ᑎᐱᑦ ᐅᓂᑭᒧᐅᓇ 91 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᐊᓐ ᑲ ᐎᒋᑦ ᐅᑲᓱᐅᓂᔨᒡ ᒪᐅᒡ ᒋᔅᑎᓯᔨᒋ, ᒋᑭ ᑕᐤ ᓯᐸ ᐊ ᑎᑲᔅᑕᓯᓂᔨᒋ ᒪᐅᒡ ᓱᐧᑲᑎᓯᔨᒋ᙮

² ᓂᑭ ᐃᔅᒋᔄᓐ ᑎᐸᔨᒋᒐᓱᐤ ᐅᒡ, “ᐎᔾ ᓂ ᓇᑎᓯᒧᐅᓐ ᑭᔭ ᓂᓂᑐᐱᔪᐅᒋᐛᑉ; ᓂᒋᓴᒪᓂᑐᒻ, ᑲ ᒪᒥᓯᑐᑐᐅᒄ᙮”

³ ᒐᔅᑎᓇᔅ ᒋᑭ ᒥᑕᒂᓇᒪᒄ ᐅᓇᐃᑭᓂᔪᐤ ᐅᑕᐸᒂᐛ, ᑭᔭ ᒥᒋ ᐃᑕᔅᐱᓇᐅᓂᔪᐤ ᐅᒡ᙮

⁴ ᒋᑭ ᐊᒂᓇᐅᒄ ᐅᒥᑯᓇ ᐅᒡ, ᑭᔭ ᓯᐸ ᐅᑎᑎᑭᓂᒡ ᒋᑭ ᒪᒥᓯᓐ: ᐅᑕᑈᐅᓐ ᒋᑭ ᐅᑦ ᐊᒂᓇᐊᓱᐛᑭᓄᐛᓐ ᑭᔭ ᒋᑭ ᐊᒂᓇᐱᔅᑯᒧᐛᓐ᙮

⁵ ᓇᒪᐎᔾ ᒋᑭ ᑯᔅᑕᓐ ᑲ ᑯᔅᑕᑎᒂᒡ ᒪᒂᒡ ᐊ ᑎᐱᔅᑲᒡ: ᓇᒪ ᑭᔭ ᐊᑭᔅᒄ ᑲ ᐱᒥᐱᔨᑦ ᒪᒂᒡ ᐊ ᒋᓯᑲᒡ;

⁶ ᓇᒪ ᑭᔭ ᐊᐧᑯᐃᑕᔅᐱᓇᐅᓂᒡ ᑲ ᑎᑯᔅᑭᓐ ᐊᓐᑕ ᐅᓂᑎᐱᔅᒋᓯᐅᓂᒡ, ᓇᒪ ᑭᔭ ᓂᓱᐅᓇᑎᓯᐅᓐ ᑲ ᓂᓱᐅᓇᒋᐃᐛᒥᑭᒡ ᐊ ᐊᐱᑕᒋᓯᑲᒡ᙮

⁷ ᒐᓯᐱᔪᐤ ᐸᓱᒡ ᒋᑭ ᐸᒋᓯᓄᐅᒡ, ᑭᔭ ᐸᐃᑯᔪᐤ ᑕᑥᐤ ᒐᓯᐱᔪᐤ ᒋᒥᔪᐅᓂᒡ; ᒪᒃ ᓇᒪᐎᔾ ᒥᒋᒪ ᒋᑭ ᓇᑎᑯᓐ᙮

⁸ ᒥᒄ ᒋᔅᒋᓯᑯᒡ ᒋᑭ ᐅᒋ ᐛᐸᑕᓐ ᒐ ᐃᓯ ᑎᐸᐊᒪᐛᑭᓄᐅᒡ ᐅᒥᒋᑥᐅᒡ᙮

⁹ ᐊᒋ ᐅᐛᑕᐱᒥᑦ ᑎᐸᔨᒋᒐᓱᐤ ᑲ ᐅᓇᑎᓯᒧᐅᓂᔨᓐ, ᒪᐅᒡ ᒋᔅᑎᓯᑦ ᐅᑦ, ᒐᒋ ᐅᑦ ᐃᑕᐅᓂᔨᓐ;

¹⁰ ᓇᒪᐎᔾ ᒐᒂᓐ ᑲ ᒪᔭᑎᒡ ᒋᑭ ᐅᑎᑎᑯᓐ, ᓇᒪ ᑭᔭ ᒥᒄ ᐊᓐ ᐊᓯᓇᒂᒡ ᐃᑕᔅᐱᓇᐅᓐ ᒥᒋᒪ ᒋᒋᒡ ᒋᑭ ᐸᒋ ᐃᑐᑕᒪᑭᓐ᙮

¹¹ ᐛᔅ ᒋᑭ ᐃᑎᓱᐛᑕᐤ ᐅᑦ ᐊᓐᒋᓂᒪ ᒐᒋ ᑭᓄᐛᔨᒥᔅᒋᔨᔅᒋ, ᒐᒋ ᑭᓄᐛᔨᒥᔅᒋᔨᔅᒋ ᒥᓯᐛ ᒐ ᐃᓯ ᐸᐸᔨᑐᑕᐅᓇ᙮

¹² ᒋᑭ ᓯᑐᓂᑯᒡ ᐅᑎᒋᐛᒡ, ᒐ ᐊᑲ ᒋ ᐅᑕᒪᐱᔅᒋᓯᑕᓯᓂᔨᓐ᙮

¹³ ᒋᑭ ᑕᑯᔅᑲᑕᐤ ᒥᓯᐱᓱᐤ ᑭᔭ ᒋᓇᐱᒄ: ᒥᓯᐱᓯᔅ ᑭᔭ ᒥᔅᑎᒋᓇᐱᒄ ᒋᑭ ᒪᒪᑯᔅᑯᐛᐅᒡ᙮

¹⁴ “ᐊᒋ ᓴᒋᐃᑦ, ᓂᑭ ᐱᒪᒋᐊᐤ: ᓂᑭ ᓇᐃᐱᐊᐤ ᐃᔅᐱᒥᒡ, ᐊᒋ ᒋᔅᒐᔨᑕᐧᒃ ᓂᑦ ᐃᓯᓂᐧᑲᓱᐅᓂᔪᐤ᙮

¹⁵ ᓂᑭ ᓇᓂᑐᒥᒄ, ᓂᑭ ᓂᔅᑯᒪᐤ ᒪᒃ: ᓂᑭ ᐎᒐᐊᐤ ᐊᔨᒥᓯᒐ; ᓂᑭ ᐱᒪᒋᐊᐤ, ᑭᔭ ᓂᑭ ᒋᔅᑕᔨᒪᐤ᙮

¹⁶ ᓇᐅᔅ ᒐᒋ ᐱᒪᑎᓯᑦ ᓂᑭ ᐅᒋ ᑕᐸᔨᑎᒥᐊᐤ, ᑭᔭ ᓂᑭ ᐛᐸᑎᔭᐤ ᓂ ᐱᒪᒋᐃᐛᐅᓂᔪᐤ᙮”