ᑎᐱᑦ ᐅᓂᑭᒧᐅᓇ 85 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᑎᐸᔨᒋᒐᓱᐤ, ᔅᒋ ᒋᓴᐛᑐᑕᓐ ᒋᑦ ᐊᔅᒋᔾ: ᔅᒋ ᐸᒋ ᒋᐛᑕᐛᓐ ᒪᒪᒋᑯᓂᑯᓯᐅᓂᔪᐤ ᒐᑭᑉ᙮ 2 ᔅᒋ ᐛᐸᔨᑎᒺᓐ ᐅᒥᒐᑎᓯᐅᓄᐛᐛ ᒋᑦ ᐃᔨᒥᒡ; ᔅᒋ ᐊᒂᓇᐊᒺᓐ ᒥᓯᐛ ᐅᒥᒋᑐᑎᒧᐅᓄᐛᐛ᙮ 3 ᔅᒋ ᐃᒐᓇᓐ ᒥᓯᐛ ᒋᑦ ᐊᐧᑯᔪᐛᓱᐅᓐ: ᔅᒋ ᐳᓄᔨᑕᓐ ᒋᒋᔄᓯᐅᓐ ᑲ ᐊᒂᑎᓯᒥᑲᒡ᙮ 4 ᒂᔅᒋᓂᓇᓐ, ᐅ ᒋᓴᒪᓂᑐᐤ ᐛᒋᐱᔨᒡ ᓂᐱᒪᒋᐃᑯᓯᐅᓂᓇᓐ, ᑭᔭ ᐳᓂ ᒋᔄᓯᔅᑐᐅᓇᓐ᙮ 5 ᑲᒋᒡ ᐊ ᒋᑭ ᒋᔄᐃᒥᓇᓐ ? ᒋᑭ ᐛᐸᑎᔭᐅᒡ ᐊ ᒋᒋᔄᓯᐅᓂᔪᐤ ᒥᓯᐛ ᒐ ᐊᑎ ᐊᓂᔅᒐ ᐱᒪᑎᓯᒡ ? 6 ᓇᒪ ᐊ ᒥᓐ ᒋᑭ ᒥᓏᒋᐃᓇᓐ; ᒋᑦ ᐃᔨᒥᒡ ᒐᒋ ᒧᒐᔨᑕᒡ ᒋᔾ ᐅᒋ ? 7 ᐛᐸᑎᔨᓇᓐ ᒋᒋᔅᑎᒪᒐᔨᒋᒐᐅᓐ, ᐅ ᑎᐸᔨᒋᒐᓱᐤ, ᒥᔨᓇᓐ ᒪᒃ ᒋᐱᒪᒋᐃᐛᐅᓐ᙮ 8 ᓂᑭ ᓂᑐᑕᓐ ᒐ ᐃᔅᒋᔄᒂ ᒋᓴᒪᓂᑐᐤ ᑎᐸᔨᒋᒐᓱᐤ: ᐛᔅ ᒋᔭᒪᔨᑎᒧᐅᓂᔪᐤ ᒋᑭ ᐊᔨᒧᑎᒧᐛᐤ ᐅᑦ ᐃᔨᒪ, ᑭᔭ ᐅ ᐸᔭᒋᓯᒪ: ᐊᑯᔅ ᒪᒃ ᐊᑲᐎᔾ ᒥᓐ ᒋᑭ ᒋᐛᐅᒡ ᑭᒐᐸᑎᓯᐅᓂᒡ ᐃᔅ᙮ 9 ᒐᔅᑎᓇᔅ ᐸᔄᐸᑎᒥᔪᐛ ᐅᐱᒪᒋᐃᐛᐅᓐ ᐊᓂᔭᔪᐛ ᑲ ᓇᓂᒋᔅᑕᑯᑦ; ᒋᔅᑕᔨᑕᑯᓱᐅᓐ ᒐᒋ ᐎᒋᒥᑭᓐ ᒋᑦ ᐊᔅᒋᓇᒡ᙮ 10 ᒋᔅᑎᒪᒐᔨᒋᒐᐅᓐ ᑭᔭ ᑕᑈᐅᓐ ᒋ ᓂᒋᔅᑲᑐᒥᑭᓇ; ᑯᐃᔅᑯᑕᑎᓯᐅᓐ ᑭᔭ ᒋᔭᒪᔨᑎᒧᐅᓐ ᒋ ᐅᒐᒥᑐᒥᑭᓇ᙮ 11 ᑕᑈᐅᓐ ᒋᑭ ᐸᒋ ᓴᒋᑎᓐ ᐊᔅᒋᒡ; ᑭᔭ ᑯᐃᔅᑯᑕᑎᓯᐅᓐ ᒋᒋᒋᓯᑯᒡ ᒋᑭ ᐅᒋ ᐃᑕᐱᒥᑭᓐ᙮ 12 ᓂᐦᐃ, ᑎᐸᔨᒋᒐᓱᐤ ᒋᑭ ᒥᔨᐛᐤ ᑲ ᒥᔽᓯᔨᒡ; ᑭᔭ ᒋᑦ ᐊᔅᒋᓄᐤ ᒋᑭ ᒥᔽᒥᑭᓐ ᑲ ᒥᔪ ᓂᑕᐅᒋᒋ᙮ 13 ᑯᐃᔅᑯᑕᑎᓯᐅᓂᔪᐤ ᒋᑭ ᓂᑲᓄᑕᑯᐤ; ᑭᔭ ᒋᑭ ᓂᐳᐎᐃᑯᓄᐤ ᐊᓐᑕ ᐊᑎ ᑕᑕᐧᑯᔅᒐᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.