ᑎᐱᑦ ᐅᓂᑭᒧᐅᓇ 96 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐPsalm 96 (Christmas Year C) 1 ᐅ ᓂᑭᒧᔅᑕᐧᒄ ᑎᐸᔨᒋᒐᓱᐤ ᐅᔅᒋ ᓂᑭᒧᐅᓂᔪᐤ: ᓂᑭᒧᔅᑕᐧᒄ ᑎᐸᔨᒋᒐᓱᐤ, ᒥᓯᐛ ᐊᔅᒋᒡ᙮ 2 ᓂᑭᒧᔅᑕᐧᒄ ᑎᐸᔨᒋᒐᓱᐤ, ᒪᒥᒋᑕᒺᐧᒄ ᐅᑦ ᐃᓯᓂᐧᑲᓱᐅᓐ; ᐛᐸᑎᔨᐛᐛᐧᒄ ᐅᐱᒪᒋᐃᐛᐅᓐ ᑕᑥᐤ ᑲᓯᑲᔨᒡ᙮ 3 ᐎᑎᒺᐧᒄ ᐅᒋᔅᑕᔨᑕᑯᓱᐅᓐ ᐊᓐᑕ ᐊ ᑕᔨᒋ ᐊᑲ ᐊᔭᒥᐊᔨᒋ, ᐅᒪᒥᔅᑲᒡ-ᐃᑐᐅᓇ ᐊᓐᑕ ᐊ ᑕᔨᒋ ᒥᓯᐛ ᐃᔪᐛ᙮ 4 ᐛᔅ ᑎᐸᔨᒋᒐᓱᐤ ᒋᔅᑎᓯᐤ, ᓇᔅᒡ ᑭᔭ ᐃᑕᔨᑕᑯᓱᐤ ᒐᒋ ᒪᒥᒋᒪᑭᓄᐅᑦ; ᐊᐛᓯᑕ ᒋᑭ ᓇᓂᒋᔅᑐᐛᑭᓄᐎᐱᓐ ᐃᔅᐱᔅ ᒥᓯᐛ ᒥᓂᑐᐛ᙮ 5 ᐛᔅ ᒥᓯᐛ ᐅᒥᓂᑐᒧᐛᐛ ᑲ ᐸᐱᑐᔅ ᐃᑎᔅᑲᓇᓯᒡ ᐃᔪᒡ ᒥᓂᑐᐧᑲᓄᐎᔪᐛ: ᒪᒃ ᑎᐸᔨᒋᒐᓱᐤ ᒋ ᐅᓯᑕᐤ ᒋᓯᒂ᙮ 6 ᒋᔅᑕᔨᑕᑯᓱᐅᓂᔪᐤ ᑭᔭ ᐅᒋᒪᐛᔨᑕᑯᓱᐅᓂᔪᐤ ᐅᑎᔅᑲᐎᔅᑲᑯᐤ: ᒥᔅᑯᐅᓯᐅᓂᔪᐤ ᑭᔭ ᒥᔪᓇᑯᓯᐅᓂᔪᐤ ᑎᒂᓂᔪᐤ ᐅᐸᔭᒋ-ᒥᒋᐛᐱᒡ᙮ 7 ᒥᔨᐧᒄ ᑎᐸᔨᒋᒐᓱᐤ, ᐅ ᒋᔨᐛᐤ ᐃᔪᒡ, ᒥᔨᐧᒄ ᑎᐸᔨᒋᒐᓱᐤ ᒋᔅᑕᔨᑕᑯᓱᐅᓂᔪᐤ ᑭᔭ ᒥᔅᑯᐅᓯᐅᓂᔪᐤ᙮ 8 ᒥᔨᐧᒄ ᑎᐸᔨᒋᒐᓱᐤ ᒋᔅᑕᔨᑕᑯᓱᐅᓂᔪᐤ ᐊᔅᐱᔅ ᒋᔅᑕᔨᑕᑯᓂᔨᒡ ᐅᑦ ᐃᓯᓂᐧᑲᓱᐅᓐ: ᐸᑕᒄ ᐱᔅᑎᓂᒐᐅᓇ, ᐸᒋ ᐃᑐᑕᒄ ᒪᒃ ᐅᒪᐛᒋᐃᑐᐅᒋᐛᐱᒡ᙮ 9 ᐅᐊᔭᒥᐊᔅᑕᐧᒄ ᑎᐸᔨᒋᒐᓱᐤ ᐊ ᐃᓯ ᒥᔪᓇᒂᒡ ᐸᔭᒋᓯᐅᓐ: ᓇᓂᒋᔅᑕᐧᒄ, ᒥᓯᐛ ᒋᔨᐛᐤ ᐊᔅᒋᒡ᙮ 10 ᐃᑎᐧᑯᒡ ᐊᑲ ᐊᔭᒥᐊᒡ, “ᑎᐸᔨᒋᒐᓱᐛ ᐊ ᑎᐸᔨᒋᒐᔨᒋ᙮” ᐊᔅᒋᔾ ᑭᔭ ᒋᑭ ᐃᓯ ᐊᔨᑎᔅᑕᑭᓄᐤ; ᒐ ᐊᑲ ᒋ ᐊᒋᐱᔨᑕᑭᓂᐅᒡ: ᒋᑭ ᑎᐸᔅᑯᓇᐤ ᐃᔪᐛ ᑯᐃᔅᑯᑕᑎᓯᐅᓂᒡ᙮ 11 ᐊᑯᔅ ᒋᓯᒂ ᒋᑭ ᒥᔽᑕᒧᒪᑭᓇ, ᐊᑯᔅ ᑭᔭ ᐊᔅᒋᔾ ᒋᑭ ᓯᒋᔭᓯᒥᑭᓐ; ᐊᑯᔅ ᐎᓂᐸᒄ ᒋᑭ ᒋᔄᐛᒥᑭᓐ ᑭᔭ ᐊ ᐃᓯ ᓴᑭᔅᒋᓇᒡ᙮ 12 ᐊᑯᔅ ᓂᑕᐅᒋᑕᑭᓐ ᒋᑭ ᒧᒋᒐᔨᑎᒧᒥᑭᓐ, ᑭᔭ ᒥᓯᐛ ᐊᓐᑕ ᐊ ᑎᒂᒡ: ᐊᑯ ᒥᓯᐛ ᒥᔅᑎᑯᒡ ᓄᒋᒥᒡ ᒐ ᒥᔽᔨᑕᒡ᙮ 13 ᐅᑎᔅᑯᐤ ᑎᐸᔨᒋᒐᓱᐛ; ᐛᔅ ᐸᒋ ᐃᑐᑕᐤ, ᐛᔅ ᐸᒋ ᐃᑐᑕᐤ ᒐᒋ ᑎᐸᔅᑯᓇᐧᒃ ᐊᔅᒋᔪᐤ; ᒋᑭ ᑎᐸᔅᑯᓂᒻ ᐊᔅᒋᔪᐤ ᑯᐃᔅᑯᑕᑎᓯᐅᓂᒡ, ᑭᔭ ᐃᔪᐛ ᑕᑈᐅᓂᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.