ᒋᔅᒐᔨᑕᑯᑕᒐᐅᓐ 18 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᐅᓂᑎᒡ ᐊᓐ ᐅᑕᓇᐤ ᐸᐱᓗᓐ ᐊ ᐃᓯᓂᐧᑲᑕᒡ 1 ᐃᔅᐱ ᑲᒋ ᐃᓯ ᐛᐸᑎᔨᑯᔭᓐ ᐅ ᒪᔅᑕᔾ ᑲ ᐃᓯ ᐛᐸᑎᔨᑯᔭᓐ, ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᒋᒋᒋᓯᑯᒡ ᐊ ᐅᒋ ᔭᓯᑦ᙮ ᓇᔅᒡ ᒥᔅᑎ ᒋ ᒥᔭᑭᓄᑯᐱᓇ ᑎᐸᔨᒐᐅᓂᔪᐤ ᐅ ᐊᓐᒋᓐ᙮ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᔪᐤ ᒋ ᐛᔅᑐᐛᔪᐤ ᑲ ᐃᔅᐱᔅ ᒋᐧᑲᔭᔅᑐᐛᑦ᙮ 2 ᐊᑯ ᒂ ᐃᔅᒋᔄᑦ ᐅ ᐊᓐᒋᓐ ᐊ ᒋᔄᐛᑦ, “ᓂᓱᐅᓇᒋᑕᑭᓄᐤ ! ᓂᓱᐅᓇᒋᑕᑭᓄᐤ ᐸᐱᓗᓐ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᓇᔅᒡ ᓂᓱᐅᓇᒋᑕᑭᓄᐤ᙮ ᐊᑯᑕ ᐊᑯ ᐛᒋᒡ ᒥᓯᐛ ᐊ ᐃᓯᓇᑯᓯᒡ ᒥᒋ ᐊᒐᐧᑯᒡ ᓇᔅᒡ ᐊ ᒪᔭᑎᓯᒡ ᑭᔭ ᐊ ᐎᓇᔨᑕᑯᓯᒡ᙮ ᐊᑯᑕ ᑭᔭ ᐊᑯ ᐛᒋᑦ ᒥᓯᐛ ᐊ ᐃᓯᓇᑯᓯᑦ ᑲ ᐎᓇᔨᑕᑯᓯᑦ ᑭᔭ ᐊᑲ ᒧᐛᑭᓄᐅᑦ ᐱᔭᓱᐤ᙮ 3 ᐛᔅ ᐊᓐᒡ ᐊᓐᑕ ᑲ ᐎᒋᒡ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᓇᔅᒡ ᐛᐸᒻ ᒋ ᐅᒋ ᓇᐃᐱᔨᑐᐛᐅᒡ ᒐᒋ ᓂᓱᐅᓇᒋᐃᑯᔨᒋ ᐊ ᐎᓂᓱᐤ ᐱᒪᑎᓯᔨᒋ᙮ ᒧᔭᒻ ᐊᒋ ᒥᓇᐊᒡ ᓱᒥᓇᐳᔪᐤ ᒐᒋ ᒋᔎᐸᔅᑲᑯᔨᒋ, ᐊᑯᓐ ᑲ ᐃᓯᓇᑯᓂᔨᒡ ᐊᓂᔭ ᑲ ᐃᑐᑐᐛᒡ᙮ ᒋ ᐸᒋ ᐎᒋ ᐎᓂᓱᐤ ᐱᒪᑎᓯᒥᑯᐅᒡ ᒋᓴᐅᒋᒪᐛ ᐅᑕ ᐊᔅᒋᒡ ᑲ ᑕᔨᒋ᙮ ᐊᑯ ᐊᓂᔭᔪᐛ ᐊ ᐊᑕᐛᔨᒋ ᒐᒂᔪᐤ ᑲ ᐅᒋ ᐱᒪᒋᐅᔨᒋ, ᒋ ᐅᓱᓇᔭᓂᒥᐧᑲᓱᔪᐛ ᑕᓐ ᑲ ᐃᓯ ᐊᑲ ᐅᒋ ᐳᓂᐱᔨᒡ ᐊ ᐎ ᐛᔪᑎᓯᒡ᙮ ᐎᓂᓱᐱᒪᑎᓯᐅᓂᒡ ᒋ ᐅᒋ ᐅᓱᓇᔭᓂᒥᐧᑲᓱᐅᒡ᙮” 4 ᐊᑯ ᒥᓐ ᑯᑎᒃ ᐊᐛᓐ ᒂ ᐸᑐᐅᒃ ᒋᒋᒋᓯᑯᒡ ᐊ ᐅᒋ ᐃᔨᒥᑦ ᐊ ᐃᔅᒋᔄᑦ, “ᒋᔨᐛᐤ ᓂᑦ ᐃᔨᒥᑎᒄ ᐊᓐᑕ ᐊ ᑕᔭᒄ, ᐎᐎᒄ ᐊᓐ ᐅᑕᓇᐤ ᐊᑲ ᑭᔭ ᒋᔨᐛᐤ ᒐ ᒥᒋᑐᑎᒪᒄ ᒧᔭᒻ ᑕᓐ ᐊ ᐃᑎᒡ ᐊᓐᒡ ᐊᓐᑕ ᐊ ᑕᒡ ᑭᔭ ᒪᒃ ᒐ ᐊᑲ ᒋ ᐊᓯᒡ ᐛᐛᓯᐃᑯᔭᒄ ᐃᔅᐱ ᐛᐛᓯᐊᑭᓄᑥᐛ᙮ 5 ᐛᔅ ᒋᒋᒋᓯᑯᒡ ᐃᔅᐱᔅ ᐃᔅᐸᓄᔅᑕᔪᐛ ᐅᒥᒋᑐᑎᒧᐅᓄᐛᐛ ᑲ ᐃᔅᐱᔅ ᐛᓴ ᒋ ᒥᔅᑎ ᒥᒋᑐᑕᒡ᙮ ᒋᔅᒋᓯᔪᐛ ᒪᒃ ᒋᓴᒪᓂᑐᐛ ᑕᓐ ᑲ ᐃᓯ ᒥᒋᑐᑕᒡ᙮ ᐊᑯ ᒪᒃ ᒐ ᐛᐛᓯᑯᒡ᙮ 6 ᒧᔭᒻ ᑲ ᐃᑐᑐᐛᒡ ᓂᑦ ᐃᔨᒪ ᐅᒡ ᐃᔪᒡ ᐊᑯᓐ ᐃᑐᑐᐛᐧᑯᒡ᙮ ᓇᐊᐤ ᑎᑉ ᐎ ᐃᔅᐱᔅ ᐛᐛᓯᐊᐧᑯᒡ ᑕᓐ ᒋᐸ ᐃᔅᐱᔅ ᐛᐛᓯᐊᑭᓄᐅᒡ ᑲ ᐃᔅᐱᔅ ᒋ ᒥᒋᑐᑕᒡ᙮ ᐊᓂᔭ ᑲ ᐃᓯ ᐎ ᒥᒋᑐᑐᐛᒡ ᐊᐛᔪᐛ ᐃᑐᑐᐛᐅᒡ ᐊᑲ ᓇᔅᒡ ᒐᒋ ᓇᑲᐎᔅᑲᑯᔨᒋ ᒐ ᐃᓯ ᐊᐧᑯᔪᐛᓯᔅᑕᑯᔨᒋ ᒋᓴᒪᓂᑐᐛ᙮ ᓂᔄᐤ ᒪᒃ ᒐᒋ ᐃᔅᐱᔅ ᐊᐧᑯᔪᐛᓯᔅᑕᑯᐅᒡ ᐎᔨᐛᐤ ᒋᓴᒪᓂᑐᐛ ᐃᑐᑐᐛᐧᑯᒡ᙮ 7 ᒧᔭᒻ ᑲ ᐃᔅᐱᔅ ᒋ ᒋᔅᑕᔨᑕᑯᐃᓱᒡ ᐅᒡ ᐃᔪᒡ ᑭᔭ ᒧᔭᒻ ᑲ ᐃᔅᐱᔅ ᓇᔅᒡ ᒥᓯᐛ ᒋ ᐃᓯ ᒪᒥᔽᔨᑎᒥᐃᓱᒡ ᓂᓇᐧᑯᐤ ᐊ ᐎ ᐃᓯ ᐛᐛᒋᐃᓱᒡ, ᐊᐅᑯᓐ ᒧᔭᒻ ᐃᑐᑐᐛᐧᑯᒡ ᒐᒋ ᐃᔅᐱᔅ ᒥᒐᔨᑕᒡ ᑕᓐ ᒐ ᐃᔅᐱᔅ ᓂᓇᐧᑲᑕᔨᒧᐊᑭᓄᐎᒡ᙮ ᐛᔅ ᐅ ᐅᑕᓇᐤ ᒧᔭᒻ ᐊ ᒪᒥᒋᒧᑦ ᐊᐛᓐ ᐅᑕᐃᒡ ᐊᐅᑯᓐ ᐊ ᐊᐃᒡ᙮ ᐃᔅᒋᔄᒥᑭᓐ, ‘ᒧᔭᒻ ᒋᓴᐅᒋᒪᔎᐤ ᓂᑦ ᐊᐱᓐ᙮ ᓇᒪᔭᐤ ᑲ ᐸᐃᑯᓯᑦ ᐃᔎᐤ ᓂᔾ᙮ ᑭᔭ ᓇᒪ ᐎ ᓂᔾ ᓂᑕ ᓂᑭ ᐅᒋ ᒧᓯᑕᓐ ᑕᓐ ᐊ ᐃᓯ ᒥᓯᒪᔨᑕᐧᒃ ᐃᔎᐤ ᐊ ᐅᓇᐊᑦ ᐅᓇᐸᒪ᙮’ 8 ᐅᔭ ᒪᒃ ᐊ ᐃᑕᔨᑕᒡ, ᓯᔅᒋᑯᒡ ᒥᓯᐛ ᒋᑭ ᒪᒧᐅᐱᔪᐤ ᑕᓐ ᒐ ᐃᓯ ᓂᓇᐧᑲᑕᔨᒧᐊᑭᓄᐎᒡ᙮ ᒋᑭ ᒺᐅᓯᑯᐱᔪᐛ ᒪᔭᒡ ᐃᑕᔅᐱᓇᐅᓇ, ᒥᓯᒪᔨᑎᒧᐅᓂᔪᐤ ᑭᔭ ᑯᐅᐧᑭᑕᐅᓂᔪᐤ᙮ ᐊᓂᔭ ᐅᑦ ᐃᑕᐅᓄᐛᐤ ᓇᔅᒡ ᒋᑭ ᒪᔅᑕᐧᑲᑕᔪᐤ ᐛᔅ ᓱᐧᑲᑎᓯᔪᐛ ᐊᓂᔭᔪᐛ ᐅᑎᐸᔨᒋᒐᐛ ᒋᓴᒪᓂᑐᐛ ᑕᐸᔅᑯᓂᑯᒡ᙮” 9 “ᐊᓐᒡ ᒪᒃ ᒋᓴᐅᒋᒪᐅᒡ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐅᔭ ᐊᔅᒋᔪᐤ ᐊ ᑕᒡ ᑲ ᐎᒋ ᐎᓂᓱᐤ ᐱᒪᑎᓯᒪᒡ ᐊᓂᔭᔪᐛ ᐊᐛᔪᐛ ᐊᓐᑕ ᐊ ᑕᔨᒋ ᑭᔭ ᓇᔅᒡ ᒥᓯᐛ ᑲ ᐃᓯ ᒪᒥᔽᔨᑎᒥᐃᓱᒡ ᓂᓇᐧᑯᐤ ᐊ ᐎ ᐃᓯ ᐛᐛᒋᐃᓱᒡ ᒧᔭᒻ ᐊᓂᔭ ᐊᐛᔪᐛ ᐊᓐᑕ ᐊ ᑕᔨᒋ ᐊ ᐃᑎᔨᒋ, ᒋᑭ ᒪᐅᒡ ᑭᔭ ᒋᑭ ᓂᓇᐧᑲᑥᐅᑎᒧᒡ ᐛᐸᑕᒂᐛ ᐊ ᐃᔎᑕᔨᒡ ᐊᓂᔭ ᐅᑕᓇᔪᐤ᙮ 10 ᐛᔪᐤ ᐊᓐᑕ ᒋᑭ ᐅᒋᑲᐳᐅᒡ ᐛᔅ ᒋᑭ ᑯᔅᑕᒍᐅᒡ ᑭᔭ ᐎᔨᐛᐤ ᒐᒋ ᐊᓯᒡ ᐛᐛᓯᐊᑭᓄᐎᒡ᙮ ᐊᑯ ᒐ ᐃᔅᒋᔄᒡ, ‘ᑕᑈ ᑯᔅᑕᑎᑯᓐ᙮ ᑕᑈ ᑯᔅᑕᑎᑯᓐ᙮ ᐊᓐ ᐅᑕᓇᐤ ᐸᐱᓗᓐ ᑲ ᐃᓯᓂᐧᑲᑕᒡ ᐊᔪᐛᒡ ᒋ ᓱᒐᔨᑕᑯᓐ ᑭᔭ ᓇᔅᒡ ᒋ ᒋᔅᑕᔨᑕᑭᓄᐤ᙮ ᒥᒄ ᒪᒃ ᐸᐃᒄ ᑎᐸᐃᑭᓇ ᒋ ᐃᔅᐱᔅ ᑎᓯᐧᑲᑭᓄᐤ ᓇᔅᒡ ᒐᒋ ᓂᓱᐅᓇᒋᑕᑭᓄᐅᒡ᙮’ ” 11 “ᐊᓐᒡ ᒪᒃ ᑲ ᐊᑕᐛᒡ ᒐᒂᔪᐤ ᑲ ᐅᒋ ᐱᒪᒋᐅᒡ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᔪᐤ ᐊ ᐅᒋᒡ, ᒋᑭ ᒪᐅᒡ ᑭᔭ ᒋᑭ ᒪᒪᑥᐅᒡ ᐊ ᓂᓱᐅᓇᒋᑕᑭᓄᐎᒡ ᐊᓂᔭ ᐅᑕᓇᔪᐤ, ᐛᔅ ᑕᐸ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᐅᑦ ᐊᑕᐛᐅᓄᐛᐛ᙮ 12 ᓇᒪ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᑕᓐ ᐊ ᐃᓯ ᐊᔭᒡ ᒐᒂᔪᐛ ᐎᔄᐅᓱᓇᔭᐱᔅᑯᒡ ᒪᒃ ᐛᐱᓱᓇᔭᐱᔅᑯᒡ ᐊᒋ ᐅᒋ ᐅᓯᑕᑭᓄᔨᒋ᙮ ᓇᒪ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓇᔨᒋ ᐅᑦ ᐊᓯᓂᒧᐛᐛ ᑲ ᒥᔪᓯᓯᔨᒋ, ᒪᒃ ᐊᓂᔭᔪᐛ ᑲ ᐎᔄᐛᐱᔅᒋᓯᔨᒋ᙮ ᓇᒪ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᐅᑦ ᐊᐱᒋᑕᐅᓄᐛᐛ ᑲ ᓱᓯᐛᑭᓂᔨᒋ ᓇᔅᒡ ᑲ ᒥᔪᐛᑭᓯᔨᒋ ᒪᒃ ᐊᓂᔭᔪᐛ ᐅᑦ ᐊᐱᒋᑕᐅᓄᐛᐛ ᑲ ᐅᑐᒋᒥᒂᑭᓂᔨᒋ ᒪᒃ ᐊᓂᔭᔪᐛ ᑲ ᐃᓯᓂᐧᑲᓂᔨᒋ ᑭᔭ ᐊᓂᔭᔪᐛ ᑲ ᒥᒂᑭᓂᔨᒋ᙮ ᓇᒪ ᐊᑯ ᑕᔪᐛ ᐊᐛᔪᐛ ᒐ ᐅᑎᓇᔨᒋ ᒥᓯᐛ ᐊ ᐃᓯᓇᑯᓯᔨᒋ ᑲ ᐎᒋᒪᑯᓯᔨᒋ ᒥᔅᑎᒂ ᑲ ᐊᔭᐛᒡ ᒐᒋ ᐊᑕᐛᒡ᙮ ᓇᒪ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᓂᓇᐧᑯᐤ ᐊ ᐃᓯᓇᑯᓂᔨᒋ ᒐᒂᔪᐛ ᐛᐱᑯᓂᒡ ᒪᒃ ᑲ ᓱᓇᔭᐎᔨᒋ ᒥᔅᑎᒂ ᒪᒃ ᑲ ᐎᐸᐱᔅᒋᓯᔨᒋ ᓱᓇᔭᐱᔎ ᑲ ᐅᒋ ᐅᓯᑕᑭᓄᐎᒡ᙮ ᓇᒪ ᐊᑯ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᐊᓂᔭᔪᐛ ᒐᒂᔪᐛ ᐃᓴᑯᒡ ᒪᒃ ᐊᓯᓂᔭ ᑲ ᓱᓱᐛᐱᔅᒋᓯᔨᒋ ᑲ ᐅᒋ ᐅᓯᑕᑭᓄᔨᒋ᙮ 13 ᓇᒪ ᑭᔭ ᑕᔪᐛ ᐊᐛᔪᐛ ᒐᒋ ᐅᑎᓂᒥᔨᒋ ᓂᑕᐅᒋᑕᑭᓂᒡ ᑲ ᐅᑎᓇᑭᓄᐎᒡ ᐱᒥᔪᐤ ᑲ ᐎᒋᒪᑯᓂᔨᒡ ᒪᒃ ᐊᓂᔭᔪᐛ ᓂᐱᓯᔭ ᑲ ᐎᒋᒪᑯᓂᔨᒋ᙮ ᑭᔭ ᒋ ᐊᔭᐅᒡ ᐊ ᐊᑕᐛᒡ ᐊᓂᔭᔪᐛ ᑲ ᐎᒋᒪᑯᓂᔨᒋ ᐊ ᐃᔎᓯᑭᓄᔨᒋ, ᑲ ᓱᓇᔭᐎᔨᒋ ᑐᒥᓂᑭᓇ, ᑲ ᐎᒋᒪᓱᔨᒋ ᐱᒍᐛ, ᑭᔭ ᓱᒥᓇᐳᔪᐤ, ᐱᒥᔪᐤ, ᐸᒂᓯᑭᓇ ᑲ ᒥᔪᓯᓯᔨᒋ, ᐊᔪᒥᓇ, ᒥᔅᑐᓴ, ᒪᔭᑕᓂᓴ, ᑲᐸᐃᑭᔎᐛ, ᑭᔭ ᐊᓂᔭᔪᐛ ᑎᑎᐱᑕᐸᓇᔎ ᑲᐸᐃᑭᔎᐛ ᑲᒋ ᐅᑕᐸᔨᒋ᙮ ᑭᔭ ᓇᒪ ᐅᒋ ᑕᔪᐛ ᐊᐛᔪᐛ ᒐ ᐅᑎᓇᔨᒋ ᐊᓂᔭᔪᐛ ᐊᐱᒋᐊᑭᓇ ᑲ ᐊᑕᐛᒡ᙮” 14 “ᐊᑯ ᒪᒃ ᐅᒡ ᐊ ᐊᑕᐛᒡ ᒐᒂᔪᐤ ᑲ ᐅᒋ ᐱᒪᒋᐅᒡ ᒐ ᐃᑕᒡ ᐊᓂᔭᔪᐛ ᐊᓐᑕ ᐊ ᑕᔨᒋ, ‘ᒋᔾ ᐸᐱᓗᓐ, ᒥᓯᐛ ᒐᒂᓐ ᓇᔅᒡ ᐊ ᒥᔽᓯᒡ ᑲ ᐎ ᐊᔭᔨᓐ, ᓂᓱᐅᓇᑎᓐ᙮ ᒥᓯᐛ ᐊᓂᔭ ᒐᒂᔪᐛ ᐊᑎ ᓇᔅᒡ ᑲ ᐅᒋ ᐎ ᒪᒥᔽᔨᑎᒥᐃᓱᔨᓐ ᓂᓇᐧᑯᐤ ᐊ ᐎ ᐃᓯ ᐛᐛᒋᐅᔨᓐ ᑭᔭ ᒥᓯᐛ ᑕᓐ ᑲ ᐃᓯ ᒥᔽᓯᒡ ᑲ ᐃᓯ ᐊᔭᔨᓐ, ᓂᓱᐅᓇᑎᓐ᙮ ᓇᒪ ᒪᒃ ᒥᓐ ᓂᑕ ᒋᑭ ᐅᒋ ᐊᔭᓐ᙮’ ” 15 “ᐊᓐᒡ ᒪᒃ ᐊ ᐊᑕᐛᒡ ᒐᒂᔪᐤ ᑲ ᐅᒋ ᐱᒪᒋᐅᒡ ᒋ ᐅᓱᓇᔭᓂᒥᐧᑲᑯᒡ ᐊᓂᔭ ᐅᑕᓇᔪᐤ᙮ ᐊᑯ ᒪᒃ ᐛᔪᐤ ᐊᓐᑕ ᒐ ᐅᒋᑲᐳᐅᒡ ᐛᔅ ᑯᔅᑕᒍᐅᒡ ᑭᔭ ᐎᔨᐛᐤ ᒐᒋ ᐊᓯᒡ ᓂᓇᐧᑲᑕᔨᒧᐊᑭᓄᐎᒡ ᑕᓐ ᐊ ᐃᓯ ᓂᓇᐧᑲᑕᔨᒧᐊᑭᓄᔨᒋ᙮ ᒋᑭ ᒪᐅᒡ ᑭᔭ ᒋᑭ ᓂᓇᐧᑲᑥᐅᑎᒧᒡ᙮ 16 ᒋᑭ ᐃᔅᒋᔄᐅᒡ, ‘ᑕᑈ ᑯᔅᑕᑎᑯᓐ᙮ ᑕᑈ ᑯᔅᑕᑎᑯᓐ᙮ ᐊᓐ ᑲ ᓱᒐᔨᑕᒂᒡ ᐅᑕᓇᐤ ᓇᔅᒡ ᓂᓱᐅᓇᑎᓐ᙮ ᐱᒍᐎᔭᓂᓴ ᑲ ᓱᓯᐛᑭᓂᔨᒋ ᓇᔅᒡ ᑲ ᒥᔪᐛᑭᓯᔨᒋ ᒋ ᒋᔅᑭᒧᒡ ᐊᓐᒡ ᐊᓐᑕ ᐊ ᑕᒡ, ᐱᒍᐎᔭᓂᓯᔪᐤ ᑲ ᐃᓯᓂᐧᑲᓂᔨᒡ ᒋ ᒋᔅᑭᒧᒡ ᑭᔭ ᐊᐱᒋᑕᐅᓇ ᑲ ᒥᒂᑭᓂᔨᒋ᙮ ᒋ ᒥᔽᔅᐱᑎᓱᐅᒡ ᐎᔄᐅᓱᓇᔭᐱᔅᑯᒡ ᐊ ᐅᒋ ᐅᓯᑕᑭᓄᔨᒋ ᒐᒂᔪᐛ ᐊ ᒋᔅᑲᒡ ᑭᔭ ᓂᓇᐧᑯᐤ ᐊ ᒥᔪᓯᔨᒋ ᐊᓯᓂᔭ ᐊ ᐅᒋ ᐅᓯᑕᑭᓄᔨᒋ ᑭᔭ ᐊ ᐎᔄᐛᐱᔅᒋᓯᔨᒋ ᐊᓯᓂᓴ ᐊ ᒋᔅᑯᐛᒡ᙮ 17 ᒥᒄ ᐸᐃᒄ ᑎᐸᐃᑭᓇ ᒋ ᐃᔅᐱᔅ ᑎᓯᐧᑲᑭᓄᐤ ᓇᔅᒡ ᐊ ᓂᓱᐅᓇᒋᑕᑭᓄᐅᒡ ᒥᓯᐛ ᑲ ᐃᓯ ᑎᒂᒡ ᐛᔪᑎᓯᐅᓐ ᐊᓐᑕ ᐊᓐ ᐅᑕᓇᐤ᙮’ ” “ᐊᓐᒡ ᒪᒃ ᐊ ᒥᓴᒡ ᐅᐤᑦ ᐅᒋᒪᐅᒡ ᑭᔭ ᒥᓯᐛ ᐊᐛᓐ ᑲ ᑎᑯᓂᔨᒡ ᐊᓐᑕ ᐊ ᐃᔅᐱᔨᑦ ᐊ ᒥᓴᒡ ᐅᐤᑎᒡ, ᐊ ᒥᓴᒡ ᐅᐤᑦ ᑯᐸᓇᐅᒡ ᑭᔭ ᐊᓐᒡ ᐊ ᒥᓴᔨᒡ ᐅᐤᑕ ᑲ ᐊᐱᒋᑕᒡ ᐊ ᐱᐸ ᐊᑕᐛᒡ ᒐᒂᔪᐛ ᐛᔪᐤ ᐊᓐᑕ ᒋ ᐅᒋᑲᐳᐅᒡ᙮ 18 ᐃᔅᐱ ᒪᒃ ᐎᔭᐸᑕᒡ ᐊᓂᔭ ᐊ ᐊᒂᐸᑕᔨᒡ ᐊ ᐃᔎᑕᔨᒡ ᐊᓂᔭ ᐅᑕᓇᔪᐤ ᒋ ᒪᐅᒡ ᐊ ᐃᔅᒋᔄᒡ, ‘ᓇᒪ ᓂᑕ ᐅᒋ ᑎᑯᓐ ᐅᑕᓇᐤ ᐊ ᐃᔅᐱᔅ ᒋᔅᑕᔨᑕᒂᒡ ᑲ ᐃᔅᐱᔅ ᒋᔅᑕᔨᑕᒂᒡ ᐅ ᐅᑕᓇᐤ᙮’ 19 ᒋ ᒪᐅᒡ ᑭᔭ ᒋ ᓂᓇᐧᑲᑥᐅᑎᒧᒡ᙮ ᐃᔭᑲᔪᐤ ᒋ ᐃᓯ ᐛᐱᓂᒧᒡ ᐅᔅᑎᒂᓂᐛᒡ ᐊ ᐛᐸᑎᔨᐛᒡ ᐊᔅᐱᔅ ᒥᒐᔨᑕᒡ᙮ ᐊᐅᑯᓐ ᒪᒃ ᑲ ᐃᑎᑕᑯᓯᒡ, ‘ᑕᑈ ᑯᔅᑕᑎᑯᓐ᙮ ᑕᑈ ᑯᔅᑕᑎᑯᓐ᙮ ᑯᔅᑕᑎᑯᓐ ᑕᓐ ᐊ ᐃᔅᐱᔨᒡ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᐊᓐᑕ ᑲ ᐅᒋ ᐅᓱᓇᔭᓂᒥᐧᑲᓱᒡ ᐊᓐᒡ ᐊ ᒥᓴᒡ ᐅᐤᑕ ᑲᒋ ᐊᐱᒋᑕᒡ ᓂᓇᐧᑯᐤ ᒐᒂᔪᐛ ᐊ ᐱᐸ ᐊᑕᐛᒡ᙮ ᐊᓂᔭ ᑲ ᐃᓯ ᒋ ᐛᔪᒡ ᑎᑯᓂᔨᒡ ᒐᒂᔪᐤ ᐊᓐᑕ ᐊᓂᔭ ᐅᑕᓇᔪᐤ, ᐊᑯᑕ ᑲ ᐅᒋ ᐅᓱᓇᔭᓂᒥᐧᑲᓱᒡ᙮ ᐸᐃᒄ ᑎᐸᐃᑭᓇ ᒪᒃ ᐃᔅᐱᔅ ᓴᔅ ᒥᓯᐛ ᒋ ᓂᓱᐅᓇᑎᓐ᙮’ 20 ᒋᔨᐛᐤ ᒋᒋᒋᓯᑯᒡ ᐊ ᑕᔭᒄ, ᒥᔽᔨᑎᒧᒄ ᐊᒋ ᓂᓱᐅᓇᒋᑕᑭᓄᐅᒡ ᐊᓐ ᐅᑕᓇᐤ᙮ ᒋᔨᐛᐤ ᑲ ᑕᑈᑎᒪᒄ, ᑭᔭ ᒋᔨᐛᐤ ᐊᑈᔅᑕᓇᒡ, ᑭᔭ ᒋᔨᐛᐤ ᑲ ᐅᒋᔅᒋᐛᐃᒐᓱᐅᔭᒄ, ᒥᔽᔨᑎᒧᒄ᙮ ᐛᔅ ᒋᓴᒪᓂᑐᐤ ᒋ ᑎᐸᔅᑯᓇᐤ ᐊᓂᔭᔪᐛ ᐊᓐᑕ ᑲ ᑕᔨᒋ ᑕᓐ ᑲ ᐃᑐᑕᑕᑯᒡ᙮” 21 ᐊᑯ ᐊᓐ ᐊᓐᒋᓐ ᓇᔅᒡ ᐊ ᓱᒐᔨᑕᑯᓯᑦ ᒂ ᐅᒋ ᐅᑎᓇᑦ ᐊ ᒥᒐᐱᔅᒋᓯᔨᒋ ᐊᓯᓂᔭ, ᐊᑯ ᐊᓐᑕ ᐎᓂᐸᑯᒡ ᑲ ᐃᓯ ᐱᑭᔅᑐᐛᐱᓇᑦ᙮ ᒋ ᐃᔅᒋᔄᐤ ᒪᒃ ᐊᓂᔭ ᐊ ᐛᐱᓇᑦ, “ᐊᐅᑯᓐ ᒧᔭᒻ ᒐ ᐃᔅᐱᔅ ᐊᑲ ᒥᓇᒋᑕᑭᓄᐅᒡ ᑕᓐ ᒐ ᐃᓯ ᓇᔅᒡ ᓂᓱᐅᓇᒋᑕᑭᓄᐅᒡ ᐊᓐ ᐅᑕᓇᐤ ᐸᐱᓗᓐ ᑲ ᐃᓯᓂᐧᑲᑕᒡ᙮ ᓇᒪ ᓂᑕ ᐊᓂᔭ ᒥᓐ ᒋᑭ ᐅᒋ ᒋᔅᒐᔨᑕᑯᓐ᙮ 22 ᓇᒪ ᓂᑕ ᒥᓐ ᒋᑭ ᐅᒋ ᐸᑕᑯᓐ ᐊᓐᑕ ᐊ ᑕᔨᓐ ᐸᐱᓗᓐ, ᐊ ᒥᔪᑕᑯᑕᒡ ᐊᓐᒡ ᐊᐛᓐᒋ ᑲ ᒪᑐᐛᒡ ᐊᓂᔭᔪᐛ ᑲ ᒥᔪᑕᑯᓂᔨᒋ ᒋᔍᐛᐱᒋᑭᓂᓴ᙮ ᓇᒪ ᓂᑕ ᒥᓐ ᒋᑭ ᐅᒋ ᐸᑕᑯᓱᐅᒡ ᐊᓐᒡ ᓂᓇᐧᑯᐤ ᒐᒂᔪᐛ ᐊ ᒥᔪᑕᑯᓂᔨᒋ ᑲ ᑭᔅᒋᐅᒡ ᐊ ᒪᑐᐛᒐᒡ ᒪᒃ ᐊᓐᒡ ᓂᓇᐧᑯᐤ ᐳᑕᒋᑭᓇ ᑲ ᒪᑐᐛᒡ᙮ ᓇᒪ ᓂᑕ ᒥᓐ ᒋᑭ ᐅᒋ ᐛᐱᒪᑭᓄᐎᒡ ᐊᓐᒡ ᐊᐛᓐᒋ ᓂᓇᐧᑯᐤ ᒐᒂᔪᐛ ᑲ ᐃᓯ ᑭᔅᒋᐅᒡ ᐊ ᐅᓯᑕᒡ᙮ ᓇᒪ ᓂᑕ ᑭᔭ ᒥᓐ ᒋᑭ ᐅᒋ ᐸᑕᑯᓐ ᐊ ᑎᑯᐃᑭᓄᐅᒋ ᓂᑕᐅᒋᑕᑭᓇ᙮ 23 ᓇᒪ ᓂᑕ ᒥᓐ ᒋᑭ ᐅᒋ ᓄᑯᓱᐅᒡ ᐛᔅᑕᓂᐱᒪᑭᓐᒡ ᐊ ᐛᔅᑐᐛᒡ ᐊᓐᑕ ᐊ ᑕᔨᓐ᙮ ᓇᒪ ᓂᑕ ᒥᓐ ᒋᑭ ᐅᒋ ᐸᑕᑯᓱᐅᒡ ᐊ ᒧᒋᒐᔨᑕᒡ ᐅᔅᒋᓂᒋᓱᐅᒡ ᑭᔭ ᐅᔅᒋᓂᔎᐅᒡ᙮ ᐊᓐᒡ ᓂᓇᐧᑯᐤ ᒐᒂᔪᐛ ᑲ ᐊᑕᐛᒡ ᐊᓐᑕ ᐊ ᑕᔨᓐ, ᐊᐅᑯᓐᒡ ᒪᐅᒡ ᑲ ᒋᔅᑕᔨᑕᑯᓯᒡ ᐊᐛᓐᒋ ᐅᑕ ᐊᔅᒋᒡ᙮ ᐊᓐᒡ ᐊᐛᓐᒋ ᐊᓐᑕ ᑲ ᐎᒋᒡ ᒥᓯᐛ ᐊᐛᔪᐛ ᐅᑕ ᐊᔅᒋᒡ ᒋ ᐎᔭᓯᐊᐅᒡ ᐅᒪᒥᑕᐛᑎᓯᐅᓄᐛᐤ ᐊ ᐊᐱᒋᑕᒡ᙮” 24 ᐊᑯᑕ ᐊᓐ ᐅᑕᓇᒡ ᑲ ᓂᐸᐊᑭᓄᐎᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ ᑭᔭ ᑲ ᑕᑈᑕᒡ ᑭᔭ ᑯᑎᑭᒡ ᐊᐛᓐᒋ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.