ᒋᔅᒐᔨᑕᑯᑕᒐᐅᓐ 10 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᓐᒋᓐ ᑭᔭ ᐊᓐ ᑲ ᐊᐱᓴᓯᒡ ᒥᓯᓇᐃᑭᓐ

¹ ᒥᓐ ᒂ ᐃᓯ ᐛᐸᑎᔨᑯᔭᓐ, ᒥᓐ ᑯᑎᒃ ᐊ ᓱᒐᔨᑕᑯᓯᑦ ᐊᓐᒋᓐ ᓂᒋ ᐛᐱᒪᐤ ᒋᒋᒋᓯᑯᒡ ᐊ ᐅᑐᑕᑦ, ᑭᔅᑯᐅᓂᔎ ᐊ ᐅᑦ ᐊᑯᐱᑦ᙮ ᐎᐧᑯᐱᓴᑭᓂᔪᐤ ᒋ ᐛᔅᑲᑯᑕᔪᐤ ᐊᓐᑕ ᐅᔅᑎᒂᓂᒡ᙮ ᐅᑕᔅᑎᒥᐧᒄ ᒧᔭᒻ ᐱᓯᒻ ᐊ ᐃᓯ ᒋᐧᑲᔭᔅᑐᐛᑦ ᒋ ᐃᓯᓇᑯᓂᔪᐤ᙮ ᐊᑯ ᐅᔅᑲᑕ ᒧᔭᒻ ᓯᑥᔎᐃᑭᓇ ᐊ ᐃᔅᑯᑕᐅᔨᒋ ᒋ ᐃᓯᓇᑯᓂᔪᐛ᙮

² ᒋ ᑕᐧᑯᓂᒻ ᒥᓯᓇᐃᑭᓂᓯᔪᐤ ᐅᑎᒋᒡ᙮ ᐊᒋ ᑎᑎᐸᔭᒋᓂᑭᓄᐎᒡ᙮ ᐊᑯ ᐊᓂᔭ ᐅᒥᔪᐅᓂᒡ ᐅᓯᑦ ᐊᓐᑕ ᐃᑕᒐ ᐎᓂᐸᑯᒡ ᒋ ᐃᓯ ᑕᐧᑯᔅᒐᐤ, ᐊᑯ ᐊᓂᔭ ᐅᓂᔅᐸᒋᐅ ᐅᓯᑦ ᐊᔅᒋᒡ ᒋ ᐃᓯ ᑕᐧᑯᔅᒐᐤ᙮

³ ᐊᑯ ᒂ ᑕᑈᑦ ᒧᔭᒻ ᒥᓯᐱᓱᐤ ᐊ ᐃᑎᑕᑯᓯᑦ᙮ ᐃᔅᐱ ᒪᒃ ᑲ ᑕᑈᑦ ᐊᓐᒡ ᓂᔄᐅᑕᒡ ᑲ ᐃᑕᑎᓯᒡ ᓂᒥᔅᒍᐅᒡ ᒋ ᐅᒋ ᐸᑕᑯᓱᐅᒡ ᒧᔭᒻ ᐊ ᐃᔨᒥᒡ ᐊ ᐃᑎᑕᑯᓯᒡ᙮

⁴ ᐃᔅᐱ ᒪᒃ ᑲ ᐸᑕᑯᓯᒡ ᐊᓐᒡ ᓂᔄᐅᑕᒡ ᑲ ᐃᑕᑎᓯᒡ ᓂᒥᔅᒍᐅᒡ ᒧᔭᒻ ᐊ ᐃᔨᒥᒡ ᑲ ᐃᑎᑕᑯᓯᒡ, ᓂᒋ ᐎ ᒋᒋ ᒥᓯᓇᐃᒐᓐ᙮ ᐊᑯ ᒂ ᐅᒋ ᐸᑎᒪᓐ ᐸᑕᑯᓱᐅᓐ ᒋᒋᒋᓯᑯᒡ ᐅᒡ ᐊ ᐃᑎᑯᔭᓐ, “ᐊᑲᐎᔾ ᒥᓯᓇᐊ ᑕᓐ ᑲ ᐃᔅᒋᔄᒡ ᐊᓐᒡ ᓂᒥᔅᒍᐅᒡ᙮ ᐊᑲᐎᔾ ᐊᐛᓐ ᒋᑭ ᐅᒋ ᒋᔅᒐᔨᑎᒻ᙮”

⁵ ᐊᑯ ᐊᓐ ᐊᓐᒋᓐ ᓂᐱᑕ ᐊᓐᑕ ᐎᓂᐸᑯᒡ ᑭᔭ ᓂᐱᑕ ᐊᔅᒋᒡ ᑲ ᐃᓯ ᑕᐧᑯᔅᒐᑦ ᑲ ᐅᐱᓂᔅᒐᐱᔨᑕᑦ ᐅᒥᔪᓂᑎᒋᔾ ᒋᒋᒋᓯᑯᒡ ᐃᔅ᙮

⁶ ᐊᑯ ᒂ ᐃᔅᒋᔄᑦ, “ᐊᐅᒄ ᐅ ᐊ ᐃᔅᒋᔄᔭᓐ ᐅᑎᔅᑯᐤ ᒋᓴᒪᓂᑐᐤ ᐊ ᑕᑦ, ᐊᓐ ᑲᒋᒡ ᑲ ᐱᒪᑎᓯᑦ, ᒋᓯᑯᔪᐤ, ᐊᔅᒋᔪᐤ ᑭᔭ ᐎᓂᐸᑯᔪᐤ ᑭᔭ ᒥᓯᐛ ᐊ ᐃᓯ ᑎᑯᓂᔨᒡ ᐊᓐᑕ ᒋᓯᑯᒡ, ᐊᔅᒋᒡ ᑭᔭ ᐎᓂᐸᑯᒡ ᑲ ᐅᓯᑕᑦ, ᐊᑯᓐ ᒐ ᐃᔅᐱᔅ ᓇᑲᐎᑦ, ᐊᑯ ᒋᓴᒪᓂᑐᐤ ᒐᒋ ᐃᑐᑕᐧᒃ ᑕᓐ ᐊᓂᔭᔪᐛ ᐛ ᐃᑐᑕᐧᒃ᙮

⁷ ᐃᔅᐱ ᒪᒃ ᐊᓐ ᓂᔄᐅᑕᒡ ᐊ ᑕᑦ ᐊᓐᒋᓐ ᐳᑕᑕᒐ ᐅᐳᑕᒋᑭᓐ, ᐊᑯ ᒐ ᒋᔅᑕᑦ ᒋᓴᒪᓂᑐᐤ ᐊ ᑎᐸᑐᑕᐧᒃ ᑕᓐ ᑲ ᐃᑕᔨᑎᒥᐃᑯᑦ ᒐᒋ ᐃᑐᑕᐧᒃ ᐊᓂᔭ ᒐᒂᔪᐤ ᐊᑲ ᐊᐛᔪᐛ ᐅᒋ ᒋᔅᒐᔨᑎᒥᔨᒋ, ᐊᓂᔭ ᑲ ᐃᓯ ᐎᑎᒧᐛᑯᐱᓇ ᐊᓂᔭᐧᑲ ᐅᑦ ᐊᐱᒋᐊᑭᓇ ᑲ ᒋᔅᒋᐛᐃᒐᔨᒋ᙮”

⁸ ᐊᑯ ᒥᓐ ᒂ ᐸᑐᐅᒃ ᐊᓐ ᐊᐛᓐ ᑲ ᐸᒋ ᐃᔨᒥᐃᑦ ᒋᒋᒋᓯᑯᒡ ᐅᒡ ᐊ ᐸᒋ ᐃᓯᑦ, “ᒪᒋ ᐅᑎᓂᒻ ᐊᓂᔭ ᒥᓯᓇᐃᑭᓂᓯᔪᐤ ᑲ ᓴᓂᑭᓄᐎᒡ ᐅᑎᒋᒡ ᐅᒡ ᐊᓐ ᐊᓐᒋᓐ ᐊᓐᑕ ᐎᓂᐸᑯᒡ ᑭᔭ ᐊᔅᒋᒡ ᑲ ᐃᓯ ᑕᐧᑯᔅᒐᑦ᙮”

⁹ ᐊᑯ ᒂ ᓇᑎᒃ ᐊᓐ ᐊᓐᒋᓐ, ᐊᑯ ᒂ ᐃᑎᒃ ᒐᒋ ᐸᒋ ᒥᔨᑦ ᐊᓂᔭ ᒥᓯᓇᐃᑭᓂᓯᔪᐤ ᑲ ᑕᐧᑯᓇᐧᒃ᙮ ᐊᑯ ᒂ ᐸᒋ ᐃᓯᑦ, “ᐅᑎᓇ ᒐ ᒥᒋᔨᓐ᙮ ᒋᑭ ᓯᐅᔅᐱᑯᓐ ᒋᑐᓂᒡ ᒧᔭᒻ ᑲᓯᐛᓯᐛᐳᔾ ᐊᐅᑯᓐ ᒐ ᐃᔅᐱᑎᒥᓐ᙮ ᒥᒄ ᒪᒃ ᐃᔅᐱ ᒋ ᑯᒋᐱᔨᑕᔨᓇ, ᒋᑭ ᐊᑎ ᐎᓯᑭᓐ ᐊᓐᑕ ᒋᔅᑭᑕᒡ᙮”

¹⁰ ᒂ ᐅᑎᓂᒧᒡ ᐊᓂᔭ ᒥᓯᓇᐃᑭᓂᓯᔪᐤ ᑲ ᑕᐧᑯᓇᐧᒃ ᐊᓐ ᐊᓐᒋᓐ, ᐊᑯ ᒂ ᒥᒍᐅᒡ᙮ ᐃᔅᐱ ᒪᒃ ᑲ ᓯᔅᑭᒧᔭᓐ ᓂᒋ ᒥᔅᐱᑕᓐ ᐊ ᓯᐛᒡ ᒧᔭᒻ ᑲᓯᐛᓯᐛᐳᔾ ᐊᐅᑯᓐ ᑲ ᐃᔅᐱᑎᒪᓐ᙮ ᒥᒄ ᒪᒃ ᐃᔅᐱ ᑲ ᑯᒋᐱᔨᑕᔭᓐ ᒋ ᐊᑎ ᐎᓯᑭᓐ ᐊᓐᑕ ᓂᔅᑭᑕᒡ᙮

¹¹ ᐊᑯ ᒂ ᐃᑎᑯᐅᔭᓐ, “ᒥᓐ ᒋᑭ ᒋᔅᒋᐛᐃᒐᓐ, ᒋᑭ ᐊᔨᒧᑕᓐ ᑕᓐ ᐊ ᐃᓯ ᐊᔨᒧᒥᑯᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᒥᒐᑦ ᐊᐛᓐᒋ, ᓂᓇᐧᑯᐤ ᐊ ᐃᑎᔅᑲᓇᓯᒡ, ᓂᓇᐧᑯᐤ ᐊ ᐃᓯ ᒪᒧᑕᐅᓯᒡ, ᑭᔭ ᓂᓇᐧᑯᐤ ᐊ ᐃᓯ ᐃᔨᒥᒡ᙮ ᒋᓴᐅᒋᒪᐅᒡ ᑭᔭ ᑕᓐ ᐊ ᐃᓯ ᐊᔨᒧᒥᑯᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᒋᑭ ᐊᔨᒧᑎᒧᐛᐅᒡ᙮”