ᑎᐱᑦ ᐅᓂᑭᒧᐅᓇ 88 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅ ᑎᐸᔨᒋᒐᓱᐤ ᒋᓴᒪᓂᑐᐤ ᐛᒋᐱᔨᒡ ᓂᐱᒪᒋᐃᑯᓯᐅᓐ, ᐊ ᒋᓯᑲᒡ ᑭᔭ ᐊ ᑎᐱᔅᑲᒡ ᔅᒋ ᒧᔅᑯᐛᑕᑎᓐ᙮ 2 ᐊᑯᔅ ᓂᑦ ᐊᔭᒥᐊᐅᓐ ᒋᑭ ᐅᑎᔅᑲᐎᔅᑲᑯᓐ: ᓄᑐᑕ ᓂᒧᔅᑯᐛᓱᐛᐅᓐ᙮ 3 ᐛᔅ ᓂᑦ ᐊᒐᐧᒄ ᓴᑭᔅᒋᓇᔅᑲᑯᐤ ᐊᔨᒥᓯᐅᓂᔪᐤ, ᑭᔭ ᓂᐱᒪᑎᓯᐅᓐ ᐸᒋ ᐃᔅᐱᔪᐤ ᒋᐱᐃᒋᐛᐱᒡ ᐃᓯ᙮ 4 ᓂᑦ ᐊᓯᑕᒋᒥᑯᐅᓐ ᐊᓐᒡ ᑲ ᓂᑕᑐᐎᒡ ᐛᑎᑯᓂᒡ: ᓂ ᓇᔅᐱᑐᐛᐤ ᐃᔪᐤ ᐊᑲ ᐅᒥᔅᑯᐅᓯᐅᓂᑦ; 5 ᐊ ᑎᐸᔨᒥᓱᔭᓐ ᒧᔭᒻ ᑲ ᓂᐱᒡ, ᒧᔭᒻ ᑲ ᓂᐸᐊᑭᓄᐅᒡ ᑲ ᐱᒥᓯᒡ ᒋᐱᐃᒋᐛᐱᒡ, ᒐ ᐊᑲ ᓴᔅ ᒋᔅᒋᑐᐅᑥᐤ: ᑲ ᒋᒥᓱᑯᒡ ᒋᑎᒋᔪᐤ᙮ 6 ᔅᒋ ᐱᒥᓯᒥᓐ ᒪᐅᒡ ᐊᔭᐅᓇᑲᑕᒡ ᐛᑎᑲᓐ, ᐊᐅᑲᔅᑕᔭᒡ ᐊᓐᑕ ᐊ ᒋᔅᑲᔪᐛᒡ᙮ 7 ᒋᑦ ᐊᐧᑯᔪᐛᓱᐅᓐ, ᓂ ᑯᓯᑯᒪᒋᑕᓐ, ᑭᔭ ᔅᒋ ᑯᒂᑕᒋᐃᓐ ᒥᓯᐛ ᒋ ᒪᒪᐧᑲᐊᓂᒥᒡ ᐅᒡ᙮ 8 ᔅᒋ ᔭᐛᐸᑎᔨᓐ ᓂᐎᒐᐛᑭᓐᒡ; ᔅᒋ ᐃᓯᔨᓐ ᒐᒋ ᐎᓇᐃᒥᒡ: ᓂ ᒋᐸᐅᑯᐅᓐ, ᓇᒪ ᒪᒃ ᓂᑭ ᐸᒋ ᐎᐎᓐ᙮ 9 ᓇᒪ ᐊ ᒪᒂᐃᑎᒪᓐ: ᑎᐸᔨᒋᒐᓱᐤ, ᒧᓯᓇᐤ ᔅᒋ ᓇᓂᑐᒥᑎᓐ, ᔅᒋ ᓱᐅᓂᔅᒐᔨᔅᑕᑎᓐ᙮ 10 ᒋᑭ ᐛᐸᑎᔭᐅᒡ ᐊ ᒪᒥᔅᑲᒡ ᐃᑐᐅᓇ ᑲ ᓂᐱᒡ ? ᑲ ᓂᐱᒡ ᐊ ᒋᑭ ᐅᓂᔅᑲᐅᒡ ᒐᒋ ᒪᒥᒋᒥᔅᒡ ? 11 ᒋᑭ ᐎᑕᑭᓄᐤ ᐊ ᒋᓴᒋᐃᐛᐤ ᒋᓴᐛᑎᓯᐅᓐ ᒋᐱᐃᒋᐛᐱᒡ ? ᑭᔭ ᒪᒃ ᒋᑯᐃᔅᑯᑐᐅᓐ ᓂᓱᐅᓇᑎᓯᐅᓂᒡ ? 12 ᒋᑭ ᒋᔅᒐᔨᑕᑯᓇ ᐊ ᒋᒪᒥᔅᑲᒡ-ᐃᑐᐅᓇ ᐊᓐᑕ ᐊ ᐅᓂᑎᐱᔅᑲᒡ ? ᑭᔭ ᒋᑯᐃᔅᑯᑕᑎᓯᐅᓐ ᐅᓂᒋᔅᒋᓯᐤ ᐊᔅᒋᒡ ? 13 ᒪᒃ ᒋᔾ ᔅᒋ ᒧᔅᑯᐛᑎᑎᓐ, ᐅ ᑕᐸᔨᒋᒐᔭᓐ; ᒋᔭᒋᓴᐸᔭᒋ ᒪᒃ ᓂᑦ ᐊᔭᒥᐊᐅᓐ ᒋᑭ ᐸᒋ ᐅᑎᔅᑲᐎᔅᑲᑯᓐ᙮ 14 ᑎᐸᔨᒋᒐᓱᐤ, ᑕᓇᒡ ᐛᒋ ᐛᐱᓂᑦ ᓂᑦ ᐊᒐᐧᒄ ? ᑕᓇᒡ ᐛᒋ ᑲᓱᔅᑐᐎᔨᓐ ? 15 ᓂ ᒪᒂᐃᑕᓐ ᑭᔭ ᒐᑲᑦ ᓂ ᓂᐱᓐ ᑲ ᐃᔅᐱᔅ ᐸᒋ ᐅᔅᒋᓂᒋᓱᔭᓐ: ᒪᒂᒡ ᐊ ᐎᓴᑲᒪᒋᑕᔭᓐ ᒋ ᑯᔅᑕᒋᐃᐛᐅᓇ ᓂ ᐛᐛᓇᔨᑕᓐ᙮ 16 ᒋᑦ ᐊᒂᑎᓯᐤ ᐊᐧᑯᔪᐛᓱᐅᓐ ᓂ ᐸᓯᒋᐸᔨᔅᑕᑯᓐ; ᒋ ᑯᔅᑕᒋᐃᐛᐅᓇ ᓂᒋ ᒥᓱᑯᓐ᙮ 17 ᒧᓯᓇᐤ ᓂᑭ ᐸᒋ ᐛᔅᑲᔅᑲᑯᒡ ᒧᔭᒻ ᓂᐱᔾ; ᓂᒋ ᒪᒧᐤ ᐛᔅᑲᔅᑲᑯᒡ᙮ 18 ᓂᓴᒋᐊᑭᓐ ᑭᔭ ᓂᐎᒐᐛᑭᓐ ᐛᔪᐤ ᔅᒋ ᐃᒐᓂᒧᐅᓐ, ᑭᔭ ᓂᒋᔪᐛᒪᑭᓐᒡ ᐊᓐᑕ ᐊ ᐅᓂᑎᐱᔅᑲᔨᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.