ᒋᔅᒐᔨᑕᑯᑕᒐᐅᓐ 19 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᒥᔽᔨᑕᑭᓄᐅᒡ ᒋᒋᒋᓯᑯᒡ 1 ᒥᓐ ᒂ ᐃᓯ ᐛᐸᑎᔨᑯᐅᔭᓐ ᒐᒂᓐ᙮ ᓂᒋ ᐸᑕᓐ ᒧᔭᒻ ᓇᔅᒡ ᐊ ᒥᒐᑐᐛᑕᒡ ᐊᐛᓐᒋ ᐊᓐᑕ ᒋᒋᒋᓯᑯᒡ ᐊ ᐅᒋ ᐸᑕᑯᓯᒡ ᐊ ᐃᑎᑕᒂᒡ᙮ ᓇᔅᒡ ᒋ ᒋᔄᐛᐅᒡ ᐊ ᐃᔅᒋᔄᒡ, “ᒪᒥᒋᒪᐧᒄ ᒋᓴᒪᓂᑐᐤ᙮ ᐎᔾ ᐊᐅᒄ ᑲ ᐱᒪᒋᐃᑕᐧᒄ᙮ ᓇᔅᒡ ᑕᑈ ᒋᔅᑕᔨᑕᑯᓱᐤ ᑭᔭ ᓇᔅᒡ ᓱᒐᔨᑕᑯᓱᐤ᙮ 2 ᐛᔅ ᒥᓯᐛ ᑕᐱᑐᐤ ᐃᓯ ᑎᐸᔅᑯᓇᐤ ᐊᐛᔪᐛ ᑭᔭ ᐊᓐ ᐊ ᐃᑕᔨᑕᑯᓂᔨᒡ ᒐᒋ ᐃᓯ ᑎᐸᔅᑯᓇᑭᓄᔨᒋ, ᐊᐅᑯᓐ ᐊ ᐃᓯ ᑎᐸᔅᑯᓇᑦ᙮ ᒋ ᑎᐸᔅᑯᓇᐤ ᒪᒃ ᐊᓂᔭᔪᐛ ᑲ ᒥᔪ ᒋᔅᒐᔨᒪᑭᓄᔨᒋ ᐱᓯᒂᑎᓯᔎᐛ᙮ ᒥᒐᑦ ᐊᐛᔪᐛ ᐅᑕ ᐊᔅᒋᒡ ᒋ ᐎᔭᓯᐊᐤ ᐅ ᐃᔎᐤ ᑕᓐ ᑲ ᐃᑕᑎᓯᑦ᙮ ᒋᓴᒪᓂᑐᐤ ᒋ ᐛᐛᓯᐊᐤ ᐊᓂᔭ ᐱᓯᒂᑎᓯᔎᐛ ᐊᒋ ᓂᐸᐊᔨᒋ ᐊᓂᔭᔪᐛ ᒋᓴᒪᓂᑐᐛ ᑲ ᐊᑐᔅᑯᐛᔨᒋ᙮” 3 ᐊᑯ ᒥᓐ ᒂ ᐃᔅᒋᔄᒡ ᐊ ᒋᔄᐛᒡ, “ᒪᒥᒋᒪᐧᒄ ᒋᓴᒪᓂᑐᐤ᙮ ᐊ ᐊᒂᐸᑕᒡ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᑲ ᐃᔎᑕᒡ, ᑲᒋᒡ ᒋᑭ ᐃᑕᐸᑕᐱᔪᐤ ᐃᔅᐱᒥᒡ᙮” 4 ᐊᓐᒡ ᒪᒃ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᒡ ᒋᓴᐃᔪᒡ ᑭᔭ ᐊᓐᒡ ᑲ ᓇᐅᒡ ᑲ ᐱᒪᑎᓯᒡ ᐊᐛᓐᒋ ᒋ ᐅᒋᒋᐧᑯᓂᐱᔨᔅᑐᐛᐅᒡ ᑭᔭ ᒋ ᐊᑎ ᐊᔭᒥᐊᔅᑐᐛᐅᒡ ᒋᓴᒪᓂᑐᐛ, ᐊᓂᔭ ᑲ ᐊᐱᔨᒋ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ᙮ ᒋ ᐃᔅᒋᔄᐅᒡ, “ᒪᒥᒋᒪᑕᐤ ᒋᓴᒪᓂᑐᐤ᙮ ᐊᒥᓐ᙮” ᐊᓐ ᒪᔭᑕᓂᔅ ᐅᓂᐳᐤ ᒥᑯᓴᐅᓐ 5 ᐊᑯ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᒂ ᐅᒋ ᐸᑕᑯᓯᑦ ᐊᐛᓐ ᐊ ᐃᔅᒋᔄᑦ, “ᒪᒥᒋᒪᑕᐤ ᒋᒋᓴᒪᓂᑐᒥᓄᐤ, ᒥᓯᐛ ᒋᔨᐛᐤ ᑲ ᐊᑐᔅᑯᐛᒄ, ᒋᔨᐛᐤ ᑲ ᓇᓂᒋᔅᑐᐛᒄ, ᒥᓯᐛ ᑲ ᒋᔅᑕᔨᑕᑯᓯᔭᒄ ᑭᔭ ᒋᔨᐛᐤ ᐊᑲ ᒋᔅᑕᔨᑕᑯᓯᔭᒄ᙮” 6 ᐊᑯ ᒂ ᐸᑐᐅᒂᐤ ᐊ ᒥᒐᑐᐛᑕᒡ ᐊᐛᓐᒋ ᒧᔭᒻ ᓂᐱᔾ ᐊ ᒋᔄᐛᔭᒍᐅᒡ ᑭᔭ ᒧᔭᒻ ᓂᒥᔅᒍᐅᒡ ᐊ ᐸᑕᑯᓯᒡ ᐊ ᐃᑎᑕᑯᓯᒡ᙮ ᒋ ᐃᔅᒋᔄᐅᒡ, “ᐊᓕᓗᔭ, ᐅᑎᐸᔨᒋᒐᐤ ᒋᓴᒪᓂᑐᐤ ᒪᐅᒡ ᑲ ᓱᐧᑲᑎᓯᑦ ᐎᔾ ᑕᐸᔨᒋᒐᐤ᙮ 7 ᒧᒋᒐᔨᑕᑕᐤ ᒪᒃ ᑭᔭ ᓯᒋᔭᓯᑕᐤ᙮ ᒪᒥᒋᒪᑕᐤ ᐊᓂᔭ ᐊᔅᐱᔅ ᒋᔅᑕᔨᑕᑯᓯᑦ᙮ ᐛᔅ ᓴᔅ ᐅᑎᒋᐱᔪᐤ ᒐ ᓂᐳᐅᑦ ᐊᓐ ᒪᔭᑕᓂᔅ᙮ ᓴᔅ ᒋ ᐃᓯ ᐊᔭᔅᑯᐎᐧᑲᑎᓱᐤ ᐊᓐ ᐅᔅᒋᓂᒋᔎᐤ᙮ 8 ᒋ ᒥᔭᑭᓄᐤ ᐊᓐ ᐅᔅᒋᓂᒋᔎᐤ ᐱᒍᐎᔭᓂᓯᔪᐤ ᑲ ᓱᓯᐛᑭᓯᔨᒡ ᓇᔅᒡ ᑲ ᒥᔽᑭᓯᔨᒡ ᒐᒋ ᒋᔅᑲᐧᒃ᙮ ᓇᔅᒡ ᒪᒃ ᒋ ᐛᓴᔅᑯᔅᑕᔪᐛ ᐅᑦ ᐊᐱᒋᑕᐅᓇ ᑭᔭ ᓇᔅᒡ ᒋ ᐸᔭᐧᑭᓂᔪᐛ᙮” ᐅ ᒪᒃ ᐊᐱᒋᑕᐅᓐ ᐊᔅᐱᔅ ᒥᔽᑭᓯᒡ, ᐊᐅᑯᓐ ᐊ ᐃᓯᓇᑯᓂᔨᒋ ᐅᑯᐃᔅᒄ ᐃᑐᓄᐛᐛ ᐊᓐᒡ ᑲ ᑕᑈᑕᒡ᙮ 9 ᐊᑯ ᒂ ᐸᒋ ᐃᓯᑦ ᐊᓐᒋᓐ, “ᒥᓯᓇᐊ ᐅ, ᓱᐛᔨᑕᑯᓱᐅᒡ ᐊᓐᒡ ᑲ ᐎᓴᒪᑭᓄᐎᒡ ᐊ ᒥᑯᓴᓄᐎᒡ ᐊᓂᔭ ᒪᔭᑕᓂᓴ ᐅᓂᐳᐤ ᒥᑯᓴᐅᓂᔪᐤ᙮” ᐊᑯ ᒥᓐ ᒂ ᐊᑎ ᐃᔅᒋᔄᑦ ᐊᓐ ᐊᓐᒋᓐ, “ᐊᐅᒄ ᐅᔭ ᑲ ᐃᔅᒋᔄᑦ ᒋᓴᒪᓂᑐᐤ, ᑕᑈᒥᑭᓂᔪᐤ ᒪᒃ᙮” 10 ᓂᒋ ᐅᒋᒋᐧᑯᓂᐱᔪᐅᓐ ᒪᒃ ᒐᒋ ᐊᔭᒥᐊᔅᑐᐅᒃ ᐅ ᐊᓐᒋᓐ᙮ ᒥᒄ ᒪᒃ ᓂᒋ ᐃᑎᒄ, “ᐊᑲᐎᔾ ᐊᓐ ᐃᑎᔾ᙮ ᐛᔅ ᑭᔭ ᓂᔾ ᓂᑦ ᐊᑐᔅᑯᐛᐤ ᒋᓴᒪᓂᑐᐤ ᒧᔭᒻ ᒋᔾ ᑭᔭ ᒋᐧᑲᓂᓯᒡ ᐊ ᐃᑎᔭᒄ, ᒥᓯᐛ ᐊᓐᒡ ᑯᐃᔅᒄ ᑲ ᐃᓯ ᐛᐎᑕᒡ ᐊᓂᔭ ᑕᑈᐅᓂᔪᐤ ᒋᓴᓴ ᑲ ᐛᐸᑎᔨᐛᔨᒋ᙮ ᒋᓴᒪᓂᑐᐤ ᐊᐅᒄ ᐊᔭᒥᐊᔅᑐᐤ᙮” ᐛᔅ ᐊᓂᔭ ᑕᑈᐅᓂᔪᐤ ᒋᓴᔅ ᑲ ᐸᒋ ᐛᐸᑎᔨᐛᑦ, ᐊᐅᒄ ᐊᓂᔭ ᑲ ᓱᒐᔨᑕᑯᐃᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑕᓐ ᑲ ᐃᓯ ᐃᔨᒥᒡ᙮ ᐊᓐ ᐊᐛᓐ ᑲ ᑕᑎᐱᑦ ᑲ ᐛᐱᓯᔨᒋ ᑲᐸᐃᑭᔎᐛ 11 ᐊᑯ ᒂ ᐛᐸᑎᒪᓐ ᒋᒋᒋᓯᒄ ᐊ ᔪᑕᐱᔨᒡ᙮ ᒋ ᐅᒋ ᓄᑯᓱᐤ ᒪᒃ ᑲᐸᐃᑭᔎᐤ ᐊ ᐛᐱᓯᑦ᙮ ᐊᓐ ᒪᒃ ᑲ ᑕᑎᐱᑦ ᐊᓂᔭᔪᐛ ᑲᐸᐃᑭᔎᐛ ᑲ ᑕᑈᐅᒐᔨᑕᑯᓯᑦ ᑭᔭ ᑲ ᑕᑈᑦ ᒋ ᐃᓯᓂᐧᑲᑕᑭᓄᐤ᙮ ᑯᐃᔅᑯᑕᑎᓯᐅᓂᒡ ᐃᓯ ᑎᐸᔅᑯᓂᒐᐤ ᑭᔭ ᑯᐃᔅᑯᑕᑎᓯᐅᓂᔪᐤ ᒪᓯᒐᔅᑎᒻ᙮ 12 ᐅᔅᒋᓯᒂ ᒧᔭᒻ ᐃᔅᑯᑕᔪᐤ ᐊ ᒋᐧᑲᔭᔅᑐᐛᔨᒡ ᐊ ᐎᐧᑯᔭᐱᔨᒋ ᐃᓯᓇᑯᓂᔪᐛ᙮ ᒥᒐᓂᔪᐛ ᒋᓴᐅᒋᒪᐅᑯᓂᔎᐅᓇ ᐊ ᒋᔅᑲᐧᒃ᙮ ᒥᓯᓇᑕᔪᐤ ᐃᓯᓂᐧᑲᓱᐅᓂᔪᐤ ᐊᓐᑕ ᐊ ᑕᑦ ᐊᑲ ᐊᐛᔪᐛ ᒋᔅᒐᔨᑎᒥᔨᒋ᙮ ᒥᒄ ᐎᔾ ᒋᔅᒐᔨᑎᒻ ᐊᓂᔭ ᐃᓯᓂᐧᑲᓱᐅᓂᔪᐤ᙮ 13 ᐊᑯᐱᔪᐤ ᒋᔅᑭᒻ ᒥᐧᑯᒡ ᐊᒋ ᒋᑕᓂᑭᓄᐃᑯᐱᓇ᙮ “ᒋᓴᒪᓂᑐᐤ ᐅᑦ ᐃᔨᒧᐅᓐ” ᐊᐅᑯᓐ ᐊ ᐃᓯᓂᐧᑲᑕᑭᓄᐅᑦ᙮ 14 ᓂᑐᐱᔪᐅ-ᐃᔪᐛ ᒪᒃ ᒋᒋᒋᓯᑯᒡ ᐊ ᑕᔨᒋ ᒋ ᐅᒋ ᓇᓴᐅᑯᐤ ᑲ ᐛᐱᓯᔨᒋ ᑲᐸᐃᑭᔎᐛ ᐊ ᐊᐱᒋᐊᔨᒋ᙮ ᓇᔅᒡ ᑲ ᒥᔽᑭᓂᔨᒡ ᑲ ᓱᓯᐛᑭᓯᔨᒡ ᐱᒍᐎᔭᓂᓯᔪᐤ ᐊ ᐛᐸᑭᓯᔨᒡ, ᐊᐅᑯᓐ ᐊ ᐃᓯᓇᑯᓂᔨᒋ ᐅᑦ ᐊᐱᒋᑕᐅᓄᐛᐛ ᐅᒡ ᓂᑐᐱᔪᐅ-ᐃᔪᒡ᙮ ᓇᔅᒡ ᐸᔭᐧᑭᓂᔪᐛ ᐊᓂᔭᔪᐛ ᐅᑦ ᐊᐱᒋᑕᐅᓄᐛᐛ᙮ 15 ᐊ ᑲᓴᔨᒡ ᓂᑐᐱᔪᐅ-ᒧᐧᑯᒪᓂᔪᐤ ᐅᒋᐱᔪᐤ ᐅᑐᓂᒡ ᐊᓐ ᑲ ᑕᑎᐱᑦ ᑲᐸᐃᑭᔎᐛ᙮ ᐊᐅᒄ ᐅᔭ ᒐ ᐊᐱᒋᑕᑦ ᒐᒋ ᓴᒂᐊᑦ ᐊ ᐃᑎᔅᑲᓇᓯᔨᒋ ᐊᐛᔪᐛ᙮ ᓇᒪ ᒪᒃ ᒋᑭ ᐅᒋ ᒪᒥᓇᑎᓯᐤ ᐅᒋᒪᐅᒐ᙮ ᒋᑭ ᐛᐸᑎᔨᐛᐤ ᒋᓴᒪᓂᑐᐛ ᒪᐅᒡ ᓯᔪᐧᑲᑎᓯᔨᒋ ᐊ ᐃᓯ ᐊᒂᑕᔨᑕᑯᓂᔨᒡ ᐅᑦ ᐊᐧᑯᔪᐛᓱᐅᓂᔪᐤ᙮ ᒧᔭᒻ ᐊᓐᑕ ᒥᓂᓴ ᑲ ᒪᒥᒋᒥᓂᑲᓄᔨᒋ ᑲᒋ ᑎᒂᐃᑭᓄᔨᒋ ᓱᒥᓇᐳᔾ ᐊ ᐅᓯᑕᑭᓄᐅᒡ, ᐊᐅᑯᓐ ᒐ ᐃᑕᔨᑕᑯᓂᔨᒡ ᐃᔅᐱ ᐛᐛᓯᐊᒐ ᐊᐛᔪᐛ᙮ 16 ᐅᑦ ᐊᑯᐱᒡ ᑭᔭ ᐅᑈᒥᒡ ᒥᓯᓇᑕᔪᐤ ᐃᓯᓂᐧᑲᓱᐅᓂᔪᐤ᙮ ᐃᑎᔅᑕᔪᐤ, “ᒋᒋᐛ ᐊ ᒋᔅᑕᔨᑕᑯᓯᑦ ᐊ ᑕᑎᓯᔨᒋ ᒥᓯᐛ ᐅᑎᐸᔨᒋᒐᐛ ᑭᔭ ᐎᔾ ᓇᔅᒡ ᓱᒐᔨᑕᑯᓱᐤ ᐊ ᑕᑎᓯᔨᒋ ᒥᓯᐛ ᒋᓴᐅᒋᒪᐛ᙮” 17 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᐊ ᓂᐳᐅᑦ ᐊᓐᑕ ᐊ ᒋᐧᑲᓱᐛᔨᒋ ᐱᓯᒺ᙮ ᒥᓯᐛ ᐱᔭᓱᐛ ᑲ ᐃᔅᐸᐅᔨᒋ ᒋᓯᑯᒡ ᐊ ᐱᐸᒥᔭᔨᒋ ᒋ ᑕᑈᑕᐤ᙮ ᒋ ᒋᔄᐛᐤ ᐊᓂᔭ ᐊ ᑕᑈᑕᑦ᙮ ᒋ ᐃᑕᐤ, “ᐊᔅᑎᒧᒄ ᒥᓯᐛ᙮ ᐸᒋ ᒪᒧᔨᒄ, ᒐ ᐸᒋ ᒥᑯᓴᔭᒄ ᑕᓐ ᑲ ᐃᓯ ᒥᔪ ᐊᔭᔅᑯᔅᑎᒪᑕᒄ ᒋᓴᒪᓂᑐᐤ᙮ 18 ᐊᔅᑎᒧᒄ ᒐ ᒥᒍᐛᒄ ᒋᓴᐅᒋᒪᐅᒡ ᑭᔭ ᓂᑐᐱᔪᐅ-ᐅᒋᒪᐅᒡ ᐎᔭᓱᐛᐛ᙮ ᐸᒋ ᒥᒍᐛᒄ ᐎᔪᐛᐛ ᐊᓯᒪᑭᓂᓯᒡ, ᑲᐸᐃᑭᔎᐅᒡ ᑭᔭ ᐊᓐᒡ ᑲ ᑕᑎᐱᒡ ᐊᓂᔭᔪᐛ ᑲᐸᐃᑭᔎᐛ᙮ ᒥᓯᐛ ᐊᐛᓐᒋ ᑲ ᓂᐱᒡ ᐎᔪᐛᐛ ᐸᒋ ᒥᒍᐛᐧᒄ, ᑲ ᑯᐸᓇᐅᒡ ᒪᒃ ᐊᑲ ᑯᐸᓇᐅᒡ, ᑲ ᒋᔅᑕᔨᑕᑯᓯᒡ ᒪᒃ ᐊᑲ ᒋᔅᑕᔨᑕᑯᓯᒡ᙮” 19 ᐊᑯ ᒂ ᐛᐱᒥᒃ ᐊᓐ ᒥᒋ ᐊᐛᓯᔅ ᑭᔭ ᒥᓯᐛ ᒋᓴᐅᒋᒪᐅᒡ ᐅᑕ ᐊᔅᒋᒡ ᐊ ᒪᒧᐎᒡ ᒐᒋ ᓂᑐᐱᔨᑐᐛᒡ ᐊᓂᔭᔪᐛ ᐊᓐᑕ ᑲ ᐛᐱᓯᔨᒋ ᑲᐸᐃᑭᔎᐛ ᑲ ᑕᑎᐱᔨᒋ ᑭᔭ ᐊᓂᔭᔪᐛ ᓂᑐᐱᔪᐅ-ᐃᔨᒥᔪᐛ᙮ 20 ᐊᑯ ᒂ ᒪᑯᓇᑭᓄᐅᑦ ᐊᓐ ᒥᒋ ᐊᐛᓯᔅ ᑭᔭ ᐊᓐ ᒥᒋ ᐅᒋᔅᒋᐛᐃᒐᓱᐤ᙮ ᐊᐅᒄ ᐅ ᒥᒋ ᐅᒋᔅᒋᐛᐃᒐᓱᐤ ᑲ ᒪᒥᔅᑲᒡ ᐃᑎᑦ ᐅᑎᔅᑯᐤ ᐊᓂᔭᔪᐛ ᒥᒋ ᐊᐛᓯᓴ ᐊ ᑕᔨᒋ᙮ ᐊᑯᑕ ᑲ ᐅᒋ ᐎᔭᓯᐊᑦ ᐊᓂᔭᔪᐛ ᐊᐛᔪᐛ ᑲ ᐅᑎᓂᒥᔨᒋ ᐊᓂᔭᔪᐛ ᒥᒋ ᐊᐛᓯᓴ ᐅᒋᔅᒋᓄᐛᒋᐃᐛᐅᓂᔪᐤ ᑭᔭ ᑲ ᐊᔭᒥᐊᔅᑐᐛᔨᒋ ᐊᓂᔭ ᒥᓂᑐᐧᑲᓇ ᒧᔭᒻ ᐊᓂᔭᔪᐛ ᒥᒋ ᐊᐛᓯᓴ ᐊ ᐃᓯᓇᑯᓯᔨᒋ ᑲ ᐃᓯᐊᑭᓄᔨᒋ᙮ ᑕᐱᔅᑯᓐ ᐊᓐ ᒥᒋ ᐊᐛᓯᔅ ᑭᔭ ᐊᓐ ᒥᒋ ᐅᒋᔅᒋᐛᐃᒐᓱᐤ ᐊᐱᒪᑎᓯᒡ ᒋ ᐃᓯ ᐛᐱᓇᑭᓄᐎᒡ ᐊᓐᑕ ᒥᒋ ᐃᔅᑯᑕᐤ ᓴᑲᐃᑭᓂᒡ ᐊᓐᑕ ᐊ ᐃᔎᑕᔨᒡ ᐊ ᐎᔄᐛᐸᑕᔨᒡ ᒐᒂᔪᐤ ᓇᔅᒡ ᐊ ᐎᓂᒪᔅᑕᔨᒡ᙮ 21 ᒥᓯᐛ ᒪᒃ ᐊᓂᔭᔪᐛ ᐅᑦ ᐊᓯᒪᑭᓂᓯᒧᐛᐛ ᐊᓐ ᒥᒋ ᐊᐛᓯᔅ ᑭᔭ ᐊᓐ ᑲ ᐎᔭᓯᐃᐛᑦ ᐅᒋᔅᒋᐛᐃᒐᓱᐤ ᒋ ᓂᐸᐊᑭᓄᐅᔪᐛ ᐊᓂᔭ ᓂᑐᐱᔪᐅ-ᒧᐧᑯᒪᓂᔪᐤ ᐅᑐᓂᔨᒡ ᐊᓂᔭᔪᐛ ᑲ ᑕᑎᐱᔨᒋ ᑲᐸᐃᑭᔎᐛ ᑲ ᐅᒋᐱᔨᒡ ᐊ ᐊᐱᑎᓂᔨᒡ᙮ ᒥᓯᐛ ᒪᒃ ᐊᓐᒡ ᐱᔭᓱᐅᒡ ᒋ ᒋᔅᐳᐃᓱᐅᒡ ᐊ ᒥᒋᒡ ᐊᓂᔭᔪᐛ ᒥᔪᐛ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.