅ ᓇᒪ ᐅᒋ ᒋᐧᑲᔭᔅᑐᐛᐤ ᐱᓯᒻ᙮ ᑎᐱᔅᑲᐤ ᐱᓯᒻ ᑭᔭ ᐅᒐᑭᑕᐧᑯᒡ ᑭᔭ ᐎᔨᐛᐤ ᓇᒪ ᐅᒋ ᒋᐧᑲᔭᔅᑐᐛᐅᒡ ᒐᑲᑦ ᐊᐱᑐᐊᑎᐱᔅᑲᔨᒡ ᐃᔅᐱᔅ᙮

¹³ ᒪᒂᒡ ᒪᒃ ᐊ ᐃᑕᐱᔭᓐ, ᓂᒋ ᐛᐱᒪᐤ ᒥᒋᓱᐤ ᐊ ᐱᐸᒥᔭᑦ ᐊᓐᑕ ᒋᓯᑯᒡ ᐊ ᒋᔄᐛᑦ ᐊ ᐃᔅᒋᔄᑦ, “ᑯᔅᑕᑎᑯᓐ, ᑯᔅᑕᑎᑯᓐ, ᒋᑭ ᑯᔅᑕᑎᑯᓐ ᑕᓐ ᒐ ᐃᔅᐱᔨᑦ ᒥᓯᐛ ᐊᐛᓐ ᐅᑕ ᐊᔅᒋᒡ ᐊ ᑕᑦ ᐃᔅᐱ ᐳᑕᑕᒂᐛ ᐅᐳᑕᒋᑭᓄᐛᐛ ᐊᓐᒡ ᓂᔅᑐ ᐊᓐᒋᓐᒡ ᐊᔅᒄ ᐊᑲ ᐅᒋ ᐳᑕᑕᒡ ᐅᐳᑕᒋᑭᓄᐛᐛ᙮”