ᒋᔅᒐᔨᑕᑯᑕᒐᐅᓐ 14 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᓴᒪᓂᑐᐤ ᐅᑦ ᐃᔨᒪ ᑲ ᓂᑭᒧᔨᒋ ᐊᓐᑕ ᒋᒋᒋᓯᑯᒡ 1 ᐃᔅᐱ ᒥᓐ ᑲ ᐃᑕᐱᔭᓐ ᓂᒋ ᐛᐱᒪᐤ ᐊᓐ ᒪᔭᑕᓂᔅ ᐊᓐᑕ ᐊᓂᔭ ᐱᔅᑯᑎᓇᔪᐤ ᓴᐃᔭᓐ ᑲ ᐃᓯᓂᐧᑲᑕᔨᒡ ᐊ ᓂᐳᐅᑦ᙮ ᐸᐃᑯ ᒥᑕᓯᒥᑎᓄᐤ ᐊᓱ ᓇᐎᔪᐤ ᐊᓱ ᓇᐛᐤ ᒐᓯᐱᔪᐤ ᒋ ᑕᑎᓯᔪᐛ ᐊᐛᔪᐛ ᐊᓐᑕ ᐊ ᑕᑦ᙮ ᐊᓂᔭᔪᐛ ᒪᒃ ᐊᐛᔪᐛ ᐅᔅᑲᑎᑯᐎᒡ ᒋ ᒥᓯᓇᑕᔪᐤ ᐊᓂᔭᔪᐛ ᒪᔭᑕᓂᓴ ᐅᑦ ᐃᓯᓂᐧᑲᓱᐅᓂᔪᐤ ᑭᔭ ᒋᓴᒪᓂᑐᐛ ᐅᑕᐎᒪᐛ ᐅᑦ ᐃᓯᓂᐧᑲᓱᐅᓂᔪᐤ᙮ 2 ᐊᑯ ᒂ ᐸᑎᒪᓐ ᐸᑕᑯᓱᐅᓐ ᒋᒋᒋᓯᑯᒡ ᐊ ᐅᒋ ᐃᔨᒥᑦ ᐊᐛᓐ ᒧᔭᒻ ᓂᐱᔾ ᐊ ᒥᔅᑎ ᑭᔅᒋ ᐸᒋᑎᒡ ᐊ ᐃᑎᑕᒂᒡ ᑭᔭ ᒧᔭᒻ ᓂᒥᔅᒍᐅᒡ ᐊ ᒋᔅᑐᒡ ᐊ ᐃᑎᑕᒂᒡ᙮ ᐊᓐ ᐸᑕᑯᓱᐅᓐ ᑲ ᐸᑎᒪᓐ, ᒧᔭᒻ ᐊ ᐃᑎᑕᑯᓂᔨᒡ ᐊᐛᓐᒋ ᐊ ᒪᑐᐛᒡ ᐊᓂᔭᔪᐛ ᑲ ᒥᔪᑕᑯᓂᔨᒋ ᐊᔭᒥᐊᐤ ᒋᔍᐛᐱᒋᑭᓇ, ᐊᑯᓐ ᑲ ᐃᑎᑕᒂᒡ᙮ 3 ᓂᒋ ᐛᐱᒪᐅᒡ ᒪᒃ ᐊᓐᒡ ᐸᐃᑯ ᒥᑕᓯᒥᑎᓄᐤ ᐊᓱ ᓇᐎᔪᐤ ᐊᓱ ᓇᐛᐤ ᒐᓯᐱᔪᐤ ᐊ ᐃᑕᑎᓯᒡ ᐊᐛᓐᒋ ᐊ ᐅᑎᔅᑯᑲᐳᔅᑎᒺᒡ ᒋᓴᒪᓂᑐᐛ ᐅᒋᓴᐅᒋᒪᐤ ᑕᑎᐳᐛᑭᓂᔪᐤ ᑭᔭ ᐊᓂᔭᔪᐛ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᔨᒋ ᒋᓴᐃᔪᐛ ᐊ ᐅᑎᔅᑯᑲᐳᔅᑐᐛᒡ ᑭᔭ ᐊᓂᔭ ᑲ ᓇᐎᔨᒋ ᑲ ᐱᒪᑎᓯᔨᒋ ᐊᐛᔪᐛ᙮ ᐊ ᐅᔅᑲᔨᒡ ᓂᑭᒧᐅᓂᔪᐤ ᒋ ᓂᑭᒧᐅᒡ᙮ ᓇᒪ ᒪᒃ ᑯᑎᑲ ᐊᐛᔪᐛ ᒋᑭ ᒋ ᒋᔅᒐᔨᑎᒥᔪᐛ ᐊᓂᔭ ᓂᑭᒧᐅᓂᔪᐤ ᑲ ᓂᑭᒧᐅᒡ, ᒥᒄ ᐎᔨᐛᐤ ᐊᓐᒡ ᐸᐃᑯ ᒥᑕᓯᒥᑎᓄᐤ ᐊᓱ ᓇᐎᔪᐤ ᐊᓱ ᓇᐛᐤ ᒐᓯᐱᔪᐤ ᐊ ᐃᑕᑎᓯᒡ᙮ ᐛᔅ ᐊᐅᑯᓐᒡ ᐅᒡ ᑲ ᐱᒪᒋᐃᑯᒡ ᒋᓴᒪᓂᑐᐤ ᐊᔅᒋᒡ ᐅᒡ᙮ 4 ᐊᐅᑯᓐᒡ ᐅᒡ ᐊᑲ ᐅᒋ ᐎᓂᐃᑯᒡ ᐃᔎᐛ, ᐸᔭᒋᓯᐅᓂᒡ ᑲ ᐃᓯ ᑭᓄᐛᔨᒥᓱᒡ᙮ ᒧᔅ ᓇᓴᐛᐅᒡ ᐊᓂᔭᔪᐛ ᒪᔭᑕᓂᓴ ᑕᓐᑕ ᒥᒄ ᐊ ᐃᑐᑕᔨᒋ᙮ ᒋ ᐱᒪᒋᐊᑭᓄᐅᒡ ᐊᔅᒋᒡ ᐅᒡ ᐎᔨᐛᐤ ᒪᒃ ᓂᔅᑎᒻ ᒋ ᐱᔅᑎᓇᑭᓄᐎᒡ ᒋᓴᒪᓂᑐᐛ ᑭᔭ ᒪᔭᑕᓂᓴ ᐊ ᑕᔨᒋ᙮ 5 ᓇᒪ ᓂᑕ ᐅᒋ ᑭᑭᒋᔭᐅᒡ, ᐊᑲ ᓂᑕ ᐅᒋ ᐅᓂᔨᑎᒡ ᐃᓯ ᑭᓄᐛᐱᒥᑯᐅᒡ ᒋᓴᒪᓂᑐᐛ᙮ ᑲ ᓂᔅᑎᒡ ᐊᓐᒋᓐᒡ 6 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᓇᔅᒡ ᐊ ᐃᔅᐸᐅᑦ ᐃᔅᐱᒥᒡ ᐊᓐᑕ ᐊ ᐱᒥᔭᑦ, ᐊ ᐸᒋ ᐛᐎᑎᒧᐛᑦ ᐊᓂᔭᔪᐛ ᐊᔅᒋᒡ ᐊ ᑕᔨᒋ ᒥᔪ ᑎᐸᒋᒧᐅᓂᔪᐤ ᒧᔅ ᒐ ᑕᑈᒥᑭᓂᔨᒡ᙮ ᒥᓯᐛ ᐊᐛᔪᐛ ᒋᑭ ᐎᑎᒧᐛᐤ, ᒥᓯᐛ ᐃᑎᔅᑲᓇᓯᔨᒋ, ᒥᓯᐛ ᐊ ᐃᓯ ᐃᔨᒥᔨᒋ, ᓂᓇᐧᑯᐤ ᐊ ᐃᓯ ᒪᒧᑕᐅᓯᔨᒋ᙮ 7 ᒋ ᐃᔅᒋᔄᐤ ᐊᓐ ᐊᓐᒋᓐ ᐊ ᒋᔄᐛᑦ, “ᒪᒥᒋᒪᐧᒄ ᒋᓴᒪᓂᑐᐤ ᑭᔭ ᒋᔅᑕᔨᒪᐧᒄ᙮ ᐛᔅ ᓴᔅ ᐅᑎᒋᐱᔪᐤ ᐊᓐᑕ ᒐ ᑎᐸᔅᑯᓇᑦ ᒥᓯᐛ ᐊᐛᔪᐛ᙮ ᐊᔭᒥᐊᔅᑐᐛᐧᒄ ᐊᓐ ᑲ ᐅᓯᑕᑦ ᒋᒋᒋᓯᑯᔪᐤ, ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᐊ ᐅᒋ ᒧᔅᒋᒍᐅᓂᔨᒡ ᓂᐱᔪᐤ᙮” 8 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᐊ ᐅᒋ ᐱᒥᔭᑦ ᑭᔭ ᐎᔾ ᓇᔅᒡ ᐊ ᐃᔅᐸᐅᑦ ᐃᔅᐱᒥᒡ ᐊᓐᑕ ᐊ ᐱᒥᐃᔭᑦ᙮ ᒋ ᐃᔅᒋᔄᐤ ᐅ ᐊᓐᒋᓐ, “ᐊᓐ ᓇᔅᒡ ᑲ ᒋᔅᑕᔨᑕᒂᒡ ᐅᑕᓇᐤ ᐸᐱᓗᓐ ᑲ ᐃᓯᓂᐧᑲᑕᒡ ᓇᔅᒡ ᒋ ᓂᓱᐅᓇᒋᑕᑭᓄᐤ᙮ ᐛᔅ ᐊᑯᑕ ᐊᓐ ᐅᑕᓇᐤ ᓇᔅᒡ ᑲ ᐛᑎᒡ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᐊᑲ ᓇᔅᒡ ᒐᒋ ᓇᑲᐎᔅᑕᒡ ᐎᓂᓱᐤ ᐱᒪᑎᓯᐅᓂᔪᐤ ᒧᔭᒻ ᑲ ᐃᑎᔨᒋ ᐊᓐᑕ ᐊ ᑕᔨᒋ᙮ ᐊᓂᔭ ᒪᒃ ᑲ ᐃᑐᑐᐛᒡ ᒧᔭᒻ ᐊ ᒥᓇᐊᒡ ᐊ ᓱᒋᓯᒥᑭᓂᔨᒡ ᓱᒥᓇᐳᔪᐤ ᐃᓯᓇᑯᓂᔪᐤ᙮” 9 ᒥᓐ ᑯᑎᒃ ᐊᓐᒋᓐ ᒋ ᐅᒋ ᐱᒥᔭᐤ ᓇᔅᒡ ᐊ ᐃᔅᐸᐅᑦ ᐃᔅᐱᒥᒡ ᐊᓐᑕ ᐊ ᐃᓯ ᐱᒥᔭᑦ᙮ ᐊᑯ ᒪᒧᐤ ᓂᔅᑐ ᐊᓐᒋᓐᒡ ᒂ ᓄᑯᓯᒡ᙮ ᐊᑯ ᐅ ᓂᔅᑐ ᐊ ᑕᑦ ᐊᓐᒋᓐ ᒂ ᐃᔅᒋᔄᑦ ᐊ ᒋᔄᐛᑦ, “ᐊᓐ ᐊᐛᓐ ᒐ ᐊᔭᒥᐊᔅᑐᐛᒂ ᐊᓂᔭᔪᐛ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᓂᑐᐧᑲᓇ, ᒧᔭᒻ ᐊᓐ ᒥᒋ ᐊᐛᓯᔅ ᐊ ᐃᓯᓇᑯᓯᑦ ᑲ ᐃᓯᐊᑭᓄᔨᒋ ᑭᔭ ᒐ ᐱᔅᑎᓂᓱᒂ ᒐᒋ ᒋᔅᒋᓄᐛᒋᐊᑭᓄᐅᑦ ᐅᔅᑲᑎᑯᒡ ᒪᒃ ᐅᑎᒋᒡ, 10 ᒋᑭ ᒧᓯᑕᐛᐤ ᑕᓐ ᐊ ᐃᓯ ᒋᔄᐊᑦ ᒋᓴᒪᓂᑐᐛ᙮ ᐊᓂᔭ ᒪᒃ ᒐ ᐃᓯ ᒧᓯᑕᐛᑦ ᐊ ᒋᔄᐊᑦ ᒋᓴᒪᓂᑐᐛ, ᒧᔭᒻ ᐊᐛᓐ ᐊ ᒥᓂᐊᑭᓄᐅᑦ ᓱᒥᓇᐳᔪᐤ ᒋᑭ ᐃᑕᔨᑕᑯᓂᔪᐤ᙮ ᐅᔭ ᒪᒃ ᐅᒋᔄᓱᐅᓐ ᒋᓴᒪᓂᑐᐤ, ᓇᔅᒡ ᒋ ᐃᓯ ᑯᑎᐱᓂᒺᐤ ᐊᓐᑕ ᐊᓂᔭ ᒥᓂᒂᑭᓂᔪᐤ ᐊᓐᑕ ᐊ ᐃᓯᓇᑯᓂᔨᒡ ᐊ ᑎᑯᓂᔨᒡ ᐅᑦ ᐊᐧᑯᔪᐛᓱᐅᓐ᙮ ᒥᓯᐛ ᒪᒃ ᐊᓐᒡ ᒐ ᐊᔭᒥᐊᔅᑐᐛᐛᒂ ᐊᓂᔭᔪᐛ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᒋ ᐊᐛᓯᔅ ᒥᓂᑐᐧᑲᓇ ᑭᔭ ᒐ ᐱᔅᑎᓂᓱᐛᒂ ᒐᒋ ᒋᔅᒋᓄᐛᒋᐊᑭᓄᐎᒡ ᐅᔅᑲᑎᑯᐛᒡ ᒪᒃ ᐅᑎᒋᐛᒡ ᒋᑭ ᓂᓇᐧᑲᑕᔨᒧᐊᑭᓄᐎᒡ ᐃᔅᑯᑕᔪᐤ ᑭᔭ ᐃᓴᑯ ᐊᓯᓂᔭ ᑲ ᐎᓂᒪᓱᔨᒋ ᐊ ᐃᔎᓯᑭᓄᔨᒋ ᐊ ᐊᑐᔅᒐᔨᒋ ᐅᑎᔅᑯᐤ ᐊᓂᔭᔪᐛ ᒪᔭᑕᓂᓴ ᑭᔭ ᐊᓂᔭᔪᐛ ᐅᑦ ᐊᓐᒋᓂᒥᔪᐛ ᑲ ᐸᔭᒋᓯᔨᒋ ᐊ ᑕᔨᒋ᙮ 11 ᐊᓂᔭ ᒪᒃ ᐊ ᐊᒂᐸᑕᔨᒡ ᐊᓂᔭ ᐃᔅᑯᑕᔪᐤ, ᒋᑭ ᓂᓇᐧᑲᑕᔨᒧᐃᑯᐅᒡ ᑲᒋᒡ ᒋᑭ ᐅᒋ ᐅᐸᐸᑕᐱᔪᐤ᙮ ᓇᒪ ᒪᒃ ᓂᑕ ᒋᑭ ᐅᒋ ᑎᑯᓂᔪᐤ ᑕᓐᑕ ᒐ ᐃᔅᑕᐱᔨᒡ ᐊᓂᔭ ᐊ ᓂᓇᐧᑲᑕᔨᒧᒡ ᐅᒡ ᑲ ᐊᔭᒥᐊᔅᑐᐛᒡ ᐅᔭ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᒋ ᐊᐛᓯᔅ ᒥᓂᑐᐧᑲᓇ᙮ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᒋᑭ ᓂᓇᐧᑲᑕᔨᒧᐅᒡ᙮” 12 ᐊᑯᑕ ᐅ ᐛᒋ ᓂᑐᐛᔨᑕᑯᓯᒡ ᑲ ᑕᑈᑕᒡ, ᐊᓐᒡ ᑲ ᓂᓇᐃᑎᒺᒡ ᐅᐎᓱᐛᐅᓂᔪᐤ ᑭᔭ ᐊᑲ ᐳᓂᒡ ᐊ ᑕᑈᔭᔨᒪᒡ ᒋᓴᓴ ᒐ ᐊᑲ ᒋ ᓄᑎ ᐳᓂᒡ ᐅᔭ ᐊ ᐃᑎᒡ᙮ 13 ᒥᓐ ᒐᒂᓐ ᑲ ᐃᔅᐱᔨᒡ᙮ ᓂᒋ ᐸᑐᐛᐤ ᐊᐛᓐ ᒋᒋᒋᓯᑯᒡ ᐊ ᐅᒋ ᐃᔨᒥᑦ᙮ ᒪᐅ ᑲ ᐃᔅᒋᔄᑦ, “ᒥᓯᓇᐊ ᐅ᙮ ᐅᑕ ᐃᔅ ᓂᔅᑕᒥᒡ ᓱᐛᔨᑕᑯᓱᐅᒡ ᐊᓐᒡ ᒐ ᓂᐱᒡ ᐊᔅᒄ ᐊ ᐎᒐᐛᒡ ᒋᓴᓴ᙮” ᐊᑯ ᑲ ᐸᔭᒋᓯᑦ ᐊᒐᐧᒄ ᒂ ᐃᔅᒋᔄᑦ, “ᓂᐦᐃ, ᑕᑈ ᓱᐛᔨᑕᑯᓱᐅᒡ᙮ ᒋ ᐊᔨᒥᐅᐅᒡ ᐊ ᓇᓴᐛᒡ ᒋᓴᓴ ᑭᔭ ᐊᑯ ᒐ ᐊᔽᐱᒡ᙮ ᑕᓐ ᐊ ᐃᓯ ᒪᒧᐤ ᑭᓄᐛᐸᑕᑭᓄᔨᒋ ᑲ ᐃᓯ ᐸᒋ ᐊᐱᒋᐃᑯᒡ ᒋᓴᒪᓂᑐᐤ ᒋᑭ ᐎᒐᐅᑯᒡ᙮” ᑕᓐ ᒐ ᐃᑕᔨᑕᒂᒡ ᐊᓐ ᐊ ᒋᓯᑲᒡ ᑎᐸᔅᑯᓇᑭᓄᑥᐛ ᐊᐛᓐᒋ 14 ᒥᓐ ᒂ ᐃᑕᐱᔭᓐ, ᐊᑯ ᒂ ᐛᐱᒥᒃ ᐊ ᐛᐱᓯᑦ ᑭᔅᑯᐅᓂᔅᒄ᙮ ᓂᒋ ᐛᐱᒪᐤ ᒪᒃ ᐊᐛᓐ ᐊ ᑕᑎᐱᑦ ᐊᓂᔭᔪᐛ ᑭᔅᑯᐅᓂᔎ ᒧᔭᒻ ᐃᔪᐤ ᐅᑯᓯᓴᓇ ᐊ ᐃᓯᓇᑯᓯᑦ᙮ ᐊ ᐎᔄᐅᓱᓇᔭᐱᔅᑯᔨᒡ ᒋᓴᐅᒋᒪᐅᑯᓂᔎᐅᓂᔪᐤ ᒋ ᒋᔅᑭᒻ ᐊᓐ ᐊᐛᓐ᙮ ᐊ ᑲᓴᔨᒡ ᒥᔅᑯᓯᐅ-ᒧᐧᑯᒪᓂᔪᐤ ᒋ ᑕᐧᑯᓂᒻ᙮ 15 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ᙮ ᐅ ᐎᔾ ᐊᓐᒋᓐ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ ᒋᒋᒋᓯᑯᒡ ᐊ ᑎᑯᓂᔨᒡ, ᐊᑯᑕ ᑲ ᐅᒋ ᐎᐎᑦ᙮ ᐊᑯ ᒂ ᐃᑕᑦ ᐊᓂᔭᔪᐛ ᑭᔅᑯᐅᓂᔅᑯᒡ ᑲ ᑕᑎᐱᔨᒋ, “ᐅᑎᓇ ᐊᓐ ᒋᒥᔅᑯᓯᐅ-ᒧᐧᑯᒪᓐ, ᒐ ᑭᒐᒥᓯᒥᓐ ᓂᑕᐅᒋᑕᑭᓇ ᐛᔅ ᓴᔅ ᐅᑎᒋᐱᔪᐤ ᒐᒋ ᒪᒧᓴᒋᓂᑭᓄᐅᒋ᙮ ᓴᔅ ᓇᔅᒡ ᒋ ᐃᓯ ᓂᑕᐅᒋᓇ᙮” ᒋ ᒋᔄᐛᐤ ᐊᓂᔭ ᐊ ᐃᔅᒋᔄᑦ ᐊᓐ ᐊᓐᒋᓐ᙮ 16 ᐊᑯ ᐊᓐ ᑲ ᑕᑎᐱᑦ ᐊᓂᔭᔪᐛ ᑭᔅᑯᐅᓂᔎ, ᑲ ᐛᐱᐱᔨᑕᑦ ᐊᓂᔭ ᐅᒥᔅᑯᓯᐅ-ᒧᐧᑯᒪᓐ ᐊᓐᑕ ᐃᔅ ᐊᔅᒋᒡ᙮ ᒥᓯᐛ ᒪᒃ ᐊ ᐃᔅᐱᓴᔨᒡ ᐊᔅᒋᔪᐤ ᒋ ᒋᒥᓯᒻ ᑕᓐ ᑲ ᐃᓯ ᓂᑕᐅᒋᓂᔨᒡ᙮ 17 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᐊ ᐅᒋ ᐎᐎᑦ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ ᒋᒋᒋᓯᑯᒡ ᐊ ᑎᑯᓂᔨᒡ᙮ ᑭᔭ ᐎᔾ ᒋ ᑕᐧᑯᓂᒻ ᐊ ᑲᓴᔨᒡ ᒥᔅᑯᓯᐅ-ᒧᐧᑯᒪᓂᔪᐤ᙮ 18 ᐃᔅᐱ ᒪᒃ ᑲ ᐸᒋ ᐎᐎᑦ ᐅ ᐊᓐᒋᓐ, ᐊᑯ ᒥᓐ ᑯᑎᒃ ᐊᓐᒋᓐ ᒂ ᐛᐱᒥᒃ ᐊᓐᑕ ᐊᓂᔭ ᐱᔅᑎᓂᒐᐅᓇᐱᔅᑯᔪᐤ ᐊ ᑎᑯᓂᔨᒡ ᐊ ᐅᑐᑕᑦ᙮ ᐊᐅᒄ ᐅ ᐊᓐᒋᓐ ᑕᐸᔨᑕᐧᒃ ᐃᔅᑯᑕᔪᐤ᙮ ᐊᑯ ᐅ ᐊᓐᒋᓐ ᒂ ᑕᑈᑕᑦ ᐊᓂᔭᔪᐛ ᐊᓐᒋᓇ ᑲ ᑕᐧᑯᓂᒥᔨᒋ ᐊ ᑲᓴᔨᒡ ᒥᔅᑯᓯᐅ-ᒧᐧᑯᒪᓂᔪᐤ᙮ ᒋ ᒋᔄᐛᐤ ᐊᓂᔭ ᐊ ᑕᑈᑕᑦ᙮ ᒋ ᐃᑕᐤ ᒪᒃ ᐊᓂᔭᔪᐛ ᐊᓐᒋᓇ, “ᐅᑎᓇ ᐊᓐ ᒋᒥᔅᑯᓯᐅ-ᒧᐧᑯᒪᓐ ᒐ ᒪᒧᓴᒋᓂᒥᓐ ᐊᓂᔭᔪᐛ ᐊ ᒪᒧᐅᒥᒋ ᒥᓂᓴ᙮ ᐛᔅ ᓴᔅ ᐅᑎᒋᐱᔪᐤ ᒐᒋ ᒪᒧᓴᒋᓂᑭᓄᐅᒋ᙮ ᓴᔅ ᒥᔽᐛ ᒐᒋ ᒪᒧᓴᒋᓂᑭᓄᐅᒋ᙮” 19 ᐊᑯ ᐊᓐ ᐊᓐᒋᓐ ᒂ ᐛᐱᐱᔨᑕᑦ ᐊᓂᔭ ᐅᒥᔅᑯᓯᐤ ᒧᐧᑯᒪᓐ ᐊᓐᑕ ᐃᔅ ᐊᔅᒋᒡ᙮ ᐊᑯ ᒂ ᒪᒧᓴᒋᓇᐧᒃ ᐊᓂᔭᔪᐛ ᒥᓂᓴ᙮ ᐊᓐᑕ ᒪᒃ ᒐ ᑎᑯᐃᑭᓄᔨᒋ ᐊᑯᑕ ᑲ ᐃᓯ ᐛᐱᓇᐧᒃ ᐊᓐᑕ ᐛᐛᓯᐊᑦ ᒋᓴᒪᓂᑐᐤ ᐊᐛᔪᐛ᙮ 20 ᐎᐎᑎᒥᒡ ᐊᓐ ᐅᑕᓇᐤ ᐊᑯᑕ ᑲ ᑎᑯᐃᑭᓄᐅᒋ ᐊᓂᔭᔪᐛ ᒥᓂᓴ᙮ ᐃᔅᐱ ᒪᒃ ᑲ ᑎᑯᐃᑭᓄᔨᒋ ᒥᔅᑎ ᒋ ᐅᒋ ᑯᐃᒂᓯᑯᓐ ᒥᐧᒄ ᐊᓐᑕ ᐊᓐ ᓇᐊᐤ ᑲ ᑎᑯᐃᑭᓄᔨᒋ ᐊᓂᔭᔪᐛ ᒥᓂᓴ᙮ ᐊᓐ ᒪᒃ ᐊ ᐃᓯ ᑯᐃᒂᓯᑯᒡ ᒥᐧᒄ, ᓴᓯᑲᓐ ᐱᑕᑕᒡ ᑕᑐᔪᐤ ᒥᓯᑦ ᒋ ᐊᑎ ᐃᔅᐱᓯᐱᔪᐤ᙮ ᓴᓯᑲᓐ ᒪᒃ ᓂᓱ ᒥᑕᓯᒥᑎᓄᐤ ᐊᔅᐱᓴᒡ ᒋ ᐃᔎᒐ ᐱᓯᒄ ᒥᐧᒄ ᐊ ᐃᓯᓇᒂᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.