ᒋᔅᒐᔨᑕᑯᑕᒐᐅᓐ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᓐᒡ ᒋᒋᒋᓯᑯᒡ ᐊ ᑕᒡ ᒪᒥᒋᒪᐅᒡ ᒋᓴᒪᓂᑐᐛ

¹ ᐃᔭᒡ ᒥᓐ ᓂᒋ ᐃᓯ ᐛᐸᑎᔨᑯᐅᓐ᙮ ᐃᔅᐱᒥᒡ ᐊ ᐃᑕᐱᔭᓐ ᓂᒋ ᐛᐱᒪᐤ ᔅᑐᐧᑭᓐ ᐊ ᐊᔪᑕᑯᒋᓂᑦ ᐊᓐᑕ ᒋᒋᒋᓯᑯᒡ᙮ ᐊᑯ ᑲ ᐸᒋ ᐃᔨᒥᐃᑦ ᒥᓐ ᐊᓐ ᐊᐛᓐ ᓴᔅ ᐊᓐᑕ ᐊᒋ ᐸᒋ ᐃᔨᒥᐃᑦ᙮ ᒧᔭᒻ ᐳᑕᒋᑭᓂᔪᐤ ᐊ ᒋᔄᐛᒥᑭᓂᔨᒡ ᐊ ᐃᑎᑕᑯᓂᔨᒡ, ᐊᑯᓐ ᐊ ᐃᑎᑕᑯᓂᔨᒡ ᐅᐸᑕᑯᓱᐅᓐ᙮ ᓂᒋ ᐃᑎᒄ, “ᐊᔅᑎᒻ ᐅᑕ᙮ ᒐ ᐛᐸᑎᔨᑕᓐ ᑕᓐ ᒥᓐ ᒐ ᐊᑎ ᐃᔅᐱᔨᒡ᙮”

² ᑎᐛᒡ ᒪᒃ ᑲ ᐸᔭᒋᓯᑦ ᐊᒐᐧᒄ ᓂᒋ ᐸᒋ ᐱᒋᔅᑲᒄ, ᐊᑯ ᒂ ᐛᐸᑎᒪᓐ ᐊᓐᑕ ᒋᒋᒋᓯᑯᒡ ᒋᓴᐅᒋᒪᐤ ᑕᑎᐳᐛᑭᓐ᙮ ᒋ ᐊᐳᐤ ᒪᒃ ᐊᓐᑕ ᐊᐛᓐ᙮

³ ᐊᓐ ᒪᒃ ᐊᐛᓐ ᑲ ᐊᐱᑦ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ, ᓇᔅᒡ ᑕᑈ ᒋ ᒥᔽᓯᔪᐤ ᐊ ᐃᓯ ᒋᐧᑲᔭᔅᑐᐛᑦ, ᒧᔭᒻ ᐊᓯᓂᓯᒡ ᑲ ᒥᔅᑎ ᒥᔪᓯᒡ ᒐᔅᐸᕐ ᑭᔭ ᑲᕐᓂᓕᔭᓐ ᑲ ᐃᓯᓂᐧᑲᓱᒡ, ᐊᑯᓐ ᑲ ᐃᑕᔅᑐᐛᑦ ᐊᓐ ᐊᐛᓐ᙮ ᒥᓯᐛ ᐛᔅᑲ ᐊᓐ ᒋᓴᐅᒋᒪᐤ ᑕᑎᐳᐛᑭᓐ ᒋ ᐃᑕᐸᑲᒧᐤ ᐎᐧᑯᐱᓴᑭᓐ ᓇᔅᒡ ᐊ ᒥᔽᔅᑐᐛᒡ ᒧᔭᒻ ᐊᓯᓂᓴ ᐊᒥᕋᓪᑦ ᑲ ᐃᓯᓂᐧᑲᓱᑦ ᐊ ᐃᑕᔅᑐᐛᒡ᙮

⁴ ᐛᔅᑲ ᒪᒃ ᐊᓐ ᒋᓴᐅᒋᒪᐤ ᑕᑎᐳᐛᑭᓐ ᐊᑯᑕ ᑲ ᑎᒂᒋ ᓂᓱᔪᐤ ᐊᓱ ᓇᐤ ᒋᓴᐅᒋᒪᐤ ᑕᑎᐳᐛᑭᓇ᙮ ᓂᓱᔪᐤ ᐊᓱ ᓇᐤ ᐊ ᒋᔅᑕᔨᑕᑯᓯᒡ ᒋᓴᐃᔪᒡ ᒋ ᐊᐳᐅᒡ ᐊᓐᑕ᙮ ᒋ ᐛᐸᔪᐛ ᐅᑦ ᐊᐱᒋᑕᐅᓄᐛᐛ ᑭᔭ ᒋ ᒋᔅᑭᒧᒡ ᐊ ᐎᔄᐅᓱᓇᔭᐱᔅᑯᔨᒋ ᒋᓴᐅᒋᒪᐅᑯᓂᔎᐅᓇ᙮

⁵ ᐊᓐᑕ ᐅᒋᓴᐅᒋᒪᐤ ᑕᑎᐳᐛᑭᓂᒡ ᐊᓐ ᑲ ᐊᐱᑦ ᒋ ᐅᒋ ᐅᔄᔅᑕᐱᔪᐤ᙮ ᒋ ᐸᑕᑯᓇ ᐸᑕᑯᓱᐅᓇ ᑭᔭ ᒧᔭᒻ ᓂᒥᔅᒍᐅᒡ ᐊ ᐸᑕᑯᓯᒡ ᒋ ᐃᑎᑕᑯᓐ ᐊᓐᑕ ᐊ ᐊᐱᒡ ᐅᒡ᙮ ᐅᑎᔅᑯᐤ ᒪᒃ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᒋ ᑎᑯᓐ ᓂᔄᐅᑕᒡ ᐃᔅᑯᑕᐤ ᐛᔅᑕᓂᐱᒪᑭᓇ ᐊ ᐃᔅᑯᑕᐅᒋ᙮ ᐊᐅᑯᓐᒡ ᐅᒡ ᓂᔄᐅᑕᒡ ᐊᒐᐧᑯᒡ ᑲ ᐊᑐᔅᑯᐛᒡ ᒋᓴᒪᓂᑐᐛ᙮

⁶ ᐅᑎᔅᑯᐤ ᐊᓐ ᒋᓴᐅᒋᒪᐤ ᑕᑎᐳᐛᑭᓐ ᒋ ᑎᑯᓐ ᓴᑲᐃᑭᓂᔅ ᒧᔭᒻ ᓯᐳᐛᔅᑕᔨᑕᑭᓇᐱᔅᒄ ᐊ ᐃᓯᓇᒂᒡ, ᐊ ᓴᐳᓇᒂᒡ ᒧᔭᒻ ᒥᔅᑯᒥᔾ ᐊ ᓴᐳᓇᑯᓯᑦ᙮ ᒥᒋᒪ ᒪᒃ ᐛᔅᑲ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ, ᓂᒋ ᐛᐱᒪᐅᒡ ᓇᐤ ᐊᐛᓐᒋ ᐊ ᐱᒪᑎᓯᒡ᙮ ᒥᓯᐛ ᐊ ᐃᔅᐱᑎᒡ ᐊ ᑎᑯᓂᔨᒋ ᐅᔅᒋᓯᑯᐛᐛ᙮

⁷ ᐊᓐ ᒪᒃ ᓂᔅᑎᒻ ᐊᓐᒡ ᑲ ᓇᐅᒡ ᑲ ᐱᒪᑎᓯᒡ ᐊᐛᓐᒋ, ᒧᔭᒻ ᒥᓯᐱᓱᐤ ᒋ ᐃᓯᓇᑯᓱᐤ᙮ ᐊᓐ ᒥᓐ ᐛᒋ ᑕᑦ ᒧᔭᒻ ᒥᔅᑐᓯᔅ ᒋ ᐃᓯᓇᑯᓱᐤ᙮ ᒥᓐ ᐊᓐ ᓂᔅᑐ ᐛᒋ ᑕᑦ, ᐅᑕᔅᑎᒥᐧᒄ ᒧᔭᒻ ᐃᔪᐤ ᒥᑕᔅᑎᒥᐧᑯᔪᐤ ᒋ ᐃᓯᓇᑯᓂᔪᐤ ᐊᓂᔭ ᐅᑕᔅᑎᒥᐧᒄ᙮ ᐊᑯ ᐊᓐ ᓇᐤ ᐛᒋ ᑕᑦ, ᒧᔭᒻ ᒥᒋᓱᐤ ᐊ ᐱᒥᔭᑦ ᒋ ᐃᓯᓇᑯᓱᐤ᙮

⁸ ᒥᓯᐛ ᒪᒃ ᐊ ᓇᐅᒡ ᐊᓱᑕᒡ ᐃᑕᑎᓂᔪᐛ ᐅᑎᑎᑭᓄᐛᐛ᙮ ᒥᓯᐛ ᐊ ᐃᔅᐱᑎᒡ ᑎᑯᓂᔪᐛ ᐅᔅᒋᓯᑯᐛᐛ, ᐛᐛᒡ ᓯᐸ ᐅᑎᑎᑯᓂᐛᒡ ᑎᑯᓂᔪᐛ᙮ ᓇᒪ ᒪᒃ ᒋᐱᑐᐛᐅᒡ ᐊ ᓂᑭᒧᒡ ᐊ ᑎᐱᔅᑲᔨᒡ ᑭᔭ ᐊ ᒋᓯᑲᔨᒡ, ᐊ ᐃᔅᒋᔄᒡ, “ᐸᔭᒋᓯᐤ, ᐸᔭᒋᓯᐤ, ᐸᔭᒋᓯᐤ ᐅᑎᐸᔨᒋᒐᐤ ᒋᓴᒪᓂᑐᐤ ᒪᐅᒡ ᑲ ᓱᐧᑲᑎᓯᑦ, ᐊᓐ ᒧᔅ ᑲ ᐸᒋ ᑕᑦ, ᐊᓐ ᐊᓄᒡ ᐊ ᑕᑦ, ᑭᔭ ᐊᓐ ᒐ ᑎᑯᓯᐧᒃ᙮”

⁹ ᐃᔅᐱ ᒪᒃ ᓇᑭᒧᒡ ᐊᓐᒡ ᓇᐤ ᑲ ᐱᒪᑎᓯᒡ ᐊᐛᓐᒋ ᐊ ᒋᔅᑕᔨᑕᑯᐊᒡ, ᐊ ᒋᔅᑕᒋᒪᒡ ᑭᔭ ᐊ ᓂᓇᔅᑯᒪᒡ ᐊᓂᔭᔪᐛ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᑲ ᐊᐱᔨᒋ, ᐊᓂᔭ ᑲᒋᒡ ᐸᒪᑎᓯᔨᒋ,

¹⁰ ᐊᓐᒡ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᒡ ᒋᓴᐃᔪᒡ ᒋ ᐅᒋᒋᐧᑯᓂᐱᔪᐅᒡ ᐊᓐᑕ ᐃᔅ ᐊ ᑕᔨᒋ ᐊᓂᔭᔪᐛ ᑲ ᐊᐱᔨᒋ ᒋᓴᐅᒋᒪᐤ ᑕᑎᐳᐛᑭᓂᒡ, ᐊ ᐊᔭᒥᐊᔅᑐᐛᒡ ᐊᓂᔭ ᑲᒋᒡ ᐸᒪᑎᓯᔨᒋ᙮ ᒋ ᒥᓂᒧᒡ ᐊᓂᔭᔪᐛ ᐅᒋᓴᐅᒋᒪᐅᑯᓂᔎᐅᓄᐛᐛ, ᐊᑯ ᐅᑎᔅᑯᐤ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᑲ ᐃᓯ ᐛᐱᓇᒡ, ᐊ ᐃᔅᒋᔄᒡ,

¹¹ “ᒋᔾ ᓂᑎᐸᔨᒋᒐᓯᒥᓇᓐ ᑭᔭ ᓂᒋᓴᒪᓂᑐᒥᓇᓐ ᑲ ᐊᑐᔅᑲᑕᒡ ᒋ ᒋᔅᑕᔨᑕᑯᓯᓐ ᒐᒋ ᒋᔅᑕᔨᑕᑯᐃᑯᔨᓐ ᑭᔭ ᒐᒋ ᒋᔅᑕᒋᒥᑯᔨᓐ ᑭᔭ ᒐᒋ ᒪᒥᒋᒥᑯᔨᓐ ᐊᔅᐱᔅ ᓱᐧᑲᑎᓯᔨᓐ᙮ ᐛᔅ ᒋᔾ ᒥᓯᐛ ᒐᒂᓐ ᔅᒋ ᐅᓯᑕᓐ᙮ ᒋᔾ ᔅᒋ ᐃᑕᔨᑕᓐ ᒐᒋ ᑎᒂᒡ ᒥᓯᐛ ᒐᒂᓐ ᐊ ᑎᒂᒡ ᑭᔭ ᒥᓯᐛ ᑲ ᐅᓯᑕᔨᓐ᙮”