ᑎᐱᑦ ᐅᓂᑭᒧᐅᓇ 84 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᑕᑈ ᒥᔽᔨᑕᑯᓇ ᒋᑦ ᐊᔭᒥᐊᐅᒋᐛᐱᒪ, ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ ! 2 ᓂᑦ ᐊᒐᐧᒄ ᐱᑯᓴᔨᒧᐤ, ᓂᐦᐃ ᐱᒂᔨᑎᒺᐤ ᐅᒪᐛᒋᐃᑐᐅᒋᐛᐱᔪᐤ ᑎᐸᔨᒋᒐᓱᐛ; ᓂᑕᐃᔪᐤ ᑭᔭ ᓂᔭᓯᔪᐤ ᒧᔅᑯᐛᑎᑯᐤ ᐸᒪᑎᓯᑦ ᒋᓴᒪᓂᑐᐤ᙮ 3 ᓂᐦᐃ, ᐱᔭᓯᔅ ᒋ ᒥᔅᑭᒻ ᒐ ᐎᒋᑦ, ᑭᔭ ᐅᒥᒋᔅᑯᓯᔅ ᒐ ᐅᔅᑐᓂᑦ, ᐊᓐᑕ ᒐ ᐅᐱᒋᐊᐅᓱᑦ, ᐃᔭᐱᒡ ᒋᐱᔅᑎᓂᒐᐅᓇᐱᔅᑯᒡ, ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ, ᓂᒋᓴᐅᒋᒪᒻ ᑭᔭ ᓂᒋᓴᒪᓂᑐᒻ᙮ 4 ᓱᐛᔨᑕᑯᓱᐅᒡ ᐊᓐᒡ ᑲ ᐎᒋᒡ ᒋᒋᒡ: ᐃᔭᐱᒡ ᐊᔅᒄ ᒋᑭ ᒪᒥᒋᒥᑯᒡ᙮ 5 ᓱᐛᔨᑕᑯᓱᐤ ᐊᓐ ᐃᔪᐤ ᑲ ᐅᒥᔅᑯᐅᓯᒥᔅᒃ; ᐅᑕᐃᒡ ᑲ ᑎᒂᓂᔨᒋ ᒋᑦ ᐃᓯᑥᐅᓇ᙮ 6 ᐊᓐ ᐊ ᓴᐳᑕᐛᔅᑲᐧᒃ ᐊ ᒪᓄᐎᔨᒡ ᐊ ᑐᐛᑎᓇᔨᒡ, ᑲ ᒧᔅᒋᐅᐛᓂᑕᑦ; ᓂᐦᐃ ᐎᐱᒡ ᐛᒋ ᓴᑭᔅᒋᓇᒋ ᒥᔪ ᒐᒂᓇ ᒋᒧᓇᐳᒡ ᐅᒡ᙮ 7 ᐊᔭᔅᒄ ᒥᔅᑯᐅᓯᐅᒡ, ᑲ ᐃᑕᒡ ᓴᐃᔭᓂᒡ ᐅᑎᔅᑲᐎᔅᑐᐛᐅᒡ ᒋᓴᒪᓂᑐᐛ᙮ 8 ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ ᒋᓴᒪᓂᑐᐤ, ᓂᑐᑕ ᓂᑦ ᐊᔭᒥᐊᐅᓐ, ᐱᓯᒋᑕ ᐅ ᒐᑭᑉ ᐅᒋᓴᒪᓂᑐᒪ᙮ 9 ᐛᐸᑕ, ᐅ ᒋᓴᒪᓂᑐᐤ ᓂᑦ ᐊᒂᓇᐅᓱᐛᑭᓐ, ᑭᓄᐛᐸᑎᒻ ᑭᔭ ᐅᑕᔅᑎᒥᐧᒄ ᒋᑦ ᐊᑐᒥᔅᑯᓂᑭᓐ᙮ 10 ᐛᔅ ᐸᐃᑯ ᒋᓯᑲᐛ ᒋ ᒪᐛᒋᐃᑐᐅᒋᐛᐱᒡ ᐃᐛᒃ ᒥᔽᓱᐤ ᐃᔅᐱᔅ ᒐᓯᐱᔪᐤ᙮ ᐊᐛᔅᑕ ᓂᑭ ᐎ ᑭᓄᐎᔎᑐᐛᐤ ᐎᒋᒡ ᓂᒋᓴᒪᓂᑐᒻ, ᐃᔅᐱᔅ ᒐᒋ ᐎᒋᔭᓐ ᒥᒐᑎᓯᐤ ᒥᒋᐛᐱᒡ᙮ 11 ᐛᔅ ᑎᐸᔨᒋᒐᓱᐤ ᒋᓴᒪᓂᑐᐤ ᐱᓯᒧᐅᐤ ᑭᔭ ᐊᒂᓇᐅᓱᐛᑭᓂᐅᐤ: ᑎᐸᔨᒋᒐᓱᐤ ᒋᑭ ᒥᔨᐛᐤ ᒥᔪᐧᑲᒐᐅᓂᔪᐤ ᑭᔭ ᒋᔅᑕᔨᑕᑯᓱᐅᓂᔪᐤ: ᓇᒪ ᒐᒂᔪᐤ ᑲ ᒥᔽᓯᔨᒡ ᒋᑭ ᒋᓴᑎᓂᒧᐛᐤ ᐊᓂᔭᔪᐛ ᑯᐃᔅᒄ ᑲ ᐱᒧᑕᔨᒋ᙮ 12 ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ, ᓱᐛᔨᑕᑯᓱᐤ ᐊᓐ ᐃᔪᐤ ᑲ ᒪᒥᓯᑐᑕᔅᒃ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.