ᒋᔅᒐᔨᑕᑯᑕᒐᐅᓐ 16 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊᓂᔭᔪᐛ ᐎᔭᑭᓇ ᑲ ᒧᑕᔭᒂᐤ ᐊᓐᑕ ᐊ ᑎᑯᓂᔨᒡ ᒋᓴᒪᓂᑐᐤ ᐅᑦ ᐊᐧᑯᔪᐛᓱᐅᓐ 1 ᐊᑯ ᑲ ᐸᑐᐅᒃ ᐊᐛᓐ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᐅᒋ ᐸᑕᑯᓯᑦ ᐊ ᐃᔨᒥᑦ᙮ ᒋ ᒋᔄᐛᐤ ᐊᓐ ᐊᐛᓐ᙮ ᒋ ᐃᑕᐤ ᐊᓂᔭᔪᐛ ᓂᔄᐅᑕᒡ ᑲ ᑕᒡ ᐊᓐᒋᓐ, “ᒪᒋᒄ᙮ ᐊᓐᑕ ᐊᔅᒋᒡ ᐃᔅ ᑯᑎᐱᓂᒧᒄ ᐊᓂᔭ ᓂᔄᐅᑕᒡ ᑲ ᒧᑕᔭᒂᐤ ᐎᔭᑭᓇ ᐊᓐᑕ ᐊ ᑎᑯᓂᔨᒡ ᒋᓴᒪᓂᑐᐤ ᐅᑦ ᐊᐧᑯᔪᐛᓱᐅᓐ᙮” 2 ᐊᑯ ᐊᓐ ᓂᔅᑎᒻ ᐊᓐᒋᓐ ᑲ ᑯᑎᐱᓇᐧᒃ ᐊᓂᔭ ᐅᐎᔭᑭᓐ ᐊᓐᑕ ᐃᔅ ᐊᔅᒋᒡ᙮ ᐊᓐᒡ ᒪᒃ ᑲ ᐊᔭᐛᒡ ᐊᓂᔭᔪᐛ ᒥᒋ ᐊᐛᓯᓴ ᐅᒋᔅᒋᓄᐛᒋᒋᑭᓂᔪᐤ ᑭᔭ ᑲ ᒪᒥᒋᒪᒡ ᐊᓂᔭ ᒥᓂᑐᐧᑲᓐ, ᒧᔭᒻ ᐊᓐ ᒥᒋ ᐊᐛᓯᔅ ᐊ ᐃᓯᓇᑯᓯᑦ ᑲ ᐃᓯᐊᑭᓄᔨᒋ ᒋ ᐅᒥᒋᔪᐱᔪᒡ ᓇᔅᒡ ᐊ ᒪᔭᓯᓇᑯᓂᔨᒋ ᑭᔭ ᓇᔅᒡ ᐊ ᐊᐧᑯᐃᑯᒡ ᐊᓂᔭ ᑕᓐ ᑲ ᐃᓯ ᐅᒥᒋᐅᐱᔨᒡ᙮ 3 ᐊᑯ ᒥᓐ ᑯᑎᒃ ᐊᓐᒋᓐ ᒂ ᑯᑎᐱᓇᐧᒃ ᐅᐎᔭᑭᓐ᙮ ᐊᓐᑕ ᐎᓂᐸᑯᒡ ᐊᑯᑕ ᑲ ᐃᓯ ᑯᑎᐱᓇᐧᒃ᙮ ᐊᑯ ᐊᓐ ᓂᐱᔾ ᑲ ᐊᑎ ᓱᐎᐧᑲᑭᒥᒡ ᒧᔭᒻ ᐅᒥᐧᒄ ᐊᐛᓐ ᐊ ᓂᐱᑦ ᐊᑯᓐ ᑲ ᐃᓯᓇᒂᒡ᙮ ᒥᓯᐛ ᒪᒃ ᒐᒂᓐ ᐊᓐᑕ ᐎᓂᐸᑯᒡ ᑲ ᑎᒂᒡ ᒋ ᓂᐱᒥᑭᓐ᙮ 4 ᐊᑯ ᐊᓐ ᓂᔅᑐ ᐊ ᑕᑦ ᐊᓐᒋᓐ ᒂ ᑯᑎᐱᓇᐧᒃ ᐅᐎᔭᑭᓐ ᐊᓐᑕ ᐊ ᑎᑯᓂᔨᒋ ᓯᐱᔭ ᑭᔭ ᐊᓐᑕ ᐛᒋ ᒧᔅᒋᒍᐅᓂᔨᒡ ᓂᐱᔪᐤ᙮ ᒥᓯᐛ ᒪᒃ ᒋ ᐊᑎ ᓱᐎᐧᑲᑭᒥᔪᐤ ᐊᓂᔭ ᓂᐱᔪᐤ᙮ 5 ᓂᒋ ᐸᑐᐛᐤ ᒪᒃ ᐊᓐ ᐊᓐᒋᓐ ᒥᓯᐛ ᓂᐱᔪᐤ ᑲ ᐅᒋᒪᐧᑲᑕᐧᒃ ᐊ ᐃᔅᒋᔄᑦ ᐊ ᒪᒥᒋᒪᑦ, ᒋᓴᒪᓂᑐᐛ, “ᓇᔅᒡ ᑯᐃᔅᒄ ᒋᑦ ᐃᑎᓐ ᐅ ᑲ ᐃᓯ ᑎᐸᔅᑯᓂᒐᔨᓐ, ᒋᔾ ᒥᒄ ᒋ ᐸᔭᒋᓯᔨᓐ, ᒋᔾ ᑲ ᑕᔨᓐ ᑭᔭ ᒧᔅ ᑲ ᐸᒋ ᑕᔨᓐ᙮ 6 ᐛᔅ ᓇᐸᐛ ᒋ ᓂᐸᐃᑯᐅᒡ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᐊᓐᒡ ᑲ ᑕᑈᑕᒡ᙮ ᐊᑯ ᒪᒃ, ᒋᔾ ᒋᓴᒪᓂᑐᐤ, ᒥᔨᒡ ᒥᐧᑯᔪᐤ ᒐᒋ ᒥᓂᒡ ᐊᓐᒡ ᐊᐛᓐᒋ ᑲ ᓂᐸᐊᒡ ᐅᔭ᙮ ᐃᑕᔨᑕᑯᓂᔪᐤ ᒪᒃ ᐅᔭ ᒐᒋ ᐃᑐᑐᐅᑥᐤ ᐊᓂᔭ ᐊᒋ ᐸᒋ ᐃᑎᒡ᙮” 7 ᐊᑯ ᐊᓐᑕ ᐱᔅᑎᓂᒐᐅᓇᐱᔅᒄ ᐊ ᑎᒂᒡ, ᐊᑯᑕ ᒂ ᐅᒋ ᐸᑐᐅᒃ ᐊᐛᓐ ᐊ ᐃᔅᒋᔄᑦ, “ᐅᑎᐸᔨᒋᒐᐤ ᒋᓴᒪᓂᑐᐤ, ᒋᔾ ᒪᐅᒡ ᑲ ᓱᐧᑲᑎᓯᔨᓐ᙮ ᑕᑈ ᑯᐃᔅᒄ ᒋ ᐊᑎ ᐃᓯ ᑎᐸᔅᑯᓇᐅᒡ ᐊᐛᓐᒋ ᐊ ᑎᐸᔅᑯᓂᑥᐤ᙮ ᑕᑈ ᐃᑕᔨᑕᑯᓂᔪᐤ ᑭᔭ ᒐᒋ ᑎᐸᔅᑯᓂᑥᐤ᙮” 8 ᐊᑯ ᐊᓐ ᓇᐤ ᐊ ᑕᑦ ᐊᓐᒋᓐ ᐱᓯᒺ ᒂ ᐃᓯ ᑯᑎᐱᓇᐧᒃ ᐅᐎᔭᑭᓐ᙮ ᐱᓯᒻ ᒋ ᐱᔅᑎᓇᑭᓄᐤ ᒐᒋ ᐃᔎᔄᑦ ᐊᐛᔪᐛ ᓇᔅᒡ ᐊ ᐃᔅᐱᔅ ᐎᓯᑲᔅᑐᐛᑦ᙮ 9 ᒋ ᐃᔎᓱᐅᒡ ᒪᒃ ᐊᐛᓐᒋ ᐊ ᐃᔅᐱᔅ ᐎᓯᑲᔅᑐᐛᔨᒋ ᐱᓯᒺ᙮ ᐊᑯ ᒂ ᐸᔅᑕᒪᒡ ᒋᓴᒪᓂᑐᐛ ᐊᓂᔭᔪᐛ ᑲ ᐊᔭᔨᒋ ᑎᐸᔨᒋᒐᐅᓂᔪᐤ ᐅᔭ ᒐᒋ ᐃᓯ ᓂᓇᐧᑲᑕᔨᒧᓇᓄᐎᒡ᙮ ᒥᒄ ᒪᒃ ᓇᒪ ᐊᐛᓐ ᐅᒋ ᒋᔅᑕᒋᒪᐤ ᒋᓴᒪᓂᑐᐛ ᑭᔭ ᓇᒪ ᐅᒋ ᒂᔅᑲᑎᓯᐤ᙮ 10 ᐊᑯ ᐊᓐ ᐱᑕᑕᒡ ᐊ ᑕᑦ ᐊᓐᒋᓐ, ᒂ ᑯᑎᐱᓇᐧᒃ ᐅᐎᔭᑭᓐ ᐊᓐᑕ ᐃᔅ ᐊᓂᔭ ᒥᒋ ᐊᐛᓯᓴ ᐅᒋᓴᐅᒋᒪᐤ ᑕᑎᐳᐛᑭᓂᔨᒡ᙮ ᒋ ᑎᐱᔅᒋᐱᔪᐤ ᒪᒃ ᐊᓐᑕ ᐊᓐ ᒥᒋ ᐊᐛᓯᔅ ᐅᒋᒪᐤ ᐅᑦ ᐊᔅᒋᒡ᙮ ᒋ ᒪᒪᒂᑎᒧᒡ ᐊᐛᓐᒋ ᐅᑕᔨᔪᐛᐛ ᐊᔅᐱᔅ ᐎᓯᒐᔨᑕᒡ 11 ᐊᑯ ᒂ ᐸᔅᑕᒪᒡ ᒋᓴᒪᓂᑐᐛ ᒋᒋᒋᓯᑯᒡ ᐊ ᑕᔨᒋ ᐊᓂᔭ ᐊ ᐎᓯᒐᔨᑕᒡ ᑭᔭ ᐊᐅᒥᒋᒡ ᐅᒡ᙮ ᒥᒄ ᒪᒃ ᓇᒪ ᐃᔭᐱᒡ ᐅᒋ ᒂᔅᑲᑎᓯᐅᒡ᙮ 12 ᐊᑯ ᐊᓐ ᐊᓱᑕᒡ ᐊ ᑕᑦ ᐊᓐᒋᓐ ᒂ ᑯᑎᐱᓇᐧᒃ ᐅᐎᔭᑭᓐ᙮ ᐊᓐᑕ ᐊᓂᔭ ᓯᐱᔪᐤ ᔪᑉᕆᑎᔅ ᐊ ᐃᓯᓂᐧᑲᑕᔨᒡ, ᐊᑯᑕ ᑲ ᐃᓯ ᑯᑎᐱᓇᐧᒃ ᐊᓂᔭ ᐅᐎᔭᑭᓐ᙮ ᐊᑯ ᐊᓐ ᓯᐱᔾ ᒂ ᐸᒂᐱᔨᒡ ᒥᒄ ᒐᒋ ᐃᓯ ᐊᓱᐅᑕᒡ ᐊᓐᑕ ᐊᓐᒡ ᒋᓴᐅᒋᒪᐅᒡ ᐛᐱᓄᑕᒡ ᒐ ᐅᑐᑕᒡ, ᐊᓐᒡ ᒐ ᐸᒋ ᓂᑐᐱᔨᒡ᙮ 13 ᓂᒋ ᐛᐱᒪᐅᒡ ᒪᒃ ᓂᔅᑐ ᒥᒋ ᐊᒐᐧᑯᒡ ᓇᔅᒡ ᐊ ᐎᓇᔨᑕᑯᓯᒡ, ᒧᔭᒻ ᐃᔨᑭᒡ ᐊ ᐃᓯᓇᑯᓯᒡ᙮ ᐸᐃᒄ ᐊᓐ ᐊᓂᔭᔪᐛ ᒥᔅᑎ ᒥᓐᑐᓴ ᐅᑐᓂᔨᒡ ᒋ ᐅᒋ ᐎᐎᐱᔪᐤ, ᐊᑯ ᑯᑎᒃ ᐊᓂᔭᔪᐛ ᒥᒋ ᐊᐛᓯᓴ ᐅᑐᓂᔨᒡ, ᐊᑯ ᐊᓐ ᓂᔅᑐ ᐊ ᑕᑦ ᐊᓂᔭᔪᐛ ᒥᒋ ᐅᒋᔅᒋᐛᐃᒐᓱᐛ ᐅᑐᓂᔨᒡ ᐊᑯᑕ ᑲ ᐅᒋ ᐎᐎᐱᔨᑦ᙮ 14 ᐛᔅ ᐊᐅᑯᓐᒡ ᐅᒡ ᒥᒋ ᐊᒐᐧᑯᒡ ᒪᒥᔅᑲᒡ ᑲ ᐃᑎᒡ᙮ ᒥᓯᐛ ᐊ ᑕᑎᓯᔨᒡ ᒋᓴᐅᒋᒪᐛ ᐅᑕ ᐊᔅᒋᒡ ᒪᒧᓇᐅᒡ ᒐᒋ ᐸᒋ ᒪᓯᒐᔨᒋ ᐅᑎᒋᐱᔨᒐ ᐊᓂᔭ ᒋᓴᒪᓂᑐᐛ ᒪᐅᒡ ᑲ ᓱᐧᑲᑎᓯᔨᒋ ᑲ ᒋᔅᑕᔨᑕᑯᓂᔨᒡ ᐅᒋᓯᑲᒥᔪᐤ᙮ 15 ᐅᑎᐸᔨᒋᒐᐤ ᒪᒃ ᐃᔅᒋᔄᐤ, “ᒧᔭᒻ ᑲᒋᒧᑎᑦ ᐊ ᐃᑕᔨᑕᑯᓂᔨᒡ ᐊ ᑎᑯᓯᐧᒃ ᐊᐅᑯᓐ ᒐ ᐃᑕᔨᑕᒂᒡ ᓂᔾ ᑎᑯᓯᓂᔭᓇ᙮ ᒋᑭ ᓱᐛᔨᑕᑯᓱᐤ ᒪᒃ ᐊᓐ ᐊᐛᓐ ᒐ ᐊᑲ ᑯᐎᐧᑯᓯᑦ ᐊ ᐎᓂᐸᑦ ᒪᒂᒡ ᐊ ᐊᓱᐛᐱᑦ ᑭᔭ ᒐ ᐊᔭᔅᑯᔅᑕᒂ ᐅᑦ ᐊᐱᒋᑕᐅᓇ ᒥᒄ ᒐᒋ ᐃᓯ ᐳᔅᑎᔅᑲᐧᒃ ᑭᔭ ᓇᒪ ᒋᑭ ᐅᒋ ᒧᓴᔅᑭᑕᐤ ᐎᐎᒐ ᒐᒋ ᓯᓴᒂᔨᒧᑦ ᒧᓴ ᐊᓐᑕ ᐊ ᐛᐱᒪᑭᓄᐅᑦ᙮” 16 ᐊᓐᒡ ᒪᒃ ᒥᒋ ᐊᒐᐧᑯᒡ ᒋ ᒪᒧᓇᐅᒡ ᐊᓂᔭ ᒋᓴᐅᒋᒪᐛ ᐊᓐᑕ ᐊᓂᔭ ᐱᔅᑯᑎᓇᔪᐤ ᐊᕐᒪᑲᑎᓐ ᑲ ᐃᓯᓂᐧᑲᑕᔨᒡ ᐃᑉᕈᐤ ᐊ ᐃᓯ ᐃᔨᒥᓇᓄᐅᒡ᙮ 17 ᐊᑯ ᐊᓐ ᓂᔄᐅᑕᒡ ᐊ ᑕᑦ ᐊᓐᒋᓐ, ᒂ ᑯᑎᐱᓇᐧᒃ ᐊᓂᔭ ᐅᐎᔭᑭᓐ ᐊᓐᑕ ᒧᓴ ᒋᓯᑯᒡ ᐃᔅ᙮ ᒋ ᐅᒋ ᐃᔨᒧᐤ ᒪᒃ ᐊᐛᓐ ᐊᓐᑕ ᒋᓴᐅᒋᒪᐤ ᑕᑎᐳᐛᑭᓂᒡ ᐱᑎᑭᒥᒡ ᒋᓴᐊᔭᒥᐊᐅᒋᐛᐱᒡ ᐊ ᑎᑯᓂᔨᒡ ᐊ ᐅᒋ ᐸᑕᑯᓯᑦ᙮ ᒋ ᒋᔄᐛᐤ ᐊ ᐃᔅᒋᔄᑦ, “ᓴᔅ ᒪᒃ ᒋᔅᑕᑭᓄᐤ᙮” 18 ᒋ ᐅᒋ ᐅᔄᔅᑕᐱᔪᐤ ᒪᒃ᙮ ᒋ ᐸᑕᑯᓂᔪᐛ ᐅᐸᑕᑯᓱᐅᓄᐛᐛ ᐊᐛᓐᒋ᙮ ᓂᒥᔅᒍᐅᒡ ᒋ ᐸᑕᑯᓱᐅᒡ᙮ ᑭᔭ ᒋ ᒥᔅᑎ ᑯᐃᐧᑯᓐ᙮ ᓇᒪ ᓂᑕ ᐅᒋ ᑎᑯᓐ ᐊ ᐃᑕᔨᑕᒂᒡ ᐊ ᑯᐃᒂᒡ ᑲ ᐃᔅᐱᔅ ᐸᒋ ᐱᒪᑎᓯᒡ ᐊᐛᓐᒋ᙮ ᐊᐅᒄ ᐅ ᒋᒋᐛ ᑲ ᑯᔅᑕᑎᒂᒡ ᐊ ᑯᐃᒂᒡ᙮ 19 ᐊᑯ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᐸᐱᓗᓐ ᑲ ᐃᓯᓂᐧᑲᑕᒡ, ᓂᔅᑐᔨᒡ ᒂ ᐃᓯ ᐸᒂᐱᔨᒡ᙮ ᒥᓯᐛ ᐅᑕᓇᐛ ᐊᔅᒋᒡ ᑲ ᑎᒂᒋ ᒋ ᓂᓱᐅᓇᑎᓇ᙮ ᒋᓴᒪᓂᑐᐤ ᒪᒃ ᓇᒪ ᐅᒋ ᐅᓂᒋᔅᒋᓯᑐᑎᒻ ᐊᓂᔭ ᐅᑕᓇᔪᐤ ᐸᐱᓗᓐ ᑲ ᐃᓯᓂᐧᑲᑕᔨᒡ᙮ ᒋ ᐃᑐᑐᐛᐤ ᐊᓂᔭ ᐊᐛᔪᐛ ᐊᓐᑕ ᐊ ᑕᔨᒋ ᒐᒋ ᒥᓂᔨᒋ ᐊᓂᔭ ᓱᒥᓇᐳᔪᐤ ᐊᓐᑕ ᐅᒥᓂᒂᑭᓂᒡ ᐅᒡ᙮ ᐊᐅᒄ ᐅᔭ ᒥᓂᒂᑭᓂᔪᐤ ᐊᓐᑕ ᐊ ᑎᑯᓂᔨᒡ ᐅᑦ ᐊᐧᑯᔪᐛᓱᐅᓐ᙮ 20 ᒥᓯᐛ ᒥᓂᔅᑎᒂ ᑭᔭ ᐱᔅᑯᑎᓇᐛ ᒋ ᐸᓯᑯᓇᑯᓇ᙮ 21 ᐊᑯ ᒪᒃ ᑲ ᒥᔅᑎ ᒥᔅᑯᒥᐅᑎᒡ᙮ ᐊᓐᒡ ᒪᒃ ᒥᔅᑯᒥᔨᒡ ᑲ ᐸᐸᒋᓯᓂᒡ ᓴᓯᑲᓐ ᐸᐃᑯ ᒥᑕᓯᒥᑎᓄᐤ ᑎᐸᐸᑲᐃᑭᓇ ᒋ ᐃᔅᐱᔅ ᑯᓯᑯᑐᐅᒡ᙮ ᒋ ᐱᑎᑯᔅᑲᑯᐅᒡ ᒪᒃ ᐊᐛᓐᒋ ᐅᑕ ᐊᔅᒋᒡ ᐊᓂᔭᔪᐛ ᒥᔅᑯᒥᔭ ᒋᓯᑯᒡ ᑲ ᐅᒋ ᐸᒋᓯᓂᔨᒋ᙮ ᐊᓐᒡ ᒪᒃ ᐊᐛᓐᒋ ᒋ ᐸᔅᑕᒪᐅᒡ ᐊ ᐃᔅᐱᔅ ᒥᔅᑎ ᒋᔄᐃᑯᒡ ᒋᓴᒪᓂᑐᐛ ᑕᓐ ᑲ ᐃᓯ ᓂᓇᐧᑲᑕᔨᒧᐃᑯᒡ ᐊᓂᔭ ᐊ ᒋᐧᑭᐧᑯᐱᔨᒡ, ᐛᔅ ᓇᔅᒡ ᑕᑈ ᒋ ᓂᓇᐧᑲᑕᔨᒧᒡ ᒪᒂᒡ ᐅᔭ ᑲ ᐃᔅᐱᔨᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.