ᒋᔅᒐᔨᑕᑯᑕᒐᐅᓐ 11 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᓂᓯᒡ ᑲ ᐎᑕᒡ ᑕᓐ ᑲ ᐃᓯ ᐛᐸᑕᒡ 1 ᐊᑯ ᒂ ᒥᔨᑯᐅᔭᓐ ᒥᔅᑎᒄ ᑎᐸᔎᐃᑭᓐ᙮ ᓂᒋ ᐃᑎᑯᐅᓐ, “ᒋᓴᒪᓂᑐᐤ ᐃᔅᒋᔄᐤ, ᐱᓯᑯ᙮ ᒐ ᑎᐸᐊᒥᓐ ᓂᒋᓴᐊᔭᒥᐊᐅᒋᐛᑉ ᑭᔭ ᐊᓐ ᐱᔅᑎᓂᒐᐅᓇᐱᔅᒄ᙮ ᑭᔭ ᒐ ᐊᒋᒥᑥᐤ ᐊᓐᒡ ᐊᓐᑕ ᐊ ᑕᒡ ᐊᔭᒥᐊᔅᑐᐅᒡ᙮ 2 ᒥᒄ ᐊᑲᐎᔾ ᑎᐸᐊ ᐊᓐᑕ ᐱᑐᔎᒡ ᐛᔅᑲ ᐊᓐ ᒋᓴᐊᔭᒥᐊᐅᒋᐛᑉ᙮ ᐊᑲᐎᔾ ᑎᐸᐊ ᐛᔅ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒋ ᒥᔭᑭᓄᐎᒡ ᐊᓂᔭ᙮ ᐊᐅᑯᓐᒡ ᐅᒡ ᒐ ᑕᑕᐧᑯᔅᑲᑕᒡ ᐊᓂᔭ ᐅᑕᓇᔪᐤ ᑲ ᐸᔭᒋᓯᒥᑭᓂᔨᒡ ᓇᐎᔪᐤ ᐊᓱ ᓂᓱ ᐱᓯᒺ ᐃᔅᐱᔅ᙮” 3 ᒪᒂᒡ ᒪᒃ ᐊᓂᔭᔪᐛ ᐊ ᒋᓯᑲᒋ, ᓂᑭ ᐃᑎᓴᐛᐅᒡ ᓂᓱ ᐊᐛᓐᒋ ᒐ ᐅᑦ ᐊᐱᒋᐊᑭᓂᔭᓐ ᒐᒋ ᒋᔅᒋᐛᐃᒐᒡ᙮ ᑲᐛᑭᓐ ᐱᒍᐎᔭᓂᓯᔪᐤ ᐊ ᒋᔅᑲᒡ᙮ ᐸᐃᒂᐤ ᒐᓯᐱᔪᐤ ᐊᓱ ᓂᓱ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐛ ᒋᓯᑲᐛ ᐊᐅᑯᓐ ᒐ ᐃᔅᐱᔅ ᐛᐎᑕᒡ ᑕᓐ ᒐ ᐃᔅᐱᔅ ᒥᔨᒂᐤ ᒐᒋ ᐃᓯ ᐊᔨᒧᑕᒡ᙮ ᐊᐅᑯᓐ ᐊ ᑕᑎᒋ ᐊ ᒋᓯᑲᔨᒋ ᓇᐎᔪᐤ ᐊᓱ ᓂᓱ ᐱᓯᒺ᙮ 4 ᐅᒡ ᒪᒃ ᓂᓱ ᐊᐱᒋᐊᑭᓐᒡ, ᐊᐅᑯᓐᒡ ᐊᓐᒡ ᑲ ᓂᓱᑲᐳᐅᒡ ᐊᓕᑉ ᒥᔅᑎᑯᒡ ᑭᔭ ᐊᐅᑯᓐᒡ ᐊᓐᒡ ᐊᓂᔭᔪᐛ ᓂᓱ ᐛᔅᑕᓂᐱᒪᑭᓇᑎᒂ ᐅᑎᔅᑯᐤ ᒋᓴᒪᓂᑐᐤ ᐊ ᑕᑦ ᑲ ᑎᑯᓂᔨᒋ, ᐊᓂᔭᔪᐛ ᒥᓯᐛ ᐊᔅᒋᔪᐤ ᑲ ᐅᒋᒪᐅᑐᑎᒥᔨᒋ᙮ 5 ᐎ ᐎᔭᔅᑐᑕᑯᑥᐛ ᒪᒃ ᐊᐛᔪᐛ ᐅᒡ ᓂᓱ ᐊᐱᒋᐊᑭᓐᒡ, ᐃᔅᑯᑕᔪᐤ ᒋᑭ ᐅᒋᐱᔪᐤ ᐅᑐᓄᐛᒡ ᐅᒡ᙮ ᐊᑯᑕ ᒪᒃ ᒐ ᐅᒋ ᓂᓱᐅᓇᒋᐊᒡ ᐊᓂᔭᔪᐛ ᑲ ᐛᐧᑲᑎᑯᒡ᙮ ᐊᑯᑕ ᑭᔭ ᒐ ᐅᒋ ᓂᐸᐊᒡ ᒥᒄ ᐊ ᐃᓯᓇᑯᓯᔨᒋ ᐊᐛᔪᐛ ᐛ ᐎᔭᔅᑐᑕᑯᒡ᙮ 6 ᒪᒂᒡ ᒪᒃ ᐊᓂᔭ ᒐ ᐃᔅᐱᔅ ᒋᔅᒋᐛᐃᒐᒡ, ᒋᑭ ᐊᔭᐅᒡ ᑎᐸᔨᒋᒐᐅᓂᔪᐤ ᒐᒋ ᐃᑐᑕᒡ ᒐ ᐊᑲ ᒋ ᒋᒧᓂᔨᒡ᙮ ᒋᑭ ᒥᔭᑭᓄᐎᒡ ᑭᔭ ᒥᓯᐛ ᐊ ᐃᓯ ᑎᑯᓂᔨᒡ ᓂᐱᔪᐤ ᒐᒋ ᑎᐸᔨᑕᒡ ᑭᔭ ᒐ ᐃᑐᑕᒡ ᐊᓂᔭ ᓂᐱᔪᐤ ᒥᐧᑯᒡ ᒐᒋ ᐃᓯᓇᑯᓂᔨᒡ᙮ ᒥᒄ ᐛ ᐃᔅᐱᔅ ᐃᑐᑕᒡ ᒋᑭ ᒋ ᐃᑐᑎᒧᒡ ᓂᓇᐧᑯᐤ ᐃᑕᔅᐱᓇᐅᓂᔪᐤ ᒐᒋ ᑎᑯᓂᔨᒡ ᐊᔅᒋᒡ᙮ 7 ᐃᔅᐱ ᒪᒃ ᒋ ᐃᓯ ᐛᐎᑕᒂᐛ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ, ᐊᑯ ᐊᓂᔭᔪᐛ ᒥᒋ ᐊᐛᓯᓴ ᐊᓐᑕ ᑲ ᒥᔅᑎ ᐱᑯᓇᔭᔨᒡ ᑲ ᐅᒋ ᒧᔅᒋᐱᔨᒋ ᒐ ᒪᓯᐧᑲᑯᒡ᙮ ᒋᑭ ᓴᐧᑯᒋᐃᑯᐅᒡ ᒪᒃ, ᐊᑯ ᒐ ᓂᐸᐃᑯᒡ᙮ 8 ᐊᓂᔭᔪᐛ ᒪᒃ ᐎᔪᐛᐛ ᐊᑯᑕ ᐊᓐᑕ ᒪᔅᑭᓇᒡ ᐊᓂᔭ ᒥᔅᑎ ᐅᑕᓇᔪᐤ ᐊᓐᑕ ᑲ ᓂᐸᐊᑭᓄᔨᒋ ᑲ ᒋᔅᑕᔎᑕᑭᓄᔨᒋ ᒋᐱᔭᑎᑯᒡ ᐅᑎᐸᔨᒋᒐᓯᒧᐛᐛ, ᐊᑯᑕ ᒐ ᑎᑯᓂᔨᒋ᙮ ᐅ ᒪᒃ ᐅᑕᓇᐤ ᒧᔭᒻ ᑕᓐ ᑲ ᐃᑕᔨᑕᒂᒋ ᐊᓂᔭᔪᐛ ᐅᑕᓇᐛ ᓱᑕᒻ ᑭᔭ ᐃᒋᑉᑦ ᑲ ᐃᓯᓂᐧᑲᑕᒋ, ᐊᐅᑯᓐ ᒐ ᐃᑕᔨᑕᒂᒋ, ᓇᔅᒡ ᒋ ᒥᓴᐤ ᐊᓐᑕ ᒥᒐᑎᓯᐅᓐ᙮ 9 ᒥᓯᐛ ᒪᒃ ᐊ ᐃᑎᔅᑲᓇᓯᒡ ᐊᐛᓐᒋ ᑭᔭ ᓂᓇᐧᑯᐤ ᐊ ᐃᓯ ᐃᔨᒥᒡ ᑭᔭ ᒥᓯᐛ ᐊ ᐃᓯ ᒪᒧᑕᐅᓯᒡ ᒥᒄ ᒋᑭ ᑭᓄᐛᐸᑎᒧᐛᐅᒡ ᐊᓂᔭ ᐎᔭᔪᐤ ᓂᔅᑐ ᒋᓯᑲᐛ ᒪᒃ ᐳᔅᒄ ᐃᔅᐱᔅ᙮ ᓇᒪ ᒋᑭ ᐅᒋ ᐱᔅᑎᓇᐅᒡ ᒐᒋ ᓇᐃᒂᑭᓄᔨᒋ᙮ 10 ᐊᓐᒡ ᒪᒃ ᐊᐛᓐᒋ ᐊᔅᒋᒡ ᐊ ᑕᒡ, ᒋᑭ ᒥᔽᔨᑎᒧᒡ ᐊᒋ ᓂᐸᐊᑭᓄᔨᒋ ᐊᓂᔭᔪᐛ ᑲ ᓂᓯᔨᒋ᙮ ᒋᑭ ᒥᔽᔨᑎᒧᒡ ᑭᔭ ᒋᑭ ᒪᒥᐃᑐᐅᒡ ᒥᔨᐛᐅᓇ ᐊᒋ ᓂᐸᐊᑭᓂᔨᒋ ᐊᓂᔭᔪᐛ ᑲ ᓂᓯᔨᒋ ᑲ ᐃᑐᑎᒥᔨᒋ ᒐᒋ ᓂᓇᐧᑲᑕᔨᒧᓇᓄᐎᒡ ᐅᑕ ᐊᔅᒋᒡ᙮ 11 ᒥᒄ ᒪᒃ ᐃᔅᐱ ᐎᒪᐱᔨᒂᐛ ᐊᓂᔭᔪᐛ ᓂᔅᑐ ᒋᓯᑲᐛ ᒪᒃ ᐳᔅᒄ, ᐊᑯ ᒋᓴᒪᓂᑐᐤ ᒐ ᒥᔭᑦ ᔭᔭᐅᓂᔪᐤ ᐊᓂᔭᔪᐛ ᐊ ᓂᓯᔨᒋ, ᐊᑯ ᒐ ᐅᒋ ᐱᓯᑯᔨᔨᒋ᙮ ᒥᓯᐛ ᒪᒃ ᐊᐛᓐᒋ ᒐ ᐛᐱᒪᒡ ᓇᔅᒡ ᒋᑭ ᓴᒋᓱᐅᒡ᙮ 12 ᐊᑯ ᐊᓐᒡ ᑲ ᓂᓯᒡ ᒂ ᐸᑐᐛᒡ ᐊᐛᔪᐛ ᐊ ᐃᔨᒥᐃᑯᒡ ᒋᒋᒋᓯᑯᒡ ᐅᒡ᙮ ᒋ ᐃᑎᑯᐅᒡ ᐊ ᒋᔄᐛᔨᒋ, “ᐊᔅᑎᒧᒄ ᐅᑕ ᐃᔅᐱᒥᒡ᙮” ᐊᑯ ᒪᒂᒡ ᐊ ᑭᓄᐛᐱᒥᑯᒡ ᐊᓂᔭ ᑲ ᐛᐧᑲᑎᑯᒡ, ᑭᔅᑯᐅᓂᔅᑯᒡ ᒋ ᐅᐱᔪᒡ ᒋᒋᒋᓯᑯᒡ ᐃᔅ᙮ 13 ᐃᔅᐱ ᒪᒃ ᑲ ᐃᔅᐱᔨᒡ ᐅ, ᒋ ᒥᔅᑎ ᑯᐃᐧᑯᓐ᙮ ᐸᐃᒄ ᐊᓯᑯᒻ ᐸᐃᑯᔪᐤ ᒥᒋᐛᐸ ᐊᓐᑕ ᐊᓐ ᐅᑕᓇᒡ ᒋ ᓂᓱᐅᓇᑎᓇ᙮ ᓂᔄᐅᑕᒡ ᑕᑥᐤ ᒐᓯᐱᔪᐤ ᐊᐛᓐᒋ ᒋ ᓂᓱᐅᓇᑎᓯᐅᒡ ᐊᓂᔭ ᑲ ᒥᔅᑎ ᑯᐃᐧᑯᓂᔨᒡ᙮ ᐊᑯ ᐊᓐᒡ ᐊᐛᓐᒋ ᐊᔅᒄ ᐊ ᑕᒡ ᐊᔅᒋᒡ ᒋ ᒥᔅᑎ ᓴᒋᓱᐅᒡ᙮ ᒋ ᐃᔅᒋᔄᐅᒡ, ᑕᑈ ᓱᒐᔨᑕᑯᓯᔪᐤ ᒋᓴᒪᓂᑐᐤ ᒋᒋᒋᓯᑯᒡ ᐊ ᑕᑦ᙮ 14 ᐅ ᒪᒃ ᓂᓱ ᑲ ᑎᒂᒡ ᑲ ᐃᓯ ᓂᓇᐧᑲᑕᔨᒧᓇᓄᐅᒡ, ᓴᔅ ᒋ ᒋᔅᑕᐱᔪᐤ᙮ ᐊᔅᒄ ᒪᒃ ᒥᓐ ᑯᑎᒡ ᐊ ᓂᓇᐧᑲᑕᔨᒧᓇᓄᐅᒡ ᒋᑭ ᐅᑎᒋᐱᔪᐤ᙮ ᓴᔅ ᐸᓱᓇᑯᓐ ᒐ ᐅᑎᒋᐱᔨᒡ᙮ ᐊᓐᒋᓐ ᑲ ᐳᑕᑕᐧᒃ ᐊᓂᔭ ᒪᔅᑕᔾ ᐳᑕᒋᑭᓂᔪᐤ 15 ᐊᑯ ᒥᓐ ᑯᑎᒃ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᐊᐅᒄ ᐅ ᓂᔄᐅᑕᒡ ᐊ ᑕᑦ ᐊᓐᒋᓐ᙮ ᓂᒋ ᐸᑐᐛᐅᒡ ᒪᒃ ᐊᐛᓐᒋ ᐊ ᒋᔄᐛᒡ, ᐊᓐᑕ ᒋᒋᒋᓯᑯᒡ ᐊ ᐃᔨᒥᒡ ᐊ ᐃᔅᒋᔄᒡ, “ᐊᐅᑯᐤ ᐛᑎᓂᒪᓱᑦ ᒋᑎᐸᔨᒋᒐᓯᒥᓄᐤ ᑭᔭ ᐊᓂᔭᔪᐛ ᑲ ᐸᒋ ᐃᑎᓴᐛᑦ ᒐᒋ ᐅᒋᒪᐅᔨᒋ ᐅᑕ ᐊᔅᒋᒡ᙮ ᐎᔾ ᒪᒃ ᐅᑎᐸᔨᒋᒐᐤ ᒋᑭ ᐅᒋᒪᐤ ᑲᒋᒡ ᑭᔭ ᑲᒋᒡ᙮” 16 ᐊᑯ ᐊᓐᒡ ᓂᓱᔪᐤ ᐊᓱ ᓇᐤ ᑲ ᒋᔅᑕᔨᑕᑯᓯᒡ ᒋᓴᐃᔪᒡ ᑲ ᐊᐱᒡ ᐅᒋᓴᐅᒋᒪᐤ ᑕᑎᐳᐛᑭᓄᐛᒡ, ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᒋ ᐅᑎᑕᒧᓂᐱᔪᐅᒡ ᑭᔭ ᒋ ᐊᔭᒥᐊᔅᑐᐛᐅᒡ ᒋᓴᒪᓂᑐᐛ, 17 ᐊ ᐃᔅᒋᔄᒡ, “ᓂᑎᐸᔨᒋᒐᓯᒥᓇᓐ ᒋᓴᒪᓂᑐᐤ ᒪᐅᒡ ᑲ ᓱᐧᑲᑎᓯᔨᓐ, ᐊᓐ ᑲ ᑕᑦ ᑭᔭ ᒧᔅ ᑲ ᐸᒋ ᑕᑦ, ᒋ ᓂᓇᔅᑯᒥᑎᓇᓐ ᐊᒋ ᐊᐱᒋᑕᔨᓐ ᒋᓱᐧᑲᑎᓯᐅᓐ ᒋᔾ ᐊ ᑎᐸᔨᒋᒐᔨᓐ᙮ 18 ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᒋ ᒥᔅᑎ ᒋᔄᓱᐅᒡ᙮ ᐊᑯ ᒪᒃ ᒋᔾ ᐛᑎᒋᐱᔨᒡ ᒐᒋ ᒋᔄᓯᔨᓐ ᑭᔭ ᒐᒋ ᑎᐸᔅᑯᓂᑥᐤ ᐊᓐᒡ ᑲ ᓂᐱᒡ᙮ ᓴᔅ ᐅᑎᒋᐱᔪᐤ ᒐᒋ ᑎᐸᐊᒧᑥᐤ ᐅᑎᐸᐊᒪᑯᓯᐅᓄᐛᐛ ᐊᓐᒡ ᒋᑦ ᐊᐱᒋᐊᑭᓐᒡ ᑭᔭ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᐊᓐᒡ ᑲ ᑕᑈᑕᒡ ᑭᔭ ᐊᓐᒡ ᑲ ᒋᔅᑕᔨᑕᒡ ᒋᑦ ᐃᓯᓂᐧᑲᓱᐅᓂᔪᐤ, ᐊᓐᒡ ᑲ ᒋᔅᑕᔨᑕᑯᓯᒡ ᑭᔭ ᐊᓐᒡ ᐊᑲ ᒋᔅᑕᔨᑕᑯᓯᒡ᙮ ᓴᔅ ᐅᑎᒋᐱᔪᐤ ᒐᒋ ᓂᓱᐅᓇᒋᐊᑭᓄᐎᒡ ᐊᓐᒡ ᑲ ᓂᓱᐅᓇᒋᐊᒡ ᐊᐛᔪᐛ ᐅᑕ ᐊᔅᒋᒡ᙮” 19 ᐊᑯ ᒋᓴᒪᓂᑐᐤ ᐅᒋᓴᐊᔭᒥᐊᐅᒋᐛᑉ ᒋᒋᒋᓯᑯᒡ ᐊ ᑎᑯᓂᔨᒡ ᒂ ᓴᓂᑭᓄᐎᒡ᙮ ᐊᓐᑕ ᒪᒃ ᐱᑎᑭᒥᒡ ᒋ ᓄᑯᓐ ᐊᓐ ᑲ ᐸᔭᒋᓯᒥᑲᒡ ᒥᔅᑎᑯᐅᑦ ᐊᓐᑕ ᑲ ᑎᑕᑭᓄᔨᒡ ᐊᓂᔭ ᓂᔅᑯᒧᐅᓂᔪᐤ ᒋᓴᒪᓂᑐᐤ ᑲ ᐅᓯᑎᒧᐛᑦ ᐅᑦ ᐃᔨᒪ᙮ ᐊᑯ ᑲ ᐅᔄᔅᑕᐱᔨᒡ ᑭᔭ ᓂᒥᔅᒍᐅᒡ ᒋ ᐸᑕᑯᓱᐅᒡ᙮ ᑭᔭ ᒋ ᑯᐃᐧᑯᓐ ᑭᔭ ᒋ ᒥᔅᑎ ᒥᔅᑯᒥᑕᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.