ᒋᔅᒐᔨᑕᑯᑕᒐᐅᓐ 6 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒪᔭᑕᓂᔅ ᑲ ᒥᓇᐧᒃ ᐊᓂᔭᔪᐛ ᒋᔅᑕᐸᓱᐤ ᐱᓯᑯᐃᑭᓇ

¹ ᐊᑯ ᒂ ᐛᐱᒥᒃ ᐊᓐ ᒪᔭᑕᓂᔅ ᐊ ᓴᓇᐧᒃ ᐸᐃᒄ ᐊᓂᔭᔪᐛ ᓂᔄᐅᑕᒡ ᑲ ᐃᑕᑎᓂᔨᒋ ᒋᔅᑕᐸᓱᐤ ᐱᓯᑯᐃᑭᓇ᙮ ᓂᒋ ᐸᑐᐛᐤ ᒪᒃ ᐸᐃᒄ ᐊᓐᒡ ᑲ ᐱᒪᑎᓯᒡ ᐊᐛᓐᒋ ᐊ ᐃᔅᒋᔄᑦ, “ᐊᔅᑎᒻ !” ᒧᔭᒻ ᓂᒥᔅᒍᐅᒡ ᐊ ᐃᑎᑕᑯᓯᒡ ᐊ ᒋᔅᑐᒡ ᐊᑯᓐ ᑲ ᐃᔅᐱᔅ ᒋᔄᐛᑦ ᐊᓂᔭ ᐊ ᐃᔅᒋᔄᑦ᙮

² ᐊᑯ ᒂ ᐃᑕᐱᔭᓐ, ᒂ ᐛᐱᒥᒃ ᐊ ᐛᐱᓯᑦ ᑲᐸᐃᑭᔎᐤ᙮ ᐊᓐ ᒪᒃ ᑲ ᑕᑎᐱᑦ ᐊᓂᔭᔪᐛ ᑲᐸᐃᑭᔎᐛ, ᒋ ᑕᐧᑯᓇᐤ ᐊᒐᐱᔭ᙮ ᒋ ᒥᔭᑭᓄᐤ ᒋᓴᐅᒋᒪᐅᑯᓂᔎᐅᓂᔪᐤ, ᐊᑯ ᒂ ᔅᑐᑕᑦ ᒋᒋᒋᓯᑯᒡ ᐅᒡ ᐊᓐᑕ ᐊᔅᒋᒡ ᐊ ᐃᑐᑕᑦ᙮ ᒋ ᓴᐧᑯᒋᐊᑯᐱᓇ ᒪᓐ ᐊᐛᔪᐛ ᒐᒋ ᐊᑎ ᐅᒋᒪᐧᑲᑐᐛᑦ᙮ ᒥᓐ ᒪᒃ ᒋ ᔅᑐᑕᐤ ᒐᒋ ᓴᐧᑯᒋᐊᑦ ᑭᔭ ᒐᒋ ᐊᑎ ᐅᒋᒪᐧᑲᑐᐛᑦ ᑯᑎᑲ ᐊᐛᔪᐛ᙮

³ ᐃᔅᐱ ᒪᒃ ᒥᓐ ᑯᑎᒋᔪᐤ ᐊᓂᔭᔪᐛ ᓂᔄᐅᑕᒡ ᑲ ᐃᑕᑎᓂᔨᒋ ᒋᔅᑕᐸᓱᐤ ᐱᓯᑯᐃᑭᓇ ᒂ ᓴᓇᐧᒃ ᐊᓐ ᒪᔭᑕᓂᔅ, ᐊᑯ ᒂ ᐸᑐᐅᒃ ᒥᓐ ᐊᓐ ᐛᒋ ᑕᑦ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᐊ ᐃᔅᒋᔄᑦ, “ᐊᔅᑎᒻ !”

⁴ ᐊᑯ ᒥᓐ ᑯᑎᒃ ᑲᐸᐃᑭᔎᐤ ᑲ ᐅᒋ ᐎᐎᑦ᙮ ᒋ ᒥᐧᑯᓯᐤ ᐊᓐ ᑲᐸᐃᑭᔎᐤ᙮ ᐊᓐ ᒪᒃ ᑲ ᑕᑎᐱᑦ ᐊᓂᔭᔪᐛ ᑲᐸᐃᑭᔎᐛ ᒋ ᒥᔭᑭᓄᐤ ᒐᒋ ᐃᑐᑕᐧᒃ ᒐᒋ ᓂᑐᐱᔨᓇᓄᐎᒡ ᑭᔭ ᒐᒋ ᓂᐸᐃᑐᔨᒋ ᐊᐛᔪᐛ ᐊᓂᔭ ᐊ ᓂᑐᐱᔨᒋ᙮ ᒋ ᒥᔭᑭᓄᐤ ᐊ ᒥᒐᐱᔅᑲᔨᒡ ᓂᑐᐱᔪᐅ-ᒧᐧᑯᒪᓂᔪᐤ᙮

⁵ ᒥᓐ ᒐᒂᓐ ᒂ ᐃᔅᐱᔨᒡ, ᒥᓐ ᑯᑎᒋᔪᐤ ᐊᓂᔭᔪᐛ ᒋᔅᑕᐸᓱᐤ ᐱᓯᑯᐃᑭᓇ ᑲ ᓴᓇᐧᒃ ᐊᓐ ᒪᔭᑕᓂᔅ᙮ ᐊᑯ ᓂᔅᑐ ᑲ ᓴᓇᐧᒃ᙮ ᐊᑯ ᐊᓐ ᓂᔅᑐ ᐊ ᑕᑦ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᒂ ᐃᔅᒋᔄᑦ, “ᐊᔅᑎᒻ !” ᐃᔅᐱ ᒪᒃ ᐊ ᐃᑕᐱᔭᓐ ᓂᒋ ᐛᐱᒪᐤ ᐊ ᐎᐱᓯᑦ ᑲᐸᐃᑭᔎᐤ᙮ ᐊᓐ ᒪᒃ ᑲ ᑕᑎᐱᑦ ᐊᓂᔭᔪᐛ ᑲᐸᐃᑭᔎᐛ, ᒋ ᑕᐧᑯᓂᒻ ᑎᐸᐸᑲᐃᑭᓂᔪᐤ᙮

⁶ ᐊᑯ ᒂ ᐸᑎᒪᓐ ᐸᑕᑯᓱᐅᓐ ᒧᔭᒻ ᐊᐛᓐ ᐊ ᐃᔨᒥᑦ ᐊ ᐃᑎᑕᒂᒡ ᒪᒂᒡ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᐊ ᑕᒡ ᐊ ᐅᑎᑕᑯᒡ᙮ ᐊᓐ ᐊᐛᓐ ᑲ ᐃᔨᒥᑦ ᒋ ᐃᑕᐤ, “ᐸᐃᒄ ᒋᓯᑲᐛ ᐊᔅᐱᔅ ᐊᑐᔅᒐᑦ ᐊᐛᓐ ᒥᒄ ᓂᓱ ᑎᐸᐸᑲᐃᑭᓇ ᐸᒂᓯᑭᓇ ᒋᑭ ᓴᑯᑕᐛᐤ ᒪᒃ ᐊᓱᑕᒡ ᑎᐸᐸᑲᐃᑭᓇ ᐊᔪᒥᓇ᙮ ᒥᒄ ᒪᒃ ᐊᑲᐎᔾ ᐎ ᓂᓱᐅᓇᒋᑕ ᐊᓐ ᐱᒥᔾ ᑭᔭ ᐊᓐ ᓱᒥᓇᐳᔾ᙮”

⁷ ᐊᑯ ᐊᓐ ᒪᔭᑕᓂᔅ ᒥᓐ ᑯᑎᒋᔪᐤ ᐊᓂᔭᔪᐛ ᒋᔅᑕᐸᓱᐤ ᐱᓯᑯᐃᑭᓂᔪᐤ ᒂ ᓴᓇᐧᒃ᙮ ᐊᐅᒄ ᐊᑯ ᓇᐤ ᑲ ᓴᓇᐧᒃ᙮ ᐊᑯ ᒂ ᐸᑐᐅᒃ ᐊᓐ ᓇᐤ ᐊ ᑕᑦ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᐊ ᐃᔅᒋᔄᑦ, “ᐊᔅᑎᒻ !”

⁸ ᒥᓐ ᒂ ᐛᐱᒥᒃ ᑲᐸᐃᑭᔎᐤ ᐊ ᐅᒋ ᐎᐎᑦ᙮ ᒋ ᐎᐛᐱᓯᐤ ᐊᓐ ᑲᐸᐃᑭᔎᐤ᙮ ᐊᓐ ᒪᒃ ᑲ ᑕᑎᐱᑦ ᐊᓂᔭᔪᐛ ᑲᐸᐃᑭᔎᐛ, ᓂᐳᐅᓐ ᒋ ᐃᓯᓂᐧᑲᓱᐤ᙮ ᐅᑕᒡ ᒪᒃ ᐊᓐᑕ ᐊ ᑕᑦ ᐊᑯᑕ ᑲ ᑎᑯᓂᔨᒡ ᐊᐃᑎᔅ ᑲ ᐃᓯᓂᐧᑲᑕᔨᒋ ᒋᐱᔾ ᐊᔅᒋᔪᐤ᙮ ᒋ ᒥᔭᑭᓄᐎᒡ ᒪᒃ ᐅᒡ ᑎᐸᔨᒋᒐᐅᓂᔪᐤ ᐸᐃᒄ ᐊᓯᑯᒻ ᓇᐤ ᐊ ᑕᒡ ᐊᐛᔪᐛ ᐅᑕ ᐊᔅᒋᒡ ᒐᒋ ᓂᐸᐊᒡ ᓂᑐᐱᔪᐅᓂᔪᐤ ᐅᒋ, ᑭᔭ ᑯᐅᐧᑭᑕᐅᓂᔪᐤ ᐅᒋ, ᑭᔭ ᓂᓇᐧᑯᐤ ᐊᐧᑯᓯᐅᓇ ᐅᒋ᙮ ᒋ ᒥᔭᑭᓄᐎᒡ ᑭᔭ ᑎᐸᔨᒋᒐᐅᓂᔪᐤ ᒐᒋ ᐃᑐᑐᐛᒡ ᑲ ᑯᔅᑕᑎᑯᓯᔨᒋ ᐊᐛᓯᓴ ᐊᓐᑕ ᐊᔅᒋᒡ ᐊ ᑕᔨᒋ ᒐᒋ ᓇᓂᐸᐊᔨᒋ ᐊᐛᔪᐛ᙮

⁹ ᐊᑯ ᐊᓐ ᒪᔭᑕᓂᔅ ᒂ ᓴᓇᐧᒃ ᒥᓐ ᑯᑎᒋᔪᐤ ᒋᔅᑕᐸᓱᐤ ᐱᓯᑯᐃᑭᓂᔪᐤ᙮ ᐊᐅᒄ ᐊᑯ ᐱᑕᑕᒡ ᑲ ᓴᓇᐧᒃ᙮ ᐃᔅᐱ ᒪᒃ ᑲ ᓴᓇᐧᒃ ᐊᓂᔭ ᒋᔅᑕᐸᓱᐤ ᐱᓯᑯᐃᑭᓂᔪᐤ ᐊᑯ ᒂ ᐛᐱᒥᒋ ᐅᑦ ᐊᒐᐧᑯᐛᐛ ᐊᓐᒡ ᑲ ᓂᐸᐊᑭᓄᐎᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᒋ ᑕᑈᑎᒺᒡ ᑭᔭ ᐊᒋ ᐛᐎᑕᒡ ᑕᓐ ᐊ ᐃᓯ ᑕᑈᑕᒡ᙮ ᐊᓐᑕ ᐱᔅᑎᓂᒐᐤ ᒥᒋᓱᐛᑭᓇᑎᑯᒡ ᐊᓐᑕ ᑲᒋ ᒪᒥᒋᒪᑭᓄᔨᒋ ᒋᓴᒪᓂᑐᐛ, ᐊᓐᑕ ᒪᒃ ᓂᑕᒡ ᐊᑯᑕ ᒂ ᐛᐱᒥᒡ ᐅᑦ ᐊᒐᐧᑯᐛᐛ ᐅᒡ᙮

¹⁰ ᒋ ᒋᔄᐛᐅᒡ ᒪᒃ ᐊ ᑕᑈᒡ, “ᓂᑎᐸᔨᒋᒐᓯᒥᓇᓐ ᑲ ᓱᐧᑲᑎᓯᔨᓐ, ᑲ ᐸᔭᒋᓯᔨᓐ, ᑲ ᒋᔅᑕᔨᑕᑯᓯᔨᓐ ᒐᒋ ᑕᑈᐅᒐᔨᒥᑯᔨᓐ᙮ ᑕᐃᔅᐱ ᒐ ᑎᐸᔅᑯᓂᑥᐤ ᐊᓐᒡ ᐊᓐᑕ ᐊᔅᒋᒡ ᐊ ᑕᒡ ᑲ ᓂᐸᐃᔨᒥᒡ ? ᑕᐃᔅᐱ ᒐ ᑎᐸᐊᑥᐤ ᐊᓐᒡ ᑲ ᓂᐸᐃᔨᒥᒡ ?”

¹¹ ᐊᑯ ᐸᐸᐃᒄ ᒂ ᒥᔭᑭᓄᐎᒡ ᐊ ᐛᐸᐃᔨᒋ ᐊᑯᐸ᙮ ᒋ ᐃᑕᑭᓄᐎᒡ ᒪᒃ ᒥᓐ ᐛᐃᐱᔅᒋᔅ ᒐᒋ ᐊᔽᐱᒡ ᐸᑐᔅ ᑎᑉ ᒋ ᐃᔅᐱᔅ ᓂᐸᐊᑭᓄᔨᒐ ᐎᒋ ᐊᐱᒋᐊᑭᓄᐛᐛ ᑭᔭ ᐎᐧᑲᓂᓱᐛᐛ ᑕᓐ ᐊᓂᔭᔪᐛ ᒋᐸ ᓂᐸᐊᑭᓄᐅᔪᐛ ᒧᔭᒻ ᐎᔨᐛᐤ ᐊᒋ ᓂᐸᐊᑭᓄᐎᒡ᙮

¹² ᐊᑯ ᒂ ᐛᐱᒥᒃ ᐊᓐ ᒪᔭᑕᓂᔅ ᒥᓐ ᑯᑎᒋᔪᐤ ᒋᔅᑕᐸᓱᐤ ᐱᓯᑯᐃᑭᓂᔪᐤ ᐊ ᓴᓇᐧᒃ᙮ ᐊᐅᒄ ᐊᑯ ᐊᓱᑕᒡ ᑲ ᓴᓇᐧᒃ᙮ ᐃᔅᐱ ᒪᒃ ᑲ ᓴᓇᐧᒃ, ᐊᑯ ᒂ ᒥᔅᑎ ᑯᐃᐧᑯᒡ᙮ ᐱᓯᒻ ᒋ ᑎᐱᔅᒋᐱᔪᐤ ᒧᔭᒻ ᐊᐱᒋᑕᐅᓐ ᑲ ᓱᒐᑲᒡ ᐊ ᐎᐸᑲᒡ ᐊᑯᓐ ᑲ ᐃᓯᓇᑯᓯᑦ᙮ ᐊᑯ ᑎᐱᔅᑲᐤ ᐱᓯᒻ ᒂ ᒥᐧᑯᓯᑦ, ᒧᔭᒻ ᐊ ᓱᐧᑯᓯᑦ ᐊᑯᓐ ᑲ ᐃᓯᓇᑯᓯᑦ᙮

¹³ ᐅᒐᑭᑕᐧᑯᒡ ᒋ ᐸᐸᒋᓯᓄᒡ ᒋᓯᑯᒡ ᐅᒡ ᐊᓐᑕ ᐃᔅ ᐊᔅᒋᒡ ᒧᔭᒻ ᐊ ᐃᓯ ᐸᒋᓯᓂᒡ ᐛᐱᒥᓂᒡ ᐊᑲ ᐊᑎᓱᒡ ᐊ ᒥᔅᑎ ᔪᑎᓂᔨᒡ᙮

¹⁴ ᒋᓯᒄ ᒪᒃ ᒋ ᐸᓯᑯᓇᑯᓐ ᒧᔭᒻ ᒥᓯᓇᐃᑭᓐ ᐊ ᐊᑎ ᑎᑎᐱᓂᑭᓄᐅᒡ ᐊᑯᓐ ᑲ ᐃᔅᐱᔨᒡ᙮ ᒥᓯᐛ ᐱᔅᑯᑎᓇᐛ ᑭᔭ ᒥᓂᔅᑎᒂ ᒋ ᐊᒋᐱᔪᐛ ᐊᓐᑕ ᑲ ᑎᒂᒋ ᐅᒡ᙮

¹⁵ ᒥᓯᐛ ᒪᒃ ᐊᐛᓐᒋ ᐊᓐᑕ ᐊᔅᒋᒡ ᐊ ᑕᒡ ᒋ ᑲᓱᐅᒡ ᐊᓐᑕ ᐊ ᐛᑎᒂᐱᔅᑲᐃᑭᓄᐎᒡ ᐱᔅᑯᑎᓇᒡ ᑭᔭ ᒪᒃ ᓯᐸ ᐊᓯᓂᔭ ᐊ ᒥᒐᐱᔅᒋᓯᔨᒋ᙮ ᐊᑯ ᐊᓐᒡ ᒋᓴᐅᒋᒪᐅᒡ, ᑭᔭ ᐊᓐᒡ ᑲ ᒋᔅᑕᔨᑕᑯᓯᒡ ᒋᓴᐅᒋᒪᓯᓯᒡ, ᓂᑐᐱᔪᐅ-ᐅᒋᒪᐅᒡ, ᐊᓐᒡ ᑲ ᐛᔪᑎᓯᒡ, ᐊᓐᒡ ᑲ ᒋᔅᑕᔨᑕᑯᓯᒡ ᐊᐛᓐᒋ, ᑲ ᐅᑦ ᐊᐱᒋᐊᑭᓂᑐᑐᐛᑭᓄᐅᒡ ᑭᔭ ᐊᑲ ᐅᑦ ᐊᐱᒋᐊᑭᓂᑐᑐᐛᑭᓄᐅᒡ ᑭᔭ ᒥᓯᐛ ᑯᑎᒃ ᐊᐛᓐ ᒋ ᑲᓱᐤ ᐊᓐᑕ ᐊ ᐛᑎᒂᐱᔅᑲᔨᒡ ᐱᔅᑯᑎᓇᒡ ᒪᒃ ᓯᐸ ᐊᓯᓂᔭ ᐊ ᒥᒐᐱᔅᒋᓯᔨᒋ᙮

¹⁶ ᐊᑯ ᒂ ᑕᑈᒡ ᐊᓐᑕ ᐃᔅ ᐱᔅᑯᑎᓇᒡ ᑭᔭ ᐊᓐᑕ ᐊ ᑕᔨᒋ ᑲ ᒪᒥᒐᐱᔅᒋᓯᔨᒋ ᐊᓯᓂᔭ, ᐊ ᐃᔅᒋᔄᒡ, “ᐸᒋ ᐱᔅᑐᐅᓇᓐ ᒪ᙮ ᐸᒋ ᑲᐃᓇᓐ ᒐ ᐊᑲ ᒋ ᐛᐱᒥᔨᒥᑦ ᐊᓐ ᒋᓴᐅᒋᒪᐤ ᑕᑎᐳᐛᑭᓂᒡ ᑲ ᐊᐱᑦ ᑭᔭ ᒐ ᐊᑲ ᒋ ᑎᐸᔅᑯᓂᔨᒥᑦ ᐊᓐ ᒪᔭᑕᓂᔅ᙮

¹⁷ ᐛᔅ ᐊᑯ ᐛᑎᒋᐱᔨᒡ ᐊᓐᑕ ᒥᓯᐛ ᐊᐛᔪᐛ ᒐ ᐊᒂᒡ ᐛᐛᓯᐊᒡ᙮ ᓇᒪ ᒪᒃ ᐊᐛᓐ ᒋᑭ ᒋ ᐃᓯᑲᐳᔅᑎᒻ ᐅᔭ ᒐ ᐃᓯ ᐛᐛᓯᐊᑭᓄᔨᒋ ᐊᐛᔪᐛ᙮”