ᒋᔅᒐᔨᑕᑯᑕᒐᐅᓐ 17 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐱᓯᒂᑎᓯᑦ ᐃᔎᐤ ᑲ ᑕᑎᐱᑦ ᒥᒋ ᐊᐛᓯᓴ

¹ ᐊᑯ ᐸᐃᒄ ᐊᓐᒡ ᓂᔄᐅᑕᒡ ᑲ ᐃᑕᑎᓯᒡ ᐊᓐᒋᓐᒡ ᑲ ᐊᔭᒡ ᐊᓂᔭ ᓂᔄᐅᑕᒡ ᐎᔭᑭᓇ ᑲ ᒧᑕᔭᔨᒋ, ᑲ ᐸᒋ ᓂᑐᐛᐱᒥᑦ ᐊᑯ ᒂ ᐃᓯᑦ, “ᐊᔅᑎᒻ ᒪ᙮ ᒋᑭ ᐛᐸᑎᔨᑎᓐ ᑕᓐ ᒐ ᐃᓯ ᐛᐛᓯᐊᑦ ᒋᓴᒪᓂᑐᐤ ᐊᓂᔭ ᐃᔎᐛ ᑲ ᐱᓯᒂᑎᓯᔨᒋ᙮ ᐊᓐ ᐃᔎᐤ ᑲ ᐊᐱᑦ ᐊᓐᑕ ᐊ ᑎᑯᓂᔨᒋ ᒥᒐᑦ ᓯᐱᔭ᙮

² ᒋᓴᐅᒋᒪᐅᒡ ᐅᑕ ᐊᔅᒋᒡ ᐊ ᑕᒡ ᒋ ᐎᒋ ᐱᓯᒂᑎᓯᒪᐅᒡ ᐊᓂᔭᔪᐛ ᐃᔎᐛ᙮ ᑭᔭ ᒥᓯᐛ ᐊᐛᓐ ᐅᑕ ᐊᔅᒋᒡ ᐊ ᑕᑦ ᒋ ᒥᔽᔨᑎᒧᒡ ᓂᓇᐧᑯᐤ ᐊᒋ ᐃᓯ ᐎᓂᓱᐤ ᐃᑐᑐᐛᒡ ᐊᓂᔭᔪᐛ ᐃᔎᐛ, ᒧᔭᒻ ᐊᒋ ᒥᓄᐛᒡ ᐅᓱᒥᓇᐳᔪᐤ, ᐊᐅᑯᓐ ᐊ ᐃᓯᓇᑯᓯᒡ ᑭᔭ ᑲ ᒋᔎᐸᒡ᙮”

³ ᐊᑯ ᑲ ᐸᔭᒋᓯᑦ ᐊᒐᐧᒄ ᑲ ᐸᒋ ᐱᒋᔅᑯᐅᑦ᙮ ᐊᑯ ᐊᓐ ᐊᓐᒋᓐ ᐊᓐᑕ ᐸᐧᑯᑎᔅᑭᒥᑲᒡ ᒂ ᐸᒋ ᐃᑐᑕᐃᑦ᙮ ᓂᒋ ᐛᐱᒪᐤ ᒪᒃ ᐊᓐᑕ ᐃᔎᐤ ᐊ ᑕᑎᐱᑦ ᒥᒋ ᐊᐛᓯᓴ ᐊ ᒥᐧᑯᓯᔨᒋ᙮ ᐅ ᒪᒃ ᒥᒋ ᐊᐛᓯᔅ ᐃᓯᓂᐧᑲᓱᐅᓂᔪᐤ ᐊ ᒪᔭᔨᒥᑯᔨᒋ ᒋᓴᒪᓂᑐᐛ ᒋ ᒥᓯᓇᑕᔪᐛ ᐊᓐᑕ ᐊ ᑕᑦ᙮ ᓂᔄᐅᑕᒡ ᒋ ᐃᑕᑎᓂᔪᐛ ᐅᔅᑎᒂᓇ᙮ ᒋ ᐸᐃᑯᔪᐛᓯᔪᐛ ᐅᑦ ᐊᔅᑭᓇ᙮

⁴ ᐊᓐ ᒪᒃ ᐃᔎᐤ ᒋ ᒥᒂᔅᐱᓱᐤ ᑭᔭ ᒋ ᒥᔪ ᒥᒂᔪᐛ ᐅᑦ ᐊᐱᒋᑕᐅᓇ᙮ ᒋ ᐛᐛᓯᐅᐤ ᐊ ᐎᔄᐅᓱᓇᔭᐱᔅᑯᔨᒋ ᒐᒂᔪᐛ ᑭᔭ ᓂᓇᐧᑯᐤ ᐊ ᒥᔪᓯᔨᒋ ᐊᓯᓂᔭ ᑭᔭ ᐊ ᐎᔄᐛᐱᔅᒋᓯᔨᒋ ᐊᓯᓂᓴ ᐊ ᒋᔅᑯᐛᑦ᙮ ᒋ ᑕᐧᑯᓂᒻ ᒪᒃ ᐊ ᐎᔄᐅᓱᓇᔭᐱᔅᑯᔨᒡ ᒥᓂᒂᑭᓂᔪᐤ᙮ ᐊᓐᑕ ᒪᒃ ᒥᓂᒂᑭᓂᒡ ᒋ ᓴᑭᔅᑎᓇᔅᑕᔪᐤ ᓂᓇᐧᑯᐤ ᐎᓂᓱᐤ ᐃᑐᐅᓇ, ᐛᔅ ᐊᐅᑯᓐ ᒥᒄ ᐛ ᐃᑕᑎᓯᑦ ᐅ ᐃᔎᐤ᙮

⁵ ᐊᓐᑕ ᒪᒃ ᐅᔅᑲᑎᑯᒡ ᒋ ᒥᓯᓇᑕᔪᐤ ᐃᓯᓂᐧᑲᓱᐅᓂᔪᐤ ᐊᑲ ᒋᔅᒐᔨᑕᑯᓂᔨᒡ ᑕᓐ ᐊ ᐃᔅᒋᔄᐛᒥᑭᓂᔨᒡ᙮ ᒪᐅ ᑲ ᐃᑎᔅᑕᔨᒡ, “ᓂᔾ ᐸᐱᓗᓐ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ᙮ ᓂᔾ ᓄᑲᐎᒪᐅᑐᑕᑯᒡ ᐅᐱᓯᒂᑎᓯᔎᐅᒡ ᑭᔭ ᒥᓯᐛ ᐊᓐᒡ ᑲ ᒥᔽᔨᑕᒡ ᐊ ᒥᒋᑐᑕᒡ ᐅᑕ ᐊᔅᒋᒡ᙮”

⁶ ᓂᒋ ᐛᐱᒪᐤ ᒪᒃ ᐊᓐ ᐃᔎᐤ ᐊ ᒥᔪᐧᑭᓱᑦ ᐊᒋ ᒥᓄᐛᑦ ᐅᒥᐧᑯᔪᐤ ᑲ ᑕᑈᑎᒥᔨᒋ ᑭᔭ ᐅᒥᐧᑯᔪᐤ ᐊᓂᔭᔪᐛ ᑲ ᓂᐸᐊᑭᓄᐃᑯᐱᓇᓂ ᐊ ᑕᑈᔭᔨᒪᔨᒋ ᒋᓴᓴ᙮ ᐃᔅᐱ ᒪᒃ ᑲ ᐛᐱᒥᒃ ᓇᔅᒡ ᓂᒋ ᒥᔅᑲᓯᓄᐛᐤ᙮

⁷ ᐊᑯ ᒂ ᐸᒋ ᑯᒂᒋᒥᑦ ᐊᓐ ᐊᓐᒋᓐ ᒐᒂᔪᐤ ᐛᒋ ᓇᔅᒡ ᒥᔅᑲᓯᓇᒥᒋ᙮ ᐊᑯ ᒂ ᐃᔅᒋᔄᑦ, “ᒋᑭ ᐎᑎᒪᑎᓐ ᒐᒂᓐ ᑕᓐ ᐊ ᐃᓯ ᐊᑲ ᒋᔅᒐᔨᒥᑦ ᐊᓐ ᐃᔎᐤ ᑭᔭ ᐊᓂᔭᔪᐛ ᒥᒋ ᐊᐛᓯᓴ ᑲ ᑕᑎᐱᑦ ᓂᔄᐅᑕᒡ ᑲ ᐃᑕᑎᓂᔨᒋ ᐅᔅᑎᒂᓂᔪᐛ ᑭᔭ ᐸᐃᑯᔪᐤ ᑲ ᑕᑎᓯᔨᒋ ᐅᑦ ᐊᔅᑭᓂᔪᐛ᙮

⁸ ᐊᓐ ᒥᒋ ᐊᐛᓯᔅ ᑲ ᐛᐱᒥᑦ, ᒋ ᐱᒪᑎᓯᐤ ᐸᐃᒂᐤ ᒥᒄ ᒪᒃ ᓇᒪ ᓴᔅ ᐱᒪᑎᓯᐤ᙮ ᐊᓐᑕ ᐊᓂᔭ ᑲ ᒥᔅᑎ ᐱᑯᓇᔭᔨᒡ ᒋᑭ ᐅᒋ ᓄᑯᐃᓱᐤ ᑭᔭ ᒐ ᓂᓱᐅᓇᒋᐊᑭᓄᐅᑦ᙮ ᐊᓐᒡ ᒪᒃ ᐊᐛᓐᒋ ᐅᑕ ᐊᔅᒋᒡ ᑲ ᐱᒪᑎᓯᒡ ᐊᑲ ᒥᓯᓇᑕᔨᒡ ᐅᑦ ᐃᓯᓂᐧᑲᓱᐅᓄᐛᐛ ᐊᓐᑕ ᒥᓯᓇᐃᑭᓂᒡ ᐊᓐᑕ ᑲ ᒥᓯᓇᐛᑭᓄᔨᒋ ᐊᐛᔪᐛ ᒐ ᐊᔭᔨᒋ ᑲᒋᒡ ᐱᒪᑎᓯᐅᓂᔪᐤ ᐊᔅᒄ ᐊᑲ ᐅᒋ ᑎᑯᓂᔨᒡ ᐅᔭ ᐊᔅᒋᔪᐤ, ᒋᑭ ᒥᔅᑲᓯᓄᐛᐅᒡ ᐛᐱᒪᑥᐛ ᐊᓂᔭᔪᐛ ᒥᒋ ᐊᐛᓯᓴ᙮ ᐛᔅ ᒋ ᐱᒪᑎᓯᔪᐛ ᒥᒄ ᒪᒃ ᓇᒪ ᓴᔅ ᐱᒪᑎᓯᔪᐛ᙮ ᑲᐤ ᒪᒃ ᒋᑭ ᐅᒋ ᓄᑯᓯᔪᐛ ᐊ ᐱᒪᑎᓯᔨᒋ᙮”

⁹ “ᐊᑯᑕ ᐅ ᓇᑐᐛᔨᑕᒂᒡ ᑭᒐᑕᐛᔨᑎᒧᐤ ᒥᑐᓇᔨᒋᑭᓐ᙮ ᐊᓂᔭᔪᐛ ᓂᔄᐅᑕᒡ ᑲ ᐃᑕᑎᓂᔨᒋ ᐅᔅᑎᒂᓇ ᐊᓐ ᒥᒋ ᐊᐛᓯᔅ, ᐊᐅᑯᓂ ᐊᓂᔭᔪᐛ ᓂᔄᐅᑕᒡ ᐱᔅᑯᑎᓇᓴ ᐊᓐᑕ ᑎᔭᑎᐱᑦ ᐊᓐ ᐃᔎᐤ᙮ ᐊᐅᑯᓐᒡ ᑭᔭ ᓂᔄᐅᑕᒡ ᒋᓴᐅᒋᒪᐅᒡ᙮

¹⁰ ᐱᑕᑕᒡ ᐊᓐᒡ ᒋᓴᐅᒋᒪᐅᒡ ᓴᔅ ᓇᒪ ᑕᐅᒡ᙮ ᐸᐃᒄ ᒪᒂᒡ ᒋᓴᐅᒋᒪᐤ᙮ ᐊᑯ ᐊᓐ ᑯᑎᒃ ᒋᓴᐅᒋᒪᐤ ᐊᔅᒄ ᓇᒪ ᓄᑯᐃᓱᐤ᙮ ᐃᔅᐱᔅ ᓄᑯᓯᒐ ᒥᒄ ᐛᐃᐱᔅᒋᔅ ᒋᑭ ᒋᓴᐅᒋᒪᐤ᙮

¹¹ ᐊᓐ ᒪᒃ ᒥᒋ ᐊᐛᓯᔅ ᓂᔅᑎᒻ ᑲ ᐱᒪᑎᓯᑦ, ᒥᒄ ᒪᒃ ᐊᑲ ᓴᔅ ᐱᒪᑎᓯᑦ, ᐊᐅᒄ ᐊᓐ ᔭᓇᐤ ᐊ ᑕᑦ ᒋᓴᐅᒋᒪᐤ ᑭᔭ ᐊᐅᒄ ᐸᐃᒄ ᐊᓐᒡ ᓂᔄᐅᑕᒡ ᑲ ᐃᑕᑎᓯᒡ ᒋᓴᐅᒋᒪᐅᒡ᙮ ᒋᓴᒪᓂᑐᐛ ᒋᑭ ᓂᓱᐅᓇᒋᐃᑯᐤ ᐅ ᒥᒋ ᐊᐛᓯᔅ᙮”

¹² “ᐊᓂᔭᔪᐛ ᒪᒃ ᐸᐃᑯᔪᐤ ᑲ ᐃᑕᑎᓂᔨᒋ ᐅᑦ ᐊᔅᑭᓇ ᐊᓐ ᒥᒋ ᐊᐛᓯᔅ, ᐎᑎᒪᒐᒥᑭᓂᔪᐤ ᐸᐃᑯᔪᐤ ᒐ ᑕᑎᓯᔨᒋ ᒋᓴᐅᒋᒪᐛ ᐊᔅᒄ ᒐ ᒋᓴᐅᒋᒪᐎᔨᒋ᙮ ᒋ ᐱᔅᑎᓇᑭᓄᐎᒡ ᑭᔭ ᐎᔨᐛᐤ ᒥᒄ ᐛᐃᐱᔅᒋᔅ ᒐᒋ ᒋᓴᐅᒋᒪᐅᒡ ᐅᒡ ᒋᓴᐅᒋᒪᐅᒡ ᒪᒂᒡ ᒋᓴᐅᒋᒪᐎᔨᒐᓂ ᐊᓂᔭ ᒥᒋ ᐊᐛᓯᓴ᙮

¹³ ᒥᓯᐛ ᒪᒃ ᐅᒡ ᐸᐃᑯᔪᐤ ᐊ ᐃᑕᑎᓯᒡ ᒋᓴᐅᒋᒪᐅᒡ ᐸᐃᑯᓄᒡ ᒋᑭ ᐃᑕᔨᑎᒧᒡ ᐊᓂᔭ ᑕᓐ ᐛ ᐃᑎᒡ᙮ ᒥᓯᐛ ᒪᒃ ᑕᓐ ᐊ ᐃᓯ ᐊᔭᒡ ᓱᐧᑲᑎᓯᐅᓂᔪᐤ ᑭᔭ ᑎᐸᔨᒋᒐᐅᓂᔪᐤ ᐊᓂᔭᔪᐛ ᒥᒋ ᐊᐛᓯᓴ ᒋᑭ ᒥᔭᐅᒡ᙮

¹⁴ ᐅᒡ ᒪᒃ ᐸᐃᑯᔪᐤ ᒋᓴᐅᒋᒪᐅᒡ ᑭᔭ ᐊᓐ ᒥᒋ ᐊᐛᓯᔅ, ᒋᑭ ᓂᑐᐱᔨᑐᐛᐅᒡ ᐊᓂᔭᔪᐛ ᒪᔭᑕᓂᓴ᙮ ᒥᒄ ᒪᒃ ᒋᑭ ᓴᑯᐃᑯᐅᒡ ᐊᓂᔭᔪᐛ ᒪᔭᑕᓂᓴ ᑭᔭ ᐊᓂᔭᔪᐛ ᑲ ᓇᓴᐅᑯᔨᒋ᙮ ᐛᔅ ᐎᔾ ᐊᓐ ᒪᔭᑕᓂᔅ ᒋᒋᐛ ᒋᔅᑕᔨᑕᑯᓱᐤ ᐊ ᑕᑎᓯᔨᒋ ᒥᓯᐛ ᐅᑎᐸᔨᒋᒐᐛ ᑭᔭ ᐎᔾ ᒋᒋᐛ ᓱᒐᔨᑕᑯᓱᐤ ᐊ ᑕᑎᓯᔨᒋ ᒥᓯᐛ ᒋᓴᐅᒋᒪᐛ᙮ ᐊᓂᔭᔪᐛ ᒪᒃ ᑲ ᓇᓴᐅᑯᑦ, ᐊᐅᑯᓂ ᐎᔾ ᐛᒋᒡ ᑲ ᑕᑈᑕᑦ ᑭᔭ ᑲ ᐅᑎᓇᑦ ᒐᒋ ᐅᑦ ᐃᔨᒥᑦ ᑭᔭ ᐊᐅᑯᓂ ᐊᓂᔭᔪᐛ ᑯᐃᔅᒄ ᑲ ᐃᑎᔨᒋ ᐊ ᓇᓴᐅᑯᑦ᙮”

¹⁵ ᐊᑯ ᒂ ᐃᓯᑦ ᐊᓐ ᐊᓐᒋᓐ, “ᐊᓂᔭᔪᐛ ᓯᐱᔭ ᑲ ᐛᐸᑎᒥᓐ ᐊᓐᑕ ᑲ ᐊᐱᑦ ᐊᓐ ᐃᔎᐤ, ᐃᔪᒡ ᐛᔅ ᐊᓐ ᐊᓐᒡ, ᐊ ᒥᒐᑎᒡ ᐊᐛᓐᒋ, ᓂᓇᐧᑯᐤ ᐊ ᐃᑎᔅᑲᓇᓯᒡ, ᑭᔭ ᓂᓇᐧᑯᐤ ᐊ ᐃᓯ ᐃᔨᒥᒡ᙮

¹⁶ ᐊᓂᔭᔪᐛ ᒪᒃ ᐸᐃᑯᔪᐤ ᐊᔅᑭᓇ ᑲ ᐛᐸᑎᒥᓐ ᑭᔭ ᐊᓐ ᒥᒋ ᐊᐛᓯᔅ, ᒋᑭ ᐊᑎ ᐛᐧᑲᑕᐅᒡ ᐊᓂᔭᔪᐛ ᐃᔎᐛ ᑲ ᐱᓯᒂᑎᓯᔨᒋ᙮ ᒥᓯᐛ ᒋᑭ ᐅᑎᓂᒧᐛᐅᒡ ᑕᓐ ᐊ ᐃᓯ ᐊᔭᔨᒋ᙮ ᒐ ᐊᑎ ᒧᓴᔅᑭᑕᓇᒡ ᑭᔭ ᒋᑭ ᐊᑎ ᒧᐛᐅᒡ ᑭᔭ ᓇᔅᒡ ᒋᑭ ᓂᓱᐅᓇᒋᐊᐅᒡ ᐊ ᐃᔎᔄᒡ᙮

¹⁷ ᐛᔅ ᒋᓴᒪᓂᑐᐛ ᒋ ᐃᑐᑕᑯᒡ ᐅᑕᐃᐛᒡ ᒐᒋ ᐅᒋ ᐃᑕᔨᑕᒡ ᒐᒋ ᐃᑐᑎᒺᒡ ᑕᓐ ᐊ ᐃᓯ ᓂᑐᐛᔨᑎᒥᔨᒋ ᒐᒋ ᐃᑐᑕᑭᓄᐎᒡ᙮ ᐊᑯ ᒪᒃ ᐸᐃᑯᓄᒡ ᑲ ᐃᑕᔨᑎᒥᐃᑯᒡ ᒐ ᒥᔭᒡ ᐊᓂᔭᔪᐛ ᒥᒋ ᐊᐛᓯᓴ ᑕᓐ ᐊ ᐃᓯ ᐊᔭᒡ ᒐᒋ ᐅᒋᒪᐅᒡ᙮ ᒋᑭ ᐱᔅᑕᔨᒥᑎᓱᔅᑐᐛᐅᒡ ᒪᒃ ᐸᑐᔅ ᒥᓯᐛ ᒋ ᑎᐱᐱᔨᒐ ᑕᓐ ᑲ ᐃᓯ ᓂᑲᓐ ᐎᑎᒥᔨᒋ ᒋᓴᒪᓂᑐᐛ ᒐ ᐃᔅᐱᔨᒡ᙮

¹⁸ ᐊᓐ ᒪᒃ ᐃᔎᐤ ᑲ ᐛᐱᒥᑦ, ᐊᐅᒄ ᐛᔅ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᐊᓐᑕ ᐛᒋ ᐅᒋᒪᐧᑲᑐᐛᑭᓄᐎᒡ ᒥᓯᐛ ᒋᓴᐅᒋᒪᐅᒡ ᐅᑕ ᐊᔅᒋᒡ᙮”