ᒋᔅᒐᔨᑕᑯᑕᒐᐅᓐ 12 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊᓐ ᐃᔎᐤ ᑭᔭ ᐊᓐ ᒥᔅᑎ ᒥᓐᑐᔅ 1 ᐊᑯ ᒂ ᓄᒂᒡ ᓇᔅᒡ ᐊ ᒥᔅᑲᓯᓇᒂᒡ ᒋᔅᒋᓄᐛᐸᑎᔨᐛᐅᓐ ᐊᓐᑕ ᒋᒋᒋᓯᑯᒡ᙮ ᓂᒋ ᐛᐱᒪᐤ ᐃᔎᐤ, ᐱᓯᒺ ᐊ ᐅᑦ ᐊᑯᐱᑦ ᐊ ᐃᓯᓇᑯᓯᑦ ᑭᔭ ᑎᐱᔅᑲᐤ ᐱᓯᒺ ᓯᐸ ᐅᓯᑎᒡ ᐊ ᑕᔨᒋ᙮ ᒋᓴᐅᒋᒪᐅᑯᓂᔎᐅᓂᔪᐤ ᒋ ᒋᔅᑭᒻ ᓂᓱᓴᑉ ᐅᒐᑭᑕᒂ ᐊ ᒋᑭᒧᔨᒋ᙮ 2 ᒋ ᑭᓄᐛᔨᒪᐅᓱᐤ ᐊᓐ ᐃᔎᐤ᙮ ᒪᒂᒡ ᒪᒃ ᒋ ᐊᐧᑯᓱᐤ ᒐ ᐛᐱᒪᐅᓱᑦ ᓇᔅᒡ ᒪᒃ ᒋ ᐎᓯᒐᔨᑎᒻ᙮ ᒋ ᐊᓯᒂᐤ ᐊᔅᐱᔅ ᐊᐧᑯᓯᑦ᙮ 3 ᒥᓐ ᑯᑎᒡ ᒋᔅᒋᓄᐛᐸᑎᔨᐛᐅᓐ ᒋ ᐅᒋ ᓄᑯᓐ ᐊᓐᑕ ᒋᒋᒋᓯᑯᒡ᙮ ᓂᒋ ᐛᐱᒪᐤ ᒥᔅᑎ ᒥᓐᑐᔅ ᐊ ᒥᐧᑯᓯᑦ ᓂᔄᐅᑕᒡ ᐊ ᐃᑕᑎᓂᔨᒋ ᐅᔅᑎᒂᓇ ᑭᔭ ᐸᐃᑯᔪᐤ ᐊ ᐃᑕᑎᓂᔨᒋ ᐅᑦ ᐊᔅᑭᓇ᙮ ᒥᓯᐛ ᒪᒃ ᐊ ᐃᑕᑎᓂᔨᒋ ᐊᓂᔭ ᐅᔅᑎᒂᓇ ᒋᓴᐅᒋᒪᐅᑯᓂᔎᐅᓂᔪᐤ ᒋ ᒋᔅᑭᒻ᙮ 4 ᒋ ᐱᐧᑯᒋᐱᑕᐤ ᐸᐃᒄ ᐊᓂᔭᔪᐛ ᐊ ᓇᓂᔅᑎᔨᒋ ᐅᒐᑭᑕᒂ ᐊᓐᑕ ᒋᓯᑯᒡ ᐅᒡ ᐅᓱᔾ ᐊ ᐊᐱᒋᑕᑦ, ᐊᑯ ᐊᓐᑕ ᐊᔅᒋᒡ ᑲ ᐃᓯ ᐛᐱᓇᑦ᙮ ᒋ ᓂᐳᐅᐤ ᐅᑎᔅᑯᐤ ᐊᓂᔭ ᐃᔎᐛ ᐊ ᑕᔨᒋ ᒪᒂᒡ ᐊ ᐊᐧᑯᓯᔨᒋ ᐊ ᐊᓱᐛᐱᒪᑦ ᒐ ᐃᔅᐱᔅ ᐱᒪᑎᓯᔨᒋ ᐊᓂᔭᔪᐛ ᐊᐛᓴ ᒐᒋ ᒧᐛᑦ ᐃᔅᐱ ᐱᒪᑎᓯᒐᓂ᙮ 5 ᐊᑯ ᐊᓐ ᐃᔎᐤ ᒂ ᐊᐧᑯᓯᑦ, ᓇᐸᓴ ᒋ ᐊᔭᐛᐤ᙮ ᐊᐅᒄ ᒪᒃ ᐅ ᓇᔅᒡ ᒐ ᐅᒋᒪᐅᑐᑐᐛᔨᒋ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᐅᑕ ᐊᔅᒋᒡ᙮ ᐎᐱᒡ ᒪᒃ ᑲ ᐱᒪᑎᓯᑦ ᐊᓐ ᐊᐛᔅ, ᑎᐛᒡ ᒋᓴᒪᓂᑐᐛ ᐊ ᑕᔨᒋ ᒋ ᐃᓯ ᐅᑎᓇᑭᓄᐤ ᐊᓐᑕ ᐊ ᑎᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐤ ᑕᑎᐳᐛᑭᓐ᙮ 6 ᐊᑯ ᐊᓐ ᐃᔎᐤ ᐊᓐᑕ ᐸᐧᑯᑎᔅᑭᒥᑲᒡ ᐊᑯᑕ ᑲ ᐃᑎᓯᒧᑦ, ᐊᓐᑕ ᑲ ᐊᔭᔅᑯᔅᑎᒪᑯᑦ ᒋᓴᒪᓂᑐᐛ ᒐ ᑕᑦ᙮ ᐊᑯᑕ ᒪᒃ ᐊᓐᑕ ᒐ ᑭᓄᐛᔨᒪᑭᓄᐅᑦ ᐸᐃᒂᐤ ᒐᓯᐱᔪᐤ ᐊᓱ ᓂᓱ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐛ ᒋᓯᑲᐛ ᐃᔅᐱᔅ᙮ 7 ᒋ ᓂᑐᐱᔨᓇᓄᐤ ᒪᒃ ᐊᓐᑕ ᒋᒋᒋᓯᑯᒡ᙮ ᒪᐃᑲᓪ ᑭᔭ ᐊᓂᔭ ᐅᑦ ᐊᓐᒋᓂᒪ ᒋ ᒪᓯᐊᐅᒡ ᐊᓂᔭ ᒥᔅᑎ ᒥᓐᑐᓴ ᑭᔭ ᐊᓂᔭᔪᐛ ᐅᑦ ᐊᓐᒋᓂᒥᔪᐛ᙮ 8 ᒥᒄ ᒪᒃ ᒋ ᐅᓂᑕᐅᒡ ᐊᓐ ᒥᔅᑎ ᒥᓐᑐᔅ ᑭᔭ ᐊᓂᔭᔪᐛ ᐅᑦ ᐊᓐᒋᓂᒪ᙮ ᐊᑯ ᒪᒃ ᓇᒪ ᐅᒋ ᑎᑯᓂᔪᐤ ᐊᓐᑕ ᒐ ᑕᒡ ᐊᓐᑕ ᒋᒋᒋᓯᑯᒡ᙮ 9 ᐊᑯ ᒂ ᓂᒋᐛᐱᓇᑭᓄᐅᑦ ᐊᓐ ᒥᔅᑎ ᒥᓐᑐᔅ ᒋᒋᒋᓯᑯᒡ ᐅᒡ᙮ ᐊᐅᒄ ᒪᒃ ᐊᓐ ᒋᓇᐱᒄ ᐛᔅᑭᒡ ᐊᓐᑕ ᑲ ᑕᑦ, ᒥᒋᒥᓂᑐᐤ ᒪᒃ ᓴᑎᓐ ᑲ ᐃᓯᓂᐧᑲᑕᑭᓄᐅᑦ᙮ ᐊᐅᒄ ᐅ ᑲᒋ ᐎᔭᓯᐊᑦ ᒥᓯᐛ ᐊᐛᔪᐛ ᐅᑕ ᐊᔅᒋᒡ᙮ ᐊᓐᑕ ᒪᒃ ᐊᔅᒋᒡ ᒋ ᐃᓯ ᐛᐱᓇᑭᓄᐤ ᑭᔭ ᒥᓯᐛ ᐊᓂᔭ ᐅᑦ ᐊᓐᒋᓂᒪ᙮ 10 ᐊᑯ ᒪᒃ ᑲ ᐸᑐᐅᒃ ᐊᐛᓐ ᐊ ᒋᔄᐛᑦ ᐊᓐᑕ ᒋᒋᒋᓯᑯᒡ ᐊ ᐃᔨᒥᑦ᙮ ᒋ ᐃᔅᒋᔄᐤ, “ᐊᑯ ᒪᒃ ᐎᔭᐸᑎᒪᒡ ᒋᓴᒪᓂᑐᐤ ᒐ ᐱᒪᒋᐊᑦ ᐅᑦ ᐃᔨᒪ᙮ ᒋ ᐛᐸᑎᔨᐛᐤ ᑕᓐ ᐊᔅᐱᔅ ᓱᒐᔨᑕᑯᓯᑦ ᒐᒋ ᒋᓴᐅᒋᒪᐅᑦ ᑭᔭ ᓂ ᐛᐸᑎᒺᓇᓐ ᑕᓐ ᐊ ᐃᓯ ᑎᑯᓂᔨᒡ ᒐᒋ ᑎᐸᔨᒋᒐᔨᒋ ᐊᓂᔭᔪᐛ ᙭ᑕ ᑲ ᐸᒋ ᐃᑎᓴᐛᑦ᙮ ᐛᔅ ᐊᓐ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᒧᔅ ᑲ ᒪᒥᓯᒪᑦ ᒋᓴᒪᓂᑐᐛ ᐅᑦ ᐃᔨᒥᔪᐛ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᓴᔅ ᒋ ᓂᒋᐛᐱᓇᑭᓄᐤ᙮ 11 ᒥᒄ ᒪᒃ ᒋᓴᒪᓂᑐᐛ ᐅᑦ ᐃᔨᒥᔪᐛ ᒋ ᓴᐧᑯᒋᐃᑯᐤ ᐊᓂᔭ ᐅᒋ ᒪᔭᑕᓂᓴ ᐅᒥᐧᑯᔪᐤ, ᑭᔭ ᐊᓂᔭ ᐊ ᐛᐎᑎᒥᔨᒋ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ᙮ ᓇᒪ ᐅᒋ ᓴᒋᑕᐅᒡ ᐅᐱᒪᑎᓯᐅᓄᐛᐛ ᒐᒋ ᓂᐸᐊᑭᓄᐎᒡ᙮ 12 ᒥᔽᔨᑎᒧᒄ ᒪᒃ ᒥᓯᐛ ᒋᔨᐛᐤ ᒋᒋᒋᓯᑯᒡ ᐊ ᑕᔭᒄ᙮ ᐊᑯ ᒋᔨᐛᐤ ᐊᔅᒋᔾ ᑭᔭ ᐎᓂᐸᑯᒡ, ᒋᑭ ᐊᒂᒡ ᒥᒋᐱᔨᓇᐛᐤ ᐛᔅ ᐊᑯᑕ ᐊᓐᑕ ᐊ ᑕᔭᒄ ᑲ ᐃᑐᑕᑦ ᒥᒋᒥᓂᑐᐤ᙮ ᐊᔪᐛᒡ ᒪᒃ ᒋᔄᓱᐤ ᐛᔅ ᒋᔅᒐᔨᑎᒻ ᓴᔅ ᐊ ᑕᒂᔨᒡ ᐅᑎᐸᐃᑭᓐ᙮” 13 ᐃᔅᐱ ᒪᒃ ᒐᔅᒐᔨᑕᐧᒃ ᐊᓐ ᒥᔅᑎ ᒥᓐᑐᔅ ᐊᓐᑕ ᐊᔅᒋᒡ ᐊᒋ ᐃᓯ ᓂᒋᐛᐱᓇᑭᓄᐅᑦ, ᐊᑯ ᒂ ᒋᒋ ᐱᐸᓇᓴᐛᑦ ᐊᓂᔭ ᐃᔎᐛ ᑲ ᓇᐸᓯᐎᔨᒋ ᐅᑦ ᐊᐛᓯᒥᔪᐛ᙮ 14 ᒥᒄ ᒪᒃ ᐊᓐ ᐃᔎᐤ ᒋ ᒥᔭᑭᓄᐤ ᓂᓱ ᒥᑎᑎᑭᓇ ᒧᔭᒻ ᒥᔅᑎ ᐱᔭᓱᐤ ᐅᑎᑎᑭᓇ ᐊ ᐃᓯᓇᑯᓂᔨᒋ ᒐᒋ ᐃᔅᐸᔭᑦ ᐊᓐᑕ ᐸᐧᑯᑎᔅᑭᒥᑲᒡ ᐊᓐᑕ ᒐ ᑭᓄᐛᔨᒥᑯᑦ ᒋᓴᒪᓂᑐᐛ᙮ ᐊᑯᑕ ᒪᒃ ᐊᓐᑕ ᒐ ᑕᑦ ᓂᔅᑐ ᐱᐳᓇ ᒪᒃ ᐳᔅᒄ ᐃᔅᐱᔅ ᒐ ᐊᑲ ᒋ ᐱᔅᒐᔨᒥᑯᑦ ᐊᓂᔭ ᒥᔅᑎ ᒥᓐᑐᓴ᙮ 15 ᐊᑯ ᐊᓐ ᒥᔅᑎ ᒥᓐᑐᔅ ᒂ ᓴᓇᐧᒃ ᐅᑐᓐ᙮ ᓂᐱᔪᐤ ᑲ ᐅᒋᒍᐅᓂᔨᒡ ᐊᓐᑕ ᐅᑐᓂᒡ ᐅᒡ ᒧᔭᒻ ᓯᐱᔭ ᐊ ᐃᑕᒍᓂᔨᒋ᙮ ᐊᐅᒄ ᐅᔭ ᐊ ᐎ ᐛᐸᐳᔭᑦ ᐊᓂᔭᔪᐛ ᐃᔎᐛ ᐊᓂᔭ ᐊ ᐃᓯ ᐛᔪᑕᒍᓂᔨᒡ ᓂᐱᔪᐤ ᐅᒡ᙮ 16 ᐊᔅᒋᔾ ᒪᒃ ᒋ ᐎᒋᐊᐤ ᐊᓂᔭ ᐃᔎᐛ᙮ ᒋ ᑕᐅᑎᒥᑭᓐ ᐊᔅᒋᔾ, ᐊᑯ ᒂ ᐊᑯᒋᐱᔨᑕᒥᑲᒡ ᐊᓐ ᓂᐱᔾ ᒥᔅᑎ ᒥᓐᑐᔅ ᑲ ᐊᐳᐧᑯᑕᑕᐧᒃ᙮ 17 ᐊᑯ ᐊᓐ ᒥᔅᑎ ᒥᓐᑐᔅ ᒂ ᒥᔅᑎ ᒋᔄᐃᑯᑦ ᐊᓂᔭ ᐃᔎᐛ᙮ ᐊᑯ ᒂ ᓂᑐᐱᔨᑐᐅᒪᑦ ᐊᓂᔭᔪᐛ ᐅᑦ ᐊᓂᔅᒐ ᐅᑦ ᐊᐛᓯᒥᔪᐛ, ᐊᓂᔭ ᒥᓯᐛ ᑲ ᓂᓇᐃᑐᐛᔨᒋ ᒋᓴᒪᓂᑐᐛ, ᐊᓂᔭᔪᐛ ᑲ ᐛᐎᑎᒥᔨᒋ ᑕᓐ ᑲ ᐸᒋ ᐃᑎᔨᒋ ᒋᓴᓴ ᑲ ᐸᒋ ᑎᑯᓯᓂᔨᒋ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.