ᑎᐱᑦ ᐅᓂᑭᒧᐅᓇ 90 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒥᓯᓇᐃᑭᓐ 4 1 ᑎᐸᔨᒋᒐᓱᐤ, ᒋᔾ ᐊᐅᒄ ᑲ ᐎᒋᔭᒡ ᒥᓯᐛ ᑲ ᐸᒋ ᐊᓂᔅᒐ ᐱᒪᑎᓯᓇᓄᐅᒡ᙮ 2 ᐊᒺᔭ ᐅᒋ ᑎᒂᒋ ᐱᔅᑯᑎᓇᐛ, ᐊᒺᔭ ᑭᔭ ᐅᒋ ᐅᓯᑕᔨᓐ ᐊᔅᒋᔾ ᑭᔭ ᒥᓯᐛ ᒐᒂᓐ ᐊᓐᑕ ᐊ ᑎᒂᒡ, ᒧᔅ ᑲᒋᒡ ᐅᒋ ᑭᔭ ᒧᔅ ᑲᒋᒡ ᐃᓯ ᒋ ᒋᓴᒥᓂᑐᐅᓐ᙮ 3 ᒋ ᐃᑐᑐᐛᐤ ᐃᔪᐤ ᒥᓐ ᑲᐤ ᒐ ᐊᑎ ᐊᓯᔅᒋᐅᑦ; ᐊᑯ ᐃᔭᔨᓐ ᒪᒃ, “ᐸᒋ ᒋᐛᒄ, ᒋᔨᐛᐤ ᐃᔪᐤ ᐊᐛᓯᑎᒄ᙮” 4 ᐛᔅ ᒐᓯᐱᔪᐛ ᐱᐳᓇ ᒋᔾ ᐊ ᐃᓯ ᑭᓄᐛᐸᑎᒥᓐ ᒧᔭᒻ ᐅᑕᑯᓯᒡ, ᓴᔅ ᑲ ᐎᒪᐱᔨᒋ, ᑭᔭ ᒧᔭᒻ ᐸᐃᒂᐤ ᐊ ᐛᒋᐎᓇᓂᐎᒡ ᐊ ᑎᐱᔅᑲᒡ ᐃᓯᓇᑯᓐ᙮ 5 ᒋᒋᑕᒧᒐᓐ ᔅᑲ ᒥᒄ ᐊ ᐛᐸᐸᑯᒡ; ᒧᔭᒻ ᐊ ᓂᐸᓂᐅᒡ ᐃᓯᓇᑯᓯᐅᒡ: ᒧᔭᒻ ᒪᔅᑯᓱᐛ ᐊ ᒐᒋᓴᐸᔭᔨᒡ ᑲ ᐸᒋ ᓂᑕᐅᒋᓂᔨᒋ ᐃᓯᓇᑯᓯᐅᒡ᙮ 6 ᐊ ᒐᒋᓴᐸᔭᔨᒡ ᒥᑯᒋ ᑲ ᐸᒋ ᒥᔪᓂᑕᐅᒋᓂᔨᒡ; ᐛᑕᑯᓯᒡ ᓴᔅ ᑲ ᐛᓯᑲᓂᐎᔨᒡ, ᑭᔭ ᐱᐊᔅᑕᔨᒡ᙮ 7 ᐛᔅ ᓂ ᒪᒋᓐᑎᑯᓇᓐ ᒋᒋᔄᓯᐅᓐ, ᑭᔭ ᓂᑦ ᐊᒂᑕᔨᑎᒥᐃᑯᓇᓐ ᐊᓐᑕ ᒋᑦ ᐊᐧᑯᔪᐛᓱᐅᓐ᙮ 8 ᐛᔅ ᐅᑎᔅᑯᐤ ᐊ ᐃᑕᔨᓐ ᔅᒋ ᐊᔅᑕᓐ ᑲ ᐃᓯ ᐊᑲ ᑯᐃᔅᑯᑐᑎᒪᒡ, ᒋᒧᑦ ᓂᒥᒋᑥᐅᓇᓇ ᒪᒃ ᓇᐃᔪᐤ ᒋᔅᒋᓯᑯᒡ ᒋ ᐛᐸᑕᓐ᙮ 9 ᐛᔅ ᒥᓯᐛ ᓂᒋᓯᑲᒥᓇᓇ ᐊᑎ ᒥᔪᐛᐸᔨᐛ ᐊᔅᒄ ᐊ ᐊᐧᑯᔪᐛᓯᔅᑐᐅᔭᒡ; ᓂ ᐸᒋ ᐃᔎᐸᔨᑕᓇᓐ ᓂᐱᒪᑎᓯᐅᓇᓇ ᒧᔭᒻ ᐊᑎᔪᐧᑭᓐ ᐊ ᐎᑕᑭᓄᐅᒡ᙮ 10 ᓂᔄᐅᑕᒡ ᑕᑐᔪᐤ ᑕᑐᐤ ᐱᐳᓇ ᓂ ᒥᔨᑯᐅᓇᓐ; ᑭᔭ ᒪᒃ ᔭᓇᐤ ᑕᑐᔪᐤ ᐱᐳᓇ ᓂ ᓱᒋᓯᓇᓂᐎᒡ; ᐃᔭᐱᒡ ᐊᓂᔭᔪᐤ ᐛᒋ ᒪᒪᑕᑯᒧᒡ ᓇᓇᐧᑲᑎᓯᒥᑭᓂᔪᐤ ᑭᔭ ᐊᔨᒥᓯᒥᑭᓂᔪᐤ; ᐛᔅ ᐎᐱᒡ ᓇᒪ ᑎᑯᓐ, ᐊᑯ ᐃᔭᒐᐎᔭᒡ᙮ 11 ᐊᐛᓐ ᒐᔅᒐᔨᑕᐧᒃ, ᐊᓯ ᒋᔅᒐᔨᑕᑭᓄᐅᒡ ᒂᔅᐱᓂᔅᑕᑯᐎᔨᓐ ? ᐊᔅᐱᔅ ᓱᒋᓯᒥᑲᒡ ᒋᒋᔄᐛᓯᐅᓐ ᑭᔭ ᒋᑦ ᐊᐧᑯᔪᐛᓱᐅᓐ᙮ 12 ᐃᓯ ᒋᔅᑯᑎᒧᐅᓇᓐ ᒐ ᐊᒋᑎᒪᒡ ᐊ ᑕᑎᒋ ᓂᒋᓯᑲᒥᓇᓇ, ᒐᒋ ᐊᑎ ᐃᑈᐧᑲᐅᑕᐊᔭᒡ᙮ 13 ᐳᓂ ᒋᓯᐛᓯᔅᑐᐅᓇᓐ ᐅ ᑎᐸᔨᒋᒐᓱᐤ, ᐊᑯ ᐃᔅᐱᔅ ᐊᑯ ? ᐊᑯᔅ ᒪᒃ ᐳᓇᔭᔨᑕ ᑲ ᐃᑕᔨᒥᔭᒡ ᓂᔭᓐ ᒋᑦ ᐊᑐᔅᒐᔭᑭᓐᒡ᙮ 14 ᐅ ᑕᐸᔨᑎᒧᐃᓇᓐ ᒋᒋᓴᐛᑐᑕᒐᐅᓐ ᒐᒋᓴᐸᔭᒐ: ᒐᒋ ᒧᒋᒐᔨᑎᒪᒡ ᑭᔭ ᒐᒋ ᒥᔽᔨᑎᒪᒡ ᒧᔅ ᒐ ᐃᔅᐱᔅ ᐱᒪᑎᓯᔭᒡ᙮ 15 ᑐᑐᐅᓇᓐ ᒐ ᐃᔅᑯ ᒥᔽᔨᑎᒪᒡ ᑕᑐᐤ ᒋᓯᑲᐛ ᑲ ᐃᔅᑯ ᓂᓇᐧᑲᒋᐃᔭᒡ, ᑭᔭ ᑕᑐᐤ ᐱᐳᓇ ᑲ ᐃᔅᑯ ᑭᓄᐛᐸᑎᒪᒡ ᑲ ᒪᔭᑎᒡ᙮ 16 ᐊᑯᔅ ᒋᑦ ᐃᑐᐅᓂᔪᐤ ᒋᑭ ᐛᐸᑎᒧᒡ ᒋᑦ ᐊᑐᔅᒐᔭᑭᓐᒡ, ᑭᔭ ᒋᒋᔅᑎᓯᐅᓂᔪᐤ ᒋᑭ ᑎᑯᓂᔪᐤ ᐊ ᑕᔨᒋ ᐅᑦ ᐊᐛᓯᒥᓱᐛᐛ᙮ 17 ᐊᑯᔅ ᑭᔭ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ ᒋᒋᓴᐛᑎᓯᐅᓐ ᒋᑭ ᓄᑯᓐ ᓂᔭᓐ ᐊ ᐃᑕᔭᒡ: ᒐᔅᑎᓇᑎᔅᑕ ᒪᒃ ᐊᓐ ᐊᐱᑎᓯᐅᓐ ᑲ ᐃᑐᑎᒪᒡ ᓂᑎᒋᓇᒡ; ᓂᐦᐃ, ᐊᓐ ᐊᐱᑎᓯᐅᓐ ᑲ ᐃᑐᑎᒪᒡ ᓂᑎᒋᓇᒡ ᒐᔅᑎᓇᑎᔅᑕ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.