ᒋᔅᒐᔨᑕᑯᑕᒐᐅᓐ 21 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐅᔅᑲᒡ ᒋᒋᒋᓯᒄ ᑭᔭ ᑲ ᐅᔅᑲᒡ ᐊᔅᒋᔾ Revelation 21.1-6 (New Years Day, Year B, C; Easter-5 Year C)

¹ ᐊᑯ ᒂ ᐛᐸᑎᒪᓐ ᐊ ᐅᔅᑲᒡ ᒋᒋᒋᓯᒄ ᑭᔭ ᐊ ᐅᔅᑲᒡ ᐊᔅᒋᔾ᙮ ᐛᔅ ᐊᓐ ᐛᔅᑭᒡ ᒋᒋᒋᓯᒄ ᑭᔭ ᐊᓐ ᐛᔅᑭᒡ ᐊᔅᒋᔾ ᓴᔅ ᒋ ᐸᓯᑯᓇᑯᓇ᙮ ᐎᓂᐸᒄ ᑭᔭ ᓇᒪ ᐅᒋ ᑎᑯᓐ᙮

² ᓂᒋ ᐛᐸᑕᓐ ᒪᒃ ᐊᓐ ᑲ ᐸᔭᒋᓯᒥᑲᒡ ᐅᑕᓇᐤ ᒋᒋᒋᓯᑯᒡ ᐊ ᐅᒋ ᔭᓯᒥᑲᒡ᙮ ᒋᓴᒪᓂᑐᐤ ᐊ ᑕᑦ ᒋ ᐅᒋᐱᔪᐤ᙮ ᐊᐅᒄ ᐅ ᑲ ᐅᔅᑲᒡ ᒋᕈᓯᓕᒻ᙮ ᒧᔭᒻ ᐅᔅᒋᓂᒋᔎᐤ ᐊᒋ ᒥᔪᓇᑯᐃᓱᑦ ᒐ ᐅᓇᐸᒥᑦ ᐊᐅᑯᓐ ᑲ ᐃᓯᓇᒂᒡ᙮

³ ᐊᑯ ᒂ ᐸᑐᐅᒃ ᐊᐛᓐ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᔪᐤ ᐊ ᑎᑯᓂᔨᒡ ᐊ ᐅᒋ ᐃᔨᒥᑦ, ᒋ ᒋᔄᐛᐤ᙮ ᒪᐅ ᑲ ᐃᔅᒋᔄᑦ, “ᐊᓐᑕ ᐊᐛᔪᐛ ᐊ ᑕᔨᒋ ᐊᑯᑕ ᒐ ᑕᑦ ᐊᐅᒄ ᒋᓴᒪᓂᑐᐤ ᒋᑭ ᐎᒋᒪᐤ᙮ ᐊᐅᑯᓂ ᐊᓂᔭᔪᐛ ᐃᔪᐛ ᒐ ᐅᑦ ᐃᔨᒥᑦ᙮ ᐎᔾ ᒋᑭ ᑕᐤ ᒪᒂᒡ ᐊ ᑕᔨᒋ ᐊᓂᔭᔪᐛ ᐛᒋᓴᒪᓂᑐᒥᑐᑕᑯᑦ᙮

⁴ ᒋᑭ ᑲᓯᔭᐸᐛᐤ ᒪᒃ ᑕᑥᐤ ᐊ ᐅᒋᐧᑯᐛᐱᔨᒋ᙮ ᓇᒪ ᐊᑯ ᒋᑭ ᐅᒋ ᑎᑯᓂᔪᐤ ᓂᐳᐅᓂᔪᐤ ᒪᒃ ᒥᓯᒪᔨᑎᒧᐅᓂᔪᐤ᙮ ᓇᒪ ᑭᔭ ᐊᑯ ᒋᑭ ᐅᒋ ᑎᑯᓂᔪᐤ ᒪᐅᓂᔪᐤ ᒪᒃ ᐊ ᐎᓯᒐᔨᑕᑭᓄᐎᒡ᙮ ᐛᔅ ᒥᓯᐛ ᐊᓐ ᐛᔅᑭᒡ ᑲ ᐃᔅᐱᔨᒡ ᒐᒂᓐ ᓇᒪ ᓴᔅ ᑎᑯᓐ᙮”

⁵ ᐊᑯ ᐊᓐ ᑲ ᐊᐱᑦ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᒂ ᐃᔅᒋᔄᑦ, “ᒥᓯᐛ ᒐᒂᓐ ᓄᐅᔅᒋᑕᓐ᙮” ᐊᑯ ᒂ ᐃᓯᑦ, “ᒥᓯᓇᑕᐊ ᐅ᙮ ᐛᔅ ᒋᑭ ᒋ ᑕᑈᑕᑭᓄᐤ ᑭᔭ ᑕᑈᒥᑭᓐ ᐅ ᐊ ᐃᔅᒋᔄᔭᓐ᙮”

⁶ ᐊᑯ ᒪᒃ ᒂ ᐃᔅᒋᔄᑦ, “ᓴᔅ ᒥᓯᐛ ᒐᒂᓐ ᓄᐅᔅᒋᑕᓐ᙮ ᐊᐅᒄ ᓂᔾ ᓴᔅ ᑲ ᑕᔭᓐ ᐊᔅᒄ ᐊᑲ ᓇᔅᒡ ᒐᒂᓐ ᐅᒋ ᑎᒂᒡ, ᑭᔭ ᐊᐅᒄ ᓂᔾ ᐊᔅᒄ ᒐ ᑕᔭᓐ ᐃᔅᐱ ᒥᓯᐛ ᒐᒂᓐ ᒋᑎᐱᔨᒐ᙮ ᐊᐅᒄ ᓂᔾ ᒥᓯᐛ ᒐᒂᔪᐤ ᑲ ᒋᒋᐱᔨᑕᑦ ᑭᔭ ᐊᐅᒄ ᓂᔾ ᒐ ᒋᔅᑕᔭᓐ ᒥᓯᐛ ᒐᒂᓐ᙮ ᐊᓐ ᐊᐛᓐ ᒐ ᓄᑕᔭᐸᒂᑦ ᓴᒐᔾ ᓂᑭ ᒥᓇᐊᐤ ᐊᓂᔭ ᓂᐱᔪᐤ ᐊᓐᑕ ᐊᓂᔭ ᐛᒋ ᒥᔭᑭᓄᐅᑦ ᐊᐛᓐ ᑲᒋᒡ ᐱᒪᑎᓯᐅᓂᔪᐤ ᑲ ᐅᒋ ᒧᔅᒋᒍᐅᓂᔨᒡ᙮

⁷ ᐊᐅᒄ ᐅᔭ ᒐ ᐃᓯ ᐊᓂᔅᒐ ᒥᔨᒃ ᐊᓐ ᐊᐛᓐ ᒐ ᓴᐧᑯᒋᑕᒂ ᑕᓐ ᒐ ᐃᓯ ᑯᒂᒋᐃᑯᑦ ᒥᒋ ᒐᒂᔪᐤ᙮ ᑭᔭ ᓂᔾ ᓂᑭ ᐅᒋᓴᒪᓂᑐᒥᑐᑕᒄ ᑭᔭ ᐎᔾ ᒐ ᐅᑦ ᐊᐛᓯᒥᑐᑐᐅᒃ᙮

⁸ ᐊᑯ ᐊᓐᒡ ᐊᐛᓐᒋ ᐊᑲ ᓱᒋᔅᑕᐊᒡ ᒐᒋ ᐎᑕᒡ ᐊ ᑕᑈᔭᔨᒪᒡ ᒋᓴᓴ, ᐊᓐᒡ ᑲ ᒋᐛᑲᐳᔅᑕᒡ ᑕᓐ ᑲ ᐃᓯ ᑕᑈᔭᔨᒪᒡ ᒋᓴᓴ, ᐊᓐᒡ ᓇᔅᒡ ᑲ ᒥᒐᑎᓯᒡ, ᐊᓐᒡ ᑲ ᓂᐸᐊᒡ ᐊᐛᔪᐛ, ᐊᓐᒡ ᓂᓇᐧᑯᐤ ᑲ ᐃᓯ ᐎᓂᓱᐤ ᐱᒪᑎᓯᒡ, ᐊᓐᒡ ᑲ ᒥᑕᐛᑎᓯᒡ, ᐊᓐᒡ ᑲ ᐊᔭᒥᐊᔅᑐᐛᒡ ᒥᓂᑐᐧᑲᓇ ᑭᔭ ᐊᓐᒡ ᑲ ᐎᒋ ᑭᑭᒋᔭᒡ, ᒥᒋ ᐃᔅᑯᑕᐤ ᓴᑲᐃᑭᓂᒡ ᒋᑭ ᐃᓯ ᐛᐱᓇᑭᓄᐎᒡ᙮ ᐊᐅᒄ ᐅ ᓂᓱ ᓂᐳᐅᓐ᙮”

ᑲ ᐅᔅᑲᒡ ᒋᕈᓯᓕᒻ

⁹ ᐊᑯ ᐸᐃᒄ ᐊᓐᒡ ᓂᔄᐅᑕᒡ ᑲ ᐃᑕᑎᓯᒡ ᐊᓐᒋᓐᒡ ᑲ ᑕᐧᑯᓇᐧᒃ ᐸᐃᒄ ᐊᓂᔭᔪᐛ ᑲ ᒧᑕᔭᔨᒋ ᐎᔭᑭᓇ ᐊᓐᑕ ᑲ ᓴᑭᔅᒋᓇᔨᒡ ᑕᓐ ᒐ ᐃᓯ ᓂᓇᐧᑲᑕᔨᒧᐊᑭᓄᐃᑯᐱᓇ ᐊᐛᔪᐛ ᒂ ᐸᒋ ᓇᓯᑦ᙮ ᐊᑯ ᒂ ᐃᓯᑦ, “ᐊᔅᑎᒻ ᒪ᙮ ᒋᑭ ᐛᐸᑎᔨᑎᓐ ᐊᓐ ᐅᔅᒋᓂᒋᔎᐤ, ᐊᓂᔭᔪᐛ ᒐ ᐎᒋᒪᑦ ᐊᓐ ᒪᔭᑕᓂᔅ᙮”

Revelation 21.10,22-22.5 (Easter-6 Year C)

¹⁰ ᐊᑯ ᑲ ᐸᔭᒋᓯᑦ ᐊᒐᐧᒄ ᒂ ᐸᒋ ᐱᒋᔅᑯᐅᑦ᙮ ᐊᑯ ᐊᓐ ᐊᓐᒋᓐ ᐊᓐᑕ ᓇᔅᒡ ᐊ ᐃᔅᐸᓇᔨᒡ ᐱᔅᑯᑎᓇᔪᐤ ᒂ ᐸᒋ ᐃᑐᑕᐃᑦ᙮ ᓂᒋ ᐛᐸᑎᔨᒄ ᒪᒃ ᐊᓂᔭ ᑲ ᐸᔭᒋᓯᒥᑭᓂᔨᒡ ᐅᑕᓇᔪᐤ ᒋᕈᓯᓕᒻ ᐊ ᐃᓯᓂᐧᑲᑕᔨᒡ ᒋᒋᒋᓯᑯᒡ ᐊ ᐅᒋ ᔭᓯᒪᑭᓂᔨᒡ ᒋᓴᒪᓂᑐᐛ ᐊ ᑕᔨᒋ ᐅᒡ᙮

¹¹ ᐊ ᐃᓯ ᒋᐧᑲᔭᔅᑐᐛᔨᒡ ᐊᓐᑕ ᐊ ᑕᑦ ᒋᓴᒪᓂᑐᐤ, ᐊᑯᑕ ᐛᒋ ᒋᐧᑲᔭᔅᑕᒡ ᐊᓐ ᐅᑕᓇᐤ᙮ ᓇᔅᒡ ᑲ ᒥᔪᓯᓯᑦ ᐊᓯᓂᔾ ᐊ ᐃᑕᔅᑐᐛᑦ, ᐊᐅᑯᓐ ᑲ ᐃᑕᔅᑐᐛᒡ, ᒧᔭᒻ ᐊᓐ ᐊᓯᓂᔾ ᒐᔅᐸᕐ ᑲ ᐃᓯᓂᐧᑲᓱᑦ ᑲ ᐎᔄᐛᔅᑐᐛᑦ, ᐊᐅᑯᓐ ᑲ ᐃᑕᔅᑐᐛᒡ ᐊᓐ ᐅᑕᓇᐤ᙮ ᒋ ᓴᐳᓄᑯᓐ ᒪᒃ ᒧᔭᒻ ᐊᓐ ᓯᐳᐛᐱᔅᒄ ᐊᓯᓂᔾ ᑲ ᐃᓯᓇᑯᓯᑦ, ᐊᐅᑯᓐ ᑲ ᐃᓯᓇᒂᒡ᙮

¹² ᓇᔅᒡ ᒋ ᐃᔅᐸᓇᐤ ᐊᓐ ᑲ ᐛᔅᑲᑲᐳᐅᒡ ᐛᔅᑲ ᐊᓐ ᐅᑕᓇᐤ᙮ ᒋ ᓂᓱᓴᐳᓇ ᒋᐱᔎᐛ ᐊᓐᑕ ᐛᒋ ᐱᒐᓄᐅᒡ ᑭᔭ ᒋ ᓂᓱᓴᐳᒡ ᐊᓐᒋᓐᒡ ᐊ ᑭᓄᔅᑯᐛᑐᐛᒡ᙮ ᒥᓯᐛ ᒪᒃ ᐊᓐᑕ ᐊᓂᔭᔪᐛ ᐊ ᓂᓱᓴᐳᐛᒋ ᒋᐱᔎᐛ, ᒋ ᒥᓯᓇᑕᔪᐛ ᐅᑦ ᐃᓯᓂᐧᑲᓱᐅᓄᐛᐛ ᐊᓐᒡ ᑲ ᓂᓱᓴᑉ ᐱᑐᐤ ᐊ ᐃᑎᔅᑲᓇᓯᒡ ᐃᔅᕋᐃᓪ ᐃᔪᒡ᙮

¹³ ᐊᓐᑕ ᒪᒃ ᓇᐎᒡ ᐊ ᐃᓯ ᐱᒥᑎᔅᑕᒡ ᐊᓐ ᐅᑕᓇᐤ, ᒋ ᓇᓂᔅᑎᓇ ᐊᓂᔭᔪᐛ ᒋᐱᔎᐛ᙮ ᐊᓐᑕ ᐃᔅ ᐛᐱᓄᑕᒡ ᒋ ᓂᔅᑎᓇ᙮ ᑭᔭ ᐊᓐᑕ ᒋᐛᑎᓄᒡ ᒋ ᓂᔅᑎᓇ᙮ ᒥᓐ ᐊᓐᑕ ᓴᐅᓄᑕᒡ ᑭᔭ ᐊᓐᑕ ᐊᑎᒪᐱᓯᒧᑕᒡ ᒋ ᓂᔅᑎᓇ᙮

¹⁴ ᒋ ᓂᓱᓴᐳᐅᒡ ᐊ ᒪᒥᒐᐱᔅᒋᓯᒡ ᐊᓯᓂᔨᒡ ᐊᓐᑕ ᑲ ᑕᒋᑲᐳᐅᒡ ᐊᓐ ᒥᓯᐛ ᑲ ᐃᓯ ᐛᔅᑲᑲᐳᐅᒡ ᐊᓐᑕ ᐅᑕᓇᒡ᙮ ᐅᒡ ᒪᒃ ᐊᓯᓂᔨᒡ, ᐊᑯᑕ ᑲ ᒥᓯᓇᑕᔨᒋ ᐅᑦ ᐃᓯᓂᐧᑲᓱᐅᓄᐛᐛ ᐊᓐᒡ ᑲ ᓂᓱᓴᐳᒡ ᐊᑈᔅᑕᓇᒡ ᐊᓂᔭᔪᐛ ᒪᔭᑕᓂᔅ ᑲ ᐅᑎᓇᑦ᙮

¹⁵ ᐊᑯ ᐊᓐ ᐊᓐᒋᓐ ᑲ ᐸᒋ ᐃᔨᒥᐃᑦ, ᒋ ᑕᐧᑯᓂᒻ ᑎᐸᔎᐃᑭᓇᑎᑯᔪᐤ ᐊ ᐎᔄᐅᓱᓇᔭᐱᔅᑯᔨᒡ᙮ ᒋᐸ ᑎᐸᐊᒻ ᐊᓂᔭ ᐅᑕᓇᔪᐤ ᑭᔭ ᐊᓂᔭᔪᐛ ᒋᐱᔎᐛ ᑭᔭ ᐊᓂᔭ ᑲ ᐛᔅᑲᑲᐳᐎᒡ ᐛᔅᑲ ᐊᓂᔭ ᐅᑕᓇᔪᐤ᙮

¹⁶ ᓇᐎᒡ ᒪᒃ ᑕᐱᑐᐤ ᒋ ᐃᓯ ᑭᒋᒐᔭᐤ ᐊᓐ ᐅᑕᓇᐤ᙮ ᐸᐃᑯᓄᒡ ᒋ ᐃᔎᔭᐤ ᐊᔅᐱᔅ ᐃᔨᑭᔅᑲᒡ ᑭᔭ ᐊᔅᐱᔅ ᐃᔅᐸᓇᒡ᙮ ᐊᑯ ᐊᓐ ᐊᓐᒋᓐ ᑲ ᑎᐸᐊᒃ ᐊᓂᔭ ᐅᑕᓇᔪᐤ ᐊᓂᔭ ᐅᑎᐸᔎᐃᑭᓇᑎᒄ ᐊ ᐊᐱᒋᑕᑦ, ᐸᐃᒂᐤ ᒐᓯᐱᔪᐤ ᐊᓱ ᐱᑕᑕᑐᐤ ᒥᑕᓯᒥᑎᓄᐤ ᐊᔅᐱᓴᒡ ᒋ ᐃᔎᔪᐤ ᑭᔭ ᐊᐅᑯᓐ ᒧᔭᒻ ᑲ ᐃᔅᐱᔅ ᐊᔨᔅᑭᔅᑲᔨᒡ ᑭᔭ ᐊᐅᑯᓐ ᑲ ᐃᔅᐱᔅ ᐃᔅᐸᓇᔨᒡ᙮

¹⁷ ᐊᑯ ᒥᓐ ᐊᓂᔭ ᑲ ᐛᔅᑲᑲᐳᐎᒡ ᒥᓯᐛ ᐛᔅᑲ ᐊᓂᔭ ᐅᑕᓇᔪᐤ ᑲ ᑎᐸᐊᒃ᙮ ᓂᓱ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᓴᑉ ᒥᓯᑦ, ᐊᐅᑯᓐ ᑲ ᐃᓯ ᐃᔅᐸᓇᔨᒡ᙮ ᐊᓂᔭᔪᐛ ᒪᒃ ᑕᓐ ᐊ ᐃᓯ ᑎᐸᐊᒥᔨᒋ ᓇᐸᐛ ᒐᒂᔪᐤ, ᐊᐅᑯᓐ ᐊᓂᔭ ᑲ ᐃᓯ ᑎᐸᐊᒃ ᐊᓐ ᐊᓐᒋᓐ᙮

¹⁸ ᐊᓐ ᒪᒃ ᑲ ᐛᔅᑲᑲᐳᐅᒡ ᒥᓯᐛ ᐛᔅᑲ ᐊᓐ ᐅᑕᓇᐤ, ᐊᓯᓂᔾ ᒐᔅᐸᕐ ᑲ ᐃᓯᓂᐧᑲᓱᑦ ᒋ ᐅᒋ ᐅᓯᑕᑭᓄᐤ᙮ ᐊᑯ ᐊᓐ ᐅᑕᓇᐤ ᒪᐅᒡ ᐊ ᐸᔭᒋᓯᔨᑦ ᑭᔭ ᒪᐅᒡ ᐊ ᒥᔪᓯᑦ ᐎᔄᐅᓱᓇᔭᐱᔅᒄ ᒋ ᐅᒋ ᐅᓯᑕᑭᓄᐤ᙮

¹⁹ ᐊᓐᒡ ᒪᒃ ᑲ ᒪᒥᒐᐱᔅᒋᓯᒡ ᐊᓯᓂᔨᒡ ᐊᓐᑕ ᑲ ᑕᒋᑲᐳᐅᒡ ᐊᓐ ᒥᓯᐛ ᑲ ᐃᓯ ᐛᔅᑲᑲᐳᐅᒡ ᐊᓐᑕ ᐅᑕᓇᒡ᙮ ᒥᓯᐛ ᒋ ᒥᔪᓇᑯᐊᑭᓄᐎᒡ ᓂᓇᐧᑯᐤ ᐊ ᐃᓯᓇᑯᓯᒡ ᐊ ᒥᔪᓯᒡ ᐊᓯᓂᔨᒡ ᐊ ᐊᐱᑎᓯᒡ᙮ ᐊᓐ ᓂᔅᑎᒻ ᐊᓯᓂᔾ ᑲ ᐊᐱᑎᓯᑦ, ᐊᐅᑯᓐ ᒐᔅᐸᕐ ᑲ ᐃᓯᓂᐧᑲᑕᑭᓄᐅᑦ᙮ ᒥᓐ ᐊᓐ ᓂᓱ ᐊ ᑕᑦ ᐊᓯᓂᔾ ᑲ ᐊᐱᑎᓯᑦ, ᐊᐅᒄ ᓴᐸᐃᕐ ᑲ ᐃᓯᓂᐧᑲᑕᑭᓄᐅᑦ (ᐱᔅᑭᓇᐱᔅᑲᐤ)᙮ ᐊᑯ ᐊᓐ ᓂᔅᑐ ᐊ ᑕᑦ ᐊᓯᓂᔾ ᑲ ᐊᐱᒋᐊᑭᓄᐅᑦ, ᐊᐅᒄ ᐊᑲᑦ ᑲ ᐃᓯᓂᐧᑲᑕᑭᓄᐅᑦ᙮ ᒥᓐ ᐊᓐ ᐛᒋ ᑕᑦ, ᐊᐅᒄ ᐊᒥᕋᓪᑦ ᑲ ᐃᓯᓂᐧᑲᑕᑭᓄᐅᑦ᙮

²⁰ ᐊᑯ ᐊᓐ ᐱᑕᑕᒡ ᐊ ᑕᑦ ᐊᓯᓂᔾ ᐊ ᐊᐱᒋᐊᑭᓄᐅᑦ, ᐊᐅᒄ ᐅᓂᑭᔅ ᑲ ᐃᓯᓂᐧᑲᑕᑭᓄᐅᑦ᙮ ᐊᓐ ᐊᓱᑕᒡ ᑲ ᑕᑦ, ᐊᐅᒄ ᑲᕐᓂᓕᔭᓐ ᑲ ᐃᓯᓂᐧᑲᑕᑭᓄᐅᑦ᙮ ᐊᑯ ᐊᓐ ᓂᔄᐅᑕᒡ ᐊ ᑕᑦ, ᐊᐅᒄ ᑲ ᐅᓯᐊᐅᓯᑦ ᑯᐛᕐᑎᔅ ᑲ ᐃᓯᓂᐧᑲᓱᑦ᙮ ᒥᓐ ᐊᓐ ᐛᒋ ᑕᑦ, ᐊᐅᒄ ᐸᕆᓪ ᑲ ᐃᓯᓂᐧᑲᑕᑭᓄᐅᑦ᙮ ᐊᓐ ᐸᐃᑯᔅᑕᐤ ᑲ ᑕᑦ, ᑥᐸᔅ ᐃᓯᓂᐧᑲᑕᑭᓄᐤ᙮ ᐊᑯ ᒥᓐ ᐊᓐ ᐛᒋ ᑕᑦ, ᐊᐅᒄ ᑲᓪᓴᑥᓂ ᑲ ᐃᓯᓂᐧᑲᑕᑭᓄᐅᑦ᙮ ᒥᓐ ᐊᓐ ᑲ ᐊᐱᑎᓯᑦ ᐸᐃᑯᓴᑉ ᐊ ᑕᑦ, ᑐᕐᒂᐃᔅ ᐃᓯᓂᐧᑲᑕᑭᓄᐤ᙮ ᐊᑯ ᐊᓐ ᒪᔅᑕᔾ ᑲ ᐊᐱᑎᓯᑦ, ᐊᒪᑎᔅᑦ ᐃᓯᓂᐧᑲᑕᑭᓄᐤ᙮

²¹ ᐊᓂᔭ ᒪᒃ ᓂᓱᓴᑉ ᒋᐱᔎᐛ ᑲ ᒥᔪᓯᓯᑦ ᑭᔭ ᐊ ᒥᓯᑎᑦ ᐊᔅ ᑲ ᐛᐱᓯᑦ ᒋ ᐅᒋ ᐅᓯᑕᑭᓄᐛ᙮ ᐊᑯ ᐊᓂᔭᔪᐛ ᒪᔅᑭᓄᐛ ᐊᓐ ᐅᑕᓇᐤ ᓇᔅᒡ ᒋ ᐎᔄᐅᓱᓇᔭᐱᔅᑯᐛ, ᒋ ᓴᐳᓇᑯᓇ ᒧᔭᒻ ᓯᐳᐛᔅᑕᔨᑕᑭᓐ ᐊ ᐃᓯᓇᒂᒡ᙮

Revelation 21.10,22-22.5 (Easter-6 Year C)

²² ᓇᒪ ᒪᒃ ᐎ ᓂ ᐅᒋ ᐛᐸᑕᓐ ᒋᓴᐊᔭᒥᐊᐅᒋᐛᑉ ᐊᓐᑕ᙮ ᐛᔅ ᐅᑎᐸᔨᒋᒐᐤ ᒋᓴᒪᓂᑐᐤ ᒪᐅᒡ ᓯᔪᐧᑲᑎᓯᑦ ᑭᔭ ᐊᓐ ᒪᔭᑕᓂᔅ ᒧᔅ ᑕᐅᒡ ᐊᓐᑕ ᐊᓂᔭ ᐅᑕᓇᔪᐤ᙮ ᓇᒪ ᒋᑭ ᐅᒋ ᓂᑐᐛᔨᑕᑯᓐ ᒐᒋ ᑎᒂᒡ ᐊᔭᒥᐊᐅᒋᐛᑉ ᐊᓐᑕ ᒐᒋ ᒪᒥᒋᒪᑭᓄᐎᒡ᙮

²³ ᓇᒪ ᓂᑐᐛᔨᑕᑯᓱᐤ ᐱᓯᒻ ᒪᒃ ᑎᐱᔅᑲᐤ ᐱᓯᒻ ᒐᒋ ᐅᒋ ᐛᔅᑐᐛᒡ ᐊᓐ ᐅᑕᓇᐤ᙮ ᐛᔅ ᐊ ᐃᔅᐱᔅ ᒋᐧᑲᔭᔅᑐᐛᔨᒡ ᐊᓐᑕ ᐊ ᑕᑦ ᒋᓴᒪᓂᑐᐤ, ᐊᑯᑕ ᐛᒋ ᒋᐧᑲᔭᔅᑕᒡ ᐊᓐ ᐅᑕᓇᐤ᙮ ᑭᔭ ᐊᓐ ᒪᔭᑕᓂᔅ ᐊ ᑕᑦ, ᐊᑯᑕ ᐛᒋ ᒋᐧᑲᔭᔅᑕᒡ᙮

²⁴ ᒥᓯᐛ ᒪᒃ ᐊᐛᓐᒋ ᐊ ᐃᑎᔅᑲᓇᓯᒡ ᐅᑕ ᐊᔅᒋᒡ, ᐊᑯᑕ ᒐ ᐅᒋ ᐛᔅᑕᓂᒪᑯᒡ ᐊᓂᔭ ᐛᔅᑕᐅᓂᔪᐤ ᐊᓐᑕ ᐊᓂᔭ ᐅᑕᓇᒡ ᑲ ᐅᒋᐱᔨᒡ᙮ ᐊᑯᑕ ᐊ ᐃᑐᑕᒡ ᐅᒋᔅᑕᔨᑕᑯᓱᐅᓄᐛᐛ ᑭᔭ ᐅᐛᔪᑎᓯᐅᓄᐛᐛ ᒋᓴᐅᒋᒪᐅᒡ ᐅᑕ ᐊᔅᒋᒡ ᐊ ᑕᒡ᙮

²⁵ ᒧᔅ ᒪᒃ ᒋᑭ ᔪᑕᑯᑕᐛ ᐊᓂᔭᔪᐛ ᒋᐱᔎᐛ ᐊᓐᑕ ᐛᒋ ᐱᒐᓄᐅᒡ ᐊᓐᑕ ᐅᑕᓇᐤ᙮ ᓇᒪ ᓂᑕ ᒋᑭ ᐅᒋ ᒋᐸᐃᑭᓄᐛ ᐛᔅ ᓇᒪ ᓂᑕ ᒋᑭ ᐅᒋ ᑎᐱᔅᑲᐤ ᐊᓐᑕ᙮

²⁶ ᐊᑯᑕ ᒐ ᐃᑐᑕᒡ ᐅᐛᔪᑎᓯᐅᓄᐛᐛ ᑭᔭ ᐊ ᓱᓇᔭᐎᔨᒋ ᐅᒥᔨᐛᐅᓄᐛᐛ ᐊᓐᒡ ᐅᑕ ᐊᔅᒋᒡ ᐊ ᑕᒡ᙮

²⁷ ᓇᒪ ᒋᑭ ᐅᒋ ᐱᔅᑎᓂᑭᓄᐤ ᒐᒂᓐ ᐊ ᒪᔭᑎᒡ ᒐᒋ ᑎᒂᒡ ᐊᓐᑕ ᐊᓐ ᐅᑕᓇᐤ᙮ ᓇᒪ ᑭᔭ ᒋᑭ ᒋ ᐱᒐᐤ ᐊᓐ ᐊᐛᓐ ᓂᑐᐎᔾ ᑲ ᐃᑎᑦ ᒪᒃ ᑲ ᐎᒋ ᑭᑭᒋᔭᑦ᙮ ᒥᒄ ᐊᓐᒡ ᑲ ᒥᓯᓇᑕᔨᒡ ᐅᑦ ᐃᓯᓂᐧᑲᓱᐅᓄᐛᐛ ᐊᓐᑕ ᐊᓂᔭᔪᐛ ᒪᔭᑕᓂᓴ ᐅᐱᒪᑎᓯᐤ ᒥᓯᓇᐃᑭᓂᔨᒡ ᒋᑭ ᒋ ᐱᒐᐅᒡ ᐊᓂᔭ ᐅᑕᓇᔪᐤ᙮