ᒋᔅᒐᔨᑕᑯᑕᒐᐅᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒠᓐ ᑲ ᐎᑕᐧᒃ ᑕᓐ ᑲ ᐃᓯ ᒋᔅᒐᔨᑎᒥᐊᑭᓄᐅᑦ

¹ ᐊᐅᒄ ᐅᔭ ᑲ ᐃᓯ ᐛᐸᑎᔨᐛᑦ ᒋᓴᔅ, ᒋᓴᒪᓂᑐᐛ ᒋ ᒥᔨᑯᐤ ᒐᒋ ᒋᔅᒐᔨᑎᒥᐊᑦ ᐊᓂᔭ ᑲ ᐊᑐᔅᑯᐛᔨᒋ ᒋᓴᒪᓂᑐᐛ ᑕᓐ ᒐ ᐃᔅᐱᔨᒡ ᐎᐱᒡ᙮ ᓂᔾ, ᒠᓐ, ᒋᓴᒪᓂᑐᐛ ᑲ ᐊᑐᔅᑯᐛᑦ, ᓂᒋ ᐃᑎᓴᐊᒪᒄ ᙭ ᐊᓐᒋᓇ ᒐᒋ ᐸᒋ ᐎᑎᒧᔨᒋ ᑕᓐ ᐊᓂᔭᔪᐛ ᓴᔅ ᐎᐱᒡ ᒐ ᐃᔅᐱᔨᒋ᙮

² ᒥᓯᐛ ᒪᒃ ᓂᒋ ᒥᓯᓇᐊᓐ ᑕᓐ ᑲ ᐃᓯ ᐛᐸᑎᔨᑯᔭᓐ᙮ ᐊᓐ ᒪᒃ ᑲ ᐃᓯ ᒥᓯᓇᐊᒪᓐ, ᑕᑈ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᓂᔭ᙮ ᒋᓴᔅ ᒋ ᓄᑯᑕᐤ ᑕᑈ ᐊ ᑕᑈᒥᑭᓂᔨᒡ᙮

³ ᒋᑭ ᓱᐛᔨᑕᑯᓱᐤ ᐊᓐ ᐊᐛᓐ ᒐ ᐃᔨᒥᑕᑦ ᐅᔭ ᑕᓐ ᐊ ᐃᑎᔅᑕᔨᒡ ᐅᑕ, ᐊᓐᑕ ᒐᒋ ᐅᒋ ᐸᑎᒥᔨᒋ ᑯᑎᑲ ᐊᐛᔪᐛ᙮ ᐊᓐᒡ ᑲ ᐸᑕᒡ ᑭᔭ ᑲ ᓂᓇᐃᑕᒡ ᑕᓐ ᐊ ᐃᑎᔅᑕᔨᒡ ᐊᓐᑕ ᑭᔭ ᐎᔨᐛᐤ ᒋᑭ ᓱᐛᔨᑕᑯᓱᐅᒡ᙮ ᐛᔅ ᓴᔅ ᐸᓱᓇᑯᓐ ᒐ ᐅᑎᒋᐱᔨᒡ ᒥᓯᐛ ᒐᒋ ᐃᔅᐱᔨᒡ ᑕᓐ ᑲ ᐃᓯ ᐛᐸᑎᔨᑯᔭᓐ᙮

ᒠᓐ ᑲ ᐛᒋᔭᒪᑦ ᐊᓂᔭ ᐅᒪᒧᐊᔭᒥᐊᐛ ᐊᓐᑕ ᑲ ᑕᔨᒋ ᓂᔄᐅᑕᒡ ᐊᔭᒥᐊᐅᒋᐛᐸ Revelation 1.4-8 (Proper-29 Year B; Easter-2 Year C)

⁴ ᓂᔾ ᒠᓐ, ᒋᔨᐛᐤ ᒪᒧᐤ ᑲ ᐊᔭᒥᐊᐛᑎᓯᒡ ᒋ ᒥᓯᓇᐊᒪᑎᓇᐛᐤ ᐊᓐᑕ ᑲ ᑕᔭᒄ ᐊᓂᔭᔪᐛ ᓂᔄᐅᑕᒡ ᐊᔭᒥᐊᐅᒋᐛᐸ ᐊᐃᓴ ᑲ ᐃᓯᓂᐧᑲᑕᒡ ᐊᔅᒋᔾ᙮ ᒋᓴᒪᓂᑐᐤ, ᐊᓐ ᐊᓄᒡ ᐊ ᑕᑦ ᑭᔭ ᒧᔅ ᑲ ᐸᒋ ᑕᑦ, ᑭᔭ ᐊᓐ ᒐ ᑎᑯᓯᐧᒃ, ᒋᑭ ᓱᐛᔨᒥᑯᐛᐤ ᑭᔭ ᒋᑭ ᒥᔨᑯᐛᐤ ᒋᔭᒪᔨᑎᒧᐅᓂᔪᐤ᙮ ᑭᔭ ᐊᓐᒡ ᓂᔄᐅᑕᒡ ᐊᒐᐧᑯᒡ ᐅᑎᔅᑯᐤ ᒋᓴᒪᓂᑐᐛ ᐅᒋᓴᐅᒋᒪᐤ ᑕᑎᐳᐛᑭᓂᔨᒡ ᐊ ᑕᒡ, ᒋᑭ ᓱᐛᔨᒥᑯᐛᐅᒡ ᑭᔭ ᒋᑭ ᒥᔨᑯᐛᐅᒡ ᒋᔭᒪᔨᑎᒧᐅᓂᔪᐤ᙮

⁵ ᒋᓴᔅ ᙭ ᑭᔭ, ᐊᓐ ᒧᔅ ᑯᐃᔅᒄ ᑲ ᐎᑕᐧᒃ ᐊ ᑎᐸᒋᒪᑦ ᒋᓴᒪᓂᑐᐛ, ᓂ ᐱᑯᓴᔨᒪᐤ ᒐᒋ ᓱᐛᔨᒥᑕᒄ ᑭᔭ ᒐᒋ ᒥᔨᑕᒄ ᒋᔭᒪᔨᑎᒧᐅᓂᔪᐤ᙮ ᐎᔾ ᒋᓴᔅ ᙭ ᒪᐅᒡ ᓂᔅᑎᒻ ᒋ ᐅᓂᔅᑲᓇᑭᓄᐤ ᓂᐳᐅᓂᒡ ᐅᒋ ᑲᒋᒡ ᒐᒋ ᐱᒪᑎᓯᑦ᙮ ᐎᔾ ᒋᓴᐅᒋᒪᐅᐤ ᒥᓯᐛ ᒋᓴᐅᒋᒪᐛ ᐅᑕ ᐊᔅᒋᒡ᙮ ᒋᓴᒋᐃᑯᓄᐤ ᑭᔭ ᒋ ᐱᔅᑎᓂᓱᐤ ᒐᒋ ᓂᐸᐊᑭᓄᐅᑦ ᒋᔭᓄᐤ ᐅᒋ ᒐ ᐊᑲ ᒋ ᑎᐸᔨᒥᑯᔭᐧᒄ ᒋᒥᒋᑥᐅᓄᐛ᙮

⁶ ᒋ ᐃᑐᑎᒻ ᒐᒋ ᒥᓯᓇᓱᐛᐧᒄ ᐊᓐᑕ ᐅᒋᓴᐅᒋᒪᐅᓂᒡ ᐊ ᐊᑐᔅᑲᔅᑐᒪᐧᑯ ᒋᓴᒪᓂᑐᐛ ᐅᑕᐎᔭ ᐊ ᐊᔭᒥᐊᐅᒋᒪᐤ ᐊᐱᑎᓯᐛᐧᒄ᙮ ᐎᔾ ᒋᑭ ᒋᔅᑕᔨᑕᑯᐊᑭᓄᐤ ᑭᔭ ᒋᑭ ᑎᐸᔨᒋᒐᐤ ᑲᒋᒡ ᑭᔭ ᑲᒋᒡ᙮ ᐊᒥᓐ᙮

⁷ ᐃᑕᐱᒄ ᒪ᙮ ᐸᒋ ᑎᑯᓯᓄᐤ ᑭᔅᑯᐅᓂᔅᑯᒡ ᐊ ᐸᒋ ᔭᓯᑦ᙮ ᒥᓯᐛ ᐊᐛᔪᐛ ᒋᑭ ᐛᐱᒥᑯᐤ, ᐛᐛᒡ ᐊᓂᔭᔪᐛ ᑲ ᑕᐧᑭᒥᑯᑦ᙮ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᒋᑭ ᒥᔅᑎ ᒪᔪᐛ ᐛᐱᒥᑯᒐ᙮ ᒐᔅᑎᓇᔅ ᒋᑭ ᐃᔅᐱᔪᐤ ᐅ᙮ ᐊᒥᓐ᙮

⁸ “ᐊᐅᒄ ᓂᔾ ᓴᔅ ᑲ ᑕᔭᓐ ᐊᔅᒄ ᐊᑲ ᓇᔅᒡ ᒐᒂᓐ ᐅᒋ ᑎᒂᒡ, ᑭᔭ ᐊᐅᒄ ᓂᔾ ᐊᔅᒄ ᒐ ᑕᔭᓐ ᐃᔅᐱ ᒥᓯᐛ ᒐᒂᓐ ᒋᑎᐱᔨᒐ,” ᐊᐅᒄ ᐊ ᐃᔅᒋᔄᑦ ᒋᓴᒪᓂᑐᐤ ᐅᑎᐸᔨᒋᒐᐤ, ᐊᓐ ᒪᐅᒡ ᑲ ᓱᐧᑲᑎᓯᑦ, ᐊᓐ ᐊ ᑕᑦ ᐊᓄᒡ, ᐊᓐ ᒧᔅ ᑲ ᐸᒋ ᑕᑦ ᑭᔭ ᐊᓐ ᒐ ᑎᑯᓯᐧᒃ᙮

ᒠᓐ ᐛᐸᑎᔨᐛᐅᓂᒡ ᑲ ᐛᐱᒪᑦ ᒋᓴᓴ

⁹ ᐊᐅᒄ ᓂᔾ ᒋᐧᑲᓂᓱᐛᐤ ᒠᓐ᙮ ᒥᓯᐛ ᒋ ᐎᐧᑲᓂᓯᓂᑐᓇᓄᐤ ᒋᓴᔅ ᐊ ᑕᑦ ᐃᔅ᙮ ᒐ ᓂᓇᐧᑲᑕᔨᒧᐃᑯᔭᐧᒄ ᐊᓐ ᐅᒋ ᐊ ᓇᓴᐛᐧᒄ ᒋᓴᔅ, ᒥᒄ ᒪᒃ ᒪᒧᐤ ᒋ ᐎ ᓯᐱᔪᐛᓯᓇᓄᐤ ᑕᓐᑕ ᐊᓐᑕ ᓇᒋᔅᑭᒪᐧᒄ ᒪᓐ ᐊ ᐊᔨᒪᒡ ᒐᒂᓐ᙮ ᓂᒋ ᒪᑯᓂᑯᐅᓐ, ᐊᑯ ᐊᓐᑕ ᐊᓐ ᒥᓂᔅᑎᒄ ᐸᑦᒧᔅ ᑲ ᐃᓯᓂᐧᑲᑕᒡ ᑲ ᑎᔨᑯᔭᓐ ᐊᓐ ᐅᒋ ᐊᒋ ᐛᐎᑎᒪᓐ ᒋᓴᒪᓂᑐᐤ ᐅᑦ ᐃᔨᒧᐅᓐ ᑭᔭ ᐊᒋ ᑎᐸᒋᒥᒃ ᒋᓴᔅ ᑕᓐ ᑲ ᐃᑎᑦ᙮

¹⁰ ᐸᐃᒂᐤ ᒪᒃ ᐊ ᐊᔭᒥᐊᐅᒋᓯᑲᒡ, ᑲ ᐸᔭᒋᓯᑦ ᐊᒐᐧᒄ ᓂᒋ ᓴᑭᔅᒋᓇᔅᑲᒄ᙮ ᐊᓐᑕ ᒪᒃ ᓂᔅᐱᔅᑯᓂᒡ ᓂᒋ ᐅᒋ ᐸᑕᓐ ᐸᑕᑯᓱᐅᓐ ᐊ ᒋᔄᐛᑦ ᐊᐛᓐ ᐊ ᐃᔨᒥᑦ᙮ ᒧᔭᒻ ᐳᑕᒋᑭᓐ ᐊ ᐃᔅᐱᔅ ᒋᔄᐛᒥᑲᒡ, ᐊᑯᓐ ᑲ ᐃᔅᐱᔅ ᒋᔄᐛᑦ ᐊ ᐃᔨᒥᑦ᙮

¹¹ ᐊᐅᒄ ᒪᒃ ᐅᔭ ᑲ ᐃᔅᒋᔄᑦ, “ᒥᓯᓇᐊ ᑕᓐ ᒐ ᐃᓯ ᐛᐸᑎᒥᓐ ᐊᓄᒡ ᐊᑯ, ᒐ ᐃᑎᓴᐊᒧᐅᑥᐤ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᐊᓂᔭ ᓂᔄᐅᑕᒡ ᐊᔭᒥᐊᐅᒋᐛᐸ ᐃᐱᓴᔅ, ᓯᒥᕆᓇ, ᐸᕐᑲᒪᒻ, ᑕᔭᑕᐃᕋ, ᓴᕐᑎᔅ, ᐱᓚᑕᓪᐱᔭ ᑭᔭ ᓚᐅᑎᓯᔭ ᐊ ᑕᒡ᙮” ᐊᐅᒄ ᐅᔭ ᑲ ᐸᒋ ᐃᓯᑦ᙮

¹² ᓂᒋ ᒂᔅᒋᑲᐳᐅᓐ ᒪᒃ ᐊ ᓇᓂᑐᐛᐱᒥᒃ ᐊᓐ ᐊᐛᓐ ᑲ ᐸᒋ ᐃᔨᒥᐃᑦ᙮ ᐊᑯ ᒂ ᐛᐸᑎᒪᓐ ᓂᔄᐅᑕᒡ ᐛᔅᑕᓂᐱᒪᑭᓇᑎᒂ ᐊ ᐎᔄᐅᓱᓇᔭᐱᔅᑯᐅᒋ᙮

¹³ ᒪᒂᒡ ᒪᒃ ᐊᓂᔭᔪᐛ ᐛᔅᑕᓂᐱᒪᑭᓇᑎᒂ ᐊ ᑎᒂᒋ, ᐊᑯᑕ ᑲ ᐛᐱᒥᒃ ᐊᐛᓐ ᒧᔭᒻ ᐃᔪᐤ ᐅᑯᓯᓴᓐ ᐊ ᐃᓯᓇᑯᓯᑦ᙮ ᐊᓐ ᒪᒃ ᐊᐛᓐ ᒋ ᒋᔅᑭᒻ ᐊᑯᐱᔪᐤ ᐊᓐᑕ ᐃᔅ ᐅᓯᑎᒡ ᐊ ᐃᔎᑭᓂᔨᒡ᙮ ᑭᔭ ᒋ ᐱᒂᑕᐅᐤ ᐅᔅᑲᔅᒋᑭᓂᒡ ᐊ ᐎᔄᐅᓱᓇᔭᐸᑭᓂᔨᒡ ᐅᐱᒂᑕᐅᓐ᙮

¹⁴ ᐅᔅᑎᒂᓐ ᑭᔭ ᐅᐱᔎᐅᓇ ᒋ ᐛᐸᔪᐛ ᒧᔭᒻ ᒪᔭᑕᓂᔅ ᐅᐱᐎᔭ ᐊ ᐃᔅᐱᔅ ᐛᐸᔨᒋ ᒪᒃ ᒧᔭᒻ ᑯᓐ ᐊ ᐃᔅᐱᔅ ᐛᐱᓯᑦ᙮ ᐅᔅᒋᓯᒂ ᒧᔭᒻ ᐊ ᐃᔅᑯᑕᐅᔨᒋ ᒋ ᐃᓯᓇᑯᓂᔪᐤ᙮

¹⁵ ᐅᓯᑕ ᒧᔭᒻ ᑲ ᐛᐸᐱᔅᒋᓯᑦ ᓱᓇᔭᐱᔅᑯᔅ, ᐊᐅᑯᓐ ᑲ ᐃᓯᓇᑯᓂᔨᒋ᙮ ᒧᔭᒻ ᓇᔅᒡ ᐊ ᐛᓯᐧᑯᔅᑕᔨᒋ ᑭᔭ ᐊ ᓱᓱᐛᓯᔨᒋ ᒋ ᐃᓯᓇᑯᓂᔪᐛ᙮ ᐅᐸᑕᑯᓱᐅᓐ ᒧᔭᒻ ᐊᓐᑕ ᓂᐱᔾ ᐊ ᒋᔄᐛᔭᒍᐅᒡ, ᐊᑯᓐ ᑲ ᐃᑎᑕᑯᓂᔨᒡ᙮

¹⁶ ᓂᔄᐅᑕᒡ ᐅᒐᑭᑕᒂ ᒋ ᑕᐧᑯᓇᐤ ᐅᒥᔪᐅᓂᒡ᙮ ᐃᑐᐤ ᐊ ᐃᓯ ᑲᓴᔨᒡ ᐊᓯᒪᑭᓂᓯᐤ ᓂᑐᐱᔪᐅ-ᒧᐧᑯᒪᓂᔪᐤ ᒋ ᐅᒋᐱᔪᐤ ᐊᓐᑕ ᐅᑐᓂᒡ᙮ ᐅᑕᔅᑎᒥᐧᒄ ᓇᔅᒡ ᒋ ᐛᔅᑕᔪᐤ ᒧᔭᒻ ᐱᓯᒻ ᑲ ᐃᑕᔅᑐᐛᑦ᙮

¹⁷ ᐃᔅᐱ ᒪᒃ ᐎᔭᐱᒥᒃ, ᐅᓯᑎᒡ ᐊᓐᑕ ᓂᓯᒋ ᐸᒋᓯᓄᐛᓐ ᒧᔭᒻ ᐊ ᓂᐳᐅᒡ᙮ ᐅᒥᔪᐅᓐ ᐊ ᐊᐱᒋᑕᑦ ᓂᒋ ᐸᒋ ᑕᒋᓂᒄ ᐊᑯ ᒂ ᐃᓯᑦ, “ᐊᑲᐎᔾ ᑯᔅᑕᒋ᙮ ᐊᐅᒄ ᓂᔾ ᓂᔅᑎᒻ ᑲ ᑕᑦ ᑭᔭ ᒪᔅᑕᔾ ᒐ ᑕᑦ᙮

¹⁸ ᐊᐅᒄ ᓂᔾ ᑲ ᐱᒪᑎᓯᑦ᙮ ᓂᒋ ᓂᐱᓐ, ᒥᒄ ᒪᒃ ᐊᓄᒡ ᑲᒋᒡ ᓂ ᐱᒪᑎᓯᓐ᙮ ᓂᔾ ᓄᒋᒪᐧᑲᑕᓐ ᓂᐳᐅᓐ ᑭᔭ ᓂᔾ ᓄᒋᒪᐅᓐ ᐊᓐᑕ ᐊ ᑕᒡ ᐊᓐᒡ ᑲ ᓂᐱᒡ᙮”

¹⁹ “ᒥᓯᓇᐊ ᒥᓯᐛ ᑕᓐ ᒐ ᐃᓯ ᐛᐸᑎᒥᓐ᙮ ᒥᓯᓇᐊ ᑕᓐ ᐊ ᐃᔅᐱᔨᒡ ᐊᓄᒡ ᑭᔭ ᑕᓐ ᒐ ᐃᔅᐱᔨᒡ ᐊᓐᑕ ᓂᔅᑕᒥᒡ᙮

²⁰ ᐊᓐᒡ ᒪᒃ ᓂᔄᐅᑕᒡ ᐅᒐᑭᑕᐧᑯᒡ ᑲ ᐛᐱᒥᑥᐤ ᓂᒥᔪᐅᓂᒡ ᐊ ᑕᐧᑯᓂᒂᐤ ᑭᔭ ᐊᓂᔭᔪᐛ ᓂᔄᐅᑕᒡ ᑲ ᐎᔄᐅᓱᓇᔭᐱᔅᑯᐅᒋ ᐛᔅᑕᓂᐱᒪᑭᓇᑎᒂ, ᐊᐅᒄ ᐅ ᐊ ᐃᓯ ᐎᑎᒪᒐᒥᑲᒋ᙮ ᐊᓐᒡ ᓂᔄᐅᑕᒡ ᐅᒐᑭᑕᐧᑯᒡ, ᐊᐅᒄ ᐊᓐᒡ ᐊᓐᒋᓐᒡ ᑲ ᓂᑲᓂᔅᑯᐛᒡ ᐅᒪᒧᐊᔭᒥᐊᐛ ᐊᓐᑕ ᐊᓂᔭ ᓂᔄᐅᑕᒡ ᐊᔭᒥᐊᐅᒋᐛᐱᒡ ᐊ ᑕᒡ᙮ ᐊᑯ ᐊᓂᔭᔪᐛ ᓂᔄᐅᑕᒡ ᑲ ᐎᔄᐅᓱᓇᔭᐱᔅᑯᐅᒋ ᐛᔅᑕᓂᐱᒪᑭᓇᑎᒂ ᐊᐅᒄ ᐊᓂᔭᔪᐛ ᓂᔄᐅᑕᒡ ᐊᔭᒥᐊᐅᒋᐛᐸ ᑲ ᐊᔨᒧᑕᒋ᙮”