ᒋᔅᒐᔨᑕᑯᑕᒐᐅᓐ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒪᔭᑕᓂᔅ ᑭᔭ ᒥᓯᓇᐃᑭᓂᔅ 1 ᐊᑯ ᒂ ᐛᐸᑎᒪᓐ ᒥᓯᓇᐃᑭᓐ ᐊᒋ ᑎᑎᐸᔭᒋᓂᑭᓄᐅᒡ᙮ ᐊᓐ ᐊᐛᓐ ᑲ ᐊᐱᑦ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᒋ ᑕᐧᑯᓂᒻ ᐊᓂᔭ ᒥᓯᓇᐃᑭᓂᔪᐤ᙮ ᐃᑐᐤ ᐊᓐᑕ ᒋ ᒥᓯᓇᐃᑲᓄᑯᐱᓇ ᐊᓐ ᒥᓯᓇᐃᑭᓐ ᑭᔭ ᒋ ᒋᔅᑕᐸᓱᐤ ᐱᓯᑯᐃᑭᓄᑯᐱᓇ ᓂᔄᐅᑕᒡ ᒋᔅᑕᐸᓱᐤ ᐱᓯᑯᐃᑭᓇ ᐊᒋ ᐊᐱᑎᒋ᙮ 2 ᐊᑯ ᑲ ᐛᐱᒥᒃ ᐊ ᓱᒐᔨᑕᑯᓯᑦ ᐊᓐᒋᓐ᙮ ᒋ ᐃᔅᒋᔄᐤ ᒪᒃ ᐊ ᒥᔅᑎ ᒋᔄᐛᑦ, “ᐊᐛᓐ ᐊ ᑕᑦ ᐊ ᒋᔅᑕᔨᑕᑯᓯᑦ ᒐᒋ ᒥᓇᐧᒃ ᐊᓂᔭᔪᐛ ᒋᔅᑕᐸᓱᐤ ᐱᓯᑯᐃᑭᓇ ᑭᔭ ᒐᒋ ᐸᔅᒋᔭᐅᒋᓇᐧᒃ ᐊᓂᔭ ᒥᓯᓇᐃᑭᓂᔪᐤ ?” 3 ᓇᒪ ᒪᒃ ᐊᐛᓐ ᐅᒋ ᑕᐤ ᐊᓐᑕ ᒋᒋᒋᓯᑯᒡ ᑭᔭ ᒪᒃ ᐅᑕ ᐊᔅᒋᒡ ᑭᔭ ᒪᒃ ᑕᒥᒡ ᐊᔅᒋᒡ ᒐᒋ ᐃᑐᑕᐧᒃ ᒐᒋ ᐸᔅᒋᔭᐅᒋᓇᐧᒃ ᐊᓂᔭ ᒥᓯᓇᐃᑭᓂᔪᐤ ᒐᒋ ᐃᔨᒥᑕᑦ᙮ 4 ᓂᒋ ᒥᔅᑎ ᒪᓐ ᒪᒃ ᐛᔅ ᓇᒪ ᐅᒋ ᒥᔅᑯᐛᑭᓄᐤ ᐊᐛᓐ ᐊ ᒋᔅᑕᔨᑕᑯᓯᑦ ᒐᒋ ᐸᔅᒋᔭᐅᒋᓇᐧᒃ ᐊᓂᔭ ᒥᓯᓇᐃᑭᓂᔪᐤ ᑭᔭ ᒐᒋ ᐃᔨᒥᑕᑦ᙮ 5 ᐊᑯ ᐸᐃᒄ ᐊᓐ ᑲ ᓂᑲᓇᔨᑕᑯᓯᑦ ᒋᓴᐃᔪᐤ ᒂ ᐃᓯᑦ, “ᐊᑯᓐ ᐃᔅᐱᔅ ᒪ᙮ ᐊᓐᑕ ᒪ ᐃᑕᐱ᙮ ᑭᓄᐛᐱᒻ ᒪ ᐊᓐ ᒥᓯᐱᓱᐤ ᑲ ᐃᓯᓂᐧᑲᑕᑭᓄᐅᑦ᙮ ᒍᑕ ᐊ ᑕᔨᒋ ᐃᑎᔅᑲᓇᓱᐤ ᑭᔭ ᒋᓴᐅᒋᒪᐤ ᑎᐱᑕ ᐊ ᑕᔨᒋ ᐅᒋ ᐊᓂᔅᒐᐱᔪᐤ ᐊᓂᔭ ᐛᒋ ᒋᓴᐅᒋᒪᐅᑦ᙮ ᐎᔾ ᒋ ᓴᐧᑯᒋᐊᐤ ᒥᓯᐛ ᐊᓂᔭᔪᐛ ᑲ ᐛᐧᑲᑎᑯᑦ᙮ ᐎᔾ ᒪᒃ ᒋᑭ ᒋ ᐸᔅᒋᔭᐅᒋᓂᒻ ᐊᓂᔭ ᒥᓯᓇᐃᑭᓂᔪᐤ ᑭᔭ ᐎᔾ ᒋᑭ ᒋ ᒥᓂᒻ ᐊᓂᔭᔪᐛ ᒋᔅᑕᐸᓱᐤ ᐱᓯᑯᐃᑭᓇ᙮” 6 ᐊᑯ ᒂ ᐛᐱᒥᒃ ᒪᔭᑕᓂᔅ ᑎᐱᔅᑯᒡ ᐊ ᓂᐳᐅᑦ ᐊᓂᔭ ᒋᓴᐅᒋᒪᐤ ᑕᑎᐳᐛᑭᓂᔪᐤ, ᐊᓐᑕ ᒥᓯᑕ ᐊ ᑕᔨᒋ ᐊᓂᔭ ᓇᐤ ᑲ ᐱᒪᑎᓯᔨᒋ ᐊᐛᔪᐛ ᑭᔭ ᐊᓂᔭᔪᐛ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᔨᒋ ᒋᓴᐃᔪᐛ᙮ ᒋ ᓂᓯᑐᓇᑯᓱᐤ ᐸᐃᒂᐤ ᐊᒋ ᓂᐸᐊᑭᓄᑯᐱᓇ᙮ ᓂᔄᐅᑕᒡ ᒋ ᐃᑕᑎᓂᔪᐛ ᐅᑦ ᐊᔅᑭᓇ ᑭᔭ ᓂᔄᐅᑕᒡ ᒋ ᐃᑕᑎᓂᔪᐛ ᐅᔅᒋᓯᒂ᙮ ᐊᓂᔭᔪᐛ ᒪᒃ ᓂᔄᐅᑕᒡ ᐅᔅᒋᓯᒂ, ᐊᐅᑯᓐ ᐊᓂᔭᔪᐛ ᓂᔄᐅᑕᒡ ᐊ ᑕᑎᓯᔨᒋ ᐅᑦ ᐊᒐᒂ ᒋᓴᒪᓂᑐᐤ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᔪᐤ ᑲ ᐃᑎᓴᐛᑦ᙮ 7 ᐊᑯ ᐊᓐ ᒪᔭᑕᓂᔅ ᒂ ᓇᑕᑦ ᐊᓂᔭᔪᐛ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᑲ ᐊᐱᔨᒋ, ᐊᑯ ᒂ ᐅᑎᓂᒺᑦ ᐊᓂᔭ ᒥᓯᓇᐃᑭᓂᔪᐤ ᐅᒥᔪᓂᔨᒡ ᑲ ᑕᐧᑯᓂᒥᔨᒋ᙮ 8 ᐃᔅᐱ ᒪᒃ ᑲ ᐅᑎᓂᒺᑦ ᐊᓂᔭ ᒥᓯᓇᐃᑭᓂᔪᐤ, ᐊᓐᒡ ᑲ ᐱᒪᑎᓯᒡ ᐊᐛᓐᒋ ᑭᔭ ᐊᓐᒡ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᒡ ᒋᓴᐃᔪᒡ ᒋ ᐅᒋᒋᐧᑯᓂᐱᔪᐅᒡ ᐊᓐᑕ ᐊᓂᔭᔪᐛ ᒪᔭᑕᓂᓴ ᐊ ᑕᔨᒋ᙮ ᒥᓯᐛ ᐸᐸᐃᒄ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᑭᔭ ᐊᓐᒡ ᒋᓴᐃᔪᒡ ᒋ ᐊᔭᐅᒡ ᐊᔭᒥᐊᐤ ᒋᔍᐛᐱᒋᑭᓂᓴ ᑲ ᒥᔪᑕᑯᓂᔨᒋ ᑭᔭ ᐊ ᒧᑕᔭᐱᔅᑲᔨᒋ ᐎᔭᑭᓇ ᐊ ᐎᔄᐅᓱᓇᔭᐱᔅᑯᔨᒋ᙮ ᒐᒂᔪᐛ ᐊ ᐎᒋᒪᑯᓯᔨᒋ ᒋ ᐊᔅᑕᔪᐛ ᐊᓐᑕ ᐊᓂᔭᔪᐛ ᐎᔭᑭᓇ᙮ ᐊᓂᔭ ᒪᒃ ᒐᒂᔪᐛ ᑲ ᐎᒋᒪᑯᓯᔨᒋ, ᐊᐅᒄ ᐅᔭ ᐅᑦ ᐊᔭᒥᐊᐅᓄᐛᐛ ᐊᓐᒡ ᑲ ᑕᑈᑕᒡ᙮ 9 ᐊᓐᒡ ᒪᒃ ᓇᐤ ᑲ ᐱᒪᑎᓯᒡ ᐊᐛᓐᒋ ᑭᔭ ᐊᓐᒡ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᒡ ᒋᓴᐃᔪᒡ, ᒋ ᓂᑭᒧᐅᒡ ᓂᑭᒧᐅᓂᔪᐤ ᐊᑲ ᓂᑕ ᐊᔅᒄ ᐅᒋ ᓂᑭᒧᓇᓄᐎᒡ᙮ ᒪᐅ ᑲ ᐃᑕᐊᒪᓱᒡ, “ᒋᔾ, ᒪᔭᑕᓂᔅ, ᒋ ᒋᔅᑕᔨᑕᑯᓯᓐ ᒐᒋ ᐅᑎᓂᒥᓐ ᐊᓐ ᒥᓯᓇᐃᑭᓐ᙮ ᒋ ᒋᔅᑕᔨᑕᑯᓯᓐ ᒐᒋ ᒥᓂᒥᓐ ᐊ ᐃᓯ ᒋᔅᑕᐸᓱᐤ ᐱᓯᒂᐃᑭᓄᐅᒡ᙮ ᐛᔅ ᒋᔾ ᔅᒋ ᓂᐸᐃᑯᐅᓐ᙮ ᒋᒥᐧᑯᒡ ᒪᒃ ᐊᑯᑕ ᑲ ᐅᒋ ᐎᐧᑯᒋᐃᑥᐤ ᐊᐛᓐᒋ ᒥᓯᐛ ᐊ ᐃᑎᔅᑲᓇᓯᒡ ᑭᔭ ᒥᓯᐛ ᐊ ᐃᓯ ᒪᒧᑕᐅᓯᒡ ᑭᔭ ᓂᓇᐧᑯᐤ ᐊ ᐃᓯ ᐃᔨᒥᒡ, ᒋᓴᒪᓂᑐᐛ ᒐᒋ ᐅᑦ ᐃᔨᒥᑐᑕᑯᒡ᙮ 10 ᒥᓯᐛ ᔅᒋ ᒪᒧᓇᐅᒡ ᐊᓐᑕ ᐊ ᑕᔨᓐ ᐃᔅ ᒐᒋ ᐊᑐᔅᑯᐛᒡ ᒋᓴᒪᓂᑐᐛ ᐊ ᐊᔭᒥᐊᐅᒋᒪᐤ ᐊᐱᑎᓯᒡ᙮ ᒋᑭ ᐅᒋᒪᐅᒡ ᒪᒃ ᐅᑕ ᐊᔅᒋᒡ᙮” Revelation 5.11-14 (Easter-3 Year C) 11 ᐊᑯ ᒥᓐ ᒂ ᐃᑕᐱᔭᓐ, ᐊᑯ ᒂ ᐸᑐᐅᒂᐤ ᐊ ᒥᒐᑎᒡ ᐊᓐᒋᓐᒡ᙮ ᓇᒪ ᒋᐸ ᐅᒋ ᐊᒋᒪᑭᓄᐎᒡ ᑲ ᐃᔅᐱᔅ ᒋ ᒥᒐᑎᒡ᙮ ᒋ ᐛᔅᑲᑲᐳᐅᒡ ᐊᓂᔭ ᒋᓴᐅᒋᒪᐤ ᑕᑎᐳᐛᑭᓂᔪᐤ ᑭᔭ ᐊᓂᔭᔪᐛ ᓇᐤ ᑲ ᐱᒪᑎᓯᔨᒋ ᐊᐛᔪᐛ ᒋ ᐛᔅᑲᑲᐳᔅᑎᐛᐅᒡ ᑭᔭ ᐊᓂᔭᔪᐛ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᔨᒋ ᒋᓴᐃᔪᐛ᙮ 12 ᒋ ᒋᔄᐛᐅᒡ ᒪᒃ ᐊ ᓂᑭᒧᒡ, “ᐊᓐ ᒪᔭᑕᓂᔅ ᑲ ᓂᐸᐊᑭᓄᐅᑦ ᒋᔅᑕᔨᑕᑯᓱᐤ ᐎᔾ ᒐᒋ ᐊᔭᑦ ᓱᐧᑲᑎᓯᐅᓂᔪᐤ, ᐛᔪᑎᓯᐅᓂᔪᐤ, ᑭᒐᑕᐛᔨᑎᒧᐅᓂᔪᐤ, ᒥᔅᑯᓯᐅᓂᔪᐤ, ᒋᔅᑕᒋᒥᑯᓯᐅᓂᔪᐤ, ᒋᔅᑕᔨᑕᑯᓱᐅᓂᔪᐤ, ᑭᔭ ᓱᐛᔨᒋᒐᐅᓂᔪᐤ᙮” 13 ᐊᑯ ᒂ ᐸᑐᐅᒂᐤ ᒥᓯᐛ ᐊᐛᓐᒋ ᐊᓐᑕ ᒋᒋᒋᓯᑯᒡ ᑭᔭ ᒥᓯᐛ ᐊᐛᓐᒋ ᑭᔭ ᐊᐛᓯᓯᒡ ᐊᔅᒋᒡ ᑭᔭ ᑕᒥᒡ ᐊᔅᒋᒡ ᑭᔭ ᐊᓐᑕ ᓂᐱᒡ ᑭᔭ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᒡ ᐊ ᑕᒡ ᐊ ᓂᑭᒧᒡ, ᐅᔭ ᐊ ᐃᔅᒋᔄᒡ, “ᐊᓐ ᐊᐛᓐ ᑲ ᐊᐱᑦ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᑭᔭ ᐊᓐ ᒪᔭᑕᓂᔅ ᑲᒋᒡ ᒋᑭ ᓱᐛᔨᒪᑭᓄᐎᒡ ᑭᔭ ᒋᑭ ᒋᔅᑕᒋᒪᑭᓄᐎᒡ ᑭᔭ ᒋᑭ ᒋᔅᑕᔨᑕᑯᐊᑭᓄᐅᒡ ᑭᔭ ᒋᑭ ᓱᐧᑲᑎᓯᐅᒡ ᑲᒋᒡ ᑭᔭ ᑲᒋᒡ᙮” 14 ᐊᑯ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ “ᐊᒥᓐ” ᒂ ᐃᔅᒋᔄᒡ, ᐊᑯ ᐊᓐᒡ ᑲ ᒋᓴᐃᔪᐅᒡ ᒋ ᐸᒋᓯᓄᐅᒡ ᑭᔭ ᒋ ᐊᔭᒥᐊᔅᑐᐛᐅᒡ ᒋᓴᒪᓂᑐᐛ ᑭᔭ ᐊᓂᔭᔪᐛ ᒪᔭᑕᓂᓴ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.